Hosea

1 Ici e cebo ca kwa Yehova+ icaishile kuli Hosea+ mwana Beeri mu nshiku+ sha kwa Usia,+ Yotamu,+ Ahasi+ na Hisekia,+ ishamfumu sha kwa Yuda, na mu nshiku sha kwa Yeroboamu+ mwana Yoashi,+ imfumu ya bena Israele. 2 Icebo ca kwa Yehova catendeke ukwisa kuli Hosea, kabili Yehova atile kuli Hosea: “Kabiye,+ kope umwanakashi, umulalelale no kukwata abana aba mu bulalelale, pantu icalo nacileka ukukonka Yehova pa mulandu wa bulalelale.”+

3 Awe aile no kuupa Gomere umwana mwanakashi wa kwa Diblaimu, na o aliimite no kumufyalila umwana umwaume.+

4 E lyo Yehova amwebele ukuti: “Umwinike ati Yesreele,+ pantu kwashala panono e lyo nkalubulwisha aba mu ng’anda ya kwa Yehu+ pa kusuumya umulopa wa kwa Yesreele,* kabili nkalenga ubufumu bwa ba mu ng’anda ya kwa Israele ukupwa.+ 5 Na mu bushiku bulya nkafuna ubuta+ bwa kwa Israele mwi lungu lya Yesreele.”

6 Na kabili alimite no kufyala umwana umwanakashi. Kabili Lesa atile kuli Hosea: “Umwinike ati Loruhama,+ pantu nshakekatilwe aba mu ng’anda ya kwa Israele inkumbu na kabili,+ pantu nkabasenda.+ 7 Lelo aba mu ng’anda ya kwa Yuda nkabekatilwa inkumbu,+ kabili nkabapusushisha kuli Yehova Lesa wabo;+ lelo nshakabapusushishe ku buta nangu ku lupanga nangu ku bulwi, kuli bakabalwe nangu ni ku ba pali bakabalwe.”+

8 Awe asukile asumuna Loruhama, kabili alimite no kufyala umwana umwaume. 9 E lyo Lesa atile: “Umwinike ati Loami, pantu imwe tamuli bantu bandi na ine nshakabe Lesa wenu.

10 “Kabili impendwa ya bana ba kwa Israele ikaba ngo mucanga wa kuli bemba uushingapimwa nangu ukupendwa.+ Kabili uko baebelwe ukuti, ‘Tamuli bantu bandi,’+ e ko bakabebela ukuti, ‘Abana ba kwa Lesa wa mweo.’+ 11 Kabili abana ba kwa Yuda na bana ba kwa Israele bakalonganikwa pamo+ kabili bakaisalila intungulushi no kufuma mu calo,+ pantu ubushiku bwa kwa Yesreele bukaba ubukulu.+

2 “Sosa kuli bamunonko auti, ‘Muli bantu bandi!’+ na ku nkashi shobe usose auti, ‘Mwe banakashi ababelelwa uluse!’+ 2 Lubululeni umulandu na nyinenwe;+ lubululeni umulandu, pantu te mukashi wandi+ na ine nshili mulume wakwe.+ Awe afumye ubulalelale bwakwe ku cinso cakwe no bucende bwakwe pa kati ka mabele yakwe,+ 3 pa kuti nimufuula ashale ubwamba+ ashale fye nga mu bushiku afyelwemo,+ abe nga matololo+ kabili nge mpanga iyaumisha+ no kuti nimwipaya ku cilaka.+ 4 Kabili nshakabelele uluse abana bakwe,+ pantu bena bana ba mu bulalelale.+ 5 Pantu nyinabo nacita ubulalelale.+ Uwabemite acita ifya nsoni,+ pantu atila, ‘Ndefwaya ukukonka abantemwa,+ abampeela ifya kulya na menshi, amasako ya mpaanga ne nsalu sha kolokondwe, amafuta ne fya kunwa.’+

6 “E ico mona ndecita ulubao lwa myunga ku nshila yobe; kabili nkemika ilinga lya kumucilikila,+ pa kuti ekasanga inshila shakwe.+ 7 Kabili akakonka abacende bakwe,+ lelo takabasange;+ kabili akabasokota, lelo takabasange. E lyo akatila, ‘Ndefwaya ukuya no kubwelela ku mulume wandi, uwa ntanshi,+ pantu ilya nshita naleikala bwino ukucila ifyo ndeikala pali nomba.’+ 8 Lelo ena tailwike+ ukuti nine namupeele ifya kulya+ no mwangashi na mafuta, no kuti namufushiishe silfere, na golde, uo abomfeshe kuli Baali.+

9 “‘E ico nkabwela no kupokolola ingano shandi mu nshita ya shiko no mwangashi wandi mu nshita ya uko,+ kabili nkasompola na masako yandi aya mpaanga ne nsalu yandi iya kolokondwe iya kufimba pa bwamba bwakwe.+ 10 Lelo nomba nkafimbulapo pa bwamba bwakwe pa menso ya bacende bakwe,+ kabili takwakabe no wa kumusompola mu minwe yandi.+ 11 Kabili nkapwisha ukusekelela kwakwe konse,+ imitebeto yakwe,+ umweshi wakwe uupya+ ne sabata lyakwe ne nshita sha mitebeto yakwe yonse. 12 Kabili nkonaula ne myangashi+ yakwe ne mikunyu+ yakwe, iyo atila: “Fya bupe kuli ine, ifyo abacende bandi bampeela”; nkafilenga ukuba umutengo,+ ne nama mpanga shikafilya. 13 Kabili nkamulubulwisha+ pa nshiku alefutumwina icushi ce lambo+ ku filubi fya kwa Baali,+ ilyo alefwala inindaminwe ne fya kufwala fyakwe ifisuma+ no kulakonka abacende bakwe,+ kabili nine alabile,’+ e fyasosa Yehova.

