Uluko Ulusunga Bumpomfu

“isuleniko ku mpongolo no kuleka lwingile uluko lwa bulungami ululinde cishinka.”—ESAYA 26:2.

1. Mulandu nshi ubulondoloshi bwa kwa Esaya pa lwa “luko lwa bulungami” bwingabela ubwa kusungusha?

ILELO, kwabako imisango yalekanalekana iya nko. Imo ya budemokrasi, imo ya budikiteta. Imo ikankaala, imo yena ipiina. Icintu cimo ico inko shonse shakwatako ni ci: Shonse shaba ulubali lwa calo cintu lesa wa ciko ni Satana. (2 Abena Korinti 4:4) Mu cilolwa ca ici, amashiwi ya kwa Esaya kuti pambi yasungusha bamo lintu atila: “Isuleniko ku mpongolo no kuleka lwingile uluko lwa bulungami ululinde cishinka.” (Esaya 26:2) Uluko lwa bulungami? Ee, kwalibako uluko lwa bulungami, apantu ubusesemo bwasonta ku kubako kwa luko mu kasuba kesu. Ni shani fintu ulu luko lwaibela lwingeshibikwa?

2. “Uluko lwa bulungami” cinshi? Twaishiba shani?

² Mu bupilibulo bwa New World Translation ubwa Esaya 26:2, uluko lwasoswa ngo “lusunga imyendele ya bucishinka.” King James Version (amashiwi ya mu mbali) ipilibula icikomo ukuti, “uluko lwalungama ulo lusunga icine.” Ubulondoloshi bonse bubili nabulinga. Na kuba, uluko lwa bulungami lwalyanguka ukwishiba pa mulandu wa kuti e lweka fye pe sonde ulo lutekwa na Kristu Imfumu, na muli fyo ukukanaba ulubali lwa calo ca kwa Satana. (Yohane 17:16) Nge ca kufumamo, ifilundwa fya ulo luko fyaishibikilwa ku ‘kwenda bwino mu Bena fyalo.’ Bakonka inshila ya bumi iyo ikatamika Lesa. (1 Petro 2:12) Mu kulundapo, uko konse bali mu calo, baba lubali lwa “[cilonganino ca, NW] kwa Lesa wa mweo, ulupanda kabili ishintililo ifya Cine.” (1 Timote 3:15) Pa kwafwilisha icine, balakaana amano ya buntunse aya cisenshi ayasambilishiwa na Kristendomu, kabili bekatilila kwi “shiba lya bumupashi ilyabulo bucenjeshi”—Icebo ca kwa Lesa, Baibolo. (1 Petro 2:2) Mu kulundapo, mu kupimpa balashimikila imbila nsuma iya Bufumu “ku cibumbwa conse ca mwi samba lya muulu.” (Abena Kolose 1:23) Bushe kuti kwabako ukutwishika ukuli konse ukuti ulu luko lwapangwa na bashalapo ba kwa “Israele wa kwa Lesa,” icilonganino ca Bena Kristu basubwa? Napacepa!—Abena Galatia 6:16.

Uluko Lwafyalwa

3. Londolola fintu “uluko lwa bulungami” lwaishilefyalwa.

³ Ni lilali lintu “uluko lwa bulungami” lwafyelwe? Ukutendeka kwa luko kwalisobelwe mwi buuku lya kwa Esaya. Pali Esaya 66:7, 8, tubelengapo kuti: “Sione, ilyo talashikitika, e lyo apaapile umwana; ilyo ukunyongotoka kwakwe takulamwishila, apaapile umwana mwaume. . . . Sione apo akomwe fumo, e pa kupaapa abana bakwe abaume.” Mu kuibela nga nshi, Sione, ukuteyanya kwa kwa Lesa ukwa ku muulu, aali no kuletako “umwana mwaume” pa ntanshi ya kukomwe fumo kwakwe. Mu 1914 Ubufumu bwa buMesia bwaliletelweko mu myulu. (Ukusokolola 12:5) Pa numa ya ico, inkondo ya calo iya kubalilapo yabimbilemo inko shafulilako, kabili Abena Kristu basubwa baculile ukukanshika no kupakasa kwatapata. Mu kupelako, mu mwaka wa 1919, uluko lwa ku mupashi, “umwana mwaume,” lwaliletelweko pe sonde. Muli ifyo Sione ‘apaapile abana bakwe abaume’—ifilundwa fyasubwa ifya “luko lwa bulungami” ulupya—kabili aba baliteyanishiwe ku mulimo wa kucitilo bunte uwatwalilila ukutanunuka.—Mateo 24:3, 7, 8, 14; 1 Petro 2:9.

