Hagai
1 Mu mwaka wa bubili ukutula apo Dariusi imfumu atendekele ukuteka,+ mu mweshi walenga mutanda (6), pa bushiku bwa kubalilapo ubwa mu mweshi, e po icebo ca kwa Yehova caishiile muli Hagai+ kasesema kuli Serubabele+ mwana Shealtiele,+ kateka wa Yuda,+ na kuli Yoshua+ mwana Yehosadaki+ shimapepo mukalamba, aciti:
2 “Ifi e fyo Yehova wa mabumba+ asosa, ‘Aba bantu, batile: “Inshita tailaisa, inshita ya kuti ing’anda ya kwa Yehova ikuulwe.”’”+
3 Kabili icebo ca kwa Yehova cakonkenyepo ukwishila muli Hagai kasesema, no kutila: 4 “Bushe ni nshita ya kuti imwe mwikale mu mayanda yenu ayo mwakupako imbao,+ ilyo ing’anda iyi yalyonaika?+ 5 E ico nomba Yehova wa mabumba atila, ‘Tontonkanyeni bwino pa mibele yenu.+ 6 Mwatanda imbuto ishingi, lelo mulelobolola ifinono.+ Mulelya, lelo tamuleikuta.+ Mulenwa, lelo ukwabula ukukolwa. Mwafwala, lelo takuli uuleumfwa ukukaba; kabili uulebombela amalipilo ayabombela ku kuyabika mu mufuko uwatulika.’”+
7 “Yehova wa mabumba atila, ‘Tontonkanyeni bwino pa mibele yenu.’+
8 “‘Nineni ulupili, no kuleta imbao.+ Kabili mukuule ing’anda,+ pa kuti ntemwe iyi ng’anda+ kabili ncindamikwe,’+ e fyo Yehova asosa.”
9 “‘Mwalefwaya ifingi, lelo mwasangile ifinono;+ kabili mwafileta mu mwenu, na ine napuutapo+—pa mulandu nshi?’+ e fyasosa Yehova wa mabumba. ‘Pa mulandu wa kuti ing’anda yandi yalyonaika, lelo imwe namupamfiwa, cila muntu abikile amano ku ng’anda yakwe.+ 10 E ico imyulu yamutana umume wa iko, ne sonde na lyo lyamutana ifisabo fya liko.+ 11 Kabili naitile icilala cise pe sonde, na pa mpili, na pa ngano, na pa mwangashi uupya,+ na pa mafuta, na pa co umushili wamesha, na pa muntunse, na pa citekwa, na pali conse ica mu kucucutika kwa maboko yenu.’”+
12 Awe Serubabele+ mwana Shealtiele, na Yoshua mwana Yehosadaki+ shimapepo mukalamba, na bantu bonse abasheleko balakutika kwi shiwi lya kwa Yehova Lesa wabo,+ na ku mashiwi ya kwa Hagai+ kasesema, ayo Yehova Lesa wabo amutumine; kabili abantu balatiina pa mulandu wa kwa Yehova.+
13 Kabili Hagai inkombe+ ya kwa Yehova akonkenyepo ukusosa ku bantu ukulingana no mulimo wa kwa Yehova+ ku nkombe, ati: “‘Ine ndi na imwe,’+ e fyasosa Yehova.”
14 Kabili Yehova acincishe+ Serubabele mwana Shealtiele, umulashi wa calo ca Yuda, na Yoshua+ mwana Yehosadaki shimapepo mukalamba, na bonse abasheleko pa bantu; na bo balaingila no kubomba umulimo mu ng’anda ya kwa Yehova Lesa wabo uwa mabumba.+ 15 Pali ni pa bushiku bwalenga amakumi yabili na shine (24) ubwa mu mweshi walenga mutanda (6) mu mwaka walenga bubili ukutula apo Dariusi+ imfumu atendekele ukuteka.
2 Mu mweshi wa cinelubali (7),+ pa bushiku bwalenga amakumi yabili na bumo (21) mu mweshi, e po icebo ca kwa Yehova caishiile muli kasesema Hagai,+ no kutila: 2 “Shi sosa kuli Serubabele+ mwana Shealtiele,+ umulashi wa calo ca Yuda,+ na kuli Yoshua+ mwana Yehosadaki+ shimapepo mukalamba, na ku bashalako ku bantu, auti, 3 ‘Nani pali imwe mwe bashalapo uwamwene iyi ng’anda mu bukata bwa iko ubwa ntanshi?+ Kabili bushe muleimona shani nomba? Bushe, nga kuilinganya ku ya ntanshi, taili iya fye mu menso yenu?’+
4 “Yehova atila, ‘Lelo nomba kosa, we Serubabele, kabili kosa,+ we Yoshua mwana Yehosadaki shimapepo mukalamba.’
“‘Kabili koseni, mwe bantu bonse aba mu calo, ‘kabili bombeni,’+ e fyasosa Yehova.
