Bushe Mwalishiba Ifyo Mwingacita?
Ukundapa ukwabula ukubomfya umulopa nakuya kuleseeka mu fipatala ifingi ifya muno calo. Bushe mwalishiba bwino ifyo mwingasalapo ukucita nga mulefwaya ukundapwa ukwabula ukubomfya umulopa? Mufwile ukwishiba pa kuti musale bwino inshila mwingatemwa ukundapilwamo nelyo ukulepulwa. Tambeni vidio ya mutwe wa kuti No Blood—Medicine Meets the Challenge. Nga mwatamba, pepeni no kupituluka mu fyo musambilile ukubomfya amepusho yali pe samba.—Icishibisho: Pa mulandu wa kuti muli iyi vidio balilanga badokota baletumbula abantu, abafyashi bafwile ukumona nga kuti caba fye bwino ku bana abanono ukutambako ifya musango uyo.
(1) Mulandu nshi uukalamba Inte sha kwa Yehova bakaanina ukubabikamo umulopa? (2) Ukukuma ku kundapwa, finshi Inte sha kwa Yehova bafwaya? (3) Ni nsambu nshi umulwele onse akwata? (4) Mulandu nshi calingila kabili cabela ica mano ukusala inshila shimbi isha kundapilwamo ukwabula ukubikwamo umulopa? (5) Nga ca kuti umulopa wafuma sana, fintu nshi fibili ifyacindamisha ifyo badokota bakabila ukucita mu kwangufyanya? (6) Fintu nshi fine (4) ifyo badokota bengacita umulwele nga akaana ukubikwamo umulopa? (7) Badokota (a) kuti bacita shani pa kuti umulopa wifuma uwingi ilyo balebombela umuntu, (b) kuti basungilila shani insandesande shakashika isha mu mulopa, (c) kuti bacita shani pa kuti umulopa ufule mu mubili, na (d) kuti babomfya shani umulopa uulefuma? (8) Londololeni inshila ya kundapilwamo iyo beta ukuti (a) hemodilution na (b) cell salvage. (9) Finshi mwingafwaya ukwishiba ukukuma ku kubikwamo fimbi ifishilimo umulopa? (10) Bushe badokota kuti bacita opareshoni iikalamba kabili iyayafya ukwabula ukubikamo umulopa? (11) Fintu nshi ifisuma ifyo badokota abengi nomba balesumina ukucita?
Umuntu umwine e ulingile ukusumina ukundapwa kumo kumo ukwalondololwa muli iyi vidio, ukulingana na kampingu yakwe iyasambilishiwa na Baibolo. Bushe mwalipingulapo bwino bwino pa miti mwingatemwa ukubomfya ne nshila sha kundapilwamo ifyo mwingatemwa ukukonka imwe na bana benu, kabili bushe mwalilemba kardi ya DPA? Nga mulefwaya ifyebo fyonse pali ili lyashi, belengesheni na kabili “Amepusho Ukufuma ku Babelenga” mu Ulupungu lwa kwa Kalinda ulwa June 15, 2004, no lwa October 15, 2000. Lyena bomfyeni ipepala lyaba mu Ubutumikishi Bwesu Ubwa Bufumu ubwa November 2006, apaba umutwe wa kuti “Bushe Imona Shani Tumo Tumo Utufuma ku Fikalamba Ifyaba mu Mulopa ne Myundapile iyo Bengabomfya Umulopa Wandi?,” ku kupingulapo ifyo mwingatemwa ukusumina nangu ukukaana. Mu kulekelesha, mwilaba ukulemba bwino bwino pali kardi ya DPA ifyo mwasalapo. Mufwile no kulondolwela abo mwasala ukumwimininako mu fya cipatala na balupwa benu bonse abashili Inte, ukuti ifi e fyo mulefwaya badokota bakakonke