Icalo Cawaminako—Bushe Ciloto Fye?
NGA ca kuti wali umukonshi wa cisumino ca Mazdaism nga fintu cashimikwe na kasesema umwina Iran Zoroaster, nga walipembelele ubushiku lintu isonde lyali no kubwelela ku kuyemba kwa liko ukwa pa kutendeka. Nga ca kuti walikeleko muli Greece wa pa kale, nakalimo nga waliloteleko ulwa kufika pa Fishi fye Shuko ifya bwanalale nelyo ukumonako ukubwela kwa Nkulo ya Bwanalale iyalondolwelwe na kalemba wa mishikakulo Hesiod mu mwanda wa myaka uwalenga cinekonsekonse B.C.E. Umwina India uwa bena Guaraní mu South America pambi nga acili alesapika Icalo Cabulamo Ububifi. Ilyo uleikala mu nshita yesu, nakalimo usubila ukuti icalo cikawaminako pa mulandu wa mfundo imo iya bupolitiki nelyo nge ca kufumamo ca kwibukila kwa muno nshiku pa lwa fimenwa, inama ne fyashingulukako.
Inkulo ya Bwanalale, Ifishi fye Shuko, Icalo Cabulamo Ububifi—aya yali pa kati ka mashina ayengi yabomfiwa ku kulondolola ukufuluka kumo kwine, isubilo lya calo cawaminako.
Cino calo, icalo cesu, mu kushininkisha tacaba cifulo calinga. Imisoka ya bukatu iingilishiwako, inkondo sha bukomi bwa bana nkashi isha lukaakala ishishingalinganishiwako, ukulofiwa kwa mushobo onse, imisuula ukulola ku kucululuka kwa bambi, ubupiina ne nsala, ukubulwe ncito no kubulisha ukwikatana kwa mifwaile imo, impika sha fimenwa, inama, ne fyashingulukako, amalwele yashingondapwa ayo yapuma amamilioni—umutande wa tulanda twa pali nomba umoneka uushipwa. Ukutontonkanya pa nkondo isho shilelwikwa pali ndakai, kalemba we lyashi umwina Italy atile: “Icipusho ico cimako mu cifyalilwa fye icine ceka ca nampo nga ubulwani tabwaba e mimwene yapulishamo mu nshita yesu.” Ukulanguluka imibele, bushe uletontonkanya calibamo ukupelulula ukwalukila ku cintu cimo icapusanako, icintu cimo icawaminako? Nelyo bushe ukufwaisha kwa musango yo kwaba kufuluka fye kwa Utopia, iciloto icishakabale aciba ica cine? Bushe twikala mu calo cawamisha pa fyalo fyonse ifingabako?
Aya tayali masakamika yapya. Pa myanda ya myaka iingi abantu balilota ulwa calo cimo umo ukumfwana, ubulungi, ulubanda, no kutemwa fikaanana. Mu kupita kwa nshita, impendwa ya ba mano ya buntunse bakolobondele mu mfundo shabo isha Buteko bwalinga, ifyalo fyawaminako. Lelo, ku ca bulanda, tabatala ababa na maka ya kulondolola ifyo bengalenga fyene ukutunguluka.
Bushe uyu mutande wakokola pa myanda ya myaka iingi uwa filoto, ba Utopia, no kufwaisha kwa buntunse ukwa sosaite awaminako kuti watusambilishako icili conse?
[Icikope pe bula 3]
Bushe cino cili e calo cawamisha pa fyalo fyonse ifingabako?