14 “‘E ico moneni ndemunasha, kabili nkamulenga ukuya mu matololo,+ kabili nkakolopeka umutima wakwe.+ 15 Kabili nkamupeela amabala yakwe aya myangashi ukufuma ilyo ukuya ku ntanshi,+ kabili nkalenga ilungu lya Akore+ ukuba umwinshi we subilo; na o akaasuka kulya nga mu nshiku sha bukashana+ bwakwe kabili nga mu nshiku afumine mu calo ca Egupti.+ 16 Na mu bushiku bulya,’ e fyasosa Yehova, ‘ukanjita ati umulume wandi, tawakanjite kabili ati shikulu wandi.’+

17 “‘Kabili nkafumya amashina ya filubi fya kwa Baali mu kanwa kakwe,+ kabili tafyakebukishiwe kabili ku mashina ya fiko.+ 18 E lyo nkapangana icipangano muli bulya bushiku ne nama mpanga+ ne fipupuka mu muulu ne fikulika pa nshi, nkafumya mu calo ubuta no lupanga ne nkondo,+ no kubalenga ukusendama umutelelwe.+ 19 Kabili nkakukobekela ku kuba uwandi umuyayaya,+ mu bulungami na mu mulinganya e mo nkakukobekelela na mu cikuuku na mu nkumbu.+ 20 Nkakukobekela mu cishinka; kabili ukeshiba Yehova.’+

21 “‘Kabili mu bushiku bulya nkaasuka,’ e fyasosa Yehova, ‘Nkaasuka imyulu, na yo, ikaasuka icalo;+ 22 icalo na co, cikaasuka ingano+ no mwangashi na mafuta; na fyo, fikaasuka Yesreele [icalola mu kuti ‘Lesa akatanda imbuto’].+ 23 Nkabatanda nge mbuto shandi mwi sonde,+ kabili nkabelela uluse uushabelelwa uluse,+ na ku bashili bantu bandi nkatila: “Muli bantu bandi”;+ na bo, bakatila: “Ni mwe Lesa wandi.”’”+

3 Kabili Yehova akonkenyepo ukusosa kuli ine ati: “Kabiye na kabili, katemwe umwanakashi uwatemwikwa kuli umbi+ kabili uucita ubucende, nge fyo Yehova atemwa abana ba kwa Israele+ nelyo batemwa ukwalukila kuli tulesa tumbi+ no kutemwa ifimamantwa fya myangashi.”+

2 Awe namushitile ku kuba uwandi mu sha silfere ikumi na shisano (15)+ na mwi dalamu limo na hafu ilya barle. 3 E lyo natile kuli ena: “Inshiku ishingi isho ukekala na ine ukaba uwandi.+ Wikacita ubulalelale,+ kabili wikaya ku mwaume umbi;+ na ine nkaba obe.”

4 Pantu inshiku ishingi abana ba kwa Israele bakekala ukwabula imfumu+ kabili ukwabula cilolo kabili ukwabula ilambo+ kabili ukwabula icaimikwa kabili ukwabula efode+ no tulubi.+ 5 Pa numa abana ba kwa Israele bakabwela no kufwaya Yehova Lesa wabo,+ ne mfumu yabo Davidi;+ kabili bakesa baletutuma kuli Yehova+ na ku busuma bwakwe mu nshiku sha ku mpela.+

4 Umfweni icebo ca kwa Yehova, mwe bana ba kwa Israele, pantu Yehova ali no mulandu wa kulubulwisha abekashi ba mu calo,+ pantu mu calo tamuli icine+ nangu icikuuku nangu ukwishiba Lesa.+ 2 Kuli ukutiipa+ no kucita ubucenjeshi+ no kwipaya+ no kwiba+ no kucita ubucende,+ kabili ukusumya umulopa kwakonka pa kusumya umulopa.+ 3 E mulandu wine icalo ici na bekashi ba ciko bonse bakaloosesha+ no mwikashi onse uulimo akalobela pamo ne nama mpanga ishili mu mpanga ne fipupuka ifya mu muulu, ne sabi ilya muli bemba na lyo likafwa.+

4 “Lelo, kwiba uwa kucita ifikansa,+ nangu uwa kukalipila, pantu abantu bobe bali nga balekansana na shimapepo.+ 5 Na iwe ukaipununa mu nshita ya kasuba,+ nangu fye ni kasesema akaipunwina pamo na iwe, kwati ni mu nshita ya bushiku.+ Kabili nkatalalika noko.+ 6 Abantu bandi bakatalalikwa,+ pantu takuli ukwishiba. Apo ukwishiba e ko iwe wakaana,+ na ine nkakukaana ukuba shimapepo wandi;+ kabili apo ulalaba amafunde ya kwa Lesa obe,+ na ine, nkalaba abana bobe.+ 7 Ukulingana no bwingi bwabo, e fyo bamembukila.+ Ubukata bwandi babusaalula.+ 8 Ifya pa lubembu lwa bantu bandi e fyo balya, na ku cilubo cabo e ko babika umweo wabo.+

