November

Baeluda balesha na maka ukupashanya ifyo Yehova aba no luse ilyo baleafwa uo bafumya mu cilonganino. Ku ca kumwenako, Yehova talolelele ukuti abena Israele bakalapile e lyo akatendeke ukubafwa. Lelo alebatumina bakasesema ninshi tabalati balapile no kulapila. Pa kulangilila ifyo aba sana no luse, Yehova aebele kasesema Hosea ukuti abweshe umukashi wakwe, ninshi umukashi wakwe acili alacita imembu. (Hos. 3:1; Mal. 3:7) Apo baeluda balapashanya Yehova, balafwaya sana ukuti uwacitile ulubembu alapile no kubwelela mu cilonganino, kabili tabacita ifingalenga ca mukosela ukulapila. Mu cilangililo Yesu alandile ica mwana walubile, wishi alibutukiile umwana “amukumbatila no kumukumbatila e lyo amutomona.” (Luka 15:20) Nga namumona, wishi talolelele ukuti umwana wakwe alombe ubwelelo. Lelo alibutukiile umwana wakwe pantu alimutemenwe. w24.08 ibu. 28 para. 7-8

Nga fintu amashiwi yali mwi lembo lya bushiku bwa lelo yalelangilila, Yehova tekatilila fye amano ayo akwata, lelo alapeelako na bambi. Na kabili, Yehova alapeela abantu amano “ukwabula ukubakalipila” nelyo “ukwabula ukufwailisha ifilubo muli bena.” Talenga twalaumfwa ububi nga twamulomba ukuti atupandeko amano. Na kuba, alatukoselesha ukuti tulemulomba amano. (Amapi. 2:​1-6) Kuti twacita shani pa kuti na ifwe tulepashanya Yehova mu fyo abomfya amano? (Amalu. 32:8) Kwaliba ifintu ifingi ifyo abantu ba kwa Yehova baishiba ifyo bengasambilishako abantu. Ku ca kumwenako, ilyo tulebila imbila nsuma, tulasambilishako aba kuti e lyo batampa fye ukubombela Yehova ifya kubomba uyu mulimo. Baeluda balatekanishisha ababomfi batumikila na bamunyinefwe ababatishiwa ilyo balebasambilisha ifya kubomba imilimo mu cilonganino. Na kabili bamunyinefwe na bankashi abaishiba bwino ifya kubomba imilimo ya makuule ne milimo ya kuwamya ifyonaike, balasambilisha aba bwananyina abashaishiba bwino iyi milimo ilyo balebombela pa fikuulwa fya kubombelapo imilimo ya kwa Yehova. w24.09 amabu. 28-29 amapara. 11-12

Bamunyinefwe, pa kuti mufikepo ukuba baeluda, tamufwile ‘ukulatungwa akabi,’ e kutila aba mu cilonganino bafwile ukumwishiba ukuti mwalikwata imibele iisuma. (1 Tim. 3:2) Na kabili mufwile ukuba umuntu uo na ba kunse ya cilonganino balandapo ifisuma. Kwena abantu abashibombela Yehova kuti balanda ifyabipa pa fyo twasuminamo, lelo tabalingile ukulatwishika nampo nga muli ba cishinka nelyo nga mwalikwata imibele iisuma. (Dan. 6:​4, 5) Yipusheni amuti, ‘Bushe aba mu cilonganino na bashili ba mu cilonganino banjishiba ukuti nalikwata imibele iisuma?’ Nga ‘mwalitemwa ubusuma,’ ninshi mwakulabika amano ku fisuma ifyo abantu bacita kabili mwakulabatasha pa mibele iisuma iyo bakwata. (Tito 1:8) Na kabili mwakulacitila abantu ifisuma, kumo ne fintu ifyo bashingenekela ukubacitila. Mulandu nshi baeluda balingile ukutemenwa ubusuma? Pantu e lyo bengalaitemenwa ukubombela aba bwananyina no kulabomba imilimo imbi iya mu cilonganino. (1 Pet. 5:​1-3) Nangu ca kuti uyu mulimo ukalamba, insansa isho baeluda bakwata shilacila pa fyo baipeelesha pa kuti balebombela aba bwananyina.—Imil. 20:35. w24.11 amabu. 20-21 amapara. 3-5

Ababomfi batumikila balabomba imilimo iyacindama mu filonganino. Ukwabula no kutwishika umutumwa Paulo alicindike ababomfi batumikila pa mulandu ne milimo balebomba. Ku ca kumwenako, ilyo alembeele Abena Kristu mu Filipi kalata, aliposeshe ababomfi batumikila na baeluda mu kulungatika. (Fil. 1:1) Bamunyinefwe abengi ababatishiwa, nampo nga baice nelyo bakalamba, balatemwa ukubomba imilimo iyo ababomfi batumikila babomba mu cilonganino. Ku ca kumwenako, munyinefwe Devan bamusontele ukuba umubomfi utumikila ninshi ali ne myaka 18. Lelo munyinefwe Luis ena bamusontele ukuba umubomfi utumikila ilyo acilileko panono imyaka 50. Munyinefwe Luis alandile ifyo bamunyinefwe abengi bengalanda. Alandile ati: “Naliba ne nsansa sana ifi mombela bamunyinefwe na bankashi imilimo iyo ababomfi batumikila babomba mu cilonganino, balinanga ukuti balintemwa sana. Kanshi na ine e nshila ningabalangilamo ukuti nalibatemwa!” Nga ca kuti mwalibatishiwa nomba pali ino nshita tamuli babomfi batumikila, bushe kuti mwabombesha pa kuti mwingafikapo ukuba umubomfi utumikila? w24.11 ibu. 14 amapara. 1-3

