December

Abasambi ba kwa Yesu balisumiine mu Cebo ca kwa Lesa kabili bale-esha na maka yabo yonse ukukonka ifyo cilanda. (Yoh. 17:6) Lelo tabaumfwikishe icalengele Yesu bamwipaye pa cimuti ca kucushiwilwapo kwati cipondo. Yesu alishibe ukuti abasambi bakwe balikwete icitetekelo kabili balitemenwe Yehova. Lelo alilwike ukuti balingile ukumfwikisha Amalembo. (Luka 9:​44, 45; Yoh. 20:9) E ico alibafwile pa kuti bengomfwikisha ifyo balebelenga mu Malembo. Tontonkanyeni pa fyo acitile ifi ilyo amoneke ku basambi babili mu musebo waile ku Emao. Yesu taisokolwele kuli aba basambi ilyo amonene fye nabo. Lelo alebepusha amepusho. Cinshi alebepushisha? Nalimo alefwaya bailandile ifyo baletontonkanya ne fyali mu mitima yabo. Ifi fine e fyo bacitile. Balimwebele ukutila bale-enekela ukuti Yesu ali no kubalubula ku bena Roma ababatekele ku munga we fwafwa. (Luka 24:​18-27) Yesu alibalondolwelele Amalembo pa kuti beshibe ukuti amasesemo ayengi yalifikilishiwe. Pa numa, bulya bwine bushiku mu nshita ya bushiku, Yesu alimonene na basambi na bambi kabili nabo bene alibalondolwelele umwalolele aya amasesemo.—Luka 24:​33-48. w24.10 ibu. 14 amapara. 9-10

Yesu asambilile kuli Wishi wa ku muulu ifya kucita ne fya kulanda. Icilonganino ca kwa Yehova cilakonka ifyo Yesu alecita pantu cilatusambilisha ifyaba mu Cebo ca kwa Lesa pa kuti twishibe ifyo Yehova amona ukuti fyalibipa ne fyo amona ukuti fisuma. Na kabili cilakonka ifyaba mu Cebo ca kwa Lesa pa kututungulula. (2 Tim. 3:​16, 17) Lyonse icilonganino ca kwa Yehova cilatwibukishako ukuti tufwile ukulabelenga Icebo ca kwa Lesa kabili tulingile ukulacita ifyo cilanda. Tulanonkelamo sana nga ca kuti ilyo tuleisambilisha Baibo tulebomfya impapulo ishilanda pali Baibo. Ku ca kumwenako, tulalinganya ifyo tusambilila mu Baibo ku fyo icilonganino ca kwa Yehova citweba. Nga twamona ukuti ifyo icilonganino ca kwa Yehova citweba fifuma mu malembo, tulacetekela sana icilonganino ca kwa Yehova. (Rom. 12:2) Yesu alebila “imbila ya Bufumu bwa kwa Lesa.” (Luka 4:​43, 44) Na kabili Yesu aebele abasambi bakwe ukuti balebila pali ubu Ubufumu. (Luka 9:​1, 2; 10:​8, 9) Muno nshiku bonse ababa mu cilonganino ca kwa Yehova balabila imbila nsuma pali ubu Ubufumu, te mulandu no ko bekala. w24.04 ibu. 9 amapara. 5-7

Lyonse mulekonka ifyo icilonganino ca kwa Yehova citweba. Mu nshita ya bena Israele, Yehova alebomfya Mose, lyena pa numa aishiletendeka ukubomfya Yoshua pa kweba abena Israele ifyo alefwaya ukuti bacite. (Yosh. 1:17) Lyonse ilyo abena Israele balemona Mose na Yoshua ukuti balelandilako Yehova Lesa, ifintu fyalebawamina. Ilyo papitile imyaka iingi lintu icilonganino ca Bena Kristu capangilwe, abatumwa 12 e bale-eba abantu ba kwa Lesa ifya kucita. (Imil. 8:​14, 15) Pa numa, muli ili ibumba lya batumwa mwaishileba na bakalamba bambi aba mu Yerusalemu. Pa mulandu wa kuti aba mu filonganino balekonka ifyo aba baume ba cishinka balebeba, “icitetekelo ca ba bwananyina abali mu filonganino calekoselako kabili balefulilako cila bushiku.” (Imil. 16:​4, 5) Muno nshiku, na ifwe Yehova alatupaala nga tulekonka ifyo icilonganino cakwe ciletweba. w24.07 ibu. 10 para. 10

Yehova alitemenwe sana Imfumu Davidi. Aitile Davidi ati “uo umutima wandi watemwa.” Lelo Davidi alicitile imembu ishikalamba pamo ngo bucende no kwipaya umuntu. Ukulingana na mafunde ya kwa Mose, Davidi balingile ukumwipaya pa membu acitile. (Lebi 20:10; Impe. 35:31) Lelo Yehova alefwaya ukwafwa Davidi pa kuti alapile. Alitumine kasesema wakwe Natani ku Mfumu Davidi, nangu ca kuti pali ilya nshita ninshi Davidi talalapila. Natani alilandile icilangililo icalengele Davidi eluke ukuti alicitile imembu ishikalamba. Davidi alilwike ukuti alikalifye sana Yehova kabili alilapiile. (2 Sam. 12:​1-14) Alilembele ilumbo ililanga ifyo aumfwile ububi pa fyo acitile. (Amalu. 51, utumashiwi twa pa muulu) Ifyaba muli ili ilumbo fyalisansamusha abantu abengi ababembukapo kabili fyalilenga balapila. Bushe tatutemwa nga nshi nga twatontonkanya pa fyo Yehova ayafwile umubomfi wakwe Davidi pa kuti alapile? w24.08 ibu. 10 para. 9

