Ubulwele bwa Lupuma!

UBULWELE bwa lupuma e mulandu ukalamba uulenga imfwa no kulemana kwabipisha mu fyalo fya ku Masamba ifyalunduluka mu fya kupangapanga. Ishiwi fye line ilya kuti “lupuma” lilondolola ukupumikisha kwa “bulwele bwa kuli bongobongo.” Pa kashita kamo, kuti pambi muleumfwa fye bwino, e lyo pa kashita kambi, mwaumfwa kwati fye mwaponenwa ne nkuba—mu kupumikisha lupuma umwine mwine kuti ayalula ubumi bwenu apakalamba. Nga mwabongololwa no kulemanikwa, kuti pambi mwashala fye cibulu, inkuntu shenu ukonaika, imibele yenu na maka yenu aya kulingulula ukwaluka, kabili kuti mwapatikishiwa ukwingila mu kushomboka ukumoneka kwati kwa mutatakuya pa kuti fye mukekale filya fine mwaleikala no lupwa lwenu.

Langulukeni Ellen Morgan.a Pali Citatu, Ellen uwa myaka 64 ali fye umutuntulu, kabili uwacincila. Pali Cine, ilyo aali no mulume aleshitako fimo, mu kupumikisha Ellen alufishe amaka ya kulanda, ne cinso cakwe calibeyeme. Umubili wakwe walitembawike, kabili aletalantanta fye kwati nakolwa. Lupuma umwine mwine e waikete Ellen!

Pa numa ya kwikatwa kuli lupuma, Ellen alilemanikwe nga nshi ica kuti alefilwa ukucita no tuntu utwayanguka sana, pamo ngo kusamba nelyo ukufwala. Ico alefilwa ukulemba, ukupikula, nelyo ukubila, calengele no kuti inshita shimo shimo alelilalila fye no kunaka apakalamba. Pali iyi nshita, imitontonkanishishe ya kwa Ellen tayaonaike; nangu cibe fyo, camuletele umuseebanya lintu ayumfwile ukuti napamo bambi balemumona nge ciwelewele. Pa numa, Ellen alondolwele ukuti: “Banono fye baishiba ifyo ukupelenganya ukwa uku kwaluka kwa kupumikisha kwambukila inkuntu no muntontonkanya wa muntu. Napene ng’umfwe kwati fye yali e mpela ya buntu bwandi.”

Cinshi cilenga ubulwele bwa lupuma? Bushe uuli onse uwalwala lupuma alambukilwa mu nshila imo ine? Ni shani fintu abapusuka babomba no bu bulwele? Ni shani fintu indupwa sha bapusuka kuli lupuma shibomba? Cinshi ifwe bonse twingacita pa kubatungilila? Loleni! abebeta ifipusho fya musango yu no kumulengo kuti mwishibe imikalile ya bantu abapusuka kuli lupuma kumo ne ya ndupwa shabo ishishombokela pamo na bo.

[Futunoti]