Sekaria

1 Mu mweshi walenga cinekonsekonse (8), mu mwaka walenga bubili ukutula apo Dariusi+ atendekele ukuteka, e mo icebo ca kwa Yehova caishile kuli Sekaria+ mwana Berekia, mwana Ido+ kasesema, no kutila: 2 “Yehova alikalipe nga nshi pali bashinwe.+

3 “Kabili sosa kuli bena auti, ‘Yehova wa mabumba atila: “‘Bweleleni kuli ine,’+ e fyasosa Yehova wa mabumba, ‘na ine nkabwelela kuli imwe,’+ e fyasosa Yehova wa mabumba.’”

4 “‘Mwiba nga bashinwe+ abo bakasesema ba kale babilisheko,+ abati: “Yehova wa mabumba atila, ‘Lekeni inshila shenu ishabipa ne micitile yenu iyabipa.’”’+

“‘Lelo tabaumfwile, kabili tabakutike kuli ine,’+ e fyasosa Yehova.

5 “‘Nga bashinwe bali kwi?+ Kabili, bushe bakasesema+ baikele umuyayaya? 6 Lelo, bushe amashiwi yandi ne fipope fyandi ifyo naebele ababomfi bandi, bakasesema,+ tafyacitikile bashinwe?’+ Awe balibwelele no kusosa abati: ‘Ukulingana ne fyo Yehova wa mabumba apangile ukucita kuli ifwe,+ ukulingana ne nshila shesu kabili ukulingana ne micitile yesu, e fyo aacita kuli ifwe.’”+

7 Pa bushiku bwalenga amakumi yabili na shine (24) ubwa mweshi we kumi na umo (11), e kutila, umweshi wa Shibati, mu mwaka walenga bubili ukutula apo Dariusi+ atendekele ukuteka, e po icebo ca kwa Yehova caishile kuli Sekaria+ mwana Berekia mwana Ido+ kasesema, no kutila: 8 “Namwene mu bushiku, kabili, moneni! umuntu+ aleisa pali kabalwe uwakashika,+ kabili aiminine shilili mu kati ka mihadasi+ iyali umwashika; kabili ku numa yakwe kwali bakabalwe abakashika, abakashika ce, na babuuta.”+

9 Na ine natile: “Ni bani aba mwe shikulu?”+

Na malaika uwalelanda na ine anjebele+ ati: “Nalakulondolwela pa kuti ubeshibe.”

10 E lyo umuntu uwaiminine shilili mu kati ka mihadasi ayaswike no kutila: “Aba e bo Yehova atumine ku kwendauka pe sonde.”+ 11 Na bo bayaswike malaika wa kwa Yehova uwaiminine mu kati ka mihadasi no kutila: “Natwendauka pe sonde,+ kabili, mona! isonde lyonse lili tondolo kabili ilyabula icimfulumfulu.”+

12 Na malaika wa kwa Yehova ayaswike no kutila: “Mwe Yehova Lesa wa mabumba, kufika lilali mushakabelele Yerusalemu uluse ne misumba ya kwa Yuda,+ iyo mwakaana pali iyi myaka amakumi cinelubali (70)?”+

13 Na Yehova ayaswike malaika uwalelanda na ine, amashiwi ayasuma, amashiwi aya kusansamusha;+ 14 na malaika uwalelanda na ine asosele kuli ine ati: “Bila, auti, ‘Yehova, Lesa wa mabumba atila: “Nafubila Yerusalemu na Sione ubufuba ubukalamba.+ 15 Ndi no bukali ubukalamba pa nko ishili ne cibote;+ pantu ine nafulilwe fye panono,+ lelo shena shayafwilishe ukuti kube ubucushi.”’+

16 “E ico, Yehova atila, ‘“Nkabwela ku musumba wa Yerusalemu no luse ulwingi.+ Ing’anda yandi ikakuulwa muli wena,”+ e fyasosa Yehova wa mabumba, “kabili intambo ya kupiminako ikatambalikwa pali Yerusalemu.”’+

17 “Bilikisha na kabili, auti, ‘Yehova wa mabumba atila: “Imisumba yandi ikasuka aibamo ubusuma ubwingi na kabili;+ na Yehova akalangulukila Sione+ no kusala Yerusalemu na kabili.”’”+

18 Kabili nainwine amenso yandi no kumona; kabili, moneni! kwali insengo shine.+ 19 Na ine natile kuli malaika uwalelanda kuli ine: “Finshi ifi?” Na o atile kuli ine: “Ni nsengo ishasalangenye Yuda,+ Israele+ na Yerusalemu.”+

20 Kabili, Yehova anangile abacenjela mu fya kupangapanga bane. 21 Na ine natile: “Cinshi aba baleisa ku kucita?”

Na o atile: “Ishi e nsengo*+ shasalangenye Yuda ica kuti takwali no wa kwinuna umutwe; kabili ishi shimbi shikesa ku kushitutumya, ku kupoosa pa nshi insengo sha nko ishilesumbwila icalo ca Yuda ulusengo, pa kuti cisalangane.”+

2 Kabili nainwine amenso yandi no kumona; kabili, moneni! kwali umuntu, na mu minwe yakwe mwali umwando wa kupiminako.+ 2 E lyo natile: “Uleya kwi?”

Na o atile kuli ine: “Ku kupima Yerusalemu, pa kuti njishibe ifyo akula mu bwipi ne fyo alepa mu butali.”+

3 Kabili, moneni! malaika uwalelanda na ine alifuminepo, kabili malaika umbi alishile ku kwisamukumanya. 4 E lyo atile kuli ena: “Butuka webe umulumendo ulya, auti, ‘“Yerusalemu akekalwamo ngo mushi uwabula amalinga,+ pa mulandu wa kufulisha kwa bantu ne fitekwa mu kati kakwe.+ 5 Kabili nkaba kuli ena,” e fyasosa Yehova, “icibumba ca mulilo ukushinguluka konse,+ kabili nkaba ubukata mu kati kakwe.”’”+

6 “Imwe! Mwe bali apo! Fulumukenimo mu calo ca ku kapinda ka ku kuso,”+ e fyasosa Yehova.

“Pantu mu fyalo fya bene ifya mu ntunga sha myela ine iya mu muulu e mo namusalanganishisha,”+ e fyo Yehova asosa.

