Sefania

1 Icebo ca kwa Yehova icaishile kuli Sefania mwana Kushi mwana Gedalia mwana Amaria mwana Hisekia mu nshiku sha kwa Yoshia+ mwana Amoni+ imfumu ya Yuda ni ci:

2 “Nkalofya conse icaba pa muulu wa mushili,” e fyasosa Yehova.+

3 “Nkalofya umuntunse ne nama.+ Nkalofya ifipupuka mu muulu ne sabi lya muli bemba,+ na babifi aba kuipununako;+ kabili nkalofya abantunse pa muulu wa mushili,”+ e fyasosa Yehova. 4 “Kabili nkatambalika ukuboko kwandi pali Yuda na bekashi bonse aba mu Yerusalemu,+ kabili nkalofya abashalako ba kwa Baali+ pano pantu, ishina lya bashimapepo ba kwa lesa umbi umbi pamo na bashimapepo,+ 5 na balya abakontama pa mitenge ku fya mu muulu,+ e lyo na bapepa balesa bambi,+ no kulapila muli Yehova+ no kulapila muli Malkamu;+ 6 na bafutatuka mu kukonka Yehova+ na bashafwaya Yehova kabili abashaipusha kuli ena.”+

7 Beni tondolo ku cinso ca kwa Shikulu Mulopwe Yehova;+ pantu nabupalama ubushiku bwa kwa Yehova,+ pantu Yehova napekanya ilambo;+ nasangulula+ abo alaalika.

8 “Kabili pa bushiku bwe lambo lya kwa Yehova e po nkaalukila kuli bacilolo, na ku bana ba mfumu,+ na kuli bonse abafwala ifya kufwala fya bambi bambi.+ 9 Kabili nkaalukila kuli bonse abalenina pa cisebele* muli ubo bushiku, abaleisusha ubunkalwe no bucenjeshi mu ng’anda ya bashikulwibo.+ 10 Kabili pali ubo bushiku,” e fyasosa Yehova, “kukaba ukulila kwa nkuuta ukufuma ku Mpongolo ye Sabi,+ no kuwelesha ukufuma ku citungu icipya ica musumba,+ e lyo no kuwa ukukalamba ukufuma ku tupili.+ 11 Welesheni,+ mwe bekashi ba mu Makteshe, pantu bashimakwebo bonse nabatalalikwa;+ bonse abapima silfere nabaloba.

12 “Kabili pa nshita ilya nkasokota mu Yerusalemu ku nyali,+ kabili nkaalukila ku bantu ababa ngo mwangashi uwatikama pa fiseekwa fya uko+ kabili abaletila mu mitima yabo, ‘Yehova takacite icisuma kabili takacite icibi.’+ 13 Awe ifyuma fyabo fikaba ifya kupokolola na mayanda yabo yakaba ifibolya.+ Kabili bakakuula amayanda, lelo tabakekalemo;+ kabili bakalima amabala ya myangashi, lelo tabakanweko umwangashi.+

14 “Ubushiku ubukalamba+ ubwa kwa Yehova nabupalama.+ Nabupalama, kabili buleyangufyanya nga nshi.+ Ukulila kwa bushiku bwa kwa Yehova kwa kutiinya.+ Impalume kulya ilelila akalanda.+ 15 Ubo bushiku, bushiku bwa bukali, bushiku bwa bulanda kabili ubwa nkumbabulili,+ bushiku bwa nkuuka kabili ubwa konaula, bushiku bwa mfifi kabili ubwafiita fititi,+ bushiku bwa makumbi kabili ubwafiitisha, 16 bushiku bwa ntandala kabili ubwe penga lya kusoka,+ pa kusansa imishi iya malinga ne mpungu ishasansuka isha pa makona ya malinga.+ 17 Kabili nkaleta ubucushi ku bantunse, na bo bakenda nge mpofu;+ pantu ni Yehova babembukila.+ No mulopa wabo uketilwa ngo lukungu,+ na mala yabo nga mafi.+ 18 Nangu ni silfere wabo nangu ni golde wabo tafyakabe na maka ya kubapokolola mu bushiku bwa bukali ubwa kwa Yehova;+ lelo ku kupimpa kwakwe ukwaba ngo mulilo isonde lyonse likonaulwa,+ pantu akalofya abekashi bonse aba pe sonde, ukulofya ukwine kwine.”+

