IFINGAFWA ULUPWA | UKUKUSHA ABANA

Ifyo Mwingapangila Imisepela Amafunde

UBWAFYA UBUBAPO

Umwana wenu umusepela alanda ati mulakosha sana amafunde. Lelo imwe mumona ati, amafunde mwamupeela yaliba fye bwino kabili ico mufwaya fye kumucingilila. Mutontonkanya ati nga mwanashako amafunde, umwana wenu kuti aba mu bwafya!

Kwena, tacalubana ukupanga amafunde ayalinga aya kuti umwana wenu umusepela alekonka. Na lyo line, intanshi mufwile ukwishiba ico umwana wenu tafwaila ukukonka amafunde mumupeela.

UMULANDU KUBELA UBU BWAFYA

Ifya bufi ifyo abantu balanda: Imisepela yonse fye tabafwaya ukubapangila amafunde aya ku ti balekonka; e fyo ciba fye nga bafika pali uyu mushinku.

Icishinka: Amafunde abafyashi bapangiile umwana nga yali fye ayalinga e lyo kabili bamulondolwela na bwino ico bamupeelele ayo mafunde, te lingi umwana engakaana ukuyakonka.

Nangu ca kuti kwaliba ifingi ifilenga abana belatemwa amafunde abafyashi babapangila, limo abafyashi ukwabula no kwishiba e balenga abana ukupata amafunde balebapeela pa mulandu wa kuti amafunde balebapeela yalyumina kumo kabili basunga abana kwati bacili abaice. Moneni ifingalenga abana ukukanakonka amafunde ya bafyashi:

Ukukanalangulukilako. Abafyashi nga baleti nga bapanga amafunde ninshi abana bafwile fye ukuyakonka kabili tabafwile ukulandapo ne cili conse, abana tabamona ati amafunde mulebapeela ya kubacingilila, lelo bamona kwati mulebatitikisha. Ne ci, cilenga abana ukutendeka ukucita ifyo mwabakaanya ku mbali.

Ukusunga umusepela kwati kaice. Umwana nga acili umwaice alomfwa nga mwamweba fye ati “wilacita ifi,” lelo nga akula aba umusepela, pa kuti omfwe kano mwamweba no mulandu mwamukanisha ukucita fimo. Na kuba, nomba line umwana wenu umusepela ali no kutendeka ukulaikalila kabili akalaipingwila pa fintu ifyacindama. Kanshi calicindama ukuti alesambilila ifya kupingula bwino pa fintu ilyo acili pa ng’anda pa mwenu.

Nomba kuti mwacita shani nga ca kuti umwana wenu alafulwa lyonse nga mwamupeela amafunde?

IFYO MWINGACITA

Intanshi, mufwile ukwishiba ukuti imisepela nangu tabalanda, balafwaya abafyashi ukulabatungulula, balakabila ukubeba ifyo bafwile ukucita ne fyo bashifwile ukucita. E ico, pangeni amafunde, kabili londolweleni umwana ico mwamupeelela ayo mafunde. Icitabo ca Letting Go With Love and Confidence citila, “Nga mwalondolwela bwino bwino abana benu imisepela ifyo balingile ukucita ne fyo bashilingile ukucita kabili mulebamusopa fye mukulinga, ilingi balaba abana basuma. Lelo abafyashi abaleka abana baleicitila fye ifyo balefwaya, balenga abana balamona kwati tababikako amano. Ne ci, kuti calenga abana baleka ukumfwila abafyashi.”—Ilembo ilingamwafwa: Amapinda 29:15.

Cinshi cingamwafwa? Muleleka umwana wenu alelandapo pa mafunde mulemupeela. Ku ca kumwenako, nga alomba ukuti mu mulundileko inshita ya kuti alebwela pa ng’anda, kutikeni ilyo alelondolola. Umusepela nga aishiba ukuti mulakutika ku fyo alanda, akulakonka ifyo mulemweba, nangu ca kutila tafitemenwe sana.—Ilembo ilingamwafwa: Yakobo 1:19.

Lelo ilyo tamulamweba ifya kucita, muleibukisha ici: Nangu ca kutila imisepela ilingi line balafwaya ukubapeela sana ubuntungwa, abafyashi nabo ilingi tabapeela abana ubuntungwa balingile ukubapeela. Kanshi umwana nga afwaya fimo, mwilafikila fye ukukaana, muletontonkanyapo. Yipusheni amuti, bushe ifyo acita filanga ukutila kuti twamucetekela? Bushe kuli ificitike ifingalenga musuminishe ifyo alelomba? Mulealulako fimo nga nacilinga.—Ilembo ilingamwafwa: Ukutendeka 19:17-22.

Nga mwaishiba ifyo umwana wenu aletontonkanya, na imwe mwebeni ifyo muletontonkanya. Nga mulecita ifi, nalimo kuti mwasambilisha umwana ukulatontonkanya na pa fyo bambi baleumfwa, mu nshita ya kufwaya fye ifyo alefwaya.—Ilembo ilingamwafwa: 1 Abena Korinti 10:24.

Pa numa ya kulanshanya mwebeni ifyo mwapingula no kulanda umulandu mwapingwile ifyo. Nangu ca kuti umwana tatemenwe pa fyo mwapingula, ilingi line umwana alomfwa bwino ukuti abafyashi balamupoosako amano kabili balamukutika. Nga mulecita ifi, ninshi mulesambilisha umwana wenu ukulacita ifintu ngo mukalamba. Nga tamulekosha sana amafunde kabili mulelanshanya no mwana umulandu mulemupelela amafunde, akakula bwino.—Ilembo ilingamwafwa: Amapinda 22:6.