Ukusekelela Ukwabakilwa abo Basanga Icine

UMWAUME umwina Finland asangile icitabo ca The Divine Plan of the Ages pa ncende alesungila ifipe. Ilyo line fye atendeke ukucibelenga, kabili mu kwangufyanya alelanda ku mwine eka ati, ‘Ici e cine; ici e cine.’ Lintu aikile ukufuma umusungilwe fipe, aebele umukashi wakwe ati, “Ninsange mipepele ya cine.”

Ici ca kukumanya cili icaibela mu nshila uyu mwaume asangilemo icine, lelo abengi aba Nte sha kwa Yehova kuti bashimika ukuti baankwileko mu nshila imo ine. Bonse fye kuti bakweba ulwa ukusekelela kuntu ciletako pa kwishibe cine. Ifya kukumanya fikonkelepo fileebekeshe ci.

Ifisambilisho fya Baibolo Ifya Cine Fileto Buseko

Margarita Königer akuliile mu Munich, Germany, mu kati ka Nkondo ya Calo iya II. Amayanda yaponeshiwapo amabomba kabili ayalepya e fyo alemona libili libili. Ndume yakwe afwile mu nkondo. Ilyo alesangwa ku mapepo ye calici lya ciKatolika, aleumfwa uko amapepo yalepepwa ukulola ku fita fya bena Germany na führer, Hitler. Pa numa ya nkondo, Margarita apokelele ukwaafwa kwa kuya ku koleji ku United States pamo ngo lubali lwa programu wa kukabushanya abasambi. Asangile ukuti abantu baali aba bucibusa kuli wene, e co aletwishika icalemoneka ukutuninkisha abantu, abo ukufwaisha kwabo ukwa cifyalilwa kwaba kwikala mu mutende, ukuti belacetekelana kabili balepatana mu kati ka nkondo. Ilyo abwelele ku Munich, aishilekumana ne Nte sha kwa Yehova, kabili ukupitila mwi sambililo lya Baibolo na bene, alisangile ifyasuko ku fipusho fyakwe. Atila: “Nalilangilwe ukufuma muli Baibolo ukuti amaka ya mipashi ibifi yalibimbwamo . . . Baibolo yainika yene ukuti ni ‘bamwandanshi,’ kabili, na kuba, itila Satana ‘alelufya bonse abaikala mu calo conse.’ . . . Ukupingwila ku ncitilo shabula bukapepa, isha buciwa isha nko na bantu na bantu, fintu cilimo ukupelulula ne cabamo ukwikusha ici casuko!”—Abena Efese 6:12; Ukusokolola 12:9.

Margarita atwalilila ati: “Candetele ukusekelela kukalamba ukusambilila ulwa kupayanya kwa kwa Lesa ukwa kupikulula impika she sonde. Iyo, tacakabe ukupitila mu mfundo sha buntunse nelyo ubwangalishi bwa buntunse, nga fintu citubululwa na bakasambilisha ba ku calo. Ukucila, Baibolo ilanga ukuti kamfulumende wa ku muulu akalama imilandu ye sonde. . . . Yesu Kristu asambilishe abakonshi bakwe ukupepa ati: ‘Ubufumu bwenu bwise.’ . . . Natendeke ukumono kuti ubu bufumu ni kamfulumende wa cine cine no kuti cili kupitila fye muli bwene e mo umutende wine wine, uwa mu kusaalala kwa calo ukeshila.” Mu kati ka myaka mupepi na 30, Margarita alibomba nga mishonari mu fyalo mupepi na fisano ifya mu Africa—iilekelesheko 19 ukupooswa mu kubilishe cine ku bantu bafuuka aba mu Ouagadougou, Burkina Faso.

Ica kukumanya ca kwa Margarita te cabako ceka. Abengi balyankulako bwino mu nshila imo ine ilyo basanga ukuti bashimapepo ba Kristendomu ku mbali shonse isha bulwi balapepa kuli Lesa ukulombo kucimfya. Abantu ba mitima ya bufumacumi balamona ukubamo kupelulula mu kulondolola kwa Baibolo ukwa kuti Lesa takumako ku nkondo sha bantu lelo ukuti ishi shisako pa mulandu wa kuti “pano isonde ponse palaala mu maka ya Mubifi.” Aba bakafwaya ba cine basambilila ukuti Abena Kristu bene bene tabafwile ‘ukuba ulubali lwa calo’ lelo bali no kutwalilila ukukanabuulamo ulubali mu milandu ya ciko. Pa kwishibo kuti Inte sha kwa Yehova balikwata ukwiminina kwa musango yo, aba abapya abalesekelela balashininwa ukuti nabasanga icine. Aba musango yo balakula mwi subilo no kusekelela ilyo baleya balenonka ukwishiba kwaingilishiwako ukukuma ku mulandu Lesa asuminishisha ububifi na fintu mu kwangufyanya akaletako umutende ne mibele ya bulungami pe sonde ukupitila mu Bufumu bwakwe.—1 Yohane 5:19; Yohane 17:16, NW; Mateo 6:9, 10.