2 Longaneni, longanyeni abantu,+ mwe luko ulushaba na nsoni.+ 2 Ilyo icipope ca bupingushi cishilafikilishiwa,+ ilyo ubo bushiku tabulapita nge misungu, ilyo ubukali bwa kwa Yehova ubulepya ngo mulilo bushilaisa pali imwe,+ ilyo bushilaisa pali imwe ubushiku bwa bukali ubwa kwa Yehova,+ 3 fwayeni Yehova,+ mwe bafuuka bonse aba mwi sonde,+ mwe bakonka ubupingushi bwakwe. Fwayeni ubulungami,+ fwayeni ubufuuke.+ Napamo+ kuti mwabelama mu bushiku bwa bukali ubwa kwa Yehova.+ 4 Pantu, Gasa ukasanguka umusumba uwalekeleshiwa;+ no musumba wa Ashkelone ukaba icibolya.+ Kumfwa umusumba wa Ashdode,+ bakautamfya akasuba pa kati ka mutwe;+ no musumba wa Ekrone, ukafumishiwapo.+

5 “We bulanda ku baikala mu citungu ca kuli bemba, uluko lwa bena Keriti!+ Icebo ca kwa Yehova ni mwe caishila. We Kanaani, we calo ca baPelishiti, na iwe nkakonaula, ica kuti tamwakabe umwikashi.+ 6 Ne citungu ca kuli bemba cikasanguka impanga ya mulemfwe,+ mukaba ne fishima ifya bacemi na macinka ya mpaanga aya mabwe. 7 Kabili cikaba icitungu ica bashalapo aba mu ng’anda ya kwa Yuda.+ E mo bakalalya. Mu mayanda ya mu Ashkelone e mo bakalalambalala icungulo. Pantu Yehova Lesa wabo akabapempula+ no kubwesha bankole babo.”+

8 “Ning’umfwa imiponto ya kwa Moabu+ no musaalula wa bana baume aba kwa Amone,+ ifyo balepontela abantu bandi no kulaituumika ku kulwisha umupaka wabo. 9 E ico, na pali ne mwine,”+ e fyasosa Yehova wa mabumba, Lesa wa kwa Israele, “Moabu akaba nga Sodomu,+ na bana ba kwa Amone+ bakaba nga Gomora, umukaba bakaenya, kabili umwa kwimba umucele, kabili mukaba icibolya umuyayaya.+ Abashalapo pa bantu bandi bakabapokolola ifipe, na bashalapo ba mu luko lwandi bakabapyana.+ 10 Ici e cikapyana pa cilumba cabo,+ pantu balipontele no kulaituumika pa bantu ba kwa Yehova wa mabumba.+ 11 Yehova akaba uwa kutiinya kuli bena;+ pantu akalenga tulesa tonse utwa pano isonde ukonda,+ na bantu bakamukontamina,+ onse ku cifulo cakwe, pa fishi fyonse ifya nko.+

12 “Na imwe, mwe bena Etiopia,+ mukepaiwa ku lupanga lwandi.+

13 “Kabili akatambalikila ukuboko kwakwe ku kapinda ka ku kuso, no konaula Asiria.+ Kabili akalenga Ninebe ukuba icibolya,+ ukuba icitungu icaumisha nga matololo. 14 Na mu kati ka uko, e mo impaanga shikalambalala, ne nama mpanga shonse isha mu luko.+ Mukanga ne cinungi+ fikalaala mu ntuntu sha nceshi ishawa.+ Ukulila kwa fyuni* kukomfwika pe windo. Pakaba ukonaula pa mwinshi; pantu akapangulula imbao sha ku cibumba.+ 15 Uyu e musumba wa nsansa uwaikele umutelelwe,+ uwalesosa mu mutima wa uko, ati, ‘Nine wine, tapali na umbi.’+ Iye ifyo waba ica kupapa, icifulo ca kulambalalamo inama sha mu mpanga! Onse uwapitapo akalisha umunsoli; kabili akapukunya umutwe.”+