7 Iwe, Sione!+ Fyuka, we wikala no mwana mwanakashi Babiloni.+ 8 Pantu Yehova wa mabumba atila, ‘Ukukonka pa bukata,+ antumine ku nko ishalemupokolola ifipe;+ pantu uwakumya pali imwe+ ninshi akumya pa mboni ya linso lyandi.+ 9 Pantu ndepukunya ukuboko kwandi pali shena,+ kabili shikaba ica kupokololako ifipe ku basha ba shiko.’+ E lyo mukeshiba ukuti Yehova wa mabumba nantuma.+

10 “Aula no kusekelela, we mwana mwanakashi Sione;+ pantu ndeisa,+ kabili nkekala mu kati kobe,”+ e fyasosa Yehova. 11 “Kabili inko ishingi shikailunda kuli Yehova muli bulya bushiku,+ kabili bakaba abantu bandi;+ na ine nkekala mu kati kobe.” E lyo mukeshiba ukuti Yehova wa mabumba nantuma kuli imwe.+ 12 Kabili Yehova akabuula Yuda ukuba uwakwe pa ncende ya mushilo,+ lelo ukusala akasala Yerusalemu.+ 13 Talaleni, mwe bantunse bonse, ku cinso ca kwa Yehova,+ pantu naima+ mu bwikalo bwakwe ubwa mushilo.+

3 Kabili anangile Yoshua+ shimapepo mukalamba uwaiminine pa ntanshi ya kwa malaika wa kwa Yehova, na Satana+ aiminine ku kwa kulyo kwakwe ukuti amukaanye.+ 2 Na malaika+ wa kwa Yehova atile kuli Satana: “Yehova nakukalipile,+ we Satana, shi Yehova akukalipile, uwasala Yerusalemu!+ Bushe uyu te mulando uwasompolwa mu mulilo?”+

3 Lelo Yoshua, afwele ifya kufwala+ ifyakowela kabili aiminine pa ntanshi ya kwa malaika. 4 E lyo ayaswike no kusosa ku baiminine ku cinso cakwe ati: “Mufuuleni ifya kufwala ifyakowela.” Kabili asosele kuli ena ati: “Wamona, ninkwelela icilubo cobe,+ kabili walafwikwa ifya kufwala ifya bukata.”+

5 Na ine natile: “Nabamufwike ica kufwala ca ku mutwe icasanguluka.”+ Awe bamufwikile ica kufwala ca ku mutwe icasanguluka no kumufwika amalaya; na malaika wa kwa Yehova aiminine mupepi. 6 Kabili malaika wa kwa Yehova atendeke ukushimika ubunte kuli Yoshua, ati: 7 “Yehova wa mabumba atila, ‘Nga wakulaenda mu nshila shandi, no kusunga icipope candi,+ ninshi ni we ukapingula aba mu ng’anda+ yandi no kusunga imansa shandi; kabili muli aba beminine apa nkakupeela ubuntungwa bwa kwingilamo.’

8 “‘Shi umfwa, we Yoshua shimapepo mukalamba, iwe pamo na banobe abekele ku cinso cobe, pantu aba baume fishibilo;+ pantu mona ndeleta umubomfi+ wandi uwitwa Ukupuuka!+ 9 Pantu, mona! ilibwe+ ilyo mbikile ku cinso ca kwa Yoshua! Pa libwe limo pali amenso cinelubali (7).+ Mona ndeshilapo ifilembo fya liko,’+ e fyasosa Yehova wa mabumba, ‘kabili nkafumyapo icilubo ca cilya calo mu bushiku bumo.’+

10 “‘Muli ubo bushiku,’ e fyasosa Yehova wa mabumba, ‘muketana, cila muntu ukwita umunankwe, ilyo muli mwi samba lya mwangashi na mwi samba lya mukunyu.’”+

4 Na malaika uwalelanda na ine alibwelele no kunshibusha, kwati muntu uo babuusha mu tulo.+ 2 E lyo atile kuli ine: “Cinshi ulemona?”+

Na ine natile: “Moneni! namona, ica kutekapo inyali, ica golde,+ cili ne mbale iyafonka pa muulu wa ciko. Kabili cili ne nyali cinelubali (7) pali cena, ishili cinelubali;+ kabili inyali ishili pa muulu wa ciko shili ne mipaipi cinelubali. 3 Kabili kuli ne miolife ibili ku mbali ya ciko,+ umo ku lubali lwa ku kulyo kwa mbale iyafonka na umbi ku lubali lwa ku kuso kwa iko.”

4 E lyo nayaswike no kusosa kuli malaika uwalelanda na ine, nati: “Finshi ifi, mwe shikulu?”+ 5 Na malaika uwalelanda na ine ayaswike no kutila kuli ine: “Bushe ca cine tawishibe ifi fintu?”

Na ine natile: “Ee, mwe shikulu.”+

6 Na o ayaswike no kutila kuli ine: “Ifi e fyo Yehova asosa kuli Serubabele, ati, ‘“Te kwi bumba lya bashilika,+ nangu ku maka,+ lelo ni ku mupashi wandi,”+ e fyasosa Yehova wa mabumba. 7 Ni we nani, we lupili ulukalamba?+ Ku cinso ca kwa Serubabele+ ukabatama. Kabili akaleta ilibwe lya pa muulu.+ Kabili bakawelesha+ pa kumona ilibwe lilya, abati: “Ifyo lyamoneka bwino! Awe lyamoneka bwino!”’”+

8 Kabili icebo ca kwa Yehova caishile kuli ine, no kutila: 9 “Iminwe ya kwa Serubabele yaimika umufula wa ng’anda ino,+ kabili iminwe yakwe ikaipwisha.+ E lyo mukeshiba ukuti Yehova wa mabumba nantuma kuli imwe.+ 10 Pantu nani uwingasuula ubushiku bwa ntendekelo iinono?+ Awe bakasekelela+ no kumona umwando wa kupiminako icibumba, uuli mu minwe ya kwa Serubabele. Ishi cinelubali (7) menso ya kwa Yehova.+ Yalesabanta pano isonde ponse.”+

11 Kabili namwipwishe no kutila kuli ena: “Bushe iyi miolife ibili iili umo ku lubali lwa ku kulyo kwa ca kutekapo inyali na umbi ku lubali lwa ku kuso kwa ciko finshi?”+ 12 Kabili namwipwishe umuku wa bubili no kutila kuli ena: “Bushe ifi ifipo fibili ifya tumisambo twa miolife, ifilepongolwela amafuta ya golde mu mipaipi ibili iya golde, finshi?”

