Umukolamfula Wa Kubalilapo

BUSHE walishiba ico Noa abalilepo ukucita ilyo afumine mu cibwato no lupwa lwakwe? Apeele ilambo nelyo ubupe kuli Lesa. Mona uko alepeela ubu ubupe pa cikope cili pe samba. Noa apeele inama kuli Lesa pa kumutasha pali filya apuswishe ulupwa lwakwe ku lyeshi ilikalamba.

Bushe uletontonkanya Yehova alitemenwe bulya ubupe? Ee. E co aebele Noa ukuti takabale onaula isonde na kabili ku lyeshi.

Ilyo amenshi yakamine fye, Noa no lupwa lwakwe balifumine mu cibwato no kutendeka ukukuula amayanda no kulima. Kabili Lesa alibapaalile no kubeba ati: ‘Fyalaneni kabili mufule no kukumana isonde lyonse.’

Lelo mu kuya kwa nshita, abantu nga baumfwa ukuti kwali ilyeshi ilikalamba, nalimo nga baletiina ati kukaba na limbi. E ico Lesa alibikile icishibilo ca kubebukisha ukuti alilaya ukutila takalete ilyeshi na kabili. Bushe walicishiba ico icishibilo? Mukolamfula.

Imfula nga yaloka, umukolamfula ilingi ulamoneka mu muulu akasuba nga kabalika. Umukolamfula ulamoneka bwino sana. Bushe waliumonapo? E uyu uuli pa cikope.

Lesa atile: ‘Nalaya ukuti nshakabale ngonaula abantu ne nama ku lyeshi. Ndebika umukolamfula mu makumbi. Kabili lyonse umukolamfula nga wamoneka, nkalaibukisha ico nalaile.’

Bushe nga wamona umukolamfula, wakulaibukisha cinshi? Ukalaibukisha ubulayo bwa kwa Lesa ubwa kuti takabale onaula isonde na kabili ku lyeshi ilikalamba.