4. Mulandu nshi uluko lwa bulungami ulwa kwa Lesa lwakabila ukushomboka pa kusungilila bumpomfu?

⁴ Ukutula pa kufyalwa kwa luko, ulu luko lwalikumanya ukwesha kwatapata ukwa bumpomfu bwa luko. Mulandu nshi? Lintu Ubufumu bwa mu muulu bwafyelwe, Satana ne fibanda fyakwe balipooselwe ukufuma ku muulu ukwisa kwi sonde. Ishiwi likalamba lyabilishe ukuti: “Nomba fyaise pusukilo na ’maka, no bufumu bwa kwa Lesa wesu, no lupaka lwa kwa Kristu wakwe: ico apooselwe kashinina wa bamunyinefwe, uubashinina ku cinso ca kwa Lesa wesu akasuba no bushiku. Kabili bene bamucimfiishe ku mulopa wa Mwana wa mpaanga, na ku cebo ca bunte bwabo; kabili tabatemenwe imyeo yabo ukufika na ku mfwa.” Satana ayankwile kuli ifi fya kuponako mu kuba ne cipyu cikalamba “no kuya ku kulwa na ’basheleko ku bufyashi bwa mwanakashi, ababaka amafunde ya [k]wa Lesa, no kukwato bunte bwa kwa Yesu.” Ilyo balolenkene no kusansa kwa kwa Satana, Abena Kristu basubwa baiminine abashangila. Ukufika kuli buno bushiku, ifilundwa fyapimpa ifya luko lwalungama ulwa kwa Lesa fibelesha icitetekelo mu mulopa wa cilubula uwa kwa Yesu kabili batwalilila ukupeela Yehova icasuko ca kupeela kaseebanya mukalamba ukupitila mu kusungilila bumpomfu “ukufika na ku mfwa.”—Ukusokolola 12:1, 5, 9-12, 17; Amapinda 27:11.

5. Mibele ya mutima nshi iishaiwamina iya Nte sha muno nshiku iyabaafwa ukusunga bumpomfu?

⁵ Mu 1919, lintu ubunte bwa Bufumu bwa kwa Lesa ubwa muno nshiku bwatendeke, Abasambi ba Baibolo, nga fintu Inte sha kwa Yehova baleitwa pali iyo nshita, baali abanono mu mpendwa lelo abakosa mu citetekelo. Babele ifilundwa fya kubalilapo ifya ‘musumba wakosa, mu kuba ne pusukilo ukwimikilwa ilinga no muncingi.’ Ukutetekela kwabo kwali muli “Yehova pe pe, [uwaba] cilibwe ca muyayaya.” (Esaya 26:1, 3, 4) Ukupala Mose wa ku kale, babilishe ukuti: “Ishina lya kwa Yehova nalabilikisha: lumbuleni Lesa wesu ubukulu! Cilibwe icasansuka, ya mpomfu imicitile yakwe; pantu imibele yakwe yonse bupingushi: Lesa wa cishinka kabili uwabulo bupondamishi, uwalungama kabili uwatambalala.”—Amalango 32:3, 4.

6. Ni mu nshila nshi Yehova apaalilamo abantu bakwe muli shino nshiku sha kulekelesha?

⁶ Ukutule lyo, impongolo sha mitantikile ya Bufumu bwa kwa Lesa shatwalilila ukuba ishacenama ilyo intanshi abashalapo ba Bena Kristu basubwa ba 144,000 balelonganikwa kabili nomba ibumba likalamba ilya “mpaanga shimbi” baleilundako mu kubilisha imifwaile ya Bufumu bwa kwa Yehova. (Yohane 10:16) Muli ifyo, mu buseko kuti cabilishiwa ukuti: “Mwakusho luko lwesu, mwe Yehova, mwakusho luko lwesu, mwacindikwa; mwatalukanye mipaka yonse ya calo ca luko.” (Esaya 26:15) Ilyo tulebebeta icilime ca calo conse ilelo, tulemona fintu ayo mashiwi yaba aya cine! Ukupitila ku maka ya mupashi wa mushilo, ubunte bwa kwa Kristu ubwa Bufumu buleisa bwalitwalwa “ku mpela ya pano nse.” (Imilimo 1:8) Kuntu ukutanunuka kufikile kuti kwapiminwa pa kubomfya Lipoti wa Nte sha kwa Yehova uwa mu Kusaalala kwa Calo uwa Mwaka wa Mulimo wa 1994, uulemoneka pa mabula 12 ukufika ku 15.