13 Na o atile kuli ine: “Bushe ca cine tawishibe ifi fintu?”

Na ine natile: “Ee, mwe shikulu.”+

14 Na o e pa kusosa ati: “E basubwa+ babili abeminina lubali kuli Shikulu we sonde lyonse.”+

5 Awe nalinwine amenso yandi na kabili no kulolesha; kabili, moneni! icimfungwa cilepupuka.+ 2 Na o atile kuli ine: “Cinshi ulemona?”+

Na ine natile: “Ndemona icimfungwa icilepupuka, ica mikono amakumi yabili (20) mu butali, ne mikono ikumi (10) mu bwipi.”

3 E lyo atile kuli ine: “Ici e citiipu icileya pa muulu we sonde lyonse,+ pantu onse uwiba,+ ukulingana ne fyalembwa ku lubali lumo ulwa cimfungwa, na nomba acili alilubukako ku kukandwa; kabili onse uulapa umulapo,+ ukulingana ne fyaba ku lubali lumbi,+ na nomba acili alilubukako ku kukandwa. 4 ‘Nincilenga ukuti ciye,’ e fyasosa Yehova wa mabumba, ‘kabili cifwile ukwingila mu ng’anda ya mupuupu na mu ng’anda ya ulapa umulapo uwa bufi mwi shina lyandi;+ kabili cifwile ukwikala mu kati ka ng’anda yakwe no konaula yena ne mbao sha iko na mabwe ya iko.’”+

5 E lyo malaika uwalelanda na ine aishile no kusosa kuli ine ati: “Shi inuna amenso yobe, no kumona ici icileisa.”

6 Na ine natile: “Cinshi ici?”

Na o atile: “Ici icileisa, litepe lya kupiminamo.” Kabili akonkenyepo ukusosa ati: “Iyi e mimonekele yabo mwi sonde lyonse.” 7 Kabili, moneni! inkupiko ya mutofwe yalikupukwilwe; kabili muli no mwanakashi uwikele mwi tepe. 8 E lyo atile: “Uku e kucita ifyabipa.” Kabili amufwintiile mwi tepe umo aali,+ no kupoosapo umutofwe uwafina pa kanwa ka liko.

9 Kabili nainwine amenso yandi no kumona, kabili moneni abanakashi babili baleisa, no mwela wali mu mapindo yabo. Kabili bali na mapindo nga mapindo ya kwa kabaso. Kabili baimishe panono panono itepe lya kupiminamo no kulitwala pa kati ke sonde no muulu. 10 E lyo natile kuli malaika uwalelanda na ine nati: “Baletwala kwi itepe?”

11 Na o atile kuli ine: “Pa kuti akuulilwe+ ing’anda mu calo ca Shinari;+ kabili ifwile ukupampamikwa, kabili kulya e ko bakamutwala ku cifulo cakwe icamulinga.”

6 Awe nainwine amenso yandi na kabili no kulolesha; kabili moneni! amaceleta yane yalefuma pa kati ka mpili shibili, ne mpili shali ni mpili sha mukuba. 2 Kwi celeta lya kubalilapo kwali bakabalwe abakashika;+ na kwi celeta lya bubili, bakabalwe abafiita.+ 3 Kabili kwi celeta lya butatu kwali bakabalwe ababuuta;+ na kwi celeta lya bune, kwali bakabalwe aba mabala, aba fisemba.+

4 Kabili naipwishe no kutila kuli malaika uwalelanda na ine nati: “Finshi ifi mwe shikulu?”+

5 Na malaika ayaswike no kutila kuli ine: “Mipashi+ ine iya mu muulu iileya,+ pa numa ya kwiminina ku cinso ca kwa Shikulu+ we sonde lyonse.+ 6 Bakabalwe abafiita abo likulikweko, baleya ku calo ca ku kapinda ka ku kuso;+ kabili ababuuta bena, bali no kuya ku numa ya bemba; kabili aba mabala na bo, bali no kuya ku calo ca ku kapinda ka ku kulyo.+ 7 Aba fisemba+ na bo, bali no kuya no kulafwaya ukwa kuti baye, pa kuti bendauke mwi sonde.”+ E lyo atile: “Kabiyeni, endaukeni mwi sonde.” Awe baile bale-endauka mwi sonde.

8 Kabili abilikishe kuli ine no kusosa, ati: “Mona, abaleya ku calo ca ku kapinda ka ku kuso e balenga ukuti umupashi+ wa kwa Yehova utuushe mu calo ca ku kapinda ka ku kuso.”+

9 Kabili icebo ca kwa Yehova cakonkenyepo ukwisa kuli ine, no kutila: 10 “Mubuuleko umusangulo kuli bankole,+ na kuli Heldai na kuli Tobiya na kuli Yedaya; awe na iwe ukese muli bulya bushiku, kabili ukengile mu ng’anda ya kwa Yoshia mwana Sefania+ pamo na aba abafumine ku Babiloni. 11 Kabili ukasende silfere na golde no kupanga icisote ca bufumu+ icikalamba no kucibika pa mutwe wa kwa Yoshua+ mwana Yehosadaki shimapepo mukalamba. 12 Kabili ukamwebe ati,

“‘Yehova wa mabumba atila: “Mona umuntu+ uo ishina lyakwe ni Ukupuuka.+ Kabili akapuuka mu cifulo cakwe, kabili akakuula itempele lya kwa Yehova.+ 13 Kabili akakuula itempele lya kwa Yehova, akasenda no bukata;+ kabili akekala pa cipuna cakwe ica bufumu no kuteka, kabili akaba shimapepo pa cipuna cakwe ica bufumu,+ no kupanda amano kwa mutende+ kukaba pa kati ka aba babili. 14 Kabili icisote ca bufumu icikalamba cikaba icibukisho+ kuli Helemu na kuli Tobiya na Yedaya+ na kuli Hene mwana Sefania mwi tempele lya kwa Yehova. 15 Kabili ababa ukutali bakesa no kukuulako itempele lya kwa Yehova.”+ Na imwe e lyo mukeshiba ukuti Yehova wa mabumba nantuma kuli imwe.+ Kabili e fyo cikaba—nga mukomfwa kwi shiwi lya kwa Yehova Lesa wenu.’”+