Ukukusha abana mulimo uukalamba. Nga ca kuti pali ino nshita mulekusha umwana, tulemutasha pa fyo mulebombesha pa kwafwa umwana wenu pa kuti akwate icitetekelo icakosa. (Amala. 6:​6, 7) Ilyo umwana wenu aleya alekula, nalimo kuti alamwipusha pa fyo twasuminamo. Kuti alamwipusha na pa mafunde ya mu Baibo ayalanda pa kuba ne mibele iisuma. Pa kubala, nalimo kuti mwasakamana pantu kuti mwamona kwati ico umwana wenu alemwipushisha ni co tatetekele sana Lesa kabili tacetekele ifyo Baibo ilanda. Nomba icishinka ca kuti, ilyo umwana aleya alekula, alingile ukulaipusha amepusho pa kuti engakosha icitetekelo cakwe. (1 Kor. 13:11) Kanshi tamulingile ukusakamana nangu cimo. E ico nga ca kuti umwana wenu amwipusha amepusho, mulemona ukuti e nshita ya kumwafwa pa kuti eshibe ifya kutontonkanya sana pa fintu. Nga mulecita ifi, umwana wenu akatetekela sana Lesa kabili akacetekela sana ne fyo Baibo ilanda. w24.12 ibu. 14 amapara. 1-2

Abena Kristu abaHebere balingile ukuba ne citetekelo icakosa pa kuti bengesapusuka ubucushi ubwali no kuba mu Yudea. (Heb. 10:​37, 38) Yesu alisokele abasambi bakwe ukuti nga bamona abashilika bashinguluka umusumba wa Yerusalemu, balingile ukufulumukila ku mpili. Abena Kristu bonse, nampo nga baleikala mu musumba nelyo baleikala kunse ya musumba, balingile ukukonka ifyo Yesu alandile. (Luka 21:​20-24) Kale abashilika nga basansa uluko, abaleikala kunse ya musumba balebutukila mu musumba uwali ne linga nga filya umusumba wa Yerusalemu wali pa kuti bacingililwe. Ukubutukila ku mpili mu cifulo ca kubutukila mu musumba wa Yerusalemu calemoneka kwati te kuti cibombe. Kanshi Abena Kristu balingile ukuba ne citetekelo cakosa pa kuti bakonke ifyo Yesu abebele. Na kabili, Abena Kristu abaHebere balingile ukucetekela abo Yesu apeele umulimo wa kutungulula mu cilonganino. Abaletungulula bafwile balyebele aba mu cilonganino inshita bali no kufulumuka, e lyo ne fyo balingile ukucita pa kufulumuka.—Heb. 13:17. w24.09 ibu. 10 amapara. 9-10

Ilyo Yesu ali pano isonde, alebomba bwino sana umulimo uo Wishi amupeele. (Yoh. 17:4) Nomba Yesu taletontonkanya ukuti e wafikilepo fye ukubomba umulimo uo Wishi alefwaya ukuti ubombwe. Alisambilishe abasambi bakwe ifya kubomba uyu mulimo. Yesu alipeele abasambi bakwe umulimo wa kusakamana impaanga ishali ishacindama sana, no mulimo wa kubila imbila nsuma. Abapeele no mulimo wa kutungulula umulimo wa kubila imbila nsuma no kusambilisha abantu pa Bufumu. Yesu talepita abasambi bakwe mu mbali pa kubafunda, lelo aleba ne cikuuku. Bamo tabashininkishe ukuti alifwile kabili alibuushiwe. E ico alibafundile pa kuti beshibe bwino icishinka. (Luka 24:​25-27; Yoh. 20:27) Na kabili alibebele ukuti balingile ukulabika amano ku kusakamana abantu ba kwa Yehova, ukucila ukulabika amano ku kupanga indalama. (Yoh. 21:15) Alibebukisheko no kuti tabalingile ukulalinganya ifyo balebombela Yehova ku fyo abasambi bambi balemubombela. (Yoh. 21:​20-22) Alibalungike na pa fyo baishibe pa Bufumu kabili abebele ukuti balingile ukulabika amano ku kubila imbila nsuma.—Imil. 1:​6-8. w24.10 amabu. 15-16 amapara. 13-14