Ilyo Hisekia uwali imfumu ya baYuda ali ne myaka 39, alilwele sana. Kasesema Esaya aile-eba Hisekia amashiwi ayo Yehova alandile aya kuti Hisekia tali no kupola, ali no kufwa. (2 Isha. 20:1) Hisekia takwete isubilo lya kupola. Ilyo Esaya aebele Hisekia aya amashiwi, Hisekia ali no bulanda sana kabili alililile nga nshi. Alipaapeete sana Yehova ukuti amwafwe. Ilyo Yehova aumfwile ipepo ilyo Hisekia apepele, amona ne filamba ifyo alilile, alimumfwilile ubulanda kabili amwebele ati: “Ning’umfwa ipepo lyobe. Nimona ifilamba fyobe. Mona, nalakundapa.” Yehova alaile Hisekia ukupitila muli kasesema Esaya ukuti ali no kumulundilako imyaka kabili ali no kupususha Yerusalemu ku bena Asiria. (2 Isha. 20:​4-6) Kuti mwacita shani nga ca kuti mwalilwala ubulwele ubumoneka kwati tabwakapole? Mulingile ukweba Yehova ifyo mumfwa. Akakutika nangu ca kuti ilyo mulepepa, mulelila no kulila. Baibo itweba ukuti “Shifwe wa luse kabili Lesa wa cisansamushi conse” akatusansamusha mu macushi yesu yonse.—2 Kor. 1:​3, 4. w24.12 ibu. 24 amapara. 15-17

Ala cikawama nga nshi ilyo tukalasengela abantu abakabuushiwa! Elenganyeni ifyo mukalasekelela ilyo mukeshiba ifintu ifingi pali Yehova, na pa fintu ifingi ifyo abumba. (Amalu. 104:24; Esa. 11:9) Ne cawamisha ca kuti tukalapepa Yehova ukwabula ukumfwa ububi pa mulandu wa kukanapwililika! Bushe kuti mwafwaya ukupanya yonse aya amapaalo pa mulandu fye wa “kuipakisha ifisuma fya lubembu ifya pa kashita fye akanono”? (Heb. 11:25) Awe nakalya! Aya amapaalo yakacila pali fyonse ifyo twingakwata pali ino nshita. Muleibukisha ukuti tatwakatwalilile fye ukusubila ukuti tukalaikala mu Paradaise pano isonde. Bushiku bumo tukekalamo. Tukakwata amapaalo yonse aya pa mulandu wa kuti Yehova alitupeela Umwana wakwe pa kuti abe icilubula! w25.01 ibu. 29 para. 12

Ibuuku lya AbaHebere lyalilanda pa bantu abatetekele Yehova. Umo pali aba ali ni Mose, kabili alitetekele sana Yehova. (Heb. 3:​2-5; 11:​23-25) Mose alicitile bwino filya atwalilile ukutetekela Yehova Lesa wakwe pantu Yehova alepeela abena Israele ifya kulya na menshi pa kuti bengapusuka ilyo bali mu matololo umushali ifintu ifingi. (Ukufu. 15:​22-25; Amalu. 78:​23-25) Nangu ca kuti Mose alikwete icitetekelo icakosa, ilyo papitile nalimo umwaka umo ukutula apo Yehova alubwilile abena Israele ukufuma mu Egupti, Mose atampile ukutwishika nga ca kuti Yehova ali no kupeela abantu bakwe inama nga fintu abalaile. Apo abantu abali mu matololo balifulile sana, Mose aletwishika nga ca kuti Yehova ali no kukumanisha ukupeela abantu bonse inama. E ico Yehova aipwishe Mose ati: “Bushe ukuboko kwa kwa Yehova kwalipipa?” (Impe. 11:​21-23) Mu mashiwi yambi, Yehova aleipusha Mose ati, ‘Bushe ulemona ukutila kuti nafilwa ukucita ifyo ndefwaya ukucita?’ w25.03 ibu. 26 amapara. 1-2