7 Kabili, mu mwaka uwalenga ine ukutula apo Dariusi+ imfumu atendekele ukuteka, icebo ca kwa Yehova caishile kuli Sekaria, pa bushiku bwalenga shine ubwa mweshi wa pabula (9), e kutila, mu Kislevu.+ 2 Kabili Betele atumine Sharesere na Regemu-meleke na bantu bakwe ku kunasha+ icinso ca kwa Yehova, 3 ukusosa kuli bashimapepo+ aba mu ng’anda ya kwa Yehova wa mabumba, na kuli bakasesema, ukutila: “Bushe ndile mu mweshi uwalenga isano,+ ndeke no kulya, nga filya nacita pa myaka iyi iishaifulila?”+

4 Kabili icebo ca kwa Yehova Lesa wa mabumba cakonkenyepo ukwisa kuli ine, no kutila: 5 “Sosa ku bantu bonse aba mu calo na kuli bashimapepo, auti, ‘Ilyo mwalekele ukulya+ no kupumapo imisowa mu mweshi uwalenga isano na mu mweshi uwalenga cinelubali (7),+ no kucita ici pa myaka amakumi cinelubali (70),+ bushe kwena nine wine mwalekeele ukulya?+ 6 Kabili ilyo mwalelya no kunwa, bushe te imwe mwalelya, bushe te imwe mwalenwa? 7 Bushe te kuti mumfwile amashiwi+ ayo Yehova abilishe muli bakasesema ba kale,+ ilyo Yerusalemu aikelwemo mu cibote, ukushingulukwa ne misumba yakwe, kabili ilyo Negebu+ na Shefela+ fyaikelwemo?’”

8 Kabili icebo ca kwa Yehova cakonkenyepo ukwisa kuli Sekaria, no kutila: 9 “Yehova wa mabumba atila, ‘Muleba no mulinganya wa cine pa kupingula;+ kabili muleba ne cikuuku+ ne nkumbu umuntu onse ku munankwe;+ 10 kabili mwilaibila mukamfwilwa+ nelyo inshiwa,+ no mulebeshi+ nelyo uwacula,+ kabili mwilapangilana ifyabipa mu mitima yenu.’+ 11 Lelo tabalebikako amano,+ kabili balefutata mu bumankonso,+ no kukomeka amatwi yabo ukuti beumfwa.+ 12 Kabili imitima+ yabo baicitile nge libwe ilyakosa icine cine ku kukanaumfwila amafunde+ na mashiwi ayo Yehova wa mabumba atumiine mu mupashi wakwe,+ muli bakasesema ba kale;+ icalengele ukuti Yehova wa mabumba akalipe nga nshi.”+

13 “‘Kabili, nga filya aitile na bo tabaumfwile,+ e fyo na bo baketa na ine nshakomfwe nakalya,’+ e fyasosa Yehova wa mabumba. 14 ‘Kabili nabafwintile na maka ukubasalanganishisha mu nko+ shonse isho bashaishibe;+ ne calo bacisha icibolya, umwabula no wa kupitamo kabili ukwabula no wa kubwelelamo;+ awe balengele icalo+ icisuma caba ica kupapa.’”

8 Kabili icebo ca kwa Yehova wa mabumba cakonkenyepo ukwisa, no kutila: 2 “Yehova wa mabumba+ atila, ‘Nkafubila Sione ubufuba ubukalamba,+ kabili nkamufubila no bukali+ ubukalamba.’”

3 “Yehova atila, ‘Nkabwelela ku Sione+ no kwikala mu kati ka Yerusalemu;+ na Yerusalemu aketwa ati umusumba wa cishinka,+ no lupili lwa kwa Yehova+ wa mabumba luketwa ati, ulupili lwa mushilo.’”+

4 “Yehova wa mabumba atila, ‘Abaume abakote na banakashi abakote bakekala mu mansa sha mu Yerusalemu+ na kabili, na onse akaba ne nkonto+ mu minwe yakwe pa mulandu wa kufula kwa nshiku shakwe. 5 Kabili imansa sha mu musumba shikesulamo utulumendo no tukashana utuleangala mu mansa sha uko.’”+

6 “Yehova wa mabumba atila, ‘Nangu cingamoneka ukwafya sana mu menso ya bakashalapo pali aba bantu muli shilya nshiku, bushe kuti camoneka ukwafya sana na mu menso yandi?’+ e fyasosa Yehova wa mabumba.”

7 “Yehova wa mabumba atila, ‘Moneni ndepususha abantu bandi ku calo ca ku kabanga na ku calo ca ku masamba.+ 8 Kabili ndi no kubaleta pa kuti bengile, na bo bakekala mu kati ka Yerusalemu;+ kabili bakaba abantu bandi,+ na ine nkaba Lesa wabo mu cishinka na mu bulungami.’”+

9 “Yehova wa mabumba atila, ‘Kosheni amaboko yenu,+ mwe baleumfwa muno nshiku amashiwi aya mu tunwa twa bakasesema,+ ukutula pa bushiku umufula wa ng’anda ya kwa Yehova wa mabumba wabikilwe, ukuti itempele likuulwe.+ 10 Pantu ilyo shilya nshiku tashilafika, takwali amalipilo ku bantu;+ nangu malipilo ya fitekwa, tayatalile ayabako; kabili ku walefuma na ku waleingila takwali umutende pa mulandu wa mulwani,+ ilyo nalelwishanya abantunse bonse umuntu no munankwe.’+

11 “‘Awe nomba nshakabe nga mu nshiku sha ku kale ku bashalapo pa bantu aba,’+ e fyasosa Yehova wa mabumba. 12 ‘Pantu bakatanda imbuto sha mutende;+ umwangashi ukatwala ifisabo fya uko,+ ne sonde likafumya ubulimi bwa liko,+ no muulu ukaponya umume wa uko;+ kabili nkalenga abashalapo+ pali aba bantu ukupyana ifi fyonse.+ 13 Awe filya fine mwaishileba icitiipu mu nko,+ mwe ba mu ng’anda ya kwa Yuda na ba mu ng’anda ya kwa Israele,+ e fyo nkamupususha, kabili mukaba ipaalo.+ Mwitiina.+ Nayakose amaboko yenu.’+

14 “Pantu Yehova wa mabumba atila, ‘“Filya fine napangile ukuleta ububi pali imwe pa mulandu wa kuti ifikolwe fyenu fyanengele ukukalipa,”+ e fyasosa Yehova wa mabumba, “kabili nshalangulwike,+ 15 e fyo na kabili nkapanga muli ishi nshiku ukucitila Yerusalemu na ba mu ng’anda ya kwa Yuda icisuma.+ Mwitiina.”’+

16 “‘Ifi e fyo mufwile ukucita:+ Landeni icine umuntu onse ku munankwe.+ Pingwileni ku cine na ku bupingushi bwa mutende mu mpongolo shenu.+ 17 Kabili mwipangilana ububi mu mitima yenu,+ kabili mwitemwa umulapo onse uwa bufi;+ pantu fyonse ifi e fyo napata,’+ e fyasosa Yehova.”