Nga tuleumfwila Yehova kuti twaisaikala umuyayaya. Nga filya fine cali ku bena Israele abali mupepi no kwingila mu Calo ca Bulayo, na ifwe bene tuli mupepi no kwingila mu calo cipya ico Lesa atulaya. Nomba line isonde lyonse lili no kuba paradaise. (Esa. 35:1; Luka 23:43) Satana Kaseebanya ne fibanda tabakabemo muli ici calo. (Ukus. 20:​2, 3) Tamwakabe imipepele iisambilisha abantu ifya bufi pali Yehova. (Ukus. 17:16) Tamwakabe amabuteko ya bantunse ayatitikisha abantu abo yateka. (Ukus. 19:​19, 20) Tamwakabe ababifi. (Amalu. 37:​10, 11) Abantu bonse abakalaikala mu paradaise bakalakonka amafunde ya kwa Yehova. E ico mwi sonde lyonse mukaba umutende. Kanshi abantu bonse bakatemwana kabili bakacetekelana. (Esa. 11:9) Ala tulafwaisha ifi fikacitike! Kabili nga tuleumfwila Yehova, tukekala mu paradaise umuyayaya pano pene pe sonde.—Yoh. 3:16. w24.11 ibu. 9 para. 7

Ubusesemo buli mwi lembo lya bushiku bwa lelo, bulefikilishiwa sana muno nshiku. Imbila ya Bufumu ilebilwa ukucila mu ndimi 1,000 kabili pa mulandu na webusaiti yesu iya jw.org, abantu abengi pano calo baleumfwa imbila nsuma ya Bufumu bwa kwa Lesa. Lelo Yesu aebele abasambi bakwe ukuti tabali no kupwisha “ukushinguluka imisumba,” nelyo ukubila ku bantu bonse, ilyo impela ashilaisa. (Mat. 10:23; 25:​31-33) Ifi Yesu alandile fikacitika na mu nshiku shesu. Abantu abengi bekala mu fyalo umushaba ubuntungwa bwa kubila imbila nsuma. Na kabili cila mineti, abana abengi balafyalwa. Tulesha na maka yesu pa kuti tulebila imbila nsuma “ku nko shonse, na ku mitundu yonse, na ku ba ndimi shonse.” (Ukus. 14:6) Lelo icishinka ca kuti tatwakashimikile umuntu onse pano isonde ilyo impela ishilaisa. w24.05 ibu. 10 amapara. 6-7

Yesu alesansamusha abantu kabili alebakoselesha mu fyo alebeba. Talekalipila abasambi bakwe. (Luka 8:​47, 48) Ifi fine e fyo Abena Kristu abaupa bafwile ukuba. Yesu aebele abaume abaupa ukuti baleba aba cishinka ku bena mwabo. Alandile amashiwi ayo Wishi alandile aya kuti umulume afwile “ukulambatila ku mukashi wakwe.” (Mat. 19:​4-6) Ishiwi lya ciGriki ilyo bapilibula “ukulambatila,” nga kulikonka fye lipilibula “ukukambatika.” E ico abalume na bakashi bafwile ukutemwana sana ica kuti baba fye kwati fintu fibili ifyo bakakatika pamo. Umo nga acita ifingakalifya umunankwe, ninshi bonse babili kuti bacula. Umwaume uwatemwa umwina mwakwe muli iyi nshila, alakaana ukutamba ifye shiku ifya musango onse. Tafwaya nangu panono “ukulolesha ifishawama.” (Amalu. 119:37) Ciba kwati napangana icipangano na menso yakwe ica kuti takulakumbwa umwanakashi uuli onse uushili mwina mwakwe.—Yobo 31:1. w25.01 ibu. 10 amapara. 12-13

Abantu balapilibula ifyapusanapusana nga baeba umuntu ukuti nabamwelela. Ifyo Yehova atubelela uluse fwe bantu abashapwililika fyalipusana sana ne fyo tubelelana uluse. Takwaba umuntu uwingatubelela uluse nga fintu Yehova atubelela uluse. Uwalembele Amalumbo alandile pali Yehova ati: “Pantu imwe muleleela abantu icine cine, pa kuti balemutiina.” (Amalu. 130:4) Ukwabula no kutwishika, Yehova ‘alelela icine cine.’ E utulanga umo ukwelela kwalola. Mu fikomo fimo ifya Amalembo ya ciHebere, abalelemba Baibo pa kulondolola ifyo Yehova elela, balebomfya ishiwi ilyo bashalebomfya pa kulondolola ifyo abantu belela abantu banabo. Yehova nga abelela umuntu uluse, alafumyapo ulubembu umupwilapo. Yehova nga atubelela uluse, kuti twatwalilila ukuba ifibusa fyakwe. Ala tulatasha sana pali ifi Yehova atubelela uluse umupwilapo lyonse nga twalufyanya. w25.02 ibu. 8 amapara. 1-3

Nangu fye abantu tabakutike ilyo tulebila imbila nsuma kuli bena, ninshi ifwe natubomba umulimo wesu. Cinshi twalandila ifi? Pantu ninshi natubomba umulimo uo Yehova no Mwana wakwe bafwaya ukuti tubombe—e kutila natushimika ubunte. Nangu tatusangile umuntu nelyo umo ilyo tulebila nelyo nga ca kuti takuli nangu umo uulekutika, kuti twalasekelela pantu ninshi tulelenga Shifwe wa ku muulu alesekelela. (Amapi. 27:11) Na kabili kuti twalasekelela nga ca kuti uwa bwananyina asanga umuntu uulefwaya ukukutika imbila nsuma mu cifulo tubilamo. Ulupungu lwa kwa Kalinda lwalipashanyapo umulimo tubomba ku mulimo wa kufwaya umwana uulubile. Bantu abengi abafwaya umwana uulubile mu ncende ishalekanalekana. Nga ca kuti umwana amoneka, bonse fye balasekelela. Te ulya wine fye uwacimusanga iyo. Ifi fine e fyo caba, abantu bonse mu cilonganino balabombako umulimo wa kulenga abantu baba abasambi ba kwa Yesu. Bonse mu cilonganino balafwaikwa pa kuti tubile imbila nsuma ku bantu bonse ababa mu cifulo tubilamo, kabili bonse tulasekelela nga ca kuti uo twabilileko imbila nsuma atendeka ukwisa mu kulongana. w24.04 ibu. 18 amapara. 13-14