9 “Kabili ifyo cikaba ku bantu e fyo cikaba na kuli shimapepo;+ kabili nkabalubulwisha pa mibele yabo;+ no kubabwesesha icilingile imicitile yabo.+ 10 Ukulya bakalya, lelo tabakekute.+ Bakolungana na banakashi kwati ni bacilende; lelo tabakafule,+ pantu nabaleka ukuumfwa kuli Yehova.+ 11 Ubulalelale no mwangashi e lyo no mwangashi uwalowa e fifumyapo umutima wa mano.+ 12 Ku kalubi kabo aka cimuti,+ e ko abantu bandi bepusha,+ ne nkonto ya mu kuboko kwabo ilabeeba; pantu ukufwaisha ubulalelale nakubalenga ukufuma mu nshila,+ kabili pa mulandu wa bulalelale nabafuma kuli Lesa wabo.+ 13 Pa muulu wa mpili e po batuulila amalambo,+ na pa tupili e po bafutumwina icushi ce lambo,+ mwi samba lya muti walulubala nga nshi e lyo no muti wa mulibne no muti uukalamba, pantu icintelelwe ca iyi miti caliwama.+ E co abana benu abanakashi bacitila ubulalelale kabili e co banafyalenwe bacitila ubucende.

14 “Nshakalubulwishe abana benu abanakashi pa mulandu wa kuti bacita ubulalelale, nangu banafyalenwe pa mulandu wa kuti bacita ubucende. Pantu abaume bena, baikuminisha kuli bacilende,+ kabili bapeelela amalambo pamo na bacilende banakashi+ aba mwi tempele; na bantu abashiiluka+ bakanyantaulwa. 15 Nangu ca kuti ulecita ubulalelale, We Israele,+ wileka Yuda abe uwa mulandu,+ kabili mwi-isa ku Gilgali,+ nangu ukunina ukuya ku Bete-abene+ nangu ukulapa amuti ‘Napali Yehova!’+ 16 Pantu, ifyaba ing’ombe iilume iyumankonso, e fyo Israele aba umuumankonso.+ Bushe ni ino nshita Yehova alabacema ngo mwana wa mpaanga pa ncende iyapabuka? 17 Efraimu ailunda ku filubi.+ Mulekeni abe.+ 18 Kabili ilyo ubwalwa bwabo ubwa ngano bwapwa,+ bacita umwanakashi nga cilende.+ Aba kumucingilila+ batemwa ifya museebanya.+ 19 Umwela wamufimbilikisha mu mapindo ya uko.+ Kabili bakekatwa insoni pa malambo yabo.”+

5 “Umfweni ici, mwe bashimapepo,+ kabili kutikisheni, mwe ba mu ng’anda ya kwa Israele, na mwe ba mu ng’anda ya mfumu,+ kutikeni, pantu ni mwe ubupingushi buleishila; pantu muli ngo lukose+ kuli Mispa kabili nge sumbu ilyo bateya pa Tabore.+ 2 Na balepondoka bayobeka nga nshi mu kwipayaulula,+ na ine nalebakonkomesha bonse.+ 3 Efraimu+ nalimwishiba, na Israele tafisama kuli ine.+ Pantu nomba, we Efraimu, wacita abanakashi nga bacilende;+ Israele ali-ikowesha.+ 4 Ifyo bacita tafibasuminisha ukubwelela kuli Lesa wabo,+ pantu mu kati kabo muli ubulalelale;+ na Yehova wine tabamwishiba.+ 5 Kabili icilumba ca kwa Israele nacimushinina pa cinso cakwe;+ kabili Israele na Efraimu baipununa mu kuluba kwabo.+ Yuda na o aipununa pamo na bo.+ 6 Baile ne mpaanga shabo ne ng’ombe shabo ku kufwaya Yehova, lelo tabamusangile.+ Alitalwike kuli bena. 7 Bacita ubucenjeshi+ kuli Yehova, pantu baba bashibo ba bana ba muli bambi bambi.+ Nomba umweshi ukabalya pamo na mabala yabo.+

8 “Lisha intandala+ mu Gibea,+ ne penga mu Rama! Welesha ukuwelesha kwa bulwi pa Bete-abene,+ tuli na iwe, we Benjamini!+ 9 We Efraimu, ukasanguka fye ica kupapa mu bushiku bwa kukalipilwa.+ Mu mikowa ya kwa Israele nalenga amashiwi ya cishinka yeshibikwe.+ 10 Bacilolo ba kwa Yuda bali nga balesesha umupaka.+ Pali bena e po nkapongolwela ubukali bwandi nga menshi. 11 Efraimu nafyengwa, nafunaulwa mu bupingushi,+ pantu aituntumbile ukukonka umulwani wakwe.+ 12 Na ine nali kuli Efraimu nge cipelebesha ca bushiku+ kabili ngo kufumuka ku ba mu ng’anda ya kwa Yuda.

