Habakuki

1 Ubukombe ubwaluma ubo Habakuki amwene mu cimonwa: 2 Kufika lilali, mwe Yehova, ndelila ukuti mungafwe, na imwe ukuumfwa iyo?+ Kufika lilali ndebilikisha kuli imwe ukuti mumpusushe ku bunkalwe, na imwe ukupususha iyo?+ 3 Cinshi ico munengela ukumona icabipa, na imwe mulolesha fye pa bucushi? Kabili cinshi ico ukupokolola ifipe no bunkalwe fyabela pa ntanshi yandi, kabili cinshi ukuumana kwaimina, kabili cinshi ifikansa ficitilwa?+

4 E mulandu wine ifunde lishibombela, kabili no mulinganya takwaba.+ Pantu umubifi ashinguluka uwalungama, e co kushabela umulinganya.+

5 “Lolesheni, mu nko, no kumona, kabili loleshanyeni no kupapa.+ Papeni; pantu kuli umulimo uo umo alecita mu nshiku shenu, uo imwe mushakasumine nangu bamulondolwela.+ 6 Pantu moneni ndeimya abena Kaldi,+ uluko ulukali kabili ulwacincila, ulucilinganya icalo icikulu pa kuti lupoke incende sha bene.+ 7 Bakulenga umwenso kabili balatiinya. Umulinganya bakwata no bukata fifuma muli bena.+ 8 Na bakabalwe babo balabutukisha ukucila imbwili, kabili bakali ukucila imimbulu ya ku cungulo.+ Na bakabalwe babo bapalaula umushili, kabili bafuma ukutali. Bapupuka nga kapumpe uulefookela ku kulya.+ 9 Bonse baishila fye ukonaula.+ Bainuna ifinso fyabo kwati cikuuku ca mwela wa ku kabanga,+ kabili balonganya bankole ngo mucanga. 10 Balatumfya ishamfumu, kabili balaseka abalashi.+ Baseka fye ne cifulo conse ica malinga,+ kabili batuulika umucanga no kupoka ico cifulo. 11 Ilya nshita bakapita ngo mwela no kuya kabili bakaba no mulandu.+ Baba na ya maka pa mulandu wa kwa lesa wabo.”+

12 Bushe te kufuma ku kale mwabako, mwe Yehova?+ Mwe Lesa wandi, uwa mushilo wandi, tamufwa.+ Mwe Yehova, ni pa kuti akabapingule e co mwamubikila; kabili mwe Cilibwe,+ ni pa kuti akabakande+ e co mwamubikilako.

13 Mwalisangulukisha amenso ica kuti tamwingalolesha icabipa;+ kabili tamwingalolesha fye pa bubifi capwila na apo pene. Nga cinshi ico mulolesesha fye aba bucenjeshi,+ no kwikala tondolo ilyo umubifi amina uwamucila ubulungami?+ 14 Kabili cinshi ico mulengela abantunse ukuba nge sabi lya muli bemba, nge fikulika ifishaba no wa kufiteka?+ 15 Bonse abalobela ku bulobo;+ abakululula mu mukwau wakwe, no kubalonganikila mwi sumbu lyakwe.+ E cilenga ukuti alesekelela no kwanga.+ 16 E co atuulila amalambo ku mukwau wakwe no kufutumuna icushi ca malambo kwi sumbu lyakwe; pantu ni muli ifi e mo aliila ifyanona, ne fya kulya fyakwe fya maliila.+ 17 Bushe kanshi e co akalongolwela ifya mu mukwau wakwe, kabili bushe afwile ukwikalila fye ukulaipaya inko, ukwabula ukushumfwila inkumbu?+

2 Nakulaiminina apa kulindila pandi,+ kabili nakulaba pa lupungu; kabili nakulalola,+ pa kuti imone ifyo akalandila muli ine+ ne fyo nkaasuka pa kunkalipila.+

2 E lyo Yehova anjaswike no kutila: “Lemba icimonwa ici, kabili ucilenge cimonekeshe bwino pa mabwe ayapapaatala,+ pa kuti uulecibelenga acibelenge bwino.+ 3 Pantu icimonwa ca nshita ya ku ntanshi,+ lelo cilebutukisha ukulola ku mpela, kabili tacakabepe ubufi. Nangu fye nga cashingashinga, ulecilolela; pantu ukwisa cikesa.+ Tacakacelwe.