Bushe kuti twalanda ukuti fyonse ifyalecitika ilyo kwali Ilyeshi, fyalikwata ifyo fimininako ifikacitika ku ntanshi? Awe te kuti tulande ifyo. Cinshi tushingalandila ifyo? Pantu te fyo Baibo ilanda. Kwena Yesu alingenye inshiku sha kwa Noa ku nshita akabapo, lelo talandile ukuti fyonse ifyalecitika mu nshiku sha kwa Noa fyalikwete ifyo fyaleimininako ifyali no kucitika ku ntanshi, pamo nga ilyo Yehova aisele iciibi ca cibwato. (Mat. 24:​37-39) Finshi Noah acitile ilyo Yehova amwebele ukuti ali no kuleta Ilyeshi? Noa alilangile ukuti ali ne citetekelo pantu alipangile icibwato. (Heb. 11:7; 1 Pet. 3:20) Ifi fine e fyo caba, na bantu abomfwa imbila nsuma ya Bufumu bwa kwa Lesa, balingile ukulacita ifyo basambilila. (Imil. 3:​17-20) Petro alandile ukuti ‘Noa, aleshimikila abantu pa fyalungama.’ Muno nshiku tulebombesha pa kuti tulebila imbila nsuma ku bantu bonse kabili tulaba abacincila ilyo tubomba uyu mulimo. Nomba nangu twingesha na maka yesu yonse, te kuti tubile ku bantu bonse abaikala pano isonde ilyo impela ishilaisa. w24.05 amabu. 9-10 amapara. 3-5

Tufwile ukuba ne cikuuku no kulacindika ifibusa fya kwa Yehova. (Rom. 12:10) Cimo ico Baibo yalandapo pa Amalumbo 15:4 ca kuti umweni mwi tenti lya kwa Yehova “alafikilisha ifyo alaya, nangu ca kuti ifintu fyamubipila.” Kuti twakalifya abantu nga ca kuti tatufikilishe ifyo twabalaile. (Mat. 5:37) Ku ca kumwenako, Yehova enekela abaupana ukufikilisha ifyo bapangene ilyo baleupana. Na kabili alatemwa sana nga ca kuti abafyashi balefikilisha ifyo balaya abana babo. Apo twalitemwa Yehova na bantu banensu, twakulaesha na maka yesu yonse ukufikilisha ifyo twalaya. Inshila na imbi iyo tucindikilamo ifibusa fya kwa Lesa, kulabapokelela ku mwesu no kuba bakapekape. (Rom. 12:13) Nga tuleangalila pamo na bamunyinefwe na bankashi, bucibusa bwesu na bena bulakoselako, na bucibusa bwesu na Yehova nabo bwine bulakoselako. Na kabili nga tulepokelela abeni, ninshi tulepashanya Yehova. w24.06 ibu. 12 amapara. 15-16

Abantu abaicefya e bo Yehova asokolwela icine. (Mat. 11:25) Twali-icefeshe pa kuti batusambilishe icine. (Imil. 8:​30, 31) Na lyo line, tufwile ukucenjela pa kuti twiba ne cilumba. Icilumba kuti calenga twalatontonkanya ukuti ifyo tutontonkanya kuti fyalingana fye na mashinte ya mafunde ayaba mu fyo icilonganino ca kwa Yehova citweba. Nga tulefwaya ukutwalilila ukuba abaicefya, tulingile ukulaibukisha ukuti tuli banono sana nga kuilinganya ku fyo Yehova akula. (Amalu. 8:​3, 4) Na kabili, kuti twapepa kuli Yehova ukuti alenge ukuti tube abaicefya, kabili tuleitemenwa ukusambilila. Yehova akatwafwa pa kuti tukalebika amano ku fyo amona ifintu, ku fyo atusambilisha mu Cebo cakwe na mu cilonganino cakwe, ukucila ukulabika amano ku fyo tutontonkanya. Ilyo mulebelenga Baibo, mulemona ifilanga ukuti Yehova alitemwa abantu abaicefya kabili alipata aba cilumba, abaitutumuna, na baituntumba. Kabili mulecenjela sana pa kuti mutwalilile ukuba abaicefya nga ca kuti bamupeela imilimo iingalenga mwaishibikwa nelyo mwakwata amaka. w24.07 ibu. 10 amapara. 8-9

Ukutula mu 1919, Yesu abomfya ibumba ilinono ilya baume abasubwa no mupashi wa mushilo abatungulula umulimo wa kubila imbila nsuma, kabili abapeela abasambi bakwe ifya kulya fya ku mupashi pa nshita iyalinga. (Luka 12:42) Ukwabula no kutwishika, Yehova alapaala ili ibumba pa mulimo libomba. (Esa. 65:​13, 14) Nga ca kuti tatwakwata abatutungulula bwino, nga tatubomba bwino uyu umulimo uo Yesu atupeela. (Mat. 28:​19, 20) Ku ca kumwenako, nga ca kuti tabaletupeela ififulo fya kubilamo imbila nsuma, cila muntu nga alebila fye konse uko alefwaya. Bakasabankanya nga balebila sana mu fifulo fimo e lyo mu fifulo fimbi mwena nga tamwaleba na ba kubilamo. Tontonkanyeni na pa nshila shimbi isho tubombelamo bwino umulimo pa mulandu wa kuti twalikwata abatutungulula. Filya fine Yesu aletungulula abasambi bakwe ilyo ali pano isonde, e fyo atungulula na bantu ba kwa Lesa muno nshiku. w24.04 amabu. 8-9 amapara. 2-4