Icipimo Cipya ica pa Muulu Muli Bakasabankanya

7, 8. (a) Bushininkisho nshi bwabako ubwa kuti abantu ba kwa Lesa ‘balilefye myando yabo’? (b) Ukulolesha pali Lipoti wa Mwaka wa Mulimo uwa 1994, ni mbali nshi ulemona isho ‘shiletalukanya imipaka ya shiko’ mu nshila yaibela?

⁷ Languluka fimo ifya fishinka fikalamba ifya uno lipoti. Icipimo ca pa muulu ica bakasabankanya ba Bufumu mwi bala cafikile kuli 4,914,094! Fintu cili ica kucincimusha ukulamona ukulonganikwa kwatwalilila ukwe “bumba likalamba . . . abafuma ku luko lonse ne mikowa ne misango ya bantu na ’bantu na ’ba ndimi, nabeminina ku menso ya cipuna ca bufumu, na ku menso ya Mwana wa mpaanga, nabafwala amalaya yabuuta”! Ee, aba na bo balishininkisha ukuba bakasunga ba bumpomfu. ‘Balisamba amalaya yabo, no kuyabuutusha mu mulopa wa Mwana wa mpaanga,’ ukupendwa nga balungama pa mulandu wa kubelesha icitetekelo mwi lambo lya cilubula ilya kwa Yesu.—Ukusokolola 7:9, 14.

⁸ Ukucilisha ukutula mu 1919, ukukambisha kwalyumfwikwa mu kuteyanya kwa kwa Yehova ukwa kuti: “Tangula apa kwikale hema lyobe, ansa ne fipembe fya bwikalo bobe, wishako; lefye myando yobe, ikasha ne mambo shobe.” (Esaya 54:2) Mu kwankulako, umulimo wa kushimikila ulatwalilila ukwabula ukuleshiwa, nangu fye ni mu Yukon watalalisha, uwabela ku mupaka wa Alaska, uko ibumba lyaba no mukosela ilya bapainiya lishipikisha ukutalala uko inshita imo kwingafika fye na ku madigiri Celcius -45 nangu -50 pa milungu iingi iyakonkana. Mu myaka ya nomba line bacinkupiti balekonkomokela ku luko lwa kwa Yehova ulusunga bumpomfu mu kwingilishiwako nga nshi. Impongolo shalicenamunwa pa kupokelela bene ukufuma ku fyalo fya ku Asia ku nse ya Kristendomu, ukufuma mu fyalo umo kale Komyunisimu yakoselemo, ukufuma mu fyalo ifingi ifya mu Africa, no kufuma mu ncende baKatolika baandatilamo, pamo nga mu Italy, Spain, Portugal, na South America. Abantu bapaswa baliletako ififulo fya kubombelamo na fimbi. Mu England, ku ca kumwenako, Inte shilesakamana ukukabila kwa mabumba ya mishobo ne ndimi sha cilendo 13.

“Citeni Ici”

9. (a) Cinshi cintu impendwa ya basangilwe ku Cibukisho ca 1994 ilelangilila? (b) Ni fili kwi fimo ifya fyalo ifyo mu kuibela fikwete abasangilweko abafulisha nga nshi?

⁹ Icishinka cikalamba na cimbi ica muli lipoti wa pa mwaka cili bantu basangilwe ku Cibukisho. Mu kwipipa pa ntanshi talafwa, Yesu aimikeko Icibukisho ca mfwa yakwe kabili aebele abakonshi bakwe ukuti: “Citeni ici ku kunjibukisha.” (1 Abena Korinti 11:24) Cali ca kucincimusha mu 1994 ukumona 12,288,917—abacilile pa miku ibili iya mpendwa ya bakasabankanya bacincila—ukwisa capamo ukumfwila lilye kambisho, atemwa nga abalyako nelyo nga ba kutambako. Mu fyalo fimo icipimo ca basangilwe ku Cibukisho calicilile fye na pa ca bakasabankanya. Bakasabankanya 4,049 mu Estonia, Latvia, na Lithuania baali abacankwa ukukwata 12,876 ukusangwa ku Cibukisho, ukucila pa miku itatu impendwa ya bakasabankanya. Kabili mu Benin, abasangilwe ku Cibukisho 16,786 baiminineko mupepi ne miku isano iya mpendwa ya bakasabankanya. Icilonganino cimo ica bakasabankanya 45 cakwete abasangilweko 831!