4 “Mona! Umutima wakwe nautuuma;+ tautambalele muli ena. Lelo uwalungama, akaba no mweo pa mulandu wa citetekelo cakwe.+ 5 Na cine, pantu umwangashi ulabepa,+ umuntu wa mataki;+ kabili tacita ifyo afwaya,+ uwakusha umutima wakwe nge Nshiishi,* uwaba nge mfwa kabili uushiikuta.+ Kabili ailonganishisha inko shonse no kulonganya abantu na bantu bonse pamo.+ 6 Bushe aba bonse, tabakamusosele mu mapinda+ na mu manshoko, na mu milumbe? Kabili umo akatila,

“‘We bulanda we ku uusandulula ifishili fyakwe+—Iye kufika lilali!+—kabili we bulanda we ku uifushisha imisha! 7 Bushe abafwaya ica kulundapo kuli iwe tabakeme mu kupumikisha, bushe tabakashibuke abalekututumya nga nshi, ica kuti ni we bakasenda filya basenda ifipe ifyapokololwa?+ 8 Pantu iwe wapokolwele inko ishingi ifipe, bonse abashalako aba mu nko bakakupokolola ifipe,+ pa mulandu wa kusumya umulopa wa bantunse na pa bunkalwe ubwacitwa kwi sonde, ku musumba na kuli bonse abaikalamo.+

9 “‘We bulanda we ku uunonkela aba mu ng’anda yakwe ubunonshi bwa bubi,+ pa kuti abike icisansala cakwe apatumpuka, pa kuti apokololwe no kukanaikatwa ku bucushi!+ 10 Wapanda aba mu ng’anda yobe amano ya kulenga insoni, ukulofya abantu na bantu abengi;+ kabili umweo obe ulebembuka.+ 11 Pantu ilibwe lya mu cibumba likabilikisha no bulanda, no lusonta lwa ku mutenge lukalyasuka.+

12 “‘We bulanda we ku ulekuulila umusumba mu kusuumya umulopa, uwasokola umusumba unono mu bupondamishi!+ 13 Mona! Bushe tacafuma kuli Yehova wa mabumba ica kutila abantu na bantu bakacucutikila fye umulilo, no kuti inko shikapompontekela fye apa fye?+ 14 Pantu isonde likesuulamo ukwishiba ubukata bwa kwa Yehova ifyo amenshi yafimba pali bemba.+

15 “‘We bulanda we ku upeela abanankwe ica kunwa, ica mu bukali bwakwe, ku kubalenga ukukolwa,+ pa kuti aloleshe pa nsoni shabo.+ 16 Ukekuta umusaalula ukucila ubukata.+ Nwa na iwe,+ no kumonwa uushasembululwa.+ Kapu ya mu kuboko kwa ku kulyo ukwa kwa Yehova ikashingulukila kuli iwe,+ kabili pa bukata bobe pakaba umuseebanya;17 pantu ubunkalwe ubwacitilwe kuli Lebanone,+ no kulofya inama mu bufunushi ubwa kushilenga ukuba no mwenso e fikesa pali iwe, pa mulandu wa kusumya umulopa wa bantu na pa bunkalwe ubwacitwa kwi sonde,+ ku musumba na kuli bonse abaikalamo.+ 18 Ca kwafwa nshi icimpashanya icabaswa,+ icimpashanya icaengwa na kasambilisha wa bufi+ nga ca kuti kapanga wa ciko acipanga, nga acicetekela,+ ica kuti apanga tulesa twa fye utushilanda?+

19 “‘We bulanda we ku usosa ku cimuti ati: “Shibuka!” ku libwe ilishilanda ati: “Buuka! Usambilishe”!+ Mona! Cabikwako golde na silfere,+ kabili tamwaba umupu nakalya mu kati ka ciko.+ 20 Lelo Yehova ali mwi tempele lyakwe ilya mushilo.+ Pano isonde ponse patalale tondolo ku cinso cakwe!’”+

