Bushe Mwalishiba Ifyo Mwingacita?

Ukundapa ukwabula ukubomfya umulopa nakwamba ukuseeka mu fipatala ifingi ifya muno Zambia. Bushe mwalishiba bwino ifyo mwingasalapo ukucita nga mulefwaya ukundapwa ukwabula ukubomfya umulopa? Mufwile ukwishiba pa kuti mwingapingulapo bwino ifyo mulefwaya ukundapwa nangu ukulepulwa. Tambeni vidio ya mutwe wa kuti No Blood—Medicine Meets the Challenge. Nga mwatamba, pepeni no kupituluka mu fyo musambilile ukubomfya amepusho yali pe samba.—Icishibisho: Pa mulandu wa kuti muli iyi vidio mwaliba abantu bamo abo balanga ninshi balebatumbula, abafyashi bafwile ukumona nga kuti caba fye bwino ku bana babo abaice ukutambako ifya musango yo nelyo iyo.

(1) Mulandu nshi uukalamba Inte sha kwa Yehova bakaanina ukubikwamo umulopa? (2) Ukukuma ku kundapwa, finshi Inte sha kwa Yehova bafwaya? (3) Ni nsambu nshi umulwele onse akwata? (4) Mulandu nshi calingila kabili cabela ica mano ukukaana ukubikwamo umulopa? (5) Nga ca kuti umulopa uwafuma naufulisha nga nshi, fintu nshi fibili ifyacindamisha badokota bakabila ukucita? (6) Fintu nshi fine (4) ifyo badokota bengacita umulwele nga akaana ukubikwamo umulopa? (7) Badokota (a) kuti bacefyako shani ukonaika kwa mulopa ilyo balebombela umuntu, (b) kuti basungilila shani insandesande shakashika isha mu mulopa, (c) kuti bacita shani pa kuti umulopa ufule mu mubili, na (d) kuti babomfya shani umulopa wa muntu uufumine? (8) Londololeni inshila ya kundapilwamo iyo beta ukuti (a) hemodilution na (b) cell salvage. (9) Finshi mwingafwaya ukwishiba ukukuma ku kubikwamo fimbi ifishilimo umulopa? (10) Bushe kuti kwaba ukulepula ukwakulisha kabili ukwayafya ukwabula ukubikwamo umulopa? (11) Fintu nshi ifisuma ifyo badokota abengi nomba balesumina ukucita?

Ukusumina ukundapwa konse ukwalondololwa muli iyi vidio, kulingile ukuba kupingulapo kwa muntu pa lwakwe ukulingana na kampingu yakwe iyasambilishiwa na Baibolo. Bushe mwalipingulapo bwino bwino pa fya kundapwa ne nshila ya kundapilwamo ifyo mwingatemwa ukukonka imwe na bana benu, kabili bushe mwalilemba kardi ya DPA? Nga mulefwaya ifyebo fyonse pali ili lyashi, belengesheni na kabili “Amepusho Ukufuma ku Babelenga” mu Ulupungu lwa kwa Kalinda ulwa June 15, 2004, no lwa October 15, 2000. Lyena bomfyeni ipepala lyaba mu Ubutumikishi Bwesu Ubwa Bufumu ubwa November 2006, apaba umutwe wa kuti “Bushe Imona Shani Tumo Tumo Utufuma ku Fikalamba Ifyaba mu Mulopa ne Myundapile iyo Bengabomfya Umulopa Wandi?,” ku kupingulapo ifyo mwingatemwa ukusumina nangu ukukaana. Mu kulekelesha, mwilaba ukulemba bwino bwino pali kardi ya DPA ifyo mwasalapo . Mufwile no kulondolwela abo mwasala ukumwimininako mu fya cipatala na balupwa benu bonse abashili Inte, ukuti ifi e fyo mulefwaya badokota bakakonke.

[Akabokoshi pe bula 3]

• Bushe mwalipingulapo ukundapa uko imwe na bana benu mwingatemwa?

• Bushe mulasenda kardi ya DPA iyalembwapo epali yakabilwa ukubomfiwa ilyo mwalwala mu kupumikisha?