18 Kabili icebo ca kwa Yehova wa mabumba cakonkenyepo ukwisa kuli ine, no kutila:19 “Yehova wa mabumba atila, ‘Ukuleka ukulya ukwa mu mweshi uwalenga ine,+ no kuleka ukulya ukwa mu mweshi uwalenga isano,+ no kuleka ukulya ukwa mu mweshi uwalenga cinelubali (7),+ no kuleka ukulya ukwa mu mweshi uwalenga ikumi (10),+ kukaba ni nshita ya kwanga no kusekelela kabili iya mitebeto iisuma ku ba mu ng’anda ya kwa Yuda.+ E ico temweni icine no mutende.’+

20 “Yehova wa mabumba atila, ‘Kabili abantu na bantu na bekashi ba mu misumba iingi bakesa;+ 21 kabili abekashi ba mu musumba umo bakaya ku ba muli umbi, abati: “Natuleya+ ku kupapaata+ Yehova no kufwaya Yehova wa mabumba. Na ine wine ndeya.”+ 22 Kabili abantu na bantu abengi ne nko sha maka bakesa ku kufwaya Yehova wa mabumba mu Yerusalemu+ kabili ku kupapaata ku cinso ca kwa Yehova.’

23 “Yehova wa mabumba atila, ‘Mu nshiku shilya e mo abantu ikumi (10) aba mu ndimi shonse isha nko,+ bakekata+ ku nsenkebele sha ku ca kufwala ca muYuda umo,+ abati: “Tuleya na imwe,+ pantu natumfwa ukuti Lesa ali na imwe.”’”+

9 Ubukombe ubwaluma:+

“Icebo ca kwa Yehova caishila icalo ca Hadraki, kabili pa Damaseke+ e po caikala; pantu Yehova alamona umuntunse+ ne mikowa yonse iya kwa Israele. 2 Kabili Hamati+ na o akapakana nankwe; Turi+ na Sidone,+ pantu wa mano sana.+ 3 Awe Turi aikuuliile ilinga, no kutuulika silfere ngo lukungu na golde nga matipa ya mu misebo.+ 4 Moneni! Yehova akamupyanununa, na muli bemba e mo akafwinta ibumba lyakwe ilya bashilika;+ kabili mu mulilo e mo akonawilwa.+ 5 Ashkelone akamona no kumfwa umwenso; kabili Gasa na o, akashikitika; na Ekrone,+ pantu isubilo+ alelolela likekatwa insoni. Kabili imfumu ikaloba mu Gasa, na Ashkelone takekalwemo.+ 6 Awe umwana wa kupula+ akaiteka mu Ashdode,+ na ine nkafumyapo icilumba ca baPelishiti.+ 7 Kabili nkafumya mu kanwa kakwe ifyakantaikwako umulopa ne fya bunani fyakwe ifyafyantama pa kati ka meno yakwe,+ na o akashala alelolela Lesa wesu; kabili akaba nge mfumu+ muli Yuda,+ na Ekrone akaba ngo mwina Yebusi.+ 8 Nkacita ne nkambi pa ng’anda yandi nge nkambi ya bashilika,+ pa kuti kwikaba uwa kupitapo nangu uwa kubwela; kabili kapitao takapitepo iyo,+ pantu nomba nimona na menso yandi.+

9 “Angisha, we mwana mwanakashi Sione.+ Welesha ukuwelesha kwa kucimfya,+ we mwana mwanakashi Yerusalemu. Mona! Imfumu+ yobe ileisa kuli iwe.+ Yalilungama, kabili bali-ipususha;+ yali-icefya,+ kabili ileisa pa mpunda, pa mpunda iikalamba, pa mwana wa mpunda iikota.+ 10 Awe nkonaula iceleta lya nkondo muli Efraimu na bakabalwe mu Yerusalemu.+ Kabili ubuta bwa bulwi+ bukafunaulwa. Na o akasosa umutende ku nko;+ kabili ukuteka kwakwe kukafuma kuli bemba ukufika kuli bemba no kufuma ku Mumana ukufika ku mpela she sonde.+

11 “Na iwe we mwanakashi, ku mulopa wa cipangano+ cobe nkatuma abafungwa+ bobe ukufuma mu cilindi umushaba amenshi.

12 “Bweleleni ku ncende iyacingililwa,+ mwe bafungwa ababa ne subilo.+

“Awe, ndekweba lelo nati, ‘Nkabwesesha iwe, we mwanakashi, ifipimo fibili.+ 13 Pantu nkanyanta Yuda ngo buta bwandi. Mu buta e mo nkabika Efraimu, kabili nkashibusha abana bobe,+ we Sione, ukwimina abana bobe, we Grisi,+ kabili nkakucita ngo lupanga lwa mpalume.’+ 14 Na pa muulu wabo e po Yehova akamoneka,+ kabili umufwi wakwe ukafuma nge nkuba.+ Awe Shikulu Mulopwe Yehova akalisha ipenga,+ no kwendela mu nkuuka ya mwela ku kapinda ka ku kulyo.+ 15 Yehova wa mabumba akabacingilila, kabili bakonaula+ no kupokolola amabwe ya mu cisukushilo. Kabili bakanwa+—bakasamwa—kwati nalimo pali umwangashi; bakekuta nga filya imbale iyafonka isula, nga makona ya ciipailo.+

16 “Awe muli ubo bushiku Yehova Lesa wabo akabapususha+ ngo mukuni wa bantu bakwe;+ pantu bakalabeeka pa mushili wakwe ngo tumabwe twa ku cisote ca bufumu.+ 17 Pantu ubusuma bwakwe bukulu,+ kabili aliyemba nga nshi!+ Ingano shikalenga abalumendo ukukula bwino, no mwangashi uwalowa ukalenga banacisungu ukuyemba.”+

