Bushe Ukundapwa Ukusuma Ni Kwisa?
Dokota Michael Rose, umukalamba wa fya cipatala kabili uwaishiba bwino ukulepula abalwele, atile: “Umulwele onse uo baundapa ukwabula ukubomfya umulopa, ninshi uyo, eo babombela bwino nga nshi.” Ilyo balebombela umulwele ukwabula ukubomfya umulopa, ni nshila nshi bengabomfya? Mufwile ukwishiba ishi nshila pa kutila mwasala bwino inshila mwingatemwa bamubombelamo. Tambeni vidio atila No Blood—Medicine Meets the Challenge. Nga mwatamba, lyena yipusheni mwe bene aya mepusho mumone nga namumfwa.—Ishibeni ukuti muli iyi vidio mumo mumo balalanga badokota balebombela umulwele, kanshi abafyashi bafwile ukumona ifiputulwa bengatamba na bana babo.
(1) Mulandu nshi uukalamba uo Inte sha kwa Yehova bakaanina ukubabikamo umulopa? (2) Pa lwa kundapwa cinshi Inte sha kwa Yehova bafwaisha? (3) Ni nsambu nshi umulwele onse akwata? (4) Mulandu nshi calingila kabili cabelamo amano ukusala umuti umbi ukucila ukusumina ukumubikamo umulopa pa kundapwa? (5) Umulopa nga ulefuma sana pa kulepula, finshi fibili ifyo badokota bengacita bwangu bwangu? (6) Fishinte nshi fine ifyo bakonka nga baleundapa umulwele ukwabula ukubomfya umulopa? (7) Bushe badokota kuti (a) bacefyako shani ukufuma kwa mulopa, (b) bacita shani pa kuti insandensande sha kashika tashifumine sana mu mulopa, (c) balenga shani umulopa ukufula mu mubili, na (d) bacita shani pa kuti umulopa ube filya fine wali pa kutendeka? (8) Londololeni ukundapa uko batila (a) hemodilution na (b) cell salvage. (9) Finshi mwingafwaya mwaishiba ukukuma ku nshila balamubombelamo? (10) Bushe badokota kuti bamubombela ukwabula ukumubikamo umulopa nga ca kuti ubwafya nabukula sana? (11) Bushe badokota abengi balesumina ukuti inshila ya kubombelamo abalwele iisuma ni nshila nshi?
Pali ishi nshila balangile muli iyi vidio, umuntu umwine e ukaisalila inshila balamubombelamo ukulingana ne fyo asambilila mu Baibolo. Bushe namusala inshila mwingatemwa bamubombelamo pamo na bana benu? Balupwa benu abashili ni ba Nte nabo mufwile ukubalondolwela bwino ifyo mupingwile no mulandu mupingwilile fyo.—Moneni “Ifipusho Ukufuma ku Babelenga” mu Ulupungu lwa kwa Kalinda ulwa June 15, 2004, no lwa October 15, 2000.