13 “Kabili Efraimu amwene ubulwele bwakwe, na Yuda amwene icilonda cakwe.+ E lyo Efraimu aile ku Asiria+ no kutuma amashiwi ku mfumu nkalamba.+ Lelo yena yafililwe ukumundapa,+ kabili tayaundepe ne cilonda cenu.+ 14 Pantu ine nkaba ngo musepela+ wa nkalamo kuli Efraimu kabili ngo musepela wa nkalamo uwa masense ku ba mu ng’anda ya kwa Yuda. Ine nkasantaula kabili nkaya no kusenda, kabili takwakabe no wa kupususha.+ 15 Nkaya, nkabwelela ku cifulo candi mpaka bakasumine umulandu wabo;+ kabili bakamfwaya.+ Ilyo bacula,+ bakamfwaya.”+

6 “Iseni, muleke tubwelele kuli Yehova,+ pantu natusantaula,+ lelo akatuposha.+ Aaletupumaula, lelo akatukakilila pa filonda.+ 2 Akatulenga ukuba aba mweo pa numa ya nshiku shibili.+ Pa bwalenga shitatu akatulenga ukwima, kabili tukaba aba mweo ku cinso cakwe.+ 3 Kabili tukeshiba, tukafwaisha ukwishiba Yehova.+ Nga filya amacaca+ yafuma, e fyo ukufuma kwakwe kwapampamikwa.+ Kabili akesa kuli ifwe nge mfula iilefumfumuka;+ nge mfula iya kulekelesha iitapilila isonde.”+

4 “Cinshi nalacita kuli iwe, we Efraimu? Cinshi nalacita kuli iwe, we Yuda,+ apo icikuuku cenu cili nga makumbi ya lucelo kabili ngo mume uulukuta bwangu? 5 Ni pali ici nkabakomawila pa menso ya bakasesema;+ nkabepayawila ku mashiwi ya mu kanwa kandi.+ Kabili ubupingushi pali imwe bukaba ngo lubuuto ulwabalika.+ 6 Pantu natemwa icikuuku,+ te malambo iyo;+ kabili natemwa ukwishiba Lesa te mituulo ya koca iyo.+ 7 Lelo bena, apo bantunse fye, bapula mu cipangano.+ Muli ici e mo bacita ubucenjeshi kuli ine.+ 8 Gileadi+ musumba wa ncitatubi; umo banyanta mushala umulopa.+ 9 Nga filya ciba pa kubelamina umuntu,+ e fyo ne bumba lya bashimapepo lyaba nge fipondo ifipokolola ifyuma.+ Bepaila abantu mu mbali ya nshila pa Shekemu,+ pantu ifyo bacita fya nsoni.+ 10 Mu ng’anda ya kwa Israele namonamo ica bunani.+ Mulya e mo Efraimu acitile ubulalelale.+ Israele naikowesha.+ 11 Kabili, we Yuda, ukalobolola, ilyo nkabwesha bankole ba mu bantu bandi.”+

7 “Cilya nati mposhe Israele,+ e lyo icilubo ca kwa Efraimu casokoloka,+ kumo ne fyabipa ifya mu Samaria;+ pantu ubufi e bo babepa,+ no mupuupu aingilamo; ifipondo ifibelamina fyasansa pa nse.+ 2 Na mu mitima+ yabo tabatontonkanya ukuti nkebukisha ifyabipa fyabo fyonse.+ Nomba imicitile yabo naibashinguluka.+ Ili pa mulola wa cinso candi.+ 3 Ku fyabipa fyabo balenga imfumu ukusekelela, kabili, ku bufi bwabo, basekesha bacilolo.+ 4 Bonse fye bacende,+ bali nge citofu icakafiwa na kapanga wa mukate, uwaleka ukusonkeleshako ilyo akasa umufuba wasuka watutumuka. 5 Mu bushiku bwa mfumu yesu, bacilolo bailwalika abene,+ kabili pa mulandu wa mwangashi bakalipa. Yatambalika ukuboko kwa iko pamo na ba miponto.+ 6 Pantu bapalamika imitima yabo nga ku citofu;+ icilepya mu kati kabo.+ Kapanga wabo uwa mukate asendama ubushiku bonse; ulucelo asanga icitofu cilepya ngo lubingu lwa mulilo.+ 7 Bonse fye bakaba nge citofu, kabili baonaula abapingushi babo. Imfumu shabo shonse nashiwa;+ tapali nangu umo pali bena uulelilila kuli ine.+

8 “Efraimu aisakanya mu bantu na bantu.+ Efraimu nasanguka umukate wabulungana uushipilibwilwe ku lubali lubiye.+ 9 Abeni balya amaka yakwe,+ ukwabula ukuti eshibe.+ Kabili, amena imfwi, lelo ukwabula ukuti eshibe. 10 Ne cilumba ca kwa Israele camushinina ku cinso cakwe,+ kabili tababwelela kuli Yehova Lesa wabo,+ nangu ukumufwaya pali ici conse.+ 11 Kabili Efraimu ali nge nkunda iyatumpa+ iishaba no mutima wa mano.+ Kuli Egupti e ko balilila;+ kuli Asiria e ko baya.+

12 “Inshila yonse iyo bayamo, nkafungulwila pali bena isumbu lyandi.+ Nkabaponesha pa nshi nge fyuni fya mu muulu.+ Nkabasalapula ukulingana na mashiwi ayabililwe ku lukuta lwabo.+ 13 We bulanda kuli bena,+ pantu bafulumuka kuli ine!+ Bakapokwa ifyuma, pantu bapula mu mafunde yandi! Na ine nalibalubwile,+ lelo bena balanda ifya bufi na pali ine wine.+ 14 Kabili tabaliliile kuli ine no mutima wabo,+ nangu ca kuti baalelila umusowa pa busanshi bwabo. Pa mulandu wa ngano shabo no mwangashi wabo baikele ukwabula ifya kucita;+ baalensangukila.+ 15 Na ine, nalibasalapwile;+ nakoseshe amaboko yabo,+ lelo balempangila fye ifibi.+ 16 Balibwelele, lelo te ku kupepa kwa cine babwelele;+ bali ngo buta ubwanenuka.+ Bacilolo babo bakawa ku lupanga pa mulandu wa kuponta ku lulimi lwabo.+ Ifi e fyo bakabapumya mu calo ca Egupti.”+

