Bushe na Nomba Tamulalemba Kardi Wenu?
Inte sha kwa Yehova bonse ababatishiwa balingile ukulemba kardi ya kuti Uwa Kunjimininako Kuli Badokota mu ciNgeleshi (DPA). Apo “tamwaishiba ifyo ubumi bwenu bukaba mailo,” kanshi nacicindama ukupingulapo kabela e lyo no kulemba ishina lya myundapile ne fyo mwingafwaya bakamundape nga mwalwalisha. (Yako. 4:14; Imil. 15: 28, 29) Vidio ya Transfusion-Alternative Health Care—Meeting Patient Needs and Rights, kuti yamwaafwa. Tambeni iyi vidio no kupepelapo pa fyo mwasambilila ilyo muleipusha amepusho ayalembelwe pano.—Ico mufwile ukwishiba ca kuti: Apo muli iyi vidio muli ifikope fya kulepula abalwele, abafyashi balingile ukumona nampo nga abana abanono nabo kuti batambako.
(1) Mulandu nshi badokota bamo na babomba mu fipatala batampile ukumona ukuti ukubomfya umulopa te kusuma mu kundapa abalwele?
(2) Landeni pa bantu batatu abo bacitile opareshoni iikalamba sana ukwabula ukubabikamo umulopa. (3) Ni banga badokota mu calo fye conse, abaitemenwa ukundapa abalwele ukwabula ukubabikamo umulopa? Mulandu nshi balefwaila ukulacitile fyo? (4) Bushe finshi ifyo aba mu fipatala basanga pa kubomfya umulopa? (5) Mafya nshi umuntu akwata nga bamubikamo umulopa? (6) Finshi badokota abengi basanga ukuti fisuma ku kundapa abantu ukwabula ukubabikamo umulopa? (7) Cinshi cilenga ubulwele bwa kucepelwa umulopa? Umuntu nga nalwala ubulwele bwa kucepelwa kwa mulopa ni pi apo umulopa ulingile ukupela pa kuti e fwa? Cinshi mwingacita pa kuti umulopa ufule? (8) Finshi mwingapeela umulwele pa kuti insandesande shakashika shifule mu mubili? (9) Pa kuti umulopa wifuma sana ilyo balelepula umulwele, finshi babomfya? (10) Bushe abaice nelyo abakalamba abalwele sana kuti babondapa ukwabula ukubabikamo umulopa lelo ukubomfya inshila shimbi isha kufushishamo umulopa? (11) Cinshi icacindama sana mu kundapa umulwele ico badokota baebwa ukukonka? (12) Mulandu nshi cacindamina ku Bena Kristu ukusalila limo ifyo bakabondapa ukwabula ukubikwamo umulopa nga balwalisha nelyo nga bakaya ku opareshoni? Kuti twasala shani ifyo bengatundapa?
Umuntu nga asumina inshila sha kundapilwamo isho balangishe pa vidio, kupingulapo kwakwe umwine ukulingana ne fyo asambilila mu Baibolo. Bushe imwe na bana benu mwalisala bwino bwino inshila mulefwaya ukundapilwamo? Nga mulefwaya ifyebo na fimbi, belengeni “Ifipusho Ukufuma ku Babelenga” ifyafumine mu Ulupungu lwa kwa Kalinda ulwa June 15, 2004, na October 15, 2000 ne ca mu kati ica Ubutumikishi Bwesu Ubwa Bufumu ubwa November 2006 icakwete umutwe wa kuti: “Bushe Imona Shani Tumo Tumo Utufuma ku Fikalamba Ifyaba mu Mulopa ne Myundapile iyo Bengabomfya Umulopa Wandi?” Abo mwasala ku kumwimininako abo mwalemba pali kardi wenu kabili na ba lupwa lwenu abali bonse abashipepa, balingile ukwishiba bwino bwino ifyo mufwaya ukumundapa.