10 “Lombeni kuli Yehova imfula+ mu nshita ya mfula ya kulekelesha,+ lombeni kuli Yehova uupanga amakumbi ya mfula,+ kabili uubapeela imfula iifubauka,+ uupeela umo na umo ifimenwa fya mwi bala.+ 2 Pantu tulesa+ twasosa ifinjelengwe; na babuka imbuko bamona ifimonwa fya bufi,+ kabili ifiloto fya fye e fyo basosa, no kusansamusha kwabo kwa fye.+ E co bakaila nge mpaanga;+ bakacula, pantu tapali umucemi.+

3 “Ubukali bwandi bwaisa pali bakacema,+ kabili nkalubulwisha intungulushi+ ishaba nge mbushi;+ pantu Yehova wa mabumba nomba abika amano ku mpaanga shakwe,+ ing’anda ya kwa Yuda, kabili abacita nga kabalwe+ wakwe uwa bukata mu bulwi. 4 Kuli ena e kufuma intungulushi,+ kuli ena e kufuma kateka uutungilila,+ kuli ena e kufuma ubuta bwa bulwi;+ kuli ena e kufuma kapitao onse,+ bonse fye. 5 Kabili bakaba nge mpalume+ ishinyantaula mu matipa ya mu misebo mu bulwi.+ Kabili bakalwa, pantu Yehova ali na bo;+ na banina pali bakabalwe bakalengwa insoni.+ 6 Nkalenga ne ng’anda ya kwa Yuda ukusumbulwa, nkapususha ne ng’anda ya kwa Yosefe.+ Nkabapeela no bwikalo, pantu nkababelela uluse;+ kabili bakaba kwati nshabapoosele;+ pantu nine Yehova Lesa wabo, kabili nkabasuka.+ 7 Na ba kwa Efraimu bakaba nge mpalume,+ ne mitima yabo ikasekelela nga ku mwangashi.+ Na bana babo bakamona no kusekelela;+ ne mitima yabo ikasekelela muli Yehova.+

8 “‘Nkabalishisha umunsoli+ no kubalonganya; pantu nkabalubula,+ kabili bakafula, nge fyafula bambi.+ 9 Kabili nkabasalanganya nge mbuto mu bantu na bantu,+ na bo bakanjibukisha mu fyalo fya kutali;+ kabili bakapuupuutukila pamo na bana babo no kubwela.+ 10 Na ine nkababwesha ukufuma ku calo ca Egupti;+ no kubalonganya ukufuma ku Asiria;+ kabili ku calo ca Gileadi+ ne ca Lebanone e ko nkabaleta, kukasuke akubula incende kuli bena.+ 11 Kabili akapita muli bemba no bulanda;+ akooma na mabimbi muli bemba,+ na menshi ayengi aya Naelo yakakama.+ Kabili icilumba ca Asiria cikatentemuka,+ ne nkonto+ ya Egupti ikafumapo.+ 12 Kabili ine ne Yehova nkabacindamika,+ na mwi shina lyandi e mo bakendauka,’+ e fyasosa Yehova.”

11 “Isula ifiibi fyobe, we Lebanone,+ pa kuti umulilo oce imikedari yobe.+ 2 Pumapo umusowa, we mukupri, pantu umukedari nauwa; pantu imiti iya lulumbi naibungaulwa!+ Pumenipo imisowa, mwe miti iikalamba iya mu Bashani, pantu umutengo uushingengilwamo nauwishiwa!+ 3 Kutikeni! Misowa ya bacemi,+ pantu bukatebebe bwabo nabonaulwa.+ Kutikeni! Kubuluma kwa misepela ya nkalamo, pantu imiti yalelema iyaba mu lulamba lwa Yordani naibungaulwa.+

4 “Yehova Lesa wandi atila, ‘Cema impanga isha kwipaya,+ 5 isho abashita bepaya+ ukwabula no kupeelwa umulandu.+ Na baleshishitisha+ batila: “Shi Yehova acindikwe, ilyo nanonka ifyuma.”+ Kabili abacemi ba shiko tabashilangulukilako nangu panono.’+

6 “‘Pantu nshakalangulukile kabili abekashi ba mu calo,’+ e fyasosa Yehova. ‘E ico moneni ndelenga abantunse ukuisanga, cila muntu mu minwe ya munankwe+ na mu minwe ya mfumu yakwe;+ kabili bakonaula icalo conse fye, na ine nshakabapokolole mu minwe yabo.’”+

7 Awe natendeke ukucema impanga+ isha kwipaya,+ ukumucemenako, mwe mpaanga ishacula.+ Nabuulile ne nkonto shibili.+ Imo nainike ati Ubusuma,+ imbi nainike ati Ukulundanya,+ e fyo naile ndecema impaanga. 8 Kabili nasukile nafumyapo abacemi batatu mu mweshi umo,+ pantu nasukile nafiishiwa ku mutima pa mulandu wabo,+ na ine nasangwike ica bunani ku myeo yabo. 9 Awe na ine e pa kusosa nati: “Ndeleka ukumucema.+ Uulefwa, kafwe. No uleloba, kalobe.+ Kumfwa ku baleshalapo, nabalye, cila muntu umunofu wa munankwe.”+ 10 Awe nabuulile inkonto yandi e kutila Ubusuma+ no kuikontaula,+ pa kuti ntobe icipangano candi ico napangene na bantu bonse.+ 11 Awe e fyo catobeke muli bulya bushiku, kabili impaanga ishalecula+ ishalentamba+ e mo shaishibile ukuti cebo ca kwa Yehova.