8 “Bika intandala ku kanwa kobe!+ Nga kapumpe+ uwafookela pa ng’anda ya kwa Yehova, pantu nabapula mu cipangano candi,+ nabapula na mwi funde lyandi.+ 2 Ni kuli ine balilila abati, ‘Mwe Lesa wesu, ifwe, fwe bena Israele, twalimwishiba.’+

3 “Israele naleka ukucita ubusuma.+ Lekeni umulwani amukonke.+ 4 Nabaisontela ishamfumu,+ lelo te ine nabebele. Nabaisontela bacilolo, ukwabula ukuti ine njishibe. Kuli Silfere wabo na golde wabo baipangila ifilubi,+ pa kuti balobe.+ 5 Ing’ombe yobe iilume naipaiwa,+ we Samaria. Ubukali bwandi nabubemina.+ Kufika ku nshita nshi bakafilwa ukuba aba kaele?+ 6 Pantu ici na co ni kuli Israele cafumine.+ Capangilwe fye na baishibisha ifya kupangapanga,+ kabili cena te Lesa iyo; pantu ing’ombe iilume iya ku Samaria ikaba fye tupimfya tupimfya.+

7 “Pantu umwela e o batanda, ne cikuuku ca mwela e co bakalobolola.+ Ingano ishaiminina tashipakula.+ Ishipuuka tashifumya ubuunga.+ Shimo nga shikafumya ubuunga, ninshi bambi bambi e bakabulya.+

8 “Israele akaminwa.+ E ico bakasalanganina mu nko,+ nge cipe icishili ca kusekelelamo.+ 9 Pantu nabanina ukuya ku Asiria,+ nga colwa uwenda eka.+ Lelo Efraimu, naingisha incito abamutemwa.+ 10 Kabili, nangu ca kuti bengisha incito aba mu nko,+ ndi no kubalonganya; kabili bakashikitika+ pa nshita iinono pa mulandu wa cisendo ca mfumu na bacilolo.

11 “Pantu Efraimu nafusha ifiipailo pa kuti alebembuka.+ Aaba ne fiipailo pa kuti alebembuka.+ 12 Namulembeele ifintu ifingi ifya mu mafunde yandi;+ lelo bafimona fye nge fyeni.+ 13 Amalambo ya nama e fya bupe balepeela kuli ine,+ kabili balelya ifyo Yehova umwine ashasekeelemo.+ Nomba akebukisha ifilubo fyabo no kubalubulwisha pa membu shabo.+ Ku Egupti e ko babweleele.+ 14 Kabili Israele alabile Kalenga wakwe+ alakuula na matempele;+ Yuda wena, afushishe imisumba ya malinga.+ Kabili nkatuma umulilo mu misumba yakwe na o ukoca amayanda yabo aya malinga.”+

9 “Wisekelela, we Israele.+ Wiyanga nge fyo abantu na bantu bacita.+ Pantu pa kucita ubulalelale naufuma kuli Lesa obe.+ Watemwa ifya bupe fya bucilende pa fya kupuminapo ingano fyonse.+ 2 Apa kupumina ingano no mwa kukamina umwangashi tafibaliisha,+ kabili umwangashi na o umulenga insoni.+ 3 Tabakekalilile mu calo ca kwa Yehova,+ kabili Efraimu akabwelela ku Egupti,+ na mu Asiria e mo bakalya icishasanguluka.+ 4 Bakaleka ukupongolwela umwangashi kuli Yehova.+ Na malambo yabo tayakamusekeshe;+ kuli bena amalambo yali nge fya kulya fya mu nshita ya kuloosha;+ bonse abalyako bakaikowesha. Pantu ifya kulya fyabo fya kwikusha imyeo yabo; tafyakengile mu ng’anda ya kwa Yehova.+ 5 Cinshi mukacita mu bushiku bwa kulongana na mu bushiku bwa mutebeto wa kwa Yehova?+ 6 Pantu, moneni! bakaya pa mulandu wa kupokwa ifyuma.+ Egupti akabalonganya;+ Memfisi+ akabashiika. Lelo ifisuma fyabo ifya silfere, bakaenya bakafikwata;+ mu matenti yabo mukamena ifimpuusa ifya myunga.+

7 “Inshiku sha kupempulwa shikesa;+ inshiku sha cilandushi shikesa.+ Abena Israele bakeshiba.+ Kasesema akaba iciwelewele,+ kasesema wa bufi akafulungana pa mulandu wa bwingi bwa kulufyanya kwenu,+ na pa mulandu wa kufula kwa bulwani.”

8 Umulinshi+ wa mu Efraimu aali na Lesa wandi.+ Lelo kasesema,+ mu nshila shakwe shonse muli ulukose lwa wikata ifyuni;+ mu ng’anda ya kwa Lesa wakwe muli ubulwani. 9 Nabafika sana apatali mu kuleta ubonaushi,+ nga filya cali mu nshiku sha musumba wa Gibea.+ Akebukisha ukulufyanya kwabo;+ akalolekesha pa membu shabo.