10. (a) Cishingamo nshi ico impendwa ikalamba iya basangilwe ku Cibukisho ituletela? (b) Londolola icingacitika lintu umo uwasangilwe ku Cibukisho apokelela ukwaafwa kwalundwapo.

¹⁰ Inte sha kwa Yehova bali aba nsansa ukuti abantu balesekelela abafulishe fyo baliilundile kuli bene pali kalya kashita kalingisha. Nomba balefwaya ukwaafwa aba bantu ukucita ukulunduluka kwalundwapo mu kumfwikisha kwabo no kutemwa kwa cine. Bamo kuti pambi baankulako mu nshila Alla ayankwililemo mu Russia. Alla alesambilila na nkashi painiya waibela lelo talelunduluka, e co isambililo lyalilekelwe ukutungululwa. Nangu ni fyo, Alla alisumine ukusangwa ku Cibukisho. Kulya kulongana, uko kwakwata ubupilibulo bwakulisha nga nshi, kwalimwebekeshe apakalamba. Atile ashibwelela fye ku ŋanda, alipoosele ifipasho fyakwe fyonse kabili apepeele ukwaafwa kwa kwa Yehova. Inshiku shibili pa numa nkashi painiya atandalile Alla ku kumfwa nga aliipakishe Icibukisho. Icafuminemo cali kulanshanya kwabamo ifisabo. Isambililo lya kwa Alla lyalitampilwe cipya cipya. Mu kwangufyanya aleakana mu mulimo wa kucitilo bunte. Ici ca kukumanya cilelangisha ukukatama kwa fipempu fya kubwelelamo pali abo abasangwa ku Cibukisho. Abengi mu kupalishako bakankulako nga fintu Alla ayankwileko.

“Twiba Abaleko Kulongana”

11-13. (a) Cinshi caba ulubali lwa myendele ya bucishinka iya luko lwa bulungami? (b) Mulandu nshi Abena Kristu ba cine balekabila ukusangilwa ku kulongana?

¹¹ Icibukisho caba e kulongana kwacilishapo kucindama pali kalenda wa Nte sha kwa Yehova, lelo te kweka fye kwabako. Cila mulungu Inte sha kwa Yehova shilalongana capamo mu kumfwila amashiwi ya mutumwa Paulo aya kuti: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.” (AbaHebere 10:24, 25) Balabishanya no luko lwa bulungami ulwa kwa Yehova ulo lwishibikilwa ku myendele ya luko iya bucishinka. Imyendele ya bucishinka isanshamo ukusangwa ku kulongana muli bucishinka.

¹² Ici mu kumonekesha balicumfwikisha bwino mu Philippines, umo avareji wa basangwa ku kulongana kwa pa Mulungu mu calo conse maperesenti 125 aya mpendwa ya bakasabankanya. Na kabili, ibumba lya Nte pamo pene na balesekelela balyumfwikisha cene mu Argentina. Bekala mupepi na bakilomita 20 ukufuma ukwabela Iŋanda ya Bufumu. Nangu ni fyo, kangalila wa muputule acita lipoti ukuti takuba nangu umo uupuswa ku kulongana, kano fye nga nalwala. Benda amaawala yane mu cikocikala nelyo pali kabalwe, kabili mu nshita ya mpepo babwelela ku mwabo ninshi nakufiita na fititi.

¹³ Ilyo impela ya iyi micitile ilepalamina, ubumi bulekoselako, impika shiletuulumana, kabili ukusangwa lyonse ku kulongana kuti pambi kwaba kusonsomba nga nshi. Lelo pe samba lya mibele ya musango yo, natukwata ukukabila ukucila pali kale lyonse ukwa ca kulya ca ku mupashi no kubishanya kwa cikabilila uko kwingasangwa pa kulongana kwa musango yo epela.