Kaini e wali ibeli lya kwa Adamu na Efa. Apyene ulubembu ku bafyashi bakwe. Kabili Baibo ilanda pali ena ukuti: “Imilimo yakwe yali iyabipa.” (1 Yoh. 3:12) Nalimo ici e calengele Yehova ‘esekelela Kaini no mutuulo wakwe’ ilyo atuulile umutuulo. Mu cifulo ca kuti aaluke, “Kaini alikalipe nga nshi kabili alyumfwile ububi.” Finshi Yehova acitilepo? Alilandile na Kaini. (Ukute. 4:​3-7) Yehova ali ne cikuuku pa kulanda na Kaini. Amwebele ukutila ali no kumupaala nga acita ifisuma, kabili alimusokele ukuti nga atwalilila ukukalipa kuti acita ifyabipa. Ku ca bulanda taumfwile ifyo Yehova amwebele. Talekele Yehova amwafwa pa kuti alapile. Bushe ifi Kaini akeene ukumwafwa pa kuti alapile fyalengele Yehova aleka ukwafwa abantu pa kuti balapile? Awe nakalya! w24.08 ibu. 10 para. 8

Mose aibukisheko uluko lwa bena Israele ukuti bali no kulaikala bwino ku ntanshi. Yehova ali no kupaala abena Israele ica kuti bali no kwikala imyaka iingi mu calo ico abalaile. Ici calo cali icisuma nga nshi kabili mwalemena ifya kulya ifingi! Ilyo Mose alelondolwela abena Israele ifyo ici calo cali, atile: “Imisumba ikalamba kabili iisuma iyo mushakuulile, amayanda umwaba ifintu ifisuma ifingi ifya misango yonse ifyo mushabombeele, ifya kusungilamo amenshi ifyo mushaimbile ne fimuti fya myangashi ne fya miolife ifyo mushalimbile.” (Amala. 6:​10, 11) Mose alisokele na bena Israele. Abasokele ukuti pa kuti bengatwalilila ukwikala mu calo icisuma, balingile ukulakonka amafunde ya kwa Yehova. Mose abakoseleshe ukuti nga balekutika kuli Yehova kabili nga ‘balambatila’ kuli ena ninshi ‘basala umweo.’ (Amala. 30:20) Lelo abena Israele tabaumfwilile Yehova. E ico mu kupita kwa nshita, Lesa alilekele abena Asiria na bena Babiloni ukuti babacimfye kabili babasende bunkole.—2 Isha. 17:​6-8, 13, 14; 2 Imila. 36:​15-17, 20. w24.11 ibu. 9 amapara. 5-6

Abantu abengi abatila Bena Kristu batila kuti bapusuka nga ca kuti “basumina fye [muli Yesu] kabili nga balamumona ukuti mupusushi wabo.” (Yoh. 6:​29, Amashiwi ya kwa Lesa, Diocese of Mbala.) Lelo bamo pali balya bali mu Galili balishileleka ukusumina muli Yesu. Cinshi calengele baleke ukusumina muli Yesu? Icalengele abengi bakonke Yesu, ni co alibapeele ifyo balefwaya. Balefwaya ukuti abondape, abapeele ifya kulya kabili abebe ifyo balefwaya ukumfwa. Lelo ifyo Yesu alandile fyalelangilila ukuti kwali na fimbi ifyo abasambi bakwe aba cine balingile ukucita. Ico aishile pano isonde, te mu kupeela fye abantu ifyo balekabila. Lelo aishile mu kubasambilisha ifyo balingile ukucita pa kuti bengaba abasambi bakwe aba cine. Balingile ‘ukuya kuli ena,’ e kutila balingile ukumfwa fyonse ifyo alebeba no kulafikonka.—Yoh. 5:40. w24.12 ibu. 12 amapara. 12-13

Finshi umulume engacita pa kuti aleke ukucusha umwina mwakwe nelyo ukulacita ifintu ifilenga alamona kwati tacindama? Afwile ukulaesha na maka ukulapashanya Yesu. Filya fine Yesu alesunga abasambi bakwe e fyo na baume bafwile ukulasunga abena mwabo. Natulande pa fyo abaume bengasambilila ku fyo Yesu alesunga abatumwa bakwe ne fyo alelanda nabo. Yesu ali ne cikuuku ku batumwa bakwe kabili alebacindika. Talecusha nelyo ukutitikisha abasambi bakwe. Talemona ukuti alingile ukulabomfya amaka yakwe bubi bubi pa kuti balemutiina. Lelo aleba uwaicefya ilyo alebabombela. (Yoh. 13:​12-17) Aebele abasambi bakwe ati: ‘Sambilileni kuli ine, pantu nalifuuka kabili nali-icefya, e lyo mukatuusha.’ (Mat. 11:​28-30) Nga fintu ilembo lilandile, Yesu ali uwafuuka. Umuntu uwafuuka te kuuwe. Lelo alikwata amaka aya kuilama. Nga bamukalifya alailama kabili takalipa bwangu. w25.01 ibu. 10 amapara. 10-11