3 We bulanda ku musumba wa mutitikisha,+ uulepondoka kabili uuleikantaika! 2 Uyu musumba tawaumfwile kwi shiwi;+ tawapokelele ukusalapula.+ Tawatetekele Yehova.+ Tawapaleme kuli Lesa wa uko.+ 3 Bacilolo ba mu kati ka uko bali ni nkalamo ishalebuluma.+ Bakapingula ba uko bali mimbulu ya ku cungulo iishakokwete amafupa ukufika ulucelo.+ 4 Bakasesema ba uko bali aba musaalula, abantu ababepa.+ Bashimapepo ba uko bakoweshe ifya mushilo; basuulile ifunde.+ 5 Yehova ali uwalungama mu kati ka uko;+ tacitile icishalungama.+ Cila lucelo alepeela ubupingushi bwakwe.+ Tabwalebula ku macaca.+ Lelo uwa bupondamishi taishibe insoni.+

6 “Nalofeshe inko; impungu shabo isha pa makona ya malinga shalyonawilwe. Naonawile imisebo yabo, ica kuti tapali uwalepitamo. Imisumba yabo yashele ifibolya, ica kuti tamwashele umuntu, kabili tamwali umwikashi.+ 7 Natile, ‘Cine cine mukantiina; mukasumina ukumulungika;’+ pa kuti ubwikalo bwa uko bwikaloba+—nkamulenga ukulubulula pa membu shakwe shonse.+ Cine cine balyangufyenye ukonaula imicitile yabo yonse.+

8 “‘E ico mulenjenekela,’+ e fyasosa Yehova, ‘mpaka ubushiku nkema ku kupokolola ifipe,+ pantu ubupingushi bwandi bwa kulonganika inko,+ ukuti nonganye amabufumu, ku kupongolwela pali bena icipyu candi,+ no bukali bwandi ubulepya ngo mulilo; pantu ku kupimpa kwandi ukwaba ngo mulilo isonde lyonse likonaulwa.+ 9 Pantu lilya nkaalula ululimi lwa bantu na bantu ukuba ululimi ulwine lwine,+ ukuti bonse fye balilile kwi shina lya kwa Yehova,+ ukuti bamubombele no mutima umo.’+

10 “Ukufuma ku citungu ca mimana ya Etiopia abalempapaata, e kutila, umwana mwanakashi uwa basalangana bandi, akaleta ubupe kuli ine.+ 11 Muli ubo bushiku tamwakomfwe insoni pa micitile yenu yonse iya bumpulamafunde bwenu kuli ine,+ pantu nkafumya mu kati kenu aba matutumuko benu abasekelela;+ kabili tamwakatale amuitutumuna mu lupili lwandi ulwa mushilo na kabili.+ 12 Nkasha muli imwe abantu abaiceefya kabili abalanda,+ kabili ukuuba bakooba mwi shina lya kwa Yehova.+ 13 Kumfwa abashalapo pali Israele,+ tabakacite icishalungama,+ nangu ukusosa ubufi,+ nangu ubucenjeshi tabwakasangwe mu tunwa twabo;+ pantu bena bakalya no kuyolola,+ kabili tapakabe no wa kubatiinya.”+

14 Aula no kusekelela, we mwana mwanakashi Sione! Sangalala,+ we Israele! Sekelela no kwanga no mutima onse, we mwana mwanakashi Yerusalemu!+ 15 Yehova nafumya pali iwe ubupingushi.+ Natamfya abalwani bobe.+ Yehova, imfumu ya kwa Israele, ali mu kati kobe.+ Tawakatiine ubucushi kabili iyo.+ 16 Muli bulya bushiku Yerusalemu akebwa ati: “Witiina, we Sione.+ Amaboko yobe yetompoka.+ 17 Yehova Lesa obe ali mu kati kobe. Apo wa maka, akapususha.+ Akaanga pali iwe no kusekelela.+ Akaba tondolo mu kutemwa kwakwe. Akasekelela pali iwe ne nsansa.

18 “Nkalonganya abali no bulanda+ abashasangilwe pa nshita ya mutebeto obe;+ tabasangilwe na iwe, pa mulandu wa miponto yakwe.+ 19 Mona, mu nshita ilya nkooma bonse abakucusha;+ kabili nkapususha uusunta,+ nkalonganya no watamfiwa.+ Kabili nkabalenga ukulumbanishiwa no kubacitila ishina mu calo conse umo baseebene. 20 Mu nshita ilya nkamuleta, na mu nshita ilya nkamulonganya. Pantu nkamucitila ishina kabili nkamulenga ukulumbanishiwa mu bantu na bantu bonse aba pe sonde, ilyo nkabwesha bankole benu ku menso yenu,” e fyasosa Yehova.+