“‘Pantu ndi na imwe,’+ e fyasosa Yehova wa mabumba. 5 ‘Ibukisheni ico napangene na imwe ilyo mwafumine mu Egupti,+ na lintu umupashi+ wandi wali muli imwe. Mwitiina.’”+
6 “Pantu e fyo Yehova wa mabumba asosa, ‘Kucili inshita imo—inshita iinono+—kabili nkatensha imyulu ne calo na bemba no mulundu.’+
7 “‘Awe nkatensha inko shonse, kabili ifisuma ifya mu nko shonse fikesamo;+ na ine nkesushamo ubukata muli iyi ng’anda,’+ e fyo Yehova wa mabumba asosa.
8 “‘Silfere yandi, na golde yandi,’+ e fyo Yehova wa mabumba asosa.
9 “‘Ubukata bwa iyi ng’anda iikakonkapo bukakula ukucila ubwa ng’anda ya ntanshi,’+ e fyo Yehova wa mabumba asosa.
“‘Kabili muli iyi ncende nkapeela umutende,’+ e fyo Yehova wa mabumba asosa.”
10 Pa bushiku bwalenga amakumi yabili na shine (24) ubwa mu mweshi uwalenga pabula (9), mu mwaka wa cibili ukutula apo Dariusi atendekele ukuteka, e po icebo ca kwa Yehova caishile kuli kasesema Hagai,+ no kutila:11 “E fyo Yehova wa mabumba asosa, ‘Shi ipusha bashimapepo pa mafunde,+ auti:12 “Bushe umuntu nga asenda umunofu wa mushilo mu cisempe ica ca kufwala cakwe, kabili icisempe cakwe cakumya umukate nelyo icaipikwa nelyo umwangashi nelyo amafuta nelyo umusango onse uwa ca kulya, bushe kuti caba ica mushilo?”’”+
Awe bashimapepo bayaswike no kutila: “Iyo!”
13 Kabili Hagai atile: “Bushe umuntu uwakowela ku citumbi nga akumya cimo pali ifi fintu, bushe cikakowela?”+
Bashimapepo na bo bayaswike no kutila: “Cikakowela.”
14 Awe Hagai na o atile: “‘E fyaba na ba bantu, kabili e fyo ulu luko lwaba kuli ine,+ kabili e fyaba ne milimo yonse iya minwe yabo, na conse ico batuula palya. Calikowela,’ e fyasosa Yehova.+
15 “‘Lelo, nomba, tontonkanyeni+ pali ici ukutula buno bushiku no kuya ku ntanshi, ilyo takwali ilibwe lyabikilwe pa libwe libiye mwi tempele lya kwa Yehova,+ 16 ukufuma ilyo ifi fintu fyalecitika—umo aishile ku mwiina wa fipimo amakumi yabili (20), kabili kwali fye ikumi (10); umo aishile ku ca kukaminamo umwangashi ukuti atapulemo ifipimo amakumi yasano (50) ifya cikamino ca mwangashi, lelo kwali fye amakumi yabili;+ 17 nalimupumine pamo ne milimo yonse iya minwe yenu+ ku kukunkutana kwa mabula+ na ku kufufuma kwa mabula+ e lyo na ku mfula ya mabwe,+ lelo tapali nangu umo pali imwe uwalebwela kuli ine,’+ e fyasosa Yehova—
18 “‘Tontonkanyeni+ pali ici ukufuma buno bushiku no kuya ku ntanshi, ukufuma pa bushiku bwalenga amakumi yabili na shine (24) ubwa mweshi uwalenga pabula (9), ukufuma pa bushiku umufula we tempele lya kwa Yehova wabikilwe;+ tontonkanyeni pali ici:19 Bushe mu butala mucili imbuto?+ Kabili pali nomba, bushe umwangashi no mukunyu no mupomegranate filatwala? Ukufuma buno bushiku nkalamupaala.’”+
20 Kabili icebo ca kwa Yehova caishile umuku walenga bubili kuli Hagai+ pa bushiku bwalenga amakumi yabili na shine (24) ubwa mu mweshi,+ no kutila:21 “Sosa kuli Serubabele umulashi wa calo ca Yuda,+ auti, ‘Ndetensha imyulu ne sonde.+ 22 Kabili nkawisha icipuna ca mabufumu no konaula amaka ya mabufumu aya nko;+ kabili nkawisha iceleta na baninamo, kabili bakabalwe na bendelapo bakafwa,+ umo umo ku lupanga lwa kwa munyina.’”+
23 “‘Muli ubo bushiku,’ e fyo Yehova wa mabumba asosa, ‘nkakubuula, we Serubabele+ mwana Shealtiele,+ umubomfi wandi,’ e fyo Yehova asosa; ‘kabili nkakubika ukuba inindaminwe ya kufwatikilako,+ pantu ni we nasala,’+ e fyo Yehova wa mabumba asosa.”+