Ilyo impela ya cino calo ilepalama, kuti twaenekela ukuti ifintu fikalakoselako fye. Ifimfulunganya mu mitekele ya calo, inkondo, amasanso ayakalamba nelyo ifikuko kuti fyalenga incito yapwa, ifintu ifyo twakwata fyaonaika nangu kuti fyalenga ing’anda yesu yaonaika. Finshi twingacita pa kuti tusalepo ukucita ifingalanga ukuti twalicetekela Yehova? Nga namusakamikwa, calicindama sana ukupepa kuli Yehova. Mulemulomba ukuti alemupeela amano pa kuti mulesalapo ukucita ifisuma, muleteka umutima, na pa kuti muleke “ukusakamikwa” pa mafya ayo mukwete. (Luka 12:​29-31) Mulemupaapaata ukuti alemwafwa pa kuti muleteka umutima ku fyo mukwete. (1 Tim. 6:​7, 8) Mulefwailishako na mu mpapulo shesu pa kuti mwishibe ifyo mwingacita nga tamukwete indalama. Abengi abakwatapo ubwafya bwa kukanakwata indalama, balinonkelamo mu mavidio ne fipande ifyaba pa webusaiti ya jw.org. w25.03 amabu. 28-29 amapara. 10-11

Inshita yalifikile iya kuti Abena Fyalo babe abantu ba kwa Lesa. Petro balimutumine ukuya mu kubila kuli Korneli uwali Umwina Fyalo. Korneli aali pa Bena Fyalo ababalilepo ukuba Abena Kristu. AbaYuda tabaleumfwana na Bena Fyalo. Kanshi umutumwa Petro alingile ukwaluka mu fyo aletontonkanya pa kuti ayebila imbila nsuma kuli aba Abena Fyalo. Ilyo Petro aishibe ifyo Lesa alemona Abena Fyalo, alyalwike. E ico ilyo Korneli atumine aba kuyamwita, ‘takeene.’ (Imil. 10:​28, 29) Alibilile imbila nsuma kuli Korneli no lupwa lwakwe, kabili bonse mu lupwa balibatishiwe. (Imil. 10:​21-23, 34, 35, 44-48) Pa numa ya myaka iingi, Petro akoseleshe Abena Kristu banankwe ukuti ‘balesuminishanya mu fyo baletontonkanya.’ (1 Pet. 3:​8, futunoti) Na fwe bantu ba kwa Yehova muno nshiku, kuti tulesuminishanya mu fyo tutontonkanya nga ca kuti tuletontonkanya nge fyo Yehova atontonkanya ifyo tubelenga mu Cebo cakwe. w25.03 amabu. 9-10 amapara. 7-8

Ifyo abantu ba muli ici calo batontonkanya file filepusanininako fye ne fyo Lesa atontonkanya. (Amapi. 17:15) E ico tatufwile ukulenga umuntu nangu umo alenga twaleka ukuba abashipa ica kuti twaleka no kubombela Yehova. Umutumwa Paulo afundile Abena Kristu abaHebere ukuti batwalilile ukukula mu fya kwa Lesa. Ifi fine e fyo na ifwe tufwile ukucita. Ici cilepilibula ukuti tulingile ukulaisambilisha sana Baibo pa kuti tulemona ifintu nge fyo Yehova afimona. Ifi fine e fyo tufwile ukulacita na pa numa ya kuipeela no kubatishiwa. Nampo nga twalibombela Yehova pa myaka iingi nelyo iyo, tulingile ukutwalilila ukulabelenga Icebo ca kwa Lesa cila bushiku e lyo no kulaisambilisha. (Amalu. 1:2) Nga tuleisambilisha lyonse Icebo ca kwa Lesa, icitetekelo cesu cikakosa, kabili iyi e mibele iyo Paulo asambilishe Abena Kristu abaHebere ukuti balingile ukukwata.—Heb. 11:​1, 6. w24.09 ibu. 10 amapara. 7-8

Nga ca kuti twaba sana ifibusa na Yehova, cikatwangukila ukutwalilila ukuba aba cishinka kuli ena. Ifi fine e fyo cali kuli Yosefe. Alikaninine fye ndai ukucita ubulalelale. Alishibe ukuti ifyo ali no kucita fyali no kukuma Lesa kabili talefwaya ukumukalifya. (Ukute. 39:9) Pa kuti twingaba ifibusa fya kwa Yehova, tulingile ukulakwatako inshita iya kulapepa kuli ena, ne nshita ya kulaisambilisha Icebo cakwe. Nga tulecita ifi bucibusa bwesu na ena bukakosa. Nga twaba na bucibusa ubwakosa na Yehova nga filya Yosefe ali, tatwakafwaye ukucita nangu cimo icingamukalifya. Abaleka ukucetekela Yehova balaleka bwangu ukuba aba cishinka kuli ena. Tontonkanyeni pa fyo abena Israele bacitile ilyo bali mu matololo. Balishibe ukuti Yehova e ko aba, lelo batendeke ukulatwishika nga ca kuti ali no kulabapeela ifyo balekabila. (Ukufu. 17:​2, 7) Ici calengele bapondokele Lesa. Ukwabula no kutwishika, te kuti tufwaye ukucita ifyo bacitile.—Heb. 3:12. w24.06 ibu. 24 amapara. 14-15