“Cincila”

14. Mulandu nshi Inte sha kwa Yehova babela abacincila pa lwa butumikishi bwabo, kabili fya kufumamo nshi filangishe ci?

¹⁴ Umwaka wapwa, Icalici lya ciKatolika mu Italy lyaloseshe ku mulimo wa Nte sha kwa Yehova pamo ngo “kusangule nsangu kwa bukatu.” Mu cituntulu, nangu ni fyo, takwabako ubukatu ubuli bonse pa lwa cintu Inte shicita. Ukucila, ubutumikishi bwabo bwaba kulumbulula kwa kutemwa kwashika ku bena mupalamano babo. Na kabili bwaba bushininkisho bwa cumfwila ku mashiwi ya kwa Paulo aya kuti: “Bile cebo; cincila inshita iyene ne nshita iishiyene.” (2 Timote 4:2) Ipamfya lisesha Inte sha kwa Yehova ukuba abapimpa mu butumikishi bwabo, nga fintu cilemonwa mu kupoosa kwabo ubwingi bonse pamo ubwa maawala 1,096,065,354 mu 1994 ukushimikila ku bena mupalamano babo, ukucita ifipempu fya kubwelelamo, no kutungulula amasambililo ya Baibolo 4,701,357. Abengi balyakeneko mu mulimo wa bupainiya, icilelangisha ukuti umupashi wa bupainiya uli uumi kabili uwacincila. Avareji wa bapainiya 636,202 mu kusaalala kwa calo aleshinina ici.

15, 16. (a) Ni shani fintu abacaice na bakalamba bonse balangisha umupashi wa bupainiya? (b) Ukulolesha pa calo cimo cimo muli Lipoti wa Mwaka wa Mulimo uwa 1994, ni mu fyalo nshi ulemona impendwa shapulamo isha bapainiya?

¹⁵ Pa kati ka abo bapainiya paba abacaice abengi. Bamo mu United States nomba balebomba nga bapainiya ba nshita yonse ilyo bacili pe sukulu lya ku sekondari, mu kuba na banabo ba mu kalasi nge cifulo cabo ica kubombelamo cikalamba. Iyi misepela yalisanga ukuti bupainiya e nshila yawamisha iya kuicingilila abene ku miti ikola, bucisenene, no lukaakala ifyo fyaandatila amasukulu ayengi muli cilya calo. Abacaice bambi abengi babika umulimo wa bupainiya ngo buyo bwabo lintu bapwisha isukulu. Irina, mu Ukraine, acitile bupainiya bwa kwafwilisha ukupulinkana imyaka yonse iya ku sukulu lya sekondari pa kuti engaipekanishisha umwine ku kucita bupainiya pa numa ya kupwishe isukulu. Lintu apwishishe isukulu, ulupwa lwakwe lwatile lwali no kubombela capamo na wene ukukuma ku ncito ya ku mubili pa kuti engabemininako mu mulimo wa bupainiya bwa nshita yonse. Mu fya bunonshi, ifintu tafyayanguka mu Ukraine. Lelo Irina atila: “Ninjishibo kuti ndecita umulimo uyo upilibula ubumi te kuli ine neka fye lelo na kabili kuli abo nshimikilako.” Mu cine cine caba buseko ukumona abacaice abengi nga nshi ilelo ukutontonkanya nga Irina. Nga ni nshila nshi ingacilapo kuwama kuli bene iya ‘kwibukishishamo Kalenga wabo mu nshiku sha bulumendo no bukashana bwabo’?—Lukala Milandu 12:1.

¹⁶ Impendwa ikalamba iya bapainiya nabatantalila mu myaka. Umo acita lipoti ukuti mu kati ka nkondo ya calo iyalenga bubili, wishi na ndume yakwe balipaiwe ilyo balelwa mu nkondo, kabili nyina na nkashi nankwe bapikilwe imfuti mu ncende ya babusu. Pa numa umwana wakwe umwaume alifwile. Nomba, mu myaka yakwe iilebotelela no kucula ku butuntulu bwa bumi ubwalubana, Yehova alimupeela, ukupitila mu cilonganino ca Bwina Kristu, ulupwa lwakulilako ukucila pali lulya alufishe. Kabili alasanga ubuseko mu kwaafwa bambi pamo nga painiya wa nshita yonse.

17, 18. Ni shani fintu umo na umo uwa ifwe, nampo nga ni painiya nelyo iyo, engalangisha umupashi wa bupainiya?