Tulatemwa sana nga twaishiba ifili no kucitika nomba line! Yehova nga asuminisha, tule-enekela ukuti abantu na bambi bakasambilila icine ilyo ubucushi bukalamba bushilatendeka. Na kabili natutemwa sana pa kwishiba ukuti na lintu kukaba ubucushi bukalamba ilyo ifintu fikafya icine cine, abantu na bambi nalimo bakafuma ku lubali lwa kwa Satana bakese mu kulumbanya Yehova pamo na ifwe! Ilyo ifi fishilacitika, natukwata umulimo uo tufwile ukubomba. Twalikwata umulimo wa kubila imbila iishakabale aibilwapo na kabili, e kutila ukubila imbila nsuma ya Bufumu bwa kwa Lesa mwi sonde lyonse. Pa nshita imo ine tufwile no kutwalilila ukusoka abantu pa fili no kucitika nomba line. Abantu balingile ukwishiba ukuti impela ya cino calo cabipa naipalama sana. Apo twalitemwa imbila nsuma, twalitemwa abantu, ne cacilapo ukucindama twalitemwa Yehova Lesa ne shina lyakwe, tukatwalilila ukuba abacincila ilyo tulebila imbila nsuma kabili tukalabomba uyu umulimo bwangu bwangu mpaka Yehova akatile, “capwa.” w24.05 ibu. 19 amapara. 14-16

Mu nshita ya bushiku pa bushiku Yesu bali no ku mwipailapo, alisambilishe Petro na basambi bambi ico cacindamina ukuba abaicefya. Ifi acitile fyalangile ukuti ali uwaicefya sana. Yesu alibombele umulimo uo umubomfi alebomba. Ifi acitile fyalipapwishe sana abatumwa. Yesu afuulile ifya kufwala fyakwe ifya kunse, akaka itaulo mu musana, abika amenshi mu ca kusambilamo e lyo atendeka ukusamba amakasa ya batumwa. (Yoh. 13:​4, 5) Pafwile palipitile sana inshita pa kuti apwishe ukusamba amakasa ya batumwa bonse 12, ukubikako fye na ya kwa Yuda uwali no kumufutuka. Na lyo line, Yesu ali-icefyeshe, kabili alibombele uyu umulimo onse. Lyena Yesu aipwishe abatumwa bakwe ati: “Bushe namwishiba ico namusambila amakasa? Munjita amuti, ‘Kasambilisha’ kabili ‘Shikulu,’ ifi munjita mulalungika, pantu e fyo naba. E ico apo ine ne Shikulu wenu kabili Kasambilisha, nimusamba amakasa, ninshi na imwe mufwile ukulasambana amakasa.”—Yoh. 13:​12-14. w25.03 ibu. 10 amapara. 9-11

Ifintu fya muli cino calo filalenga catukosela ukutwalilila ukuba ifibusa fya kwa Yehova. Abantu abengi batila takwaba Lesa. Ilingi line abashikonka ifyo Lesa afwaya bamoneka kwati ifintu filabendela bwino. Nga twamona ifintu filebendela bwino, kuti catukosela ukutwalilila ukuba ne citetekelo. Nangu ca kuti twalisumina ukuti Lesa e ko aba, nalimo kuti twatendeka ukulatwishika nga kuti atwafwa. Uwalembele Amalumbo 73 na o alyumfwilepo ifi inshita imo. Alemona abantu abashalekonka amafunde ya kwa Lesa ifintu filebendela bwino. Ici calengele alatwishika nga ca kuti cali fye bwino ukulabombela Lesa. (Amalu. 73:​11-13) Cinshi calengele uwalembele Amalumbo 73 aaluke mu fyo aletontonkanya? Atontonkenye pa fyali no kucitikila abantu abalekele ukucetekela Yehova. (Amalu. 73:​18, 19, 27) Alitontonkenye na pa busuma bwaba mu kubombela Lesa. Na ifwe bene kuti twalatontonkanya pali fyonse ifyo Yehova atucitila. w24.06 ibu. 25 amapara. 16-17

