Abantu Bakuula Icilupungu

PA NUMA ya myaka iingi, abana baume ba kwa Noa balikwete abana abengi. Abeshikulu ba kwa Noa nabo balikulile no kukwata abana abengi. Na mu kuya kwa nshita abantu balifulile sana pe sonde.

Nimrode, icishikululwa ca kwa Noa, na o alifyelwe muli shilya nshiku. Ali umubi umutima, kabili aleipaya inama na bantu kumo. E lyo ali-ipeele ubufumu no kutendeka ukuteka abantu. Lesa tatemenwe Nimrode.

Pali ilya nshita abantu bonse balelanda icitundu cimo fye. Nimrode alefwaya abantu bonse ukulaikala pamo pa kuti alebateka. Bushe nawishiba ico acitile? Aebele abantu ukukuula umusumba umwali no kuba icilupungu. Bamone mu cikope ninshi balepanga injelwa.

Yehova Lesa talefwaya abantu ukukuula icilupungu, alefwaya abantu baikala mwi sonde lyonse. Lelo abantu batile: ‘Aleni! Natukuule umusumba no lupungu ulutali ulwa kuti lufike ku muulu. Lyena tukeshibikwa ku bengi!’ Ico balefwaya kucindikwa, te kucindika Lesa iyo.

E ico Lesa acitile ifyalengele baleke ukukuula. Bushe nawishiba ifyo acitile? Alengele batendeka ukulanda ifitundu ifyapusana mu nshita ya kulanda icitundu cimo fye. Abalekuula batendeke ukufilwa ukumfwa ifyo abanabo balelanda. E mulandu wine umusumba wabo bawinikile ati Babele, nelyo Babiloni, icipilibula ukuti “Icimfulunganya.”

Abantu batendeke ukufuma mu Babele. Abalelanda icitundu cimo cine, baile mu kwikala pamo mu fifulo fimbi pe sonde.