¹⁷ Kwena, te onse engaba painiya. Yehova alasekelela ukupokelela ica pe kumi cesu conse icawamisha, ico twingapeela, te mulandu na fintu ici cingaba mu mulandu wesu. (Malaki 3:10) Mu cine cine, ifwe bonse kuti twalundulula umupashi wa aba bapainiya bapimpa no kucita icili conse ico imibele yesu ilesuminisha ku kutwala pa ntanshi ukushimikilwa kwa mbila nsuma.

¹⁸ Ku ca kumwenako, mu Australia, ubushiku bwa April 16 bwalipaatwilweko ngo bushiku bwaibela ubwa kucitilo bunte kwa mu musebo. Bakasabankanya capamo na bapainiya balitungilile iyi mitantikile, nga fintu camonekele mu cipimo cipya ica pa muulu ica 58,780 muli ulya mweshi. Mu kulundapo, bamagazini balundwako 90,000 balyananishiwe ukucila abaananishiwe mu mweshi umo wine umwaka wapwa. Pali ubu bwine bushiku bwaibela, nkashi ashalike bamagazini ku mwaume, kabili ilintu alelemba ishina lyakwe na keyala pa kuti engakonkelela ubuseko, asangile ukuti baali lupwa! Caishileba ukuti umwaume aali ni ndume yakwe muli banyina mukalamba uo ashabalile amonapo pa myaka 30. Ico mu kushininkisha cafuminemo ifipempu fya kubwelelamo ifya nsansa nga nshi!

Sunga Bumpomfu Ukufika na ku Mpela

19. Mulandu nshi cibelele ice pamfya ukuti uluko lwa bulungami ulwa kwa Yehova lusungilile bumpomfu ukufika fye na ku mpela?

¹⁹ Cili ice pamfya ukuti bonse mu luko lwa bulungami ulwa kwa Lesa basunge bumpomfu ilyo icalo ca kwa Satana cileisa ku nsondwelelo ya ciko. Mu kwangufyanya, uluko lwa mushilo ulwa kwa Yehova lukomfwa ukubilisha kwa kuti: “Kabiyeni, mwe bantu bandi, ingileni mu miputule yenu, no kwisalako ifiibi fyenu; fisamenimo inshita inono iyacepesha, cisuke cipite icipyu cakwe.” Ici calo cakwata umulandu wa mulopa ukwabula ukusengauka cikalolenkana no bupingushi bwa bulesa. “Pantu, moneni, Yehova alefuma umo aikala ku kukanda abekashi ba pano isonde pa mampuulu yabo. Icalo cikasokolole milopa iyasumiwe pali cene, tacakashiike kabili pa baipayaulwa ba ciko.” (Esaya 26:20, 21) Shi umo na umo uwa ifwe naeminine uwashangila pamo ngo Mwina Kristu uusunga bumpomfu uubishanya no luko lwa bulungami ulwa kwa Yehova. Lyene tukasekelela ukunonka ubumi bwa muyayaya mu mitekele ya pe sonde nelyo iya ku muulu iya Bufumu bwa kwa Kristu.

Bushe Uleibukisha?

◻ Ni lilali lintu “uluko lwa bulungami” lwafyelwe?

◻ Mulandu nshi abantu ba kwa Lesa bakabila ukushipikisha mu kati ka ishi nshiku sha kulekelesha?

◻ Cinshi cilelangwa ne fipendo fya pa muulu ifya bakasabankanya na maawala yapooselwe mu butumikishi ifilemonwa muli Lipoti wa Mwaka wa Mulimo uwa 1994?

◻ Mulandu nshi ukusangwa ku kulongana kubelele ukwacindama nga nshi ilyo cino calo cilepalamina impela ya ciko?

◻ Mulandu nshi bonse ababishanya no luko lwa bulungami ulwa kwa Lesa bafwile ukusungila bumpomfu?

[Charti pe bula 12-15]

LIPOTI WA MWAKA WA MULIMO UWA 1994 UWA NTE SHA KWA YEHOVA UWA MU KUSAALALA KWA CALO

(Moneni muli magazini)

[Icikope pe bula 18]

Bakasunga ba bumpomfu mu luko lwa bulungami ulwa kwa Yehova bakanonka ubumi bwa muyayaya ubwapwililika