Bushe Mwalisala Ifyo Mwingafwaya Ukundapwa Nga Mwalwalisha?

Ifwe fwe bantu, mu kupumikisha fye, kuti twalwalisha. (Yako. 4:14) E co kanshi uwasalapuka alaipekanishisha libela. (Amapi. 22:3) Bushe mwalisala ifyo mwingatemwa ukundapwa kabili bushe mwalilemba? Pa kuti mwishibe bwino ifyo mwingasalapo pa kundapwa, kwaliba DVD iya kuti Transfusion-Alternatives—Documentary Series, umwaba imitwe itatu, nomba mukatambe umutwe wa kuti Transfusion-Alternative Health Care—Meeting Patient Needs and Rights. Ilyo muletamba, moneni nga kuti mwa-asuka amepusho ayali pe samba. Pa mulandu wa kuti muli iyi vidio balilangamo ne fyo balelepula umuntu, abafyashi balingile ukumona nga cili fye bwino ukutambila pamo na bana abanono.

(1) Mulandu nshi badokota bamo bamo shino nshiku batendekela ukutontonkanya nga caliba fye bwino ukubika umulopa mu muntu nelyo iyo? (2) Landeni pa kulepula abantu kutatu ukwayafya nga nshi uko badokota bacitile ukwabula ukubikamo umulopa. (3) Cinshi badokota abengi mu calo baipeelesesha ukubombela abalwele ukwabula ukubabikamo umulopa? (4) Finshi abasambilila pa kundapa abantu mu fipatala basanga ukulosha ku mulopa? (5) Mafya nshi abengi bakwata pa mulandu wa kubabikamo umulopa? (6) Fisuma nshi badokota balanda pa nshila shimbi isha kundapilamo abantu ukwabula ukubomfya umulopa? (7) Finshi filenga umulopa ukucepa mu mubili, kabili finshi mwingapeela umulwele pa kuti umulopa ufule? (8) Finshi bapeela umulwele pa kuti insandesande shakashika shifule mu mubili? (9) Ni nshila nshi babomfya pa kuti umulopa wifuma sana pa kulepula umuntu? (10) Bushe inshila sha kundapilamo abantu ukwabula ukubomfya umulopa kuti shabomba na ku bana abanono abalekabila amaopareshoni ayakalamba? (11) Cishinka nshi icacindama sana mu kundapa umulwele ico badokota baebwa ukukonka?

Apo ukusumina ukundapwa kumo kumo ukuli muli iyi vidio ciba kuli kampingu wa muntu, kanshi mwilolela ukufikila lintu mwalwalisha e lyo mukatampe ukumona imyundapile iyo mwingasumina nelyo ukukaana. Belengeni icipandwa 7 mu citabo ca “Ikalilileni mu Kutemwa kwa kwa Lesa” ne fya kuloshako ifilimo e lyo ne ca mu kati ica mu Ubutumikishi Bwesu Ubwa Bufumu ubwa mu November 2006, cikamwafwa ukupingulapo bwino. Na mu kulekelesha, nga mwalibatishiwa, lembeni pali kardi ya Uwa Kunjimininako (DPA) ifyo musalilepo, kabili te kwesha ukuisha konse uko muleya.

[Amashiwi pe bula 3]

Bushe mwalisala ifyo mwingatemwa ukundapwa kabili bushe mwalilemba?