Bushe na Nomba Tamulalemba?
Ukulemba finshi? Ukulemba kardi ya Uwa Kunjimininako Kuli Badokota iyo beta mu ciNgeleshi ati durable power of attorney (DPA) iyo bapangila Inte sha kwa Yehova bonse ababatishiwa. Apo te “kuti mwishibe icikamucitikila mailo,” nacicindama ukuti mwasalila calimo no kulemba umusango wa kundapwa uo mwasalapo epali mwalwala ica kuti mwakabila no kumubombela. (Yako. 4:14; Imil. 15:28, 29) Pa kuti mwishibe bwino ifyo mwingasalapo pa kundapwa, kwaliba vidio iingamwafwa iya kuti Transfusion-Alternative Health Care—Meeting Patient Needs and Rights. Intanshi tambeni iyi vidio, lyena pitulukeni mu fyo mwatamba ukubomfya amepusho yalakonkapo kabili pepelenipo.—Icishibisho: Pa mulandu wa kuti muli iyi vidio balilangamo ne fyo balelepula umuntu, abafyashi balingile ukumona nga cili fye bwino ukutambila pamo na bana abanono.
(1) Mulandu nshi badokota bamo bamo shino nshiku batendekela ukutontonkanya nga caliba fye bwino kubika umulopa mu muntu nelyo iyo? (2) Landeni pa kulepula abantu kutatu ukwayafya nga nshi uko badokota bacitile ukwabula ukubikamo umulopa. (3) Bushe ni badokota banga mu calo conse abaipeelesha ukubombela no kundapa abalwele ukwabula ukubabikamo umulopa? Cinshi basuminina ukucite co? (4) Finshi abasambilila pa kundapa abantu mu fipatala basanga ukulosha ku mulopa? (5) Mafya nshi abengi bakwata pa mulandu wa kubabikamo umulopa? (6) Fisuma nshi badokota balanda pa nshila shimbi isha kundapilamo abantu ukwabula ukubomfya umulopa? (7) Finshi filenga umulopa ukucepa mu mubili? Bushe umulopa wa muntu kuti wacepa ukufika pi ilyo umuntu ashilafwa? Finshi mwingapeela umulwele pa kuti umulopa ufule? (8) Finshi bapeela umulwele pa kuti insandesande shakashika shifule mu mubili wa mulwele? (9) Ni nshila nshi babomfya pa kuti umulopa wifuma sana nga balelepula umuntu? (10) Bushe ishi nshila sha kundapilamo abantu ukwabula ukubomfya umulopa kuti shabomba na ku bana abanono abalekabila amaopareshoni ayakalamba? (11) Cishinka nshi icacindama sana mu kundapa umulwele ico badokota baebwa ukukonka? (12) Mulandu nshi cacindamina ku Bena Kristu ukusalila limo inshila sha kundapilamo isha kukanabomfya umulopa? Kuti twacita shani ifi?
Umuntu umwine e ufwile ukuisalila ukundapwa kumo kumo ukuli muli iyi vidio kabili afwile ukumfwila kampingu yakwe iyakanshiwa bwino na Baibolo. Bushe mwalisala bwino bwino imyundapile iyo mwingatemwa pamo na bana benu e lyo no kusaina kardi ya Uwa Kunjimininako? Nga mulefwaya ukulanshanya bwino bwino aya malyashi, belengeni icipandwa 7 mu citabo ca “Ikalilileni mu Kutemwa kwa kwa Lesa” e lyo no kubelenga Ifyebo na Fimbi ifyaba ku mpela ya citabo. Belengeni ne ca mu kati ica mu Ubutumikishi Bwesu Ubwa Bufumu ubwa mu November 2006 pa cipande citila “Bushe Imona Shani Tumo Tumo Utufuma ku Fikalamba Ifyaba mu Mulopa ne Myundapile iyo Bengabomfya Umulopa Wandi?” Na mukulekelesha shininkisheni ukutila mwalemba bwino bwino ifyo musalile pali kardi ya Uwa Kunjimininako. Mufwile ukulondolwela bwino bwino abo mwasala ukumwimininako pamo na balupwa lwenu abashili Inte sha kwa Yehova ukuti ifi e fyo mwe bene musalilepo.
[Akabokoshi pe bula 3]
• Bushe mwalisala bwino bwino imyundapile iyo mwingatemwa pamo na bana benu?
• Bushe lyonse mulenda na kardi ya Uwa Kunjimininako iyasainwa pa mulandu wa kuti limbi kuti mwaba mu busanso?