Tuleikala mu nshiku sha kulekelesha, kabili kuti twaenekela ukuti ifintu ifilenga tulelila fikalafulilako fye. Yehova alamona nga tulelila kabili na o wine alaba no bulanda. Alitutemwa pa mulandu wa kuti tulatwalilila ukuba aba cishinka nangu tukwate amafya kabili alebukisha ifilamba fyesu. E ico nga natukwata ubwafya ubukalamba, tulingile ukupepa kuli Yehova no kumulondolwela fyonse ifyo tuleumfwa. Tatufwile ukuitalusha ku ba bwananyina abatutemwa abo twaba nabo mu cilonganino. Na kabili nga tulebelenga Baibo, Yehova akalatusansamusha. Kuti twacetekela ukuti nga twatwalilila ukushipikisha, Yehova akatulambula. Pa fyo akatulambula paba no kukumuna ifilamba fyonse ku menso yesu ifyo tulila pa mulandu wa kuba no bulanda, pa mulandu wa kuti umuntu uo twacetekela atupondokela nelyo atukalifya, na pa mulandu wa kulwala. (Ukus. 21:4) Pali ilya nshita tukalalukusha fye ifilamba pa mulandu wa kusekelela. w24.12 ibu. 20 para. 3; ibu. 25 para. 19

Yehova alitusonta ukuti tube Inte shakwe, kabili alitulaya ukuti akulatwafwa pa kuti tuleba abashipa. (Esa. 43:​10-11) Natulande pa nshila 4 isho atwafwilamo pa kuti tube abashipa. Inshila ya kubalilapo, lyonse ilyo tulebila imbila nsuma Yesu alaba na ifwe. (Mat. 28:​18-20) Inshila yalenga bubili, Yehova alisonta bamalaika pa kutila baletwafwa. (Ukus. 14:6) Inshila yalenga butatu, Yehova alitupeela umupashi wa mushilo uutwafwa pa kuti tuleibukisha ifyo twasambilila. (Yoh. 14:​25, 26) Inshila yalenga 4, Yehova alitupeela bamunyinefwe na bankashi aba kubomba nabo. Apo Yehova alatwafwa e lyo na ba bwananyina nabo balatutungilila, kuti twaba abashipa no kutwalilila ukubila imbila nsuma. Bushe mulafuupuka nga ca kuti tamusangile abantu abengi pa mayanda? Kuti cawama mwayipusha amuti: ‘Bushe abantu abekala mu cifulo ico mbilamo bali kwisa pali ino nshita?’ (Imil. 16:13) ‘Bushe bali ku ncito nelyo bele mu kushita ifintu?’ Nga ca kuti bele ku ncito nelyo mu kushita ifintu, bushe te kuti ciwame mwabilako mu misebo umo mwingasanga abantu abengi? w24.04 ibu. 17 amapara. 10-11

Nga ca kuti mwalyupa, ifyo ulupwa lwenu lwaba kuti fyalenga mwafikapo ukuba eluda nelyo mwafilwa ukufikapo. Kanshi mulingile ‘ukulatungulula bwino aba mu ng’anda yenu.’ Aya mashiwi yalola mu kuti mufwile ukulasunga bwino aba mu ng’anda yenu, kabili fyonse ifyo musalapo ukucita fifwile ukulawamina ulupwa lwenu. Mulingile no kulatungulula amapepo ya lupwa, ukulashininkisha ukuti aba mu lupwa lwenu balelongana. Na kabili mulingile ukula-afwa aba mu lupwa lwenu pa kuti balebila imbila nsuma. Nga mwalikwata abana, ninshi abana benu bafwile ukuba “abana abanakila kabili aba mucinshi nga nshi.” (1 Tim. 3:4) Mulingile ukulabalanga ukuti mwalibatemwa ilyo mulebasambilisha. Kwena mufwile ukulaleka abana benu baleseka, baleba ne nsansa kabili baleangala nga filya fine abana bonse bacita. Lelo pa mulandu wa kuti mwalibasambilisha bwino, bakalamumfwila, bakalamucindika kabili bakakwata imibele iisuma. Na kabili mulingile ukula-afwa abana benu pa kuti baleba ifibusa ifisuma na Yehova, balekonka amashinte ya mafunde ya mu Baibo kabili balelunduluka ica kuti babatishiwa no kubatishiwa. w24.11 ibu. 22 amapara. 10-11

Nga tulebombesha mu mulimo wa kubila imbila nsuma, tukalamona ifyo Yehova akalatutungilila kabili tukamucetekela sana. (1 Kor. 3:9) Lelo muleibukisha ukuti Yehova talinganya ifyo mumubombela ku fyo aba bwananyina bambi bamubombela. Alatasha sana pa fyo mulanga ukuti mwalimutemwa. Alatemwa nga amona ifyo mutasha pa bupe ubusuma nga nshi ubo atupeela, e kutila icilubula. (1 Sam. 16:7; Marko 12:​41-44) Icilubula calilenga Yehova aletubelela uluse pa membu shesu, calilenga twaba ifibusa fyakwe kabili calilenga tukwate isubilo lya kwisakwata umweo wa muyayaya. Natulelanga ukuti tulatasha Yehova pa fyo atutemwa, pantu na kuba icalenga tukwate aya amapaalo yonse ni co alitutemwa. (1 Yoh. 4:19) Natulelanga no kuti tulatasha Yesu pa fyo aitemenwe ukwisatufwila! w25.01 ibu. 31 amapara. 16-18

