Mulandu Nshi Lesa Abela Uwatekanye Fyo?
LOLESHA pa cinso ca nkumbabulili ica mwana uulecula ku nsala. Mona umubili wakwe uwaondoloka ne fumo lyabotoka. Tontonkanya pa lwa kukabila kwakwe kwapelelwa ukwa ca kulya, kabili mona imbale yafonka iyabulwamo akantu iyo asendele. Nakalimo nyina aletamba mu kuba na menso yafonka, icinso cakwe cine ukuba icikope ca kubulwe subilo. Lyene esha ukucincintila ubulanda bobe—ee, no kwesha ukuleshe filamba fyobe.
Uku kumoneka kulabwekeshiwabwekeshiwapo imiku amamilioni mu citungu capumwa ku cipowe ica masikweya kilomita 6 icaishibikwa nga Sahel. Citanunuka ukucila amakilomita 4,800 ukucilinganya Africa yabela ku kapinda ka ku kulyo aka Ciswebebe ca Sahara, ukufuma ku Senegal pa Lulamba lwa Atlantic ukufika ku Ethiopia pali Bemba Wakashika. Kwena, icipowe na kabili cilatiinya bacinkupiti mu fyalo fimbi. World Health Organization icita lipoti ukuti mupepi na bantu amakana ya mamilioni 1.1 ukushinguluka isonde balilwala icabipisha nelyo ukukanaliishiwa bwino.
Kwena, insala yaba, lubali fye lumo ulwa kucula kwa buntunse. Umuntu alakowesha isonde, kabili ifwe bonse tulambukilwako. Imicitile ya bupolitiki ilasuminisha ulufyengo ne nkondo iyo iletako ukumanama ne mfwa ku bengi. Mulandu nshi Lesa asuminishisha ifintu fya musango yo? Bushe alatusakamana?
Lesa Alasakamana!
Kabumba wesu alatusakamana. Kwalibako ubushinino ubwingi ubwa ici no bwa maka yakwe ku kulenge fintu ukubombela pamo ku busuma bwesu na ku kumfwana mu bubumbo bwakwe bonse. Ku ca kumwenako, lolesha pa cikope cili pano ica lushimu luletandalila iluba lyabalula pa cimuti ca fitwalo. Ulushimu lushintilila pa kubalula pa mulandu wa bulongo ubo lukabila ku kuliishiwa. Mu kukonkapo, icimuti cashintilila pa buluba ubo umubili wa lushimu usenda ukufuma ku cimuti capalako. Muli iyi nshila, ukubalula kulalengwa no buluba pa kuti ifitwalo kuti fyaletwako. Te fimuti fyonse ifya fitwalo ifikwata ubuluba muli iyi nshila, lelo Lesa mu kushininkisha alitantikila uku kubombela pamo ukushili kwa lyonse muli uno mulandu. Kabili ubusuma bwakwe bufumamo icisabo ico pambi twingalya mu kuba no kusekelela no kumwenamo.
Ulushimu ulwine lwaba lubali lwa nshimu sha malela ishateyanishiwa bwino ukucila pa nshimu 30,000. Shimo shilinda icilunda, ilintu shimbi shilawamya cene no kwingishamo umwela. Nalyo line shimbi shilonganika ubulongo no buluba, shiliisha ubube, nelyo ukusapika intulo shimbi isha bulongo. Lesa umwine atantika imibombele ifyo pa kuti tumwenemo lintu inshimu sha musango yo ishapamfiwa shaletako ubuci bwalowa kabili ubwabamo umulyo ubusangalasha ukusonda kwesu.
Icipesha amano ca kubombela pamo pa kati ka nshimu ne fimenwa na pa kati ka fishishi fiine bushinino bumo fye ubwa bushinino ubwingi ukuti Kabumba mu kupwililika alikwata amaka aya kulenga ifintu fya mweo ukubombela pamo cimo ne cinankwe. Pali uyo mulandu, “Lesa te wa cimfulumfulu, lelo wa muyano.” (1 Abena Korinti 14:33) Mulandu nshi, lyene, asuminishisha umutundu wa muntu ukubako mu cimfulumfulu ca musango yo, mu kuba no bulanda bufumamo ku bafulisha ifyo? Nga ca kuti Lesa alatusakamana, mulandu nshi apembelela pa nshita yalepe fyo ku kulungika iyi mibele? Mu cine cine, mulandu nshi Lesa abela uwatekanya ifyo?
Icebo ca kwa Lesa, Baibolo, cilasuka amepusho ya musango yo. Ici citabo cawamisha citweba ukuti Yehova Lesa aliba uwatekanya pa mulandu uusuma. Mulandu nshi uyo? Kabili butali bwaba shani ukutekanya kwa kwa Lesa kukatwalilila?
[Abatusuminishe Ukubomfya Icikope pe bula 2]
Icikope ca pa nkupo: Frilet/Sipa