12 E lyo nabebele ukuti: “Nga cawama kuli imwe,+ mpeeni amalipilo yandi; lelo nga te ifyo, mwimpa.” Awe bampeele amalipilo yandi, indalama sha silfere amakumi yatatu (30).+

13 Na Yehova atile kuli ine: “Shipoose mu cipao+—umutengo wa bukatebebe uo baningila.”+ Na ine nabuulile indalama sha silfere amakumi yatatu (30) no kushipoosa mu cipao mu ng’anda ya kwa Yehova.+

14 E lyo naputwile tupimfya tupimfya inkonto yandi iya bubili, iyo nainike ati Ukulundanya,+ pa kuti ngonaule ubwananyina+ ubwaba pali Yuda na Israele.+

15 Kabili Yehova akonkenyepo ukusosa kuli ine ati: “Buula kabili ifibombelo fya kwa kacema icinangwa.+ 16 Pantu mona ndeimya kacema mu calo.+ Impaanga ishileloba takashisakamane.+ Akana akaluba takakafwaye, kabili impaanga iyafunika takayundape.+ Na ilya iiminine fye takaipeele ifya kulya, kabili akalya umunofu wa yaina,+ kabili akasotola ifibondo fya mpaanga.+ 17 We bulanda ku mucemi wandi uwa fye,+ uulesha impaanga!+ Ulupanga lukaba pa kuboko kwakwe na pa linso lyakwe ilya ku kulyo. Ukuboko kwakwe kukooma,+ ne linso lyakwe ilya ku kulyo likaleka ukumwenekesha.”

12 Ubukombe ubwaluma:

“Icebo ca kwa Yehova pali Israele,” e fyasosa Yehova, uwayansa umuulu+ kabili uwapanga ica kukuulapo isonde+ no kubika umupashi+ mu kati ka muntu. 2 “Moneni ndelenga Yerusalemu+ ukuba imbale iyafonka iya kulenga abantu bonse abashingulukako ukupungaila;+ kabili Yuda na o bakamushinga, na Yerusalemu wine.+ 3 Kabili muli ubo bushiku+ nkalenga Yerusalemu ukuba icilibwe+ icafina pa bantu na bantu bonse. Bonse abakacimya bakaikuusulula nga nshi; ne nko shonse isha pano isonde shikamulonganina.+ 4 Muli ubo bushiku,”+ e fyasosa Yehova, “nkafulunganya kabalwe+ onse no kulenga uwaninapo ukupena;+ kabili nkashibwila amenso+ yandi pa ng’anda ya kwa Yuda, na kabalwe onse uwa bantu na bantu nkamulenga ukupofula. 5 Kabili bacilolo+ ba mu Yuda bakasosa mu mitima yabo abati, ‘Abekashi ba mu Yerusalemu e maka yandi muli Yehova wa mabumba Lesa wabo.’+ 6 Muli bulya bushiku nkalenga bacilolo ba mu Yuda ukuba nge ca kubikamo umulilo icili mu kati ka miti+ kabili nge cenge icileaka icili mu mwanshi wa ngano+ ishalobololwa, kabili bakonaula abantu na bantu bonse abashinguluka ku kwa kulyo na ku kwa kuso;+ lelo Yerusalemu ena akekalwamo mu cifulo cakwe, mu Yerusalemu.+

7 “Kabili Yehova akapususha amatenti ya kwa Yuda intanshi, pa kuti ubusuma bwa ba mu ng’anda ya kwa Davidi no busuma bwa bekashi ba mu Yerusalemu bwicila sana pali Yuda. 8 Muli ubo bushiku Yehova akaba ica kucingilila ukushinguluka abekashi ba mu Yerusalemu;+ kabili uuleipununa muli bulya bushiku akaba uwakosa nga Davidi,+ na ba mu ng’anda ya kwa Davidi bakaba abakosa nge fyakosa Lesa,+ nga malaika wa kwa Yehova pa ntanshi yabo.+ 9 Kabili muli ubo bushiku nkafwaya ukulofya inko shonse ishileimina Yerusalemu.+

10 “Kabili nkapongolwela pa ba mu ng’anda ya kwa Davidi na pa bekashi ba mu Yerusalemu umupashi wa luse+ no wa kupapaata,+ bakalolesha na ku o balashile,+ kabili bakamuloosha nge fyo baloosha umwana umwaume umo fye mpo; kabili kukaba ukumuloosha nga nshi filya kuba ukuloosha nga nshi umwana umwaume ibeli.+ 11 Muli ubo bushiku mukaba ukuloosha ukukalamba mu Yerusalemu, ngo kuloosha kwa pa Hadadrimone mu mpanga iyabatama iya Megido.+ 12 Kabili icalo cikaloosha,+ cila lupwa lweka; ulupwa lwa ba mu ng’anda ya kwa Davidi lweka, na banakashi babo beka;+ ulupwa lwa ba mu ng’anda ya kwa Natani+ lweka, na banakashi babo beka; 13 ulupwa lwa ba mu ng’anda ya kwa Lebi+ lweka, na banakashi babo beka; ulupwa lwa bena Shimei+ lweka, na banakashi babo beka;14 indupwa shonse ishashalapo, cila lupwa lweka, na banakashi babo beka.+

13 “Muli ubo bushiku+ e mo icishima+ cikeswilwa aba mu ng’anda ya kwa Davidi na bekashi ba mu Yerusalemu bakabembila icishima ica kubasangulula ku lubembu+ na ku ca bunani.+

2 “Kabili muli ubo bushiku,” e fyasosa Yehova wa mabumba, “e mo nkalofya amashina ya tulubi mu calo,+ kabili tabakatwibukishe na kabili; nkalenga bakasesema+ no mupashi wakowela ukufuma mu calo.+ 3 Kabili ngo muntu akonkanyapo ukusesema, wishi na nyina, abamufyele, na bo bakamwebe ati, ‘Tawabe no mweo, pantu wasosela ubufi mwi shina lya kwa Yehova.’ E lyo wishi na nyina, abamufyele, bakamulase ifumo pa mulandu wa kusesema kwakwe.+

4 “Na mu bushiku bulya bakasesema bakekatwa insoni,+ umo umo pa cimonwa cakwe ilyo alesesema; kabili tabakafwale ica kufwala caibela ica masako+ ica bukasesema pa kuti babepelemo. 5 Kabili akatila, ‘Nshili kasesema. Ndi mulimi wa mushili, pantu umuntunse e wanshitile ukutula ku bwaice bwandi.’ 6 Kabili umo akamwipusha ati, ‘Nge fi filonda ifili pa mubili obe?’ Na o akatila, ‘Fintu nauminwe mu ng’anda ya bantu abo natemwa sana.’”

