Bakabilisha ba Bufumu Bacita Lipoti

Yehova Apayanya Ukwaafwa

MU NSHITA ya nomba line, Inte sha kwa Yehova mu South Africa bapokelele amashiwi pa lwa kalanda ka kupelelwa aka bamunyinabo ba ku mupashi mu calo ca mupepi uko umulimo wabo uwa kushimikila wabindwa. Calicitilwe lipoti kuli bene ukuti pa mulandu wa cilala cabipisha, bamunyinabo balepusukila ku kulya imishila imo. Na kabili babulishe imifwalile yalinga, icalengele Inte bamo ukushimunuka ukwakana mu butumikishi bwa mwi bala.

Mu kwangufyanya bamunyina mu South Africa balyankwileko. Ukwipusha kwalicitilwe ku filonganino fya cikaya mu ncende ya Johannesburg pa lwa kukabila kwa fya kufwala. Mu nshiku fye, amatani yatatu aya fya kufwala yali nayasangulwa. Ifipe lyene fyalisobolwelwe kuli bakabomba ba kuitemenwa. Amapekanyo yalicitilwe ku kutuma amatani 3 aya cilemba, tani imo iya mafuta ya kwipikila, tani imo iya sopo, na matani 17 aya bunga bwa mataba. Lintu akampani kapayenye ubunga bwa mataba kaumfwile ulwa kalanda ka Nte mu calo capumwa ku cilala, basangwilileko ukucila pali tani imo iya ici ca kulya cikabilwa nga nshi.

Pali Cimo, April 16, 1990, icimbayambaya mu kuba ne fipe fyafina amatani 25 ifya kupayanya kwa kwaafwa caimine mu South Africa pa lwendo lwa ciko ulwa makilomita 5,500. Lelo nomba ulusa lwali no kupokwa ukufuma ku mabulashi pa kupisha ifyapayanishiwe ukupula mu calo cabo icalepaulwa ku nkondo.

Amabulashi pe ofesi lya beminishi basosele ukuti nangu cingati Inte sha kwa Yehova tabaishibikwe mwi funde mu calo cabo, bali abaibukila bwino pa lwa kubapo kwabo. Takwali no kubako ukukaanya ku kutuma ukupayanya kwa kwaafwa kuli bamunyinefwe. Ulusa lwalipeelwe. Ifyalembwa fyakabilwa fyalipeelwe, kabili pali Cisano, April 20, Inte bayabwike umupaka ukwabule mpika. Nangu ni fyo, balolenkene no kupikita kwa pa musebo ukucila pali 30 apo bakapokola bapikitila, apo ilingi line bafwaikwe ukulangisha ifyalembwa fyabo ifya kwendelapo. E lyeka fye lintu bamwensekeshe fintu ifyo fyalembwa fyali ifyakabilwa.

Pa numa babe nabenda amakilomita yamo 140 mu kati ka cilya calo, ukutwalilila kwabo kwalicilikilwe ku mumana uwalepoosa. Ubulalo bwa kutendekelako bwalyonawilwe, kabili ubwapangilwe ubwa pa nshita inono mu cifulo ca buko tabwali ubwalinga ku cimbayambaya cikalamba ukubomfya. Nangu cibe fyo, basangile ukuti motoka iyacepeleko iyali mu mulongo wa bamotoka kuti yayabuka ubulalo bwabundwa ukwabula ubusanso. Capingwilwepo ukupatukana mu mabumba yabili. Inkambi yalimikwe pa mulonga waisula iye bumba limo, ilintu ibumba limbi lyatwalilile ulwendo lwabo ukuyakumanya bamunyina amakilomita yamo 260 ukutantalila ku kapinda ka ku kuso. Fintu bali aba nsansa mu kupelako pa kukumana na bamunyina! Tabali no kuleka ukumwentula, ukukumbatana, no kufunkana iminwe. Mu kwangufyanya ifimbayambaya fimbi fibili ifya cikaya fyali mu nshila ku kuyakumanya ibumba limbi ilya bamunyina ilyalelolela mupepi no mumana. Palya, ifya kupayanya kwa kwaafwa fyafumishiwe mu cimbayambaya icikalamba ukulongwa muli fibili ifyacepako.

Amalipoti yapokelelwa yalangilila ukutasha kwashika pa kupayanya kwa kwa Yehova ukwa kwaafwa kwa fya ku mubili. Nalyo line, te mulandu na kalanda kabo aka ku mubili, ukulila kwa bamunyina ku ca kulya ca ku mupashi kwali ukwacila napo ukupelelwa. Icilonganino cimo cakwete ishuko lya Ulupungu lwa kwa Kalinda lumo fye, ulwali no kukopwa ku lupwa lumo lumo. Ukutootela kuli Yehova, amapekanyo yalecitwa nomba ku kupayanya ukukonkoloka kwatwalilila ukwa ca kulya ca ku mupashi kuli bamunyina muli cilya calo.