Bushe Ukubikwamo Umulopa Kulakabilwa Cine Cine?

UMWAKA wapwile mu November icipusho cili pa mulu calipushiwe mu cipande ca mu nyunshipepala icalembelwe na Dokota Ciril Godec, ceyamani wa urology pa Long Island College Hospital, mu Brooklyn, New York. Alembele ukuti: “Ilelo napamo umulopa tawingasuminishiwa ukubomfiwa ngo muti, pantu te kuti ufike pa fipimo fya kucingilila ifya kabungwe ka Food and Drug Administration. Umulopa cilundwa ca mubili, kabili ukubikwamo umulopa cimo no kubikwamo icilundwa ca umbi.”

Dokota Godec atile: “Ukubikwamo icilundwa ca umbi e nshila ya kulekelesha iya kundapilamo abalwele. Pa mulandu wa kuti ilingi mulafuma ifyabipa, abalwele balebwa ifishinka fyonse pa nshila shimbi isha kundapilamo ilyo bashilabikwamo icilundwa.” Pa lwa kubikwamo umulopa, asondwelele ukuti: “Ubusuma bwabamo bulatwishikwa sana ica kuti abengi abaishibisha ifya kulepula umubili balipokelela imfundo ya ‘kusengauka ukubika umulopa’ te pa mulandu fye wa nshila sha kundapilamo lelo na pa mulandu we funde.”

Ubwafya bukalamba pa lwa kubikwamo umulopa bwa kuti iminshipendwa ya bantu balyambula amalwele yabipisha, ukusanshako na AIDS. Nangu cingati inshila sha kupiminamo umulopa nashiwaminako mu fyalo ifingi, Dokota Godec atile: “Mwaliba ubusanso mu mulopa ufuma mu bantu abalwala lelo abashilakwata insandesande shilwisha amalwele ishingamoneka lintu umulopa ulepimwa.”

Ilyo alesondwelela icipande cakwe, Dokota Godec aaswike icipusho cili pa muulu, atile: “Ilyo badokota na baishibisha ifya kulepula umubili baleya baleumfwikisha ifyo umwela wa oxygen wenda mu mubili no kwishiba ukuti hemoglobin (ifyo umulopa umoneka) tailingile ukuba iingi nga fintu baletontonkanya kale, kuti basangako inshila shimbi isha kundapilamo ukwabula ukubika umulopa. Mupepi no mwaka uupitilepo, ukulepula ukwapikana ukwa kubikamo umutima na mabu kwalengele abantu ukusuma umulopa uwingi sana ica kuti pa kubalepula balekabila lyonse ukubikwamo umulopa uwingi sana. Nomba ishi nshila sha kundapilamo shibili shalibomfiwa ukwabula ukubomfya umulopa.

“Nomba line takwakabe ukubikwamo umulopa. . . . Ukubikwamo umulopa kwa mutengo, kwalibipa; kabili te nshila yawamisha iya kundapilamo abalwele.”