3 Ipepo lya kwa Habakuki kasesema ilya mu nyimbo sha kuloosha: 2 Mwe Yehova, ning’umfwa ilyashi pali imwe.+ Natiina umulimo wenu, mwe Yehova.+

Lekeni ubukuluke mu kati ka myaka! Lengeni wishibikwe mu kati ka myaka. Mu bukali bwenu ibukisheni ukuba ne nkumbu.+

3 Lesa umwine aishile ukufuma ku Temani, uwa mushilo afumine ku Lupili lwa Parani.+ Se-lah.+

Ubukata bwakwe bwakupile imyulu;+ na pe sonde paiswilepo ukumulumbanya.+

4 Lelo ukubalika kwakwe, kwaishileba fye ngo lubuuto.+ Mu kuboko kwakwe mwalefuma imyengelele ibili, na mulya e mwafiseeme amaka yakwe.+

5 Ku ntanshi yakwe e kwaleya icikuko,+ no mubili walekaba ukufuma ku makasa yakwe.+

6 Aiminine shilili, pa kuti atenshe isonde.+ Aliloleshe, e lyo pa numa alengele inko ukucilauka.+

Ne mpili sha pe shalipashilwe;+ no tupili twa muyayaya twalikonteme.+ Imibele yakwe yaba ifyo yali na kale.

7 Namwene amatenti ya Kushani yali mu bucushi. Insalu sha matenti ya mu calo ca Midiani+ shaletenkana.+

8 Bushe mimana ubukali bwenu bwaimina, mwe Yehova,+ napamo ni bemba e o icipyu cenu caimina?+ Pantu mwaninine pali bakabalwe benu;+ amaceleta yenu yali e pusukilo.+

9 Ubuta bwenu babufimbulapo.+ Imilapo ya mikowa e isoswa.+ Selah. Mwalepwile pano isonde ku mimana.+

10 Impili shalimumwene; no kushikitika.+ Icibulukutu ca mfula capongolwele amenshi. Amenshi ayashika yafumishe iciunda ca yako.+ Yasumbwiliile amaboko ya yako mu muulu.

11 Akasuba no mweshi fyaiminine shilili,+ umo fyaikala umwasansuka.+ Imifwi yenu yaleya ngo lubuuto.+ Ukubyata kwe fumo lyenu kwalengele kwabuuta.+

12 Mwatampwile mwi sonde mu cifukushi cenu. Mu bukali bwenu mwanyantawile inko.+

13 Kabili mwaile ku kupususha abantu benu,+ ku kupususha uwasubwa wenu. Mwasansawile umukalamba mu ng’anda ya mubifi.+ Kwali ukusha pa mbilibili umufula wa kukuulapo, ukufika na pa muulu.+ Selah.

14 Mwatulile+ imitwe ya bashilika bakwe ku nkonto yakwe ilyo baishile bukali bukali ku kumpasa.+ Ukusamwa kwabo kwali ngo kwa bantu abalefwaisha ukonaula abalanda mu cifulo ca kufisamamo.+

15 Mwanyantawile muli bemba na bakabalwe benu, mu menshi ayengi.+

16 Nalyumfwile, na mu nda yandi mwasunkana; ne milomo yandi yalitutwime pa kuumfwa iciunda; amafupa yandi yalifumwike;+ kabili nalitenkene, pa kuti ndoleele mu kutekanya ubushiku bwa bucushi,+ ilyo ali no kwishila abantu,+ ukuti abasanse.

17 Nangu umukunyu taubalwile,+ ne myangashi taitwele ifisabo; umuolife wafilwa ukutwala, na mabala yakaana ukufumya ifya kulya;+ impaanga shaloba mu macinka, na mu matanga tamuli ing’ombe;+

18 Na lyo line, ine, nakula-angila muli Yehova;+ nakulasekelela muli Lesa we pusukilo lyandi.+