7 “We lupanga, buukila kacema wandi,+ no mwaume wine wine umunandi,”+ e fyasosa Yehova wa mabumba. “Ipaya kacema,+ pa kuti impaanga sha mu mukuni shisalangane;+ na ine nkabwesesha ukuboko kwandi pa shacepa.”+

8 “Awe mu calo conse,” e fyasosa Yehova, “aba mu fitungu fibili ifya cilya calo bakabepaya no kufwa bakafwe;+ kabili aba mu citungu ca butatu, bakashalamo.+ 9 Na kabili nkaleta aba mu citungu ca butatu ukubapisha mu mulilo;+ kabili nkabalopolola nga filya silfere alopololwa,+ no kubaceeceeta nga filya golde aceeceetwa.+ Bakalilila kwi shina lyandi, na ine nkabaasuka.+ Nkatila, ‘Bantu bandi,’+ na bo bakatila, ‘Yehova ni Lesa wesu.’”+

14 “Mona! Ubushiku buleisa, ubushiku bwa kwa Yehova,+ kabili bakaakana ifipe ifyo bapokolola kuli iwe. 2 Kabili nkalonganya inko shonse ukwimina Yerusalemu ku kulwa;+ no musumba ukapokwa+ na mayanda yakasampwa, na banakashi bakapatikishiwa ukuulungana na bo.+ Kabili hafu wa bena musumba bakaya muli bunkole;+ lelo abakashalapo bena,+ tabakalofiwe mu musumba.+

3 “Kabili Yehova akafuma no kulwa ne nko+ shilya nga mu bushiku bwa nkondo yakwe, mu bushiku bwa bulwi.+ 4 Kabili amakasa yakwe yakeminina muli bulya bushiku pa lupili lwa miolife, ulwaba pa ntanshi ya Yerusalemu, ku kabanga;+ no lupili lwa miolife+ lukalepuka pa kati,+ ukufuma ku kabanga ukufika ku masamba. Kukaba umupokapoka uukalamba; kabili hafu wa lupili akaselela ku kapinda ka ku kuso, na hafu umbi ku kapinda ka ku kulyo. 5 Kabili mukafulumukila ku mupokapoka wa mpili shandi;+ pantu umupokapoka wa mpili ukafika na ku Asele. Na imwe mukafulumuka, nga filya mwafulumwike pa mulandu wa cinkukuma mu nshiku sha kwa Usia imfumu ya Yuda.+ Kabili Yehova Lesa wandi akesa,+ pamo na ba mushilo bonse.+

6 “Kabili muli ubo bushiku ulubuuto talwakabalike+—ifintu fikakamantana pa mulandu wa kutalala.+ 7 Kabili ubo bushiku bukeshibikwa ukuti bwa kwa Yehova.+ Takwakabe akasuba, nelyo ubushiku;+ kabili icungulo kukaba ulubuuto.+ 8 Kabili muli ubo bushiku amenshi+ ya mweo yakafuma mu Yerusalemu,+ hafu yakaya ku kabanga ka bemba+ na hafu ku masamba ya bemba.+ Cikacitika mu lusuba na mu mpepo.+ 9 Kabili Yehova akaba imfumu pe sonde lyonse.+ Muli ubo bushiku Yehova akaba umo,+ ne shina lyakwe likaba limo.+

10 “Icalo conse cikaaluka cikaba nga Araba,+ ukufuma ku Geba+ ukufika ku Rimone+ ku kapinda ka ku kulyo aka Yerusalemu; kabili akema na bantu bakekala muli ena,+ ukufuma pa Mpongolo ya kwa Benjamini+ ukufika ukwaba Impongolo ya Kubalilapo, ukuyafika na ku Mpongolo ya pa Kona, kabili ukufuma pa Lupungu lwa kwa Hananele+ ukuyafika na ku fya kukaminamo umwangashi ifya mfumu. 11 Kabili abantu bakekala muli ena; takwakabe ne cikonaulwa na kabili,+ na bantu bakekala umutelelwe mu Yerusalemu.+

12 “Kabili ici e cikuko ico Yehova akominako abantu na bantu bonse abakemina Yerusalemu ku kumulwisha:+ Umubili wa muntu ukabola, ilyo eminine ku makasa yakwe;+ kabili amenso ya muntu yakabola mu fifokolobwa fya yako, no lulimi lwa muntu lukabola mu kanwa kakwe.

13 “Kabili muli ubo bushiku icimfulunganya ukufuma kuli Yehova cikaba konse konse pali bena;+ kabili cila muntu akafyambata ukuboko kwa munankwe, kabili ukuboko kwakwe kukemina ukuboko kwa munankwe. 14 Kabili Yuda na o akalalwa mu Yerusalemu; ne fyuma fya nko shonse ishamushinguluka fikalonganikwa, golde na silfere ne fya kufwala ifingi nga nshi.+

15 “Kabili ifi e fikaba icikuko ca kwa kabalwe, imfalashi, ingamila, ne mpunda, ne citekwa conse mu nkambi shilya, cikaba, nge cikuko ici.

16 “Kabili bonse abakashalapo pa nko shonse ishileisa ku kwimina Yerusalemu,+ bakalenina no kuya umwaka no mwaka+ ku kukontamina Imfumu,+ Yehova wa mabumba,+ na ku kusefya umutebeto wa nsakwe.+ 17 Kabili onse uushakanine+ ukufuma mu ndupwa+ sha pano isonde ukuya ku Yerusalemu ku kukontamina Imfumu, Yehova wa mabumba, ninshi ne mfula tayakalokelepo pali ena.+ 18 Kabili ngo lupwa lwa ku Egupti taluninine no kwingila, na pali bena tapakalokele imfula nangu imo. Kukaba icikuko ico Yehova akominako inko ishikakaana ukunina no kuya ku kusefya umutebeto wa nsakwe. 19 Ici e cikaba ukukanda kwa pa lubembu lwa Egupti no lubembu lwa nko shonse ishikakaana ukunina ku kusefya umutebeto wa nsakwe.+

20 “Muli ubo bushiku pa nyenjele sha bakabalwe pakaba+ amashiwi ya kuti ‘Bumushilo bwa kwa Yehova!’+ Ne mpoto+ iikalamba iya mu ng’anda ya kwa Yehova ikaba nge mbale ishafonka+ ishaba pa ntanshi ya ciipailo.+ 21 Kabili impoto ishikalamba shonse mu Yerusalemu na mu Yuda shikaba isha mushilo isha kwa Yehova wa mabumba, kabili bonse abaletuula amalambo bakengila no kushibuula no kwipikilamo.+ Kabili muli ubo bushiku tamwakasangwe kabili umwina Kanaani*+ mu ng’anda ya kwa Yehova wa mabumba.”+