Ifishinte fya Cine Ifya Baibolo Fileto Buseko

Daniel Rosero uwa ku Ecuador ayumfwile ukuti ubumi tabwakwetemo bupilibulo, e co atendeke ukunwa. Icalici aleyako lyamusambilishe ukuti icalemupembelela cali fye ni mfwa no mulilo wa helo. Ayankwileko ati, “Ndi no kuyapya, kanshi kandenwa!” Akwete ulupwa ulwa bantu cinekonsekonse abo ashalepayanishisha nangu cimo, kabili lyonse fye alelwa no mukashi wakwe, Delia. Aishilealuka bushiku bumo pa Mulungu ulucelo lintu batandalilwe ne Nte sha kwa Yehova no kutendeka ukusambilila Baibolo. Umuku wa kubalilapo Daniel asangilwe ku kulongana kwa muputule ukwa Nte sha kwa Yehova, ailwike ukuti aali nasanga icine. Atila: “Ukuteyanya kwalimpapwishe. Abantu baleumfwana, abantu abengi, bonse capamo. Kuti waumfwa ukutemwa mwi bumba. Takwali uwalepeepa fwaka. Takwali uwa milandile yabipa. . . . Ndeibukisha naletontonkanya ukuti, ‘Ici e cine!’ Icankuntile tacali kutiina imfwa nelyo impela ya calo. Cali kusanguluka kwa kuteyanya.”

Ulupwa lonse ulwa baRosero basangwike ni Nte sha kwa Yehova. Ubumi bwabo ubwa lupwa ne mibele yabo iya fya bunonshi yaliwamineko ilyo balebomfya ifishinte fya Baibolo. Delia Rosero atila: “Namwishiba conse ci cili ni pa mulandu wa cine ca mu Baibolo. Nani engeshiba uko abana bandi bengaba ukwabule Cebo ca kwa Lesa? Bonse cinelubali balibatishiwa kabili baliba abashikatala. Icine capilibula ubumi ubupya umupwilapo, insansa ishipya kuli ine.”

Ica kukumanya ca lupwa lwa baRosero te cabako ceka. Abengi mu kasuba kesu balicushiwa ku mpika. Umulandu umo waba wa kuti ifipimo fya mibele isuma ifyapayanishiwa muli Baibolo mu cinkumbawile taficindikwa na kabili, nga fintu fyalecindikwa mu nkulo shabangilileko. Imipepele iingi e mo na yo ine yakonka, atemwa mu kubepekesha ukuti balalekelela nelyo pa mulandu wa kuti bayumfwe fyo apo inshita shilealuka imibele isuma iya kale yalileka ukubomba. E co, ukupala abantu bambi, ulupwa lwa baRosero balepampanta fye ukwabula ubutungulushi bwa Baibolo. Nangu cibe fyo, lintu abantu baicefya aba musango yo baumfwikisha imimwene ya kwa Lesa pa lwa mibele isuma no bumi bwa lupwa, ukwabulo kushingashinga balabomfya ico basambilila. Ukufuma ku kushimika kwabo kuti twamono busuma bwa kubomfya cintu tusambilila.

Ukusekelela Kufwile Ukulundululwa

Nangu cibe fyo, ici tacilepilibulo kuti, Umwina Kristu aba lyonse mu mibele ya kusangalala. Ukwabulo kutwishika, amafya ayo abantu mu cinkumbawile balolenkana na yo, pamo nga ukubulwe ncito, ukulwala, ne mfwa, yalambukilako na Bena Kristu bene. Abena Kristu na kabili balikwata ubulwi bwatwalilila ubwa kulwisha ukukanapwililika kwabo abene na mabunake. Ubulondoloshi bwa Baibolo busoso kuti Lote “[aleba] no bulanda ku mibele ya bucilende iya bapulumushi” mu musumba wa Sodomu. Abena Kristu ba busumino tabengasengauka ukuyumfwa kwapalako lintu balemona imibele ya bubifi ileanana.—2 Petro 2:7, 8.

Nangu cibe fyo, abo abasanga icine balikwata ishuko. Ku ca kumwenako, uwasumina uuleloosha uufwile tali na kuyumfwo “bulanda, filya baba na bambi abashaba na kucetekela.” Ubulanda bwakwe bukakwata umwa kupelela. E fyo caba na ku mpika shimbi na ko. Umuntu uwasanga icine alishiba ukuti amafya ya pali ino nshita yali fye ya pa kashita kanono. Isubilo licilenga ukwangukako ukushipikisha pe samba lya mafya. Umusango wa bumi uwashikatala na o ulafwilisha.—1 Abena Tesalonika 4:13.

Paulo akonkomeshe Abena Kristu ukuti: “Sekeleleni pe muli Shikulu; ndetila kabili, Sekeleleni.” (Abena Filipi 4:4) Ici cilangililo kuti ilintu ukusekelela kuti kwasangwa kuli ifwe bonse, na kabili kuti cacitika ukukanakukwata. Amasakamika ya ino micitile ya fintu iikote kuti yaba cipindami. Mu kulundapo, Baibolo itwebe fyo tulakabila ukulundulula ukusekelela, cimo ica fisabo fya mupashi wa kwa Lesa. (Abena Galatia 5:22) Nga watwalilila ukulapokelela ukwishiba kwa cine no kuicinkulako ulwa fyuma fya ku mupashi fintu caleta na fintu cicili cileleta, ukusekelela kobe kukafula. Kukalakoselako ilyo tulepalamina ku nshita lintu Lesa “akafuute filamba fyonse” ku menso ya bantu kabili lintu nangu “kuloosha nangu kukuuta nangu kucululuka” fishakabeko na kabili.—Ukusokolola 21:4.

[Ifikope pe bula 8]

Abengi balebekeshiwa no kusekelela no kuteyanya kusuma pa kulongana kukalamba ukwa Nte sha kwa Yehova