Bakabilisha ba Bufumu Bacita Lipoti
Yehova Alambula Umusepela wa Busumino
IMISEPELA ya busumino yaliba iyaumisho mutengo mu menso ya kwa Yehova. Icakukumanya cikonkelepo ica mulumendo wa busumino cilingile ukukoselesha abacaice bambi ukusungilila bumpomfu bwabo ilyo balebombela Yehova.
Mu Argentina kalume wa myaka ya bukulu 11 na munyina umwaice balesambilila icitabo Icine Icitungulula ku Bumi bwa Ciyayaya na nakulwibo. Mu kwangufyanya, abafyashi ba bakalume balangishe ukukaanya, kabili babindile bakalume ukuya ku kulongana ku Ŋanda ya Bufumu. Pa nshita imo, pa kuti bengasangwa ku kulongana, bakalume balifyukile ukupula pe windo lya muputule wa kusambilamo, ukutolokela pa lukungu, kabili ukufuma apo batolweke pa mulu wa cibumba ukupita pa lukungu lwa bena mupalamano no kwingila mu Ŋanda ya Bufumu. Lyene umuntu umo aebele nyinabo ukuti balesangwa ku kulongana kwa Nte sha kwa Yehova. Nyinabo abatiinishe ukuboma, kabili ici cabikile kalume umwaice mu munsokwe, uwalekele ukusambilila. Lelo umukalamba alikoselele. Pa myaka isano aali na maka ya kusangwa ku kulongana ukwabula abafyashi bakwe ukwishiba.
Lintu aali ne myaka ya bukulu 16, afwaile ukutendeka kosi pe sukulu lya ku sekondari iishalimo mwi tauni lya ku mwabo. Ukuba kumbi ukufuma pa ŋanda kwali no kumupeela ubuntungwa bwalundwako ku kukonkelela icine. Abafyashi bakwe balimulekele ukuya, kabili fyonse fyaendele fye bwino pa myeshi itatu. Lyene kafundisha mukalamba uwa pa sukulu acinkwileko abafyashi bakwe ukuti umwana mwaume wabo talepika sulupu ku mendela nelyo ukwimba ulwimbo lwa cishipa. Pa ntanshi ye bumba lya kwa kafundisha mukalamba, abafyashi bakwe, kalemba, loya, na baprofesa ikumi, umulumendo aali na maka ya kupeela ubunte bwawamisha ukulosha ku mulandu mu kukatama ashaleyakanina muli ishi ncitilo. (Ukufuma 20:4, 5) Abafyashi balikalifiwe. Nyina afwaile imfuti, ukufwaya ukwipaya nakulu, uyo alangulwike ukuba uwashingamwa. Lelo taali na maka ya kumusanga eka.
Pa numa, ku kupanda amano kwa kwa cibusa wa lupwa kabili mu kuba no kusuminisha kwa kwa kafundisha mukalamba, abafyashi bapingwilepo ukutwala uyu musepela ku cipatala cinono ica balwala umuntontonkanya, ukutontonkanya ukuti ukundapa kwa mashilu kwali no kumulenga ukusha icitetekelo cakwe. Bakabomba ba mu cipatala cinono basendele kalume intamfu ya makilomita 100 muli motoka kabili bamulashile imiti yafulilako iya insulin ne miti imbi ukufikila afwa icipuupu. Ilyo ashibwike, aali uwafulunganishiwa umupwilapo, taishibe uuli onse, kabili aculile ku bulwele bwa kulaba pa nshita inono. Pa numa ya kubebeta ukwingi badokota tabali na maka ya kusanga ukufulungana ukuli konse ukwa muntontonkanya muli wene. Lelo icipatala cinono calitwalilile mu kuba no kundapa. Ilyo apuupuutuka, kalume alepepa mu kutwalilila kuli Yehova ukukanamusha kabili alemulomba ubukose ku kushipikisha. Yehova alimucingilile, kabili mu kupelako alifumishiwe mu cipatala cinono.
Pa kashita kamo kafundisha mukalamba uwe sukulu aipwishe umulumendo nga ca kuti ali uwaipekanya ukusuusukako. Lintu asosele ukuti iyo, kafundisha mukalamba aebele abafyashi bakwe ukumubwesesha ku cipatala cinono pantu alipenene ukucila pa katanshi. Abafyashi bamutwele ku ŋanda ya kulelelako kabili baebele umuleshi ukushininkisha ukuti taleya ku kulongana kwa Nte sha kwa Yehova. Pa numa lintu abafyashi baile, fintu uyu kalume apapushiwe! Abene ba ŋanda ya kulelelamo bali ni Nte sha kwa Yehova! Mu kupelako abafyashi balileseshe ukundapa kwa mashilu, ukushininwa ukuti badokota balibabepele. Pali iyi nshita Icilye Casumbukisha ica Argentina capingwilepo ukuti abana ba Nte sha kwa Yehova tabali na kutamfiwa ukufuma ku sukulu pa kukanapika sulupu ku mendela.
Bushe ifi fya kwesha fyalinonseshe uyu musepela wa busumino? Ee. Alondolola ukuti: “Naali na maka ya kupeela ubunte bwakulilako kuli badokota, baprofesa, abanandi ba pa sukulu, abafyashi, na bantu bandi, na kuba, ku musumba onse. Abafyashi bandi balinakako mu nshila imo kabili balikwata itontonkanyo lyawaminako ku Nte. Nomba, lintu nalolesha ku numa ku bwaice bwandi, ndamona fintu Lesa aba uwa kusungusha kabili uwabondoka mu kusakamana umo uwatwalilila ukuba uwa cishinka kuli wene. Cili fye nga fintu kemba wa malumbo asosele pe Ilumbo 27:10 ukuti: ‘Ilyo tata na mayo bandekelesha, e lyo Yehova ambuula.’”
Uyu mulumendo nomba ali ne myaka ya bukulu 23, alyupa, kabili aliba uwacincila nga nshi mu mulimo wa kwa Yehova. Mu cine cine, amaka ya kutungilila aya kwa Yehova tayaba na mwa kupelela.—Ilumbo 55:22.