Nahumu
1 Ubukombe ubwaluma pali Ninebe:+ Ibuuku lya cimonwa ca kwa Nahumu umwina Elkoshe:
2 Yehova ni Lesa uufwaya abantu ukupepa fye ena eka+ kabili wa cilandushi; Yehova alalandula+ kabili alakalipa.+ Yehova alakanda ifibambe+ fyakwe, kabili aba no bukali ku balwani bakwe.+
3 Yehova alakokola ukukalipa+ kabili wa maka ayengi,+ kabili Yehova takashingashinge ukukanda nakalya.+
Inshila shakwe shaba mu cikuuku ca mwela na mu nkuuka, kabili amakumbi ayafiita fititi e lukungu lwa ku makasa yakwe.+
4 Akalipila bemba,+ no kumukamya; kabili imimana yonse alaikamya.+
Bashani na Karmele nababonsa,+ na maluba ya mu Lebanone nayabonsa.
5 Impili shatenta pa mulandu wakwe, kabili utupili na to twasunguluka.+
Na pe sonde pakatutuma pa mulandu wa kubapo kwakwe; pamo ne calo, na bonse abaikalamo.+
6 Nani engeminina ku cipyu cakwe?+ Kabili nani engeminina ku bukali bwakwe ubwaba ngo mulilo?+
Icipyu cakwe cikapongololwa ngo mulilo,+ ne fimabwe fikabongololwa pa mulandu wakwe.
7 Yehova musuma,+ e ucingilila+ mu bushiku bwa bulanda.+
Kabili aishiba abooba muli ena.+
8 Kabili ku lyeshi ililepita akonaula icifulo+ conse ica kwa Ninebe, kabili imfifi ikakonka abalwani bakwe.+
9 Nga kanshi mapange nshi mwingapangila Yehova?+ Ena alonaula ukwabula ukushako.
Ubulanda tabwakeme umuku wa bubili.+
10 Nangu bakobane kwati myunga+ no kukolwa kwati ni ku bwalwa bwabo ubwa ngano,+ ukonaulwa bakonaulwa nge mpimbili ishauma.+
11 Muli iwe e mukafuma umuntu uupangila Yehova ifyabipa,+ uupanga amapange aya fye.+
12 Yehova atila: “Nelyo bali abatuntulu kabili kwali abengi abaali ifyo fine, nangu fye ni muli ulya musango babelelemo bakonaulwa;+ kabili umuntu akapitamo. Kabili nkakucusha, ica kuti nshakakucushe na kabili.+ 13 Kabili nomba nkonaula ikoli lyakwe ukufuma pali iwe,+ kabili ifikakilo ifyaba pali iwe nkaputula muli fibili.+ 14 Kabili Yehova alandile pali iwe ati, ‘Ishina lyobe talyakakwate imbuto na kabili.+ Mu ng’anda ya balesa bobe nkafumyamo icimpashanya icabaswa ne cimpashanya icaengwa.+ Nkakupangila inshiishi,+ pantu tawacindama.’
15 “Moneni! Pa mpili e pali amakasa ya uleleta imbila nsuma, uubila umutende.+ We Yuda, sefya imitebeto yobe.+ Fikilisha imilapo yobe;+ pantu umuntu icinangwa takapite muli iwe na kabili.+ Akalobelela.”+
2 Uusalanganya naisa pa ntanshi yobe.+ Linda ilinga. Linda inshila. Kosha intungu. Kosha amaka yobe.+
2 Pantu cine cine Yehova akabwesha ubucindami bwa kwa Yakobo,+ ngo bucindami bwa kwa Israele, pantu abonaula nababonaula;+ kabili nabonaula imisambo yabo.+
3 Inkwela sha mpalume shakwe shalikashikila; abaume bakwe aba maka bafwala ifyakashika ce.+ Ifyela fya ku maceleta yakwe aya nkondo filebeeka ngo mulilo mu bushiku bwa kuiteyanya kwakwe, kabili imifwi ya mukupri+ yalengwa ukututuma. 4 Amaceleta ya nkondo yale-enda bushilu bushilu mu misebo.+ Yalebutauka uku no ku mu lubansa. Imimonekele ya yako yaba nge fyenge fya mulilo. Yalebutuka nge nkuba.+
5 Akebukisha abakankaala bakwe.+ Bakaipununa pa kwenda kwabo.+ Bakangufyanya ukuya ku cibumba cakwe, kabili ica kucingilila cikapampamikwa. 6 Impongolo sha mimana shikesulwa, ne sano na lyo likasunguluka. 7 Kabili calipampamikwa; nabamufuula; cine cine akasendwa,+ kabili abakashana abamubombela bakalaloosha, ngo kulila kwa nkunda,+ bakalaitutaula pa fifuba.+ 8 Kabili ukutula apo Ninebe abelako,+ aba nge cishiba ca menshi;+ lelo balefulumuka. “Imwe, iminineni! Iminineni!” Lelo takuli uulepilibuka.+
9 Pokololeni silfere; pokololeni golde;+ pantu takuli impela ku fintu ifyateyanishiwa. Kuli ifipe ifingi nga nshi ifisuma ifya misango yonse.+