Mu nshita balelemba Baibo, abantu bamo balefyenga bamunyinabo abali abapiina pantu balebakongwesha kaloba. Na kabili, bakapingula bamo balepoka amafisakanwa pa kuti bafyenge aba kaele. Yehova tatemwa nga ca kuti abantu balecita ifya musango uyu. (Esek. 22:12) Tufwile ukutontonkanyapo sana pa fyo tumona indalama. Yipusheni amuti: ‘Bushe ilingi line ntontonkanya pa ndalama na pa fyo ningashitamo? Nga ca kuti nakongola indalama, bushe ndakokola ukubwesha? Bushe ntontonkanya ukuti uo nakongolako indalama taleshikabila? Bushe indalama isho nakwata shilenga ndeumfwa ukuti nalicindama ukucila abantu banandi? Bushe shilalenga cilenkosela ukuba kapekape? Bushe mona bamunyinefwe na bankashi ukuti balitemwisha indalama pa mulandu fye wa kuti balikwata icuma? Bushe mba fye cibusa wa bantu abakankaala? Bushe abantu abapiina mbamona ukuti tabalingile ukuba ifibusa fyandi?’ Kuti twatwalilila ukuba ifibusa fya kwa Yehova nga ca kuti tatutemenwe sana indalama. Nga tulecita ifi Yehova takatushe! w24.06 amabu. 12-13 amapara. 17-18

Pa kuti tuicingilile ku matunko, tulingile ukulafwaisha ukucita ifisuma. Nga twasambilila ‘ukupata ifyabipa no kutemwa ifisuma,’ twakulafwaisha ukucita ifisuma. (Amose 5:15) Nga tulefwaisha ukucita ifisuma, tukalacimfya amatunko ayo tukwata. Kuti twacita ifi nga ca kuti tulecita ifintu ifingalenga twatemwa sana Yehova. Nga tuli pa kulongana nelyo ilyo tulebila imbila nsuma, tucita ifilenga tulefwaisha ukusekesha Yehova. (Mat. 28:​19, 20; Heb. 10:​24, 25) Nga tulebelenga no kulaisambilisha sana Icebo ca kwa Lesa kabili nga tuletontonkanyapo sana, tukalafwaisha ukucita ifisuma kabili tukalapata ifyabipa. (Yosh. 1:8; Amalu. 1:​2, 3; 119:97) Tuleibukisha ukuti Yesu aebele abasambi bakwe ati: “Akupepeni pa kuti mwi-ingila mu matunko.” (Mat. 26:41) Tulaleka Yehova aletwafwa kabili ici cilalenga tulefwaisha ukulacita ifilenga alesekelela.—Yako. 4:8. w24.07 amabu. 17-18 amapara. 14-16

Abasambilisha aba bwananyina ifyo baishiba bafwile ukulaesha na maka yonse ukulapashanya Yehova mu fyo abomfya amano. Muleibukisha ukuti Yehova alaitemenwa fye ukupeela abantu amano. E ico na ifwe tuleitemenwa ukusambilishako aba bwananyina ifyo twaishiba. Ilyo tulesambilisha umuntu, tatufwile ukushako nangu fimo pa mulandu wa kutiina ukuti nga aishiba kuti aisatupoka imilimo. Kabili tatulanda ukuti: ‘Ine takwali uwansambilishe. Na o alaisambilisha umwine!’ Abantu ba kwa Yehova tabafwile ukulatontonkanya ifi. Lelo tulaitemenwa ukusambilishako aba bwananyina ifyo twaishiba, kabili tulaitemenwa ukubapeela “ne myeo yesu” ilyo tulebasambilisha. (1 Tes. 2:8) Tusuubila ukuti “nabo bakafikapo bwino bwino ukusambilishako bambi.” (2 Tim. 2:​1, 2) Nga ca kuti bonse tulesambilishako aba bwananyina ifyo twaishiba, tukeshiba ifingi kabili bonse fye tukalaba ne nsansa sana. w24.09 ibu. 29 amapara. 12-13

Nga ca kuti mumona ukuti takwaba umulimo uo mwaishiba sana, tamufwile ukufuupuka. Mulandu nshi? Pantu ukwabula no kutwishika mwalikwata imibele imo iingalenga mwala-afwa aba mu cilonganino. Nalimo kuti mwatontonkanya pa fyo Paulo alandile pali 1 Abena Korinti 12:​12-30. Lyena kuti mwalomba Yehova ukuti amwafwe pa kuti mumone ifyo mwingalakonka ifyaba pali ili ilembo. Amashiwi ayo Paulo alandile yalangilila fye apabuuta tuutu ukuti mwalikwata umulimo uwacindama mu cilonganino, nga filya fine bonse aba mu cilonganino bakwata. Mulecita ifyo mwingakumanisha pa kuti mulebombela Yehova kabili muleafwa na ba bwananyina. Kuti mwacetekela ukuti baeluda bakamona ifyo mwaba kabili bakamupeela imilimo iyo balemona ukutila kuti mwakumanisha ukubomba. (Rom. 12:​4-8) Abena Kristu bonse balingile ukuba ifibusa fya kwa Yehova, bafwile ukulaitemenwa ukupeelako abantu ifyo balekabila kabili bafwile ukulacita ifingalenga Yehova alasekelela. Kanshi mufwile mwalikwata kale iyi imibele. w24.11 ibu. 17 amapara. 12-13