Tontonkanyeni pa fyo uwalembele Amalumbo 73 aleumfwa. Alemona abantu abashalebombela Yehova lelo abali no bumi ubusuma, abali abakankaala, kabili abalemoneka kwati tabalekwata amafya. (Amalu. 73:​3-5, 12) Ilyo amwene ukuti aba baleikala bwino sana, atontonkenye ukuti aleipoosela fye inshita ukubombela Yehova. Ifyo aletontonkanya fyalemusakamika “akasuba konse.” (Amalu. 73:​13, 14) Bushe acitile shani pa kuti aleke ukumfwa ububi? Uyu uwalembele Amalumbo 73 aile ku cifulo ca mushilo ica kwa Yehova. (Amalu. 73:​16-18) Pa mulandu wa kuti kuli ici cifulo kwali abantu ba kwa Yehova, uwalembele aya Amalumbo ali no kulatontonkanya bwino. Alilwike ukuti nangu ca kuti bamo balemoneka ukuti baleikala bwino, tabali no kutwalilila ukwikala bwino. E ico tatwalilile ukumfwa bubi, kabili alishininkishe ukuti filya asalilepo ukubombela Yehova alicitile bwino sana. Ne cafuminemo ca kuti alitwalilile ukubombela Yehova.—Amalu. 73:​23-28. w24.10 ibu. 27 amapara. 11-12

Yehova e watusala ukuba “inte” shakwe. (Esa. 43:​10-12) Imyaka imo ku numa, kalata yafumine kwi Bumba Litungulula yatile: “Takwaba icacindama ukucila pa kuba Inte ya kwa Yehova.” Cinshi Ibumba Litungulula lyalandile ifi? Tontonkanyeni pali ici ica kumwenako. Tutile bamubepesha ubufi bwa kuti mwalicitile ifyabipa, nomba mulefwaya umuntu uwa kuti ese amulandileko ukuti bamubepeshe fye, mwalikwata imibele iisuma. E ico te kuti mucite icintu ca musango uyu. Ukwabula no kutwishika kuti mwafwaya umuntu uo mwacetekela, uwakwata imibele iisuma kabili uo abantu na bambi bengacetekela. Ifi Yehova atusala ukuba Inte shakwe filanga ukuti alitwishiba bwino kabili alicetekela ukutila kuti twamulandilako ukuti e Lesa wa cine fye eka. Tumona ukuti Yehova alitucindamika sana ifi atusala ukuba Inte shakwe, kabili tufwaya abantu baishiba ukuti fyonse ifyabipa ifyo baishiba pali ena fya bufi. Nga tulecita ifi ninshi tulecita ifyalingana ne shina lyesu, pantu tuli Nte sha kwa Yehova!—Rom. 10:​13-15. w24.05 ibu. 18 para. 13

Yesu alesekelela nga nshi pa mulandu wa kuti alebombela abantu. Bushiku bumo ilyo Yesu alebombela abali mwi bumba, tapelelele fye pa kubasambilisha. Lelo alibapeele ne fyo balekabila. Alifushishe ifya kulya mu cipesha mano kabili aebele abasambi bakwe ukuti bapeele abantu. (Marko 6:41) Ifi acitile alesambilisha abasambi bakwe ifya kulabombela abantu. Kabili alibalangilile ukuti imilimo imo yalicindama. Tontonkanyeni pa fyo abasambi ba kwa Yesu batemenwe pa kubombela pamo na Yesu umulimo wa kupeela abantu ifya kulya ica kuti “bonse baliliile baikuta no kwikuta”! (Marko 6:42) Ici ca kumwenako fye cimo pa fyo Yesu alebika sana amano ku fyo abantu balekabila, ukucila ukubika amano ku fyo ena alekabila. Ifi fine e fyo alecita ilyo ali pano isonde. (Mat. 4:23) Yesu aleba ne nsansa ilyo alesambilisha abantu na lintu alebafwa mu fyo balekabila. w24.11 ibu. 16 amapara. 10-11

