Bakabilisha Ba Bufumu Bacita Lipoti

Ukufika ku Tumishi Twabela Ukutali mu Greenland

PA MAKUMI ya myaka ayengi Inte sha kwa Yehova balibomfya bamagazini ba Ulupungu lwa kwa Kalinda na Loleni! mu kushimikila imbila nsuma. Aba bamagazini basumbula amano ya kwa Yehova nge fyo yalumbululwa mu Cebo cakwe, Baibolo. Babebeta ifya kuponako fya mu calo ifyo filosha ku busesemo bwa Baibolo, kabili bakwatamo ukufunda kwabamo ukupelulula ukwa Baibolo ku mafya ya pali ino nshita.—Yakobo 3:17.

Mu 1994, Inte mu Greenland balibombeshe ku kutambika Ulupungu lwa kwa Kalinda na Loleni! ku bantu abafulisha nga nshi. Mu kati ka lusuba, bapangile amapekanyo ya kutandalila utumishi twabela ukutali mu Greenland. Ibumba lya bakabilisha ba Bufumu baendele no bwato ukucila bakilomita 4,000 ukulola ku masamba ya lulamba lwa Qaanaaq (Thule), ukufika ku mekalo yabela ukutali ku kapinda ka ku kulyo aka cibulungwa ca calo. Ulwendo lwabo lwasendele imilungu cinelubali. Pa lulamba lwabela ku kabanga, Inte abaupana bafikile ku kamushi ka Ittoqqortoormiit kabili pa muku wa kubalilapo bafimbile kene bwino bwino ne mbila nsuma.

Mu kubangilila ulya mwaka, mu kati ka mweshi wa April, bamagazini 7,513 aba Ulupungu lwa kwa Kalinda na Loleni! balishalikwe ku bantu ba mu Greenland. Ico cilepilibula ukuti, pali avareji, kasabankanya wa Bufumu umo mu bali 127 ashalike bamagazini 59—magazini umo ku bekashi cinelubali. Ulya mweshi, Loleni! akwete ifipande pe samba lya mutwe wa pa nkupo “Kansa wa ku Mabeele—Ukusakamikwa kwa Mwanakashi Uuli Onse.” Nte umo, uwashalike bamagazini 140, ashile uyo Loleni! kuli kabilisha wa pa televisioni. Pa numa ya nshiku shafulilako, ilyashi lya pa televisioni lyalangile ifipande pa lwa kansa wa ku mabeele. Kabilisha alangishe magazini pali televisioni, aiswile amabula yafulilako ilintu aletasha umusango usuma uwa bupilibulo bwa ciGreenlandic. Na kabili aebekeshe imitubululo ibomba iyapeelwe na Loleni! nge nshila ya kucingililamo ubutuntulu bwa bumi.

Nte uyo mu kutendekelako uwashalike bamagazini kuli kabilisha alipushiwe muli programu imo ine iya pa TV. Ayaswike ifipusho fyafulilako pa lwa Nte sha kwa Yehova kabili alandile pa lwa kwananya kwakulisha ukwa bamagazini ulya mweshi. Na kabili alandile pa lwa mano yabomba ayasangwa muli Baibolo no kulondolola ukuti ukufunda kwa musango yo ukwabamo ukupelulula kuti kwatwaafwa ukubomba pa mpika sha lelo.

Programu asondwelele mu kuba no kwipusha presidenti wa Cancer Society ya mu Greenland. Asosele ukuti tabalile amonapo ifyebo fya musango yo ifishaiwamina kabili ifyaisulamo ukufunda pali uyu mutwe wa lyashi mu lulimi lwakwe. Lyene alaalike bonse abalefwaisha ukwishiba pa lwa kansa wa ku mabeele ukubelenga ifipande fya muli Loleni