Bwaba Shani Ubwa Mutengo Ubumi Kuli Iwe?

KALUME umupungwe aipeye umwine pa kutoloka ukufuma pa ntunti yalenga cinekonsekonse iya cikuulwa ca mayanda ayengi. Aali nabelenga icitabo icalondolwele ibaka lya mfwa ukuti lyaba “ilyabula ukukalipwa nelyo ukusukasuka nelyo umwenso; lelo, lilomfwika bwino.” Kalemba wa ici citabo, icasabankanishiwe mu Japan, atungile ukuti aletambika fye “ukuipaya pamo nga cimo ica fya kusalapo mu bumi.”

Abantu abaipaya tababa e beka fye abalangisha imisuula ku bumi ilelo. Banamutekenya ba mulekelesha na bo balangisha umucinshi unono nga nshi ku bumi. Bamo balanwa fye no kunwa kabili elyo baleensha, abengi ukwangufyanya ukufika ku mfwa.

Bambi balangisha fintu bacindika panono ubumi bwabo pa kukomaila kuntu babika pa musamwe. Bakapeepa ba fwaka balakaana ukuleka fwaka, nangu cingati ukupeepa kuti kwalenga imfwa kabili kwainikwa ukuipaya kwa panono panono. Mu cifulo ca kusungilila umusangwela muli cino calo caiminwa ku kwampana kwa bwamba, abengi bakonkelela inshila ya bucitobo iyo ilingi line itungulula ku mfwa.

Ukwabula fye no kwiluka ulwa cene, bamo balaipusula imyaka ya bumi ukupitila mu kuliisha, ukunwesha, ukutukusho mubili kushakumanina, no kufwayo musamwe. Kalemba umwina Japan Shinya Nishimaru asokele ukuti: “Ifibelesho fishalamwa ifya miliile filafulunganya imibombele ya mu mubili, kabili ukukonkelela fye ubwanalale no musamwe kulakubulula ubutuntulu bwa bantu.” Bamo balikwatako imimwene ya balya aba nshita sha pa kale abatile: “Natulye no kunwa, pantu mailo tukafwa.”—Esaya 22:13; 1 Abena Korinti 15:32.

Ee, imisuula ku bumi yalyanana ilelo. Muli ifyo, kuti caipushiwa mu kulinga ukuti, Bwaba shani ubwa mutengo ubumi kuli iwe? Bushe ubumi bulingile ukusungililwa te mulandu ne cingesa? Bushe kwalibako icili conse icacilapo mutengo pa bumi bwesu ubwa ndakai?