Apo ifintu filebipilako muli shino “nshiku sha kulekelesha,” aba bwananyina abengi bakalakabila ukubafwa. Na kabili kuti twalasansamusha aba bwananyina kabili kuti twalabalanga ukuti twalibatemwa. Inshila imo iyo twingacitilamo ifi, kulalanda nabo no kulabakoselesha nga baisa mu kulongana. E ico aba bwananyina nga baisa mu kulongana, tulebakoselesha kabili tulebalanga ukuti twalibatemwa. Baeluda balasansamusha bamunyinefwe na bankashi ilyo bali na mafya ayalekanalekana. Nga kwacitika amasanso ayakalamba, nelyo aba bwananyina bamo balwala mu kupumikisha, baeluda ilyo line fye balapekanya ukuti bafwe bamunyinefwe abakwete amafya ya musango uyu. Na kabili balakoselesha aba bwananyina ku mashiwi yaba mu Baibo. Bamunyinefwe na bankashi balangukilwa ukulanda na eluda nga ca kuti balishiba ukuti alaba ne cikuuku ilyo alelanda na bena, alakutika nga balelanda kabili alesha ukumfwa ifyo baleumfwa. Eluda wa musango uyu alalenga aba bwananyina balaumfwa ukuti alibatemwa, kabili cilabangukila ukukonka fyonse ifyo babafunda mu mashiwi yaba mu Baibo.—1 Tes. 2:​7, 8, 11. w24.06 ibu. 29 amapara. 12-13

Tatulingile ukulatontonkanya ukuti apo Lesa wa maka yonse, tomfwa ububi. Yehova atupangile mu cipasho cakwe kabili atupangile ukuti tuleumfwa ububi nga kwacitika ifyabipa. Ici cilenga twaishiba ukuti na o wine alomfwa ububi. Baibo ilanda pali Yehova ukuti inshita shimo “balemukalifya” kabili aleba “no bulanda.” (Amalu. 78:​40, 41) Yehova alyumfwile sana ubulanda ilyo abantu balecusha Umwana wakwe no kumwipaya! Icilubula citusambilisha ukuti takwaba uwatutemwa nge fyo Yehova atutemwa, nangu fye ni balupwa lwesu nelyo cibusa wesu uwa pa mutima. (Rom. 8:​32, 38, 39) Ukwabula no kutwishika Yehova alitutemwa ukucila ne fyo twaitemwa. Bushe mulafwaya ukwikala umuyayaya? Yehova ena cicilenapo. Bushe mulafwaya ukumwelela imembu? Yehova ena alafwaya sana ukumwelela imembu. Ico afwaya fye kutila tuletasha pa fyo atucitila, kabili kuti twalanga ukuti tulatasha nga tuli ne citetekelo e lyo ne cumfwila. Icilubula bupe ubukalamba ubulanga ifyo Yehova atutemwa icine cine.—Luk. Mil. 3:11. w25.01 amabu. 22-23 amapara. 8-9

Bonse tulasalapo ukucita ifintu ukulingana ne fyo tulemona ne fyo tuleumfwa. Nomba ifyo tumona ne fyo tumfwa limo kuti fyatulufya. Nga ca kuti tulesalapo ukucita ifintu pa mulandu fye ne fyo tulemona ne fyo tuleumfwa, ifyo twingasalapo nalimo kuti fyalenga Yehova akalipa. (Luk. Mil. 11:9; Mat. 24:​37-39) Nomba nga tule-endela mu kutetekela, ifyo tukalasalapo ukucita, ‘fikalasekesha Shikulu.’ Nga tulekonka ifyo Icebo ca kwa Lesa cilanda, tukalaba no mutende ne nsansa sha cine cine. (Amalu. 16:​8, 9; Esa. 48:​17, 18) Na kabili nga twatwalilila ukulaendela mu kutetekela, tukatwata umweo wa muyayaya. (2 Kor. 4:18) Kuti twaishiba shani nga ca kuti twendela mu kutetekela nelyo twendela mu kumona? Bonse tulingile ukuyipusha atuti: ‘Finshi filenga ndesalapo ukucita ifintu fimo? Bushe nshitilila fye pa fintu ifyo mona? Nelyo nshitilila pa fyaba mu Cebo ca kwa Yehova? w25.03 amabu. 20-21 amapara. 3-4

Bonse kuti twacitapo fimo pa kuti tulenge abantu batemwe paradaise ya ku mupashi. Kuti twacita ifi nga tulepashanya Yehova. Tapatikisha abantu ukwisa mu cilonganino cakwe. Lelo alaba uwanakilila ilyo ‘aleleta’ abantu mu cilonganino cakwe. (Yoh. 6:44; Yer. 31:3) Abantu abakwata imitima iisuma abasambilila pa fyo Yehova aba no kutemwa na pa mibele yakwe iisuma, balafwaisha ukupalama kuli ena. Bushe nga tuli ne mibele iisuma kabili tulecita ifintu ifisuma, kuti twalenga shani abantu balafwaya ukwisa muli paradaise ya ku mupashi? Cimo ico twingacita pa kulenga abantu balafwaya ukwisa muli paradaise ya ku mupashi, kutemwa aba bwananyina no kuba ne cikuuku kuli bena. Nga ca kuti abantu baisa mu kulongana na ifwe pa muku wa kubalilapo, tufwile ukulenga balaumfwa nge fyo abali mu Korinti nalimo baumfwile ilyo baile mu kulongana pa muku wa kubalilapo. Batile: “Cine cine Lesa aba na imwe.” (1 Kor. 14:​24, 25; Seka. 8:23) Kanshi tulingile ukulakonka ifyo ilembo lya buno bushiku lilelanda. w24.04 amabu. 23-24 amapara. 16-17