Hana alikwete amafya ayengi sana ayalengele aleba no bulanda kabili alelila. Ubwafya bumo ubo akwete bwali bwa kuti aupilwe ku mpali kabili umukashi munankwe Penina alemucusha sana. Ubwafya bumbi bwali bwa kuti takwetepo umwana, lelo Penina ena alikwete abana abengi. (1 Sam. 1:​1, 2) Cila nshita Penina alepumya Hana pa mulandu wa kuti takwetepo umwana. Hana aleumfwa ububi sana ica kuti “alelila fye kabili alefilwa no kulya.” Na kabili “ali no bulanda sana.” (1 Sam. 1:​6, 7, 10) Finshi Hana acitile pa kuti asansamuke? Cimo ico acitile ca kuti aile mu kupepa Yehova kwi tenti lya mushilo. Ilyo ali kulya, apaapeete Yehova ati: ‘Moneni ifyo ndecula, mukanjibukishe.’ (1 Sam. 1:11) Yehova alimwene ifyo alecula, alyumfwile ifyo alelila kabili pa numa alimupaalile pantu alilengele aimita.—1 Sam. 1:​19, 20; 2:21. w24.12 ibu. 21 amapara. 5-7

Icilubula citusambilisha ukuti Yesu alibika sana amano ku bantu, maka maka ku basambi bakwe. (Yoh. 13:1) Ku ca kumwenako, Yesu alishibe ukuti fimo ifyo ali no kucita pano calo, fyali no kwafya, pamo nga imfwa yakwe iyabipisha. Lelo ilyo alebomba umulimo wakwe pano isonde, Yesu talecita fye ifintu pantu e fyo Wishi amwebele ukuti e fyo alecita. Yesu alebombesha, ne calengele ni co alitemenwe abantu. E mulandu wine alebilila kuli bena, alebasambilishisha, no kulabafwilisha. Ilyo ali mupepi no kufwa, alisambile amakasa ya batumwa bakwe, alibasambilishe, alibakoseleshe kabili alibasansamwishe. (Yoh. 13:​12-15) Na lintu bamupoopeele pa cimuti, Yesu alipeele isubilo icipondo ico bamupoopeele pamo naco ilyo acebele ukuti “ukaba na ine mu Paradaise.” Na kabili alilangile ukuti alibikile amano kuli nyina ilyo aebele Yohane ukuti alemusakamana. (Luka 23:​42, 43; Yoh. 19:​26, 27) Yesu tapelelele fye pa kufwila abantu pa kubalanga ukuti alibatemwa, alibatemenwe icine cine kabili aleba ne cikuuku kuli bena. w25.01 ibu. 23 para. 11

Baibo ilabomfya icilangililo icilenga twaumfwikisha ubuntungwa tukwata nga ca kuti Yehova atubelela uluse. Pa mulandu wa kuti tatwapwililika kabili tulafwaya ukucita ifyabipa, Baibo itila tuli “basha ba lubembu.” Nomba pa mulandu wa kuti Yehova alatubelela uluse, twaba nga basha ‘abalubuka ku lubembu.’ (Rom. 6:​17, 18; Ukus. 1:5) Nga twaishiba ukuti Yehova natubelela uluse, tulaba ne nsansa nga shilya shikwata umusha uulubwike. Pa mulandu wa kuti Yehova alitupeela Umwana wakwe pa kuti abe icilubula, Baibo itila twalyundapwa. (1 Pet. 2:24) Nga twabembuka, bucibusa bwesu na Yehova bulapwa. Lelo pa mulandu wa cilubula, kuti atubelela uluse kabili kuti twaba ifibusa fyakwe na kabili. Nga filya fine umuntu uwalwele sana asekelela nga apola, e fyo na ifwe tusekelela nga ca kuti twaba ifibusa fya kwa Yehova na kabili pa mulandu wa kuti alatubelela uluse. w25.02 ibu. 11 para. 16; ibu. 13 para. 17

Mu cilangililo ca matalanti, Yesu alandile pa basha babili abali aba cishinka kuli shikulwibo e lyo na pa musha umo uushali ne cishinka kuli shikulu wakwe. (Mat. 25:​14-30) Abasha babili aba cishinka bemininako Abena Kristu abasubwa aba cishinka. Shikulwibo Yesu abeba ukuti ‘ingileni pa kuti mulesekelela pamo’ na ine. Balapokelela icilambu cabo ku muulu, e kutila ukubuuka kwa ntanshi. (Mat. 25:​21, 23; Ukus. 20:5b) Lelo ku musha uwali umunang’ani, Abena Kristu abasubwa kuti basambililako ukuti tabalingile ukuba abanang’ani. Kuti basambililako shani? Kuti basambililako ukuti bafwile ukulabombesha. Mu cilangililo ca banacisungu ne ca matalanti, Yesu talesobela ukuti Abena Kristu abasubwa bali no kuba abanang’ani. Lelo alelanda pa fyali no kucitika nga ca kuti baleka ukubombesha. Nga baba abanang’ani bali no kupanya ‘ubwite bwabo no kusalwa kwabo,’ kabili Yesu tali no kubasuminisha ukwingila mu Bufumu bwa mu muulu. w24.09 ibu. 22 para. 10; ibu. 23 amapara. 12-13

