Inte sha kwa Yehova Ukushinguluka Icalo—Bahamas

ICALO ca Bahamas—umunkulinkuli wa fishi ne fishi finono 3,000—capangwa ukupala ubulungu bwa mu mukoshi ubwa korali ukulalanya bakilomita 900 pali bemba wa kafifi pa kati ka Florida na Cuba. Pa kati ka bekashi ba uko 267,000 pali aba kwankulana balefulilako abali ni bakabilisha ba Bufumu. Ulwimbo lwabo ulwa kutasha luleta ku muntontonkanya Esaya 42:10-12 apatila: “Imbeni kuli Yehova ulwimbo lupya, ulwa kumutasha ukutula pa mpela sha pano isonde, mwe batentemukila kuli bemba ne fyaisulamo, mwe naamba ne fishi na baikalamo. . . . Ukutula pa muulu wa mpili baweleshe. Nabapeele Yehova ubukata, no kubilisho lwa kumutasha mu naamba ne fishi.”

Icitetekelo Cipya Casonsombwa

Mu July 1992, painiya wa nshita yonse (kashimikila wa nshita yonse uwa Bufumu) ashalike ica kwaafwo kusambililamo Baibolo Kuti Waikala Kuli Pe na pe muli Paradise Pe Sonde ku wa kwishibana nankwe uwa ku ncito. Pa numa umwaume abelengele icitabo, aisoseshe ati, ‘Ubu butotelo cintu cimo ico mfwile ukufwailisha.’ Pa nshiku sha pa Mulungu shibili ishakonkelepo, asangilwe ku kulongana pa Mayanda ya Bufumu yabili ayapusanapusana aya Nte sha kwa Yehova. Mu kukonkapo, isambililo lya Baibolo lyalitampilwe kuli wene. Nangu cibe fyo, imilungu fye mutanda mu kusambilila kwakwe ukwa Baibolo, ukusonsomba kwalimineko uko kwali no kwesha icitetekelo cakwe icipya—ukusefya kwa nshiku sha kufyalwa.

Ulupwa lwa kwa uyu shimakwebo lwalibimbilwemo nga nshi mu kusefya kwa musango yo, lelo ukutemwa kwakwe ukwa Cebo ca kwa Lesa kwamucincishe ukutwalilila amasambililo yakwe aya Baibolo. Ilyo ukwishiba kwakwe ukwa cine ca mu Malembo kwaleingilishiwako, e lintu no kumfwikisha kwakwe pa lwa kusefya inshiku sha kufyalwa na maholide ya ku calo ne mimwene ya kwa Yehova pa lwa fyene kwaleingilishiwako.

Lintu umukashi wa uyu mwaume apekenye ukubungana kwa kwangalila capamo pa Bushiku bwa Bashifwe, mu mucinshi alikeene ukusangwako. Umukashi ayumfwile, nangu ni fyo, ukuti umulume tamutemenwe no kuti alebiika ubutotelo pa ntanshi ya mukashi no lupwa. Mu cikuuku alilondolwele ukuti ukubomfya cintu alesambilila ukufuma muli Baibolo kwaleafwa ukumwalwila ku kuba umulume wawaminako na wishi. Mu kupelako, umukashi alitesekeshe ukutemwa kwa mulume wakwe ukwa cine ca mu Malembo kabili alisumine ukusambilila Baibolo. Nomba umulume alatungulula isambililo lya Baibolo ku lupwa lwakwe. Kabili mwandi buseko akwete pe Bungano lya Citungu ilya “Ukusambilisha kwa Bulesa” uyu mwaka wapwile! Umukashi wakwe no mwana mwanakashi balisangilwepo kabili balimumwene ukubatishiwa.

Abakuuka Baumfwa Ulwimbo Lupya

Amakana ya bakuuka abena Haiti baleitobeka muli sosaite wa bena Bahamas. Na bo bene balakabila ukumfwa ulwimbo lupya ulwa cine ca Bufumu. Inte ishikala mu Bahamas shilatasha ukuti abaupana abena Haiti ba ku America balifika. Aba balyaafwa ukukosha amabumba yapangwa ayapya pa fishi fya Grand Bahama na Abaco.

Pamo ngo kwaafwa kwalundwapo ku bena Haiti balesekelela mu bukombe bwa Bufumu, ibungano lya citungu ilya kubalilapo mu ciCreole ilyabala alicitwapo mu Bahamas lyacitikeko ukufuma pa July 31 ukufika pa August 1, 1993. Abasangilweko bafikile kuli 214, mu kuba na bapya baipeela batatu ukubatishiwa. Abena Haiti abengi abasambilile icine mu Bahamas ukutule lyo balibwelela ku cishi ca ku mwabo nelyo balikala kumbi ku kulunda amashiwi yabo kuli ayo aya Nte sha cikaya mu kwimbila Yehova amalumbo.

[Akabokoshi pe bula 8]

UKULONDOLOLA IMIBOMBELE YA CALO

Umwaka wa Mulimo uwa 1993a

IMPENDWA YA PA MUULU ABALECITILO BUNTE: 1,294

ICIPIMO: Nte umo kuli 197

ABASANGILWE KU CIBUKISHO: 3,794

AVAREJI WA BAKASABANKANYA BAPAINIYA: 186

AVAREJI WA MASAMBILILO YA BAIBOLO: 1,715

IMPENDWA YA BABATISHIWE: 79

IMPENDWA YA FILONGANINO: 22

IOFESI LYA MUSAMBO: NASSAU

[Futunoti]

[Icikope pe bula 9]

Iŋanda ya Bufumu iya kubalilapo, mu kuba ne ofesi lya musambo ne ŋanda ya bamishonari

[Icikope pe bula 9]

Inte mu kupimpa shibilisha imbila nsuma

[Icikope pe bula 9]

Milton G. Henschel na Nathan H. Knorr mu kuba na bamishonari mu Nassau imyaka mupepi na 45 iyapitapo

[Icikope pe bula 9]

Iofesi lya musambo ilipya, lyapeelwe pa February 8, 1992