10 Umusumba uwabulamo akantu, uwaonaulwa, kabili uwashala icibolya!+ Kabili umutima ulesunguluka,+ na makufi yaletutuma,+ no bukali bwabipisha mu ntungu shonse;+ kabili ifinso fyabo bonse, nafisakamikwa.+ 11 Bushe umwikala inkalamo muli kwi, ne ncengo umwikala imisepela ya nkalamo, umo inkalamo yale-enda no kwingila,+ umwali abana ba nkalamo, kabili takwali uwa kushitiinya?+ 12 Inkalamo yalesantaula ifya kukumana abana ba iko, kabili yaleipaila ishikota sha iko. Kabili mu filindi fya iko yaleisushamo inama kabili umo ibelama mwali inama ishasantaulwa. +
13 “Mona! ndekulwisha,” e fyo Yehova wa mabumba asosa,+ “kabili nkoca iceleta lyobe mu mulilo.+ Kabili ulupanga lukalya abana ba nkalamo abobe.+ Kabili nkafumya mwi sonde abo waikata, ne shiwi lya nkombe shobe talyakomfwike na kabili.”+
3 We bulanda ku musumba uusumya umulopa.+ Waisulamo ubucenjeshi no bupuupu. Tauleka ukupokolola ifipe! 2 Kulya e kuli ukulila kwa cikoti+ no kulila kwa kukolonkonta ukwa mupeto, na bakabalwe abalepontauka ne celeta ililecilauka.+ 3 Uwendela pali kabalwe, no lubingu lwa lupanga, no kubeka kwe fumo,+ ne cinabwingi ica bo baipaya, ne fitumbi ifingi; kabili takuli impela ku fitumbi. Balaipununa mu fitumbi fyabo; 4 pa mulandu wa kufulisha kwa bucilende bwa kwa cilende,+ uwayemba nga nshi, nakulu wa fya buloshi, uwikata inko ku fya bucilende fyakwe ne ndupwa ku fya buloshi fyakwe.+
5 “Mona! ndekulwisha,”+ e fyasosa Yehova wa mabumba, “kabili nkakufimba ifisempe fyobe ku menso, kabili nkalenga inko ukumona ubwamba bobe,+ na mabufumu ukumona insoni shobe. 6 Kabili nkapoosa ifya bunani pali iwe,+ kabili nkakulenga ukuba uwasuulwa; kabili nkakulenga ukuba ica kutiinya kuli bonse abakumona.+ 7 Na onse uwakumona akakufulumuka+ no kutila, ‘Ninebe nabamonaula! Nani akamuumfwila uluse?’ Ni kwi ndekufwaila aba kukusansamusha? 8 Bushe walicila No-amone,+ uwaleikala mu tumifoolo utwafuma mu mumana wa Naelo?+ Amenshi yalimushingulwike, uo ifyuma fyakwe fyali ni bemba, uo icibumba cakwe cafumine kuli bemba. 9 Etiopia na Egupti bali e maka yakwe;+ kabili tabali no mwa kupelela. Puti na bena Libya balikwafwile.+ 10 Na o wine, aali no kusendwa muli bunkole; aile muli bunkole.+ Abana bakwe na bo babatobawilile ku mpela ya misebo yonse;+ kabili bapendwilile pa baume bakwe abacindikwa,+ kabili abakalamba bakwe bonse balikakwa mu minyololo.+
11 “E lyo iwe ukakolwa;+ ukaba icafiswa.+ Kabili ukafwaya ukucingililwa pa mulandu wa mulwani.+ 12 Ififulo fyobe fyonse ifya malinga fyaba nge mikunyu iiliko ifisabo fya kubalilapo ukupya, iya kuti nga baitensha, ifisabo fikaponena mu kanwa ka ulelya.+
13 “Mona! Abantu bobe, banakashi mu kati kobe.+ Impongolo sha calo cobe shikeswilwa abalwani bobe. Umulilo ukoca imipindo yobe.+ 14 Itapile amenshi aya kubomfya mu kushinga umusumba.+ Kosha amalinga yobe.+ Ingila mu matipa, kabili nyantaula mwi loba; ikatisha icikombola. 15 Na kulya kwine umulilo ukakoca. Ulupanga lukakulofya.+ Lukakulya nga bana ba makanta.+ Ifushe nga bana ba makanta; ifushe nga makanta. 16 Naufusha bashimakwebo bobe ukucila intanda sha mu muulu.+
“Lelo abana ba makanta bena, basotola icipapa cabo; e lyo bapupuka. 17 Abalinshi bobe baba nga makanta, kabili abakalamba ba bashilika abengisha abashilika incito baba nga makanta ku bwingi. Baleikala mu macinka ya mabwe mu bushiku bwa mpepo. Akasuba kabalika, kabili bafulumuka; kabili icifulo cabo uko bali tacishibikwe.+
18 “Abacemi bobe bashipula,+ we mfumu ya ku Asiria; abakankaala bobe baikala mu bwikalo bwabo.+ Abantu bobe nabasalanganina pa mpili, kabili takuli uulebalonganika pamo.+ 19 Takuli ukwilululwa ku bucushi bobe. Ifilonda fyobe tafingondapwa.+ Bonse abaleumfwa ilyashi pali iwe bakakutotela;+ pantu ni pali bani ububi bobe bushalepita?”+