Bonse fye tulafwaya ukulaisakamana no kulasakamana ulupwa lwesu mu fyo lukabila. (Luk. Mil. 7:12; 1 Tim. 5:8) Ilyo tulesalapo incito ya kwingila, caliba fye bwino ukutontonkanya pa ndalama tukalafola. Lelo nga twabika fye amano ku ndalama isho tukalafola ninshi tatule-endela mu kutetekela. Nga tule-endela mu kutetekela, tukatontonkanya na pa fyo incito iyo tulefwaya ukwingila ikakuma bucibusa bwesu na Yehova. Kuti twayipusha atuti: ‘Bushe incito ndefwaya ukwingila ikalalenga ndecita ifyo Yehova ashifwaya?’ (Amapi. 6:​16-19) ‘Bushe ikalalenga nilapepa bwino Yehova, kabili ikalalenga nilaba no lupwa lwandi pa nshita iitali?’ Nga ca kuti ifi e fyo incito mulefwaya ukwingila ikalenga ifintu fikabe, ninshi kuti cawama tamwingile iyo ncito nangu ca kuti calikosa ukusanga incito. Pa mulandu wa kuti twendela mu kutetekela, ifyo tusalapo ukucita filingile ukulanga ukuti twalishininkisha ukuti Yehova akalatusakamana mu fyo tukabila.—Mat. 6:33; AbaHebere 13:5. w25.03 ibu. 21 amapara. 5-6

Tulingile ukulaesha na maka yonse pa kuti tulemona aba bwananyina nge fyo Yehova abamona. Kuti twacita ifi nga tulebika amano ku mibele yabo iisuma ukucila ukulabika amano ku fyo balufyanya, pantu ifi fikapwa ku ntanshi, kabili kuti tulepwisha amafya yonse ayo twingakwata. Nga tulecita ifi, abantu abafwaya ukubalanga imibele ya musango uyu bakesa muli paradaise ya ku mupashi. Natutwalilile ukulatasha pali paradaise ya ku mupashi iyo Yehova atupeela. Bonse abafwaya ukulaikala bwino, ukuteka imitima, ukukanasakamikwa, no kucingililwa bafwile ukwisa muli paradaise ya ku mupashi kabili tabafwile ukufumamo. Lelo tulingile ukuba abacenjela pantu Satana ale-esha na maka yakwe yonse pa kuti atufumye muli iyi paradaise. (1 Pet. 5:8; Ukus. 12:9) Tatufwile ukumuleka atufumya muli iyi paradaise. Natulebombesha pa kuti iyi paradaise ya ku mupashi itwalilile ukuba iisuma, iyasanguluka kabili umwaba umutende. w24.04 amabu. 24-25 amapara. 18-19

Mwe bafyashi, kuti mwalenga abana benu balafwaisha ukubombela Yehova. Mulelenga baishiba ukuti imfumu isho Yehova alemona ukuti shali ne cishinka, shintu shalemupepa ukulingana ne fyo afwaya kabili ishalekoselesha na bo shaleteka ukulacita ifi fine. Mulesambilisha abana benu ku fyo mulanda na ku fyo mucita pa kuti balemona ukuti ifyo balingile ukubikako sana amano fintu pamo nga, ukuisambilisha Baibo, ukulaya mu kulongana e lyo no kulabila imbila nsuma. Abana bafwile baba ifibusa fya kwa Yehova, pantu nga tabali ifibusa fya kwa Yehova, kuti balamona ukuti balingile ukulabombela Yehova pa mulandu fye wa kuti abafyashi babo ni Nte sha kwa Yehova. Ici kuti calenga belabika amano ku kupepa Yehova, nalimo kuti baleka fye no kumupepa. Bushe umuntu nga alileka ukubombela Yehova ninshi calipwa takabale abapo cibusa wakwe? Awe. Pantu kuti alapila no kutendeka ukubombela Yehova na kabili. Pa kuti acite ifi, alingile ukuicefya no kukonka ifyo baeluda balemweba. (Yako. 5:14) Ukuba cibusa wa kwa Yehova na kabili, kwalicindama sana ukucila fyonse ifyo engacita. w24.07 amabu. 24-25 amapara. 18-19

Kuti mwacita shani pa kuti ifyo mulecita ilyo muleishishanya tafilengele Lesa akalipa? Ilyo muleya muleishibana mwakulatemwaninako. Finshi mwingacita pa kuti tamucitile ifingalenga Yehova akalipa? Mwilalanda amalyashi ya nsoni, mwilaba ku ncende ukwa kuti muli fye mweka, kabili mwilanwesha ubwalwa. (Efes. 5:3) Ifi ifintu kuti fyalenga mwakwata insuuna, kabili kuti camukosela ukucita icalungama. Kanshi kuti cawama nga ca kuti lyonse mulelanshanya pa fyo bonse babili mwingakonka Amafunde ya kwa Yehova Lesa ilyo muleishishanya. (Amapinda 22:3). Ilyo muleya muleishibana, caliba fye bwino ukucitako fimo ifilanga ukuti mwalitemwana. Na lyo line, nga mulekwata sana insuuna, kuti camukosela ukwishibana bwino no muntu muleishishanya nankwe. (Ulwimbo 1:2; 2:6) Fimo ifyo abaleishishanya bacita pa kulanga ukuti balitemwana kuti fyacilamo ica kuti bakalifya na Yehova. (Amapi. 6:27) Kanshi ilyo fye mwatendeka ukwishishanya mulingile ukulanshanya pa fyo mwingacita na pa fyo mushingacita pa kulanga ukuti mwalitemwana, ifilingene na mashinte ya mafunde ya mu Baibo.—1 Tes. 4:​3-7. w24.05 ibu. 29 amapara. 10-11