10 “Nge myangashi mu matololo e fyo nasangile Israele.+ Nga makunyu ayabangilila ku mukunyu mu kutendeka kwa uko e fyo namwene bashinwe.+ Bena baitwele kuli Baali uwa ku Peore,+ kabili baipeele na ku ca nsoni,+ kabili baishileba ica bunani ukupala ico cine batemenwe.+ 11 Lelo abena Efraimu, ubukata bwabo bwapupuka bwaya nge cuni,+ ica kuti takuli ukupaapa, nangu ukuba ne fumo nangu ukwimita.+ 12 Pantu nelyo bakusha abana babo abaume, nkabalenga kabili ukufwilwa abana pa kuti pekaba umwaume;+ pantu—bakaba no bulanda ilyo nkabasha!+ 13 Efraimu, uo ine imwene uwaba nga Turi uwalimbwa mu mpanga ya mulemfwe,+ uyu wine Efraimu ali no kufumisha abana bakwe ku wa kubepaya.”+

14 “Mwe Yehova, bapeeleni ico muli no kubapeela.+ Bapeeleni icisa iciponya amafumo+ na mabele ayabulamo umukaka.

15 “Ububi bwabo bonse bwali mu Gilgali,+ pantu kulya nalibapatile.+ Pa mulandu wa micitile yabo iyabipa nkabatamfya mu ng’anda yandi.+ Nkaleka ukubatemwa.+ Bacilolo babo bonse bomankonso.+ 16 Efraimu akapumwa.+ Umushila wabo ukooma.+ Takwakabe icisabo ico bakatwala.+ Kabili, nga bafyala abana, nkepaya abakafuma mu nda shabo.”+

17 Lesa wandi+ akabakaana, pantu tabomfwa kuli ena,+ kabili bakalaendauka fye mu nko.+

10 “Israele mwangashi uuleonaika.+ Ifisabo atwala fyakwe umwine.+ Ukulingana no bwingi bwa fisabo fyakwe e fyo afusha ne fiipailo fyakwe.+ Ukulingana no kuwama kwa calo cakwe, e fyo bakuula ne fyaimikwa ifyawama.+ 2 Umutima wabo wa bumbimunda;+ nomba bakasangwa no mulandu.

“Kuli uukatobaula ifiipailo fyabo; akabongolola ifyaimikwa fyabo.+ 3 Pantu nomba bakatila, ‘Tatwakwata imfumu,+ pantu tatwaba na katiina kuli Yehova. Nge mfumu, cinshi ingatucitila?’

4 “Balanda amashiwi ya fye, balapa imilapo ya bufi,+ no kupangana icipangano;+ kabili ubupingushi bupuukile nge cimenwa icikola mu tumifoolo utwa mwi bala.+ 5 Abekashi ba mu Samaria bakekatwa umwenso pa kana ka ng’ombe akalubi aka ku Bete-abene;+ pantu abantu ba kako bakakaloosha, na bashimapepo ba kako abalesekelela pali kena, pa bukata bwa kako bakaloosha, pantu ubukata bwa kako bukaba nabuya muli bunkole.+ 6 Na ku Asiria e ko umo akakaleta ku kuba ica bupe ku mfumu iikalamba.+ Na Efraimu akekatwa insoni,+ Israele na o akekatwa insoni pa kupanda amano kwa kako.+ 7 Samaria ne mfumu yakwe bakaloba,+ bakaba kwati kamusambo akakontolwa, akaponena pa muulu wa menshi. 8 Ne fifulo fya kupepelapo ifya mu Bete-abene,+ ulwaba e lubembu lwa kwa Israele,+ fikaloba. Imyunga na ficilasa+ fikamena pa fiipailo fyabo.+ Na bantu bakasosa ku mpili abati, ‘Tufimbeni!’ na ku tupili abati, ‘Tuponeneni!’+

9 “Ukutula mu nshiku sha musumba wa Gibea+ walibembuka,+ we Israele. Balitwalilile ukucita imembu. Ubulwi bwa kulwisha abana ba bupondamishi tabwabasangile mu Gibea.+ 10 Ilyo nkafwaya nkabasalapula.+ Na bantu na bantu bakalonganikilwa pali bena ilyo bakabakakila ku filubo fyabo fibili.+

11 “Kabili Efraimu aali mwana wa ng’ombe uwasambilishiwa, uwatemenwe ukupuula ingano;+ lelo ine, naciliile umukoshi wakwe uusuma. Nkalenga Efraimu ukulima.+ Yuda alima umushili;+ Yakobo amutobawila umushili.+ 12 Itandileni imbuto mu bulungami;+ lobololeni ukulingana ne cikuuku.+ Ilimineni ibala,+ ilyo kuli inshita ya kufwaya Yehova akasuke esa+ no kumusambilisha ubulungami.+

13 “Mwabyala ifyabipa.+ Mwalobolola ubupondamishi.+ Mwalya ifisabo fya bucenjeshi,+ pantu mwacetekela imibele yenu,+ e lyo na mu kufula kwa mpalume shenu.+ 14 Kabili mu bantu benu mwaima icimfulunganya,+ ne misumba yenu yonse iya malinga ikonaulwa,+ ifyo Shalmani aonawile aba mu ng’anda ya kwa Arbele, mu bushiku bwa bulwi ilyo nyina atobawililwe pamo na bana bakwe.+ 15 Ifi e fyo umo akacita kuli imwe, mwe ba ku Betele, pa mulandu wa bubi bwenu ubukulu.+ Imfumu ya kwa Israele ikaloba ku macaca.”+

11 “Ilyo Israele ali umwaice, nalimutemenwe,+ kabili naitile uyu umwana wandi ukufuma ku Egupti.+

2 “Balibetile.+ Na bo ifyo fine e fyo batalwike ku cinso cabo.+ Batendeke ukupeela amalambo kuli baBaali,+ kabili batendeke ukufutumwina icushi ca malambo ku fimpashanya ifyabaswa.+ 3 Lelo ine, nasambilishe Efraimu ukwenda,+ ukubasendela pa maboko yandi;+ lelo tabaishibe ukuti nalibaposeshe.+ 4 Ku myando ya buntunse e ko nalebakulila, ku myando ya kutemwa,+ ica kuti nali kuli bena nga bantu abaleimya ikoli ukufuma pa nsekete shabo,+ kabili nalinakilile ilyo nalebaletela ifya kulya umo umo.+ 5 Takabwelele ku calo ca Egupti, lelo Asiria akaba imfumu yakwe,+ pantu bakeene ukubwelelamo.+ 6 Kabili ulupanga lukalashinguluka mu misumba yakwe+ no kupwishishisha imipindo yakwe no kuyonaula+ pa mulandu wa mapange yabo.+ 7 Kabili abantu bandi batendeka ukubulwa icishinka kuli ine.+ Kabili baebwa ukubwelela ku kupepa kwa cine; lelo tapali uwaima.

8 “Kuti nakuleka shani, we Efraimu?+ Kuti nakulekelesha shani, we Israele?+ Kuti nakucita shani nga Adma?+ Kuti nacita shani kuli iwe ifyo nacitile kuli Seboimu?+ Nawaluka umutima wandi muli ine;+ ne nkumbu shandi nashifula. 9 Nshakabubuke mu bukali.+ Nshakabwekeshepo ukonaula Efraimu,+ pantu ine ndi Lesa,+ nshili muntu, ndi wa mushilo mu kati kenu;+ kabili nshakeshile mu bukali. 10 Bakakonka Yehova.+ Akabuluma nge nkalamo;+ pantu ena akabuluma,+ e lyo na bana bakesa baletutuma ukufuma ku masamba.+ 11 Bakesa baletutuma kwati cuni ukufuma ku Egupti,+ kabili kwati ni nkunda ukufuma ku calo ca Asiria;+ kabili nkabalenga ukwikala mu mayanda yabo,” e fyasosa Yehova.+

12 “Efraimu anshinguluka ne fya bufi,+ na ba ng’anda ya kwa Israele banshinguluka ne fya bucenjeshi. Lelo Yuda acili alekonka Lesa,+ kabili wa cishinka ku wa Mushilo nga nshi.”

12 “Efraimu alelya umwela+ no kukonkelela umwela wa ku kabanga akasuba konse.+ Ukubeepa no konaula e fyo afusha.+ Kabili bapangana icipangano na Asiria,+ na ku Egupti e ko batwala amafuta.

2 “Kabili Yehova ali no mulandu wa kulubulwisha Yuda,+ no kulubulwisha Yakobo ukulingana fye ne mibele yakwe;+ kabili akamupeela icalingana ne micitile yakwe.+ 3 Ilyo aali mwi fumo aikete munyina ku citende,+ kabili ku maka yakwe ashombweke na Lesa.+ 4 Kabili ashombweke na malaika asuka amucimfya.+ Alililile no kupapaata ukuti apaalwe.”+

Lesa amusangile ku Betele,+ kabili kulya e ko Lesa atendeke ukulanda na ifwe.+ 5 Yehova Lesa wa mabumba,+ Yehova e shina lya kumwibukishishako.+

6 “Lelo imwe, kuli Lesa wenu e ko mubwelele,+ muleba ne cikuuku+ no mulinganya;+ kabili mulesubila muli Lesa wenu pe.+ 7 Lelo mu minwe ya wa makwebo, muli sekelo wa bucenjeshi;+ ukucita ubucenjeshi e ko atemwa.+ 8 Efraimu na o asosa ati, ‘Cine cine ninonka;+ ninjisangila ifyuma.+ Muli fyonse ifyo nacucutikilapo, tabakansange ne filubo ifingaba ulubembu.’+

9 “Lelo ine ndi Yehova Lesa obe ukutula ilyo wali mu calo ca Egupti.+ Na lyo line ndekulenga ukwikala mu matenti nga mu nshiku sha nshita yapimwa. 10 Kabili nalandile kuli bakasesema,+ kabili nine nafushishe ifimonwa, na muli bakasesema e mo nalelandile imilumbe ya kupashanya.+

11 “Mu Gileadi mwaba ifinjelengwe,+ e lyo no bufi.+ Nabapeela na malambo ya ng’ombe ishilume mu Gilgali.+ Kabili, ifiipailo fyabo fili nge miina ya mabwe mu tumifoolo twa mwi bala.+ 12 Kabili Yakobo afulumukiile ku mpanga ya ku Siria,+ na Israele+ abombeele ukuupa umwanakashi,+ kabili acemene impaanga pa mulandu wa mukashi.+ 13 Kabili Yehova abomfeshe kasesema ukufumya abena Israele ku Egupti,+ kabili abomfeshe kasesema ukucingilila abena Israele.+ 14 Efraimu akalifye Lesa nga nshi,+ no mulandu wakwe uwa mulopa asha pa mwine,+ kabili Shikulu wakwe Umukalamba akabwesesha pali ena umuseebanya wakwe.”+

13 “Efraimu nga alanda, kwaleba ukututuma; aali uwacindikwa mu Israele.+ Lelo aishileba uwa mulandu pa kupepa Baali+ kabili alifwile.+ 2 Na nomba balundapo ukubembuka no kwenga icimpashanya kuli silfere wabo,+ no kupanga utulubi ukulingana na mano yabo,+ utwapangwa no wacenjela mu fya kupangapanga fyonse fye.+ Balesosa kuli fyena abati, ‘Lekeni abaume abapeela amalambo batomone abana ba ng’ombe aba fye.’+ 3 E ico bakaba nga makumbi ya lucelo+ kabili ngo mume uukuntika ulucelocelo; nge misungu iyululwa ku nkuuka apa kupumina ingano+ kabili nge cushi icilefumina pa cipunda ca mu mutenge.

4 “Lelo ine ndi Yehova Lesa obe ukufuma ku calo ca Egupti,+ kabili takwali Lesa uo waishibe kano ine; kabili takwali umupusushi kano ine.+ 5 Ine nalikwishibe mu matololo,+ mu calo ca malwele.+ 6 Ukulingana ne mpanga yabo iya mulemfwe e fyo baleikuta.+ Baalikwite+ ne mitima yabo yatuuma.+ E co bandabiile. 7 Kabili nkaba kuli bena ngo musepela wa nkalamo.+ Nge mbwili iili mu mbali ya nshila e fyo nkalalolesha.+ 8 Nkalolenkana na bo nga bere uwalufya abana bakwe,+ kabili nkalepaula ififuba fyabo umwaikala imitima. Kabili e ko nkabalya nge nkalamo;+ inama mpanga ikabalepaula.+ 9 Ikakonaula,+ we Israele, pantu wayalukiile ine, ne kaafwa obe.+

10 “Nga kanshi ili kwi imfumu yobe, uleke ikupusushe mu misumba yobe yonse,+ na bapingushi bobe abo wasosele auti, ‘Mpeeleni imfumu na bacilolo’?+ 11 Nakupeele imfumu mu bukali bwandi,+ kabili nkaipoka mu cipyu candi.+

12 “Icilubo ca kwa Efraimu nacikakwa, ulubembu lwakwe nalusungwa.+ 13 Ukucula ngo kwa mwanakashi uulepaapa e kukamwishila.+ Mwana uwabula amano,+ pantu ilyo inshita ikafika takalole umo abana balola pa kufuma mu cisa.+

14 “Nkabalubula mu kuboko kwa Nshiishi;*+ nkabapokolola ku mfwa.+ Luli kwi ulubola lobe, we Mfwa?+ Buli kwi ubonaushi bobe, we Nshiishi?*+ Amenso yandi tayakabomfwile uluse.+

15 “Nga atwalisha nga matete,+ umwela wa ku kabanga, umwela wa kwa Yehova, ukesa.+ Ulenina ukufuma ku matololo, kabili ukakamya icishima cakwe no kukamya akamfukumfuku kakwe.+ Ukapoka ifyuma fya fipe fyonse ifisuma.+

16 “Samaria akaba uwa mulandu,+ pantu na kuba napondokela Lesa wakwe.+ Bakepaiwa ku lupanga.+ Abana babo bakabapuma icine cine,+ na banakashi babo abali na mafumo bakalepaulwa.”+

14 “Bwelela kuli Yehova Lesa obe,+ we Israele, pantu nauipununa mu kulufyanya kobe.+ 2 Lapileni no kubwelela kuli Yehova.+ Imwe bonse, mutile kuli ena, ‘Tweleleni pa kulufyanya kwesu;+ kabili pokeleleni icisuma, na ifwe tukamulumbanishisha ku milomo yesu, e bana ba ng’ombe abo tukapeela.+ 3 Asiria takatupusushe.+ Tatwakanine pali bakabalwe.+ Tatwakasose kabili ku capangwa ku minwe yesu, atuti: “Ni mwe Lesa wesu!” pantu ni mwe mumfwila inshiwa inkumbu.’+

4 “Nkaposha ukubulwa icishinka kwabo.+ Nkabatemwa fye ne mwine,+ pantu ubukali bwandi nabufuma pali bena.+ 5 Nkaba ngo mume kuli Israele.+ Akabalula nge luba, no kulimba imishila yakwe ngo muti wa mu Lebanone. 6 Utumisambo twakwe tukafuma, no bukata bwakwe bukaba ngo muolife,+ kabili akalanunkila bwino kwati muti wa mu Lebanone. 7 Bakekala mu cintelelwe cakwe na kabili.+ Bakalima ingano, no kubalula ngo mwangashi.+ Abantu bakalalanda pali ena nga filya balanda pa mwangashi wa mu Lebanone.

8 “Efraimu akatila, ‘Bushe utulubi twa nshi kuli ine kabili?’+

“Nine nkaasuka kabili nkalalolesha pali ena.+ Naba ngo muti wa mukupri uwalelema.+ Muli ine e musangwa ifisabo fyobe.”

9 Nani uwa mano, uwingomfwikisha ifi fintu?+ Nani uwashilimuka, uwingafishiba?+ Pantu inshila sha kwa Yehova shalitambalala,+ kabili abalungama e bakendamo;+ lelo bampulamafunde bakaipununamo.+