Tufwaya aba bwananyina batucetekela ukutila kuti twabafwa ilyo bali na mafya. (Amapi. 17:17) Finshi twingacita pa kuti aba bwananyina baletucetekela? Cila bushiku tufwile ukulapashanya Yehova mu fyo tucita. Ku ca kumwenako, tufwile ukulacita fyonse ifyo twalaya no kulasunga inshita. Bushe aba mu cilonganino banonkelamo shani nga ca kuti balicetekela baeluda? Bakasabankanya balomfwa ukuti balicingililwa nga baishiba ukutila kuti balanda na baeluda inshita ili yonse fye ilyo bali no bwafya, pamo nga ukulanda na kangalila we bumba lya mulimo ilyo babamo. Kabili bakasabankanya balamona ukuti balibatemwa nga ca kuti baishiba ukuti baeluda balaitemenwa ukubafwa. Na kabili aba bwananyina balacetekela sana baeluda nga ca kuti pa kubafunda balebomfya Baibo e lyo ne mpapulo shesu, ukucila ukulabeba fye ifyo baletontonkanya. Bamunyinefwe na bankashi na kabili balacetekela baeluda abashisokolola inkaama kabili abacita ifyo balaya. w24.06 ibu. 30 amapara. 14-15

Muno nshiku, te kuti twenekele ukuti Yehova alapwisha amafya yonse ayo tukwata. Lelo kuti twacetekela ukuti akalatwafwa. (Amalu. 41:3) Yehova alabomfya umupashi wakwe uwa mushilo pa kutukosha, pa kutupeela amano na pa kutupeela umutende pa kuti twingatwalilila ukushipikisha. (Amapi. 18:14; Fil. 4:13) Na kabili alitulaya ukuti akapwisha amalwele yonse. Ifi atulaya nafyo filatusansamusha. (Esa. 33:24) Yehova alisunga amashiwi ayasuma mu Cebo cakwe ayengatusansamusha nga tuli no bwafya. (Rom. 15:4) Ilyo nkashi umo uwa ku West Africa bamusangile no bulwele bwa kansa, alelila sana. Alandile ati: “Ilembo limo ilinsansamusha sana lya kwa Esaya 26:3. . . . Ili lembo lilenga nacetekela ukuti Yehova kuti alenga twakwata umutende uwingalenga twateka imitima pa kuti twingashipikisha amafya ayo twingakwata.” Bushe kwaliba ilembo ilimusansamusha nga namukwata ubwafya ubukalamba, nelyo nga tamukwete isubilo lya kuti ifintu fikaba fye bwino? w24.12 ibu. 24 amapara. 17-18

Baeluda balalanga ukuti balitemwa uucitile ulubembu. Bafwaya ukuti abataluka kuli Yehova babwelele kuli ena. (Luka 15:​22-24, 32) Uwacitile ulubembu nga alapila, ku muulu balasekelela, kabili na pe sonde na po balasekelela! (Luka 15:7) Cailanga fye apabuuta tuutu ukuti Yehova tatekelesha abacita imembu abashilapila. Na lyo line, alatwalilila ukwafwa abacita imembu. Afwaya babwelela kuli ena. Moneni ifyo Yehova omfwa abacitile imembu nga balapila. Pali Hosea 14:4 patila: “Nkabondapa pa kuti bakaleke ukukanaba ne cishinka. Nkaitemenwa fye ukubatemwa, pantu ubukali bwandi nabufuma pali bena.” Aya amashiwi yalalenga baeluda balabika sana amano ku filanga ukuti umuntu nalapila, kabili yalalenga abafuma kuli Yehova balafwaisha ukubwelela kuli ena. w24.08 ibu. 28 amapara. 8-9

Inshita shimo abantu tabatutasha pa fisuma ifyo tubacitila. Nalimo kuti twabomfya inshita yesu, amaka yesu, nelyo ifyo twakwata pa kwafwilisha abantu. Lelo kuti bamoneka kwati tababikile na mano ku fyo tubacitile. Ica musango uyu nga cacitika, kuti twacita shani pa kuti tutwalilile ukuba ne nsansa nelyo twifulwa? Muleibukisha ukuti, icilenga tuleba ne nsansa te fintu abantu batutasha nga twabacitila fimo. (Imil. 20:35) Kuti twatwalilila ukucitila abantu ifisuma no kuba ne nsansa nangu ca kuti abantu tabalelanga ukuti baletasha pa fyo tulebacitila. Finshi twingacita pa kuti tutwalilile ukuba ne nsansa? Muleibukisha ukuti nga mulepeela ninshi mulepashanya Yehova. Alapeela abantu ifisuma, nampo nga balatasha nelyo tabatasha. (Mat. 5:​43-48) Yehova alitulaya ukuti nga ca kuti na ifwe tulepeela ukwabula ukwenekela ukuti ‘bakatubwesesha,’ icilambu cesu ‘cikaba icikalamba.’ (Luka 6:35) E ico mwilaumfwa ububi nga ca kuti abantu tabalemutasha pa fisuma ifyo mulebacitila. Muleibukisha ukuti Yehova akamulambula pa fisuma ifyo mucitila abantu pantu ‘mupeela ne nsansa.’—Amapi. 19:17; 2 Kor. 9:7. w24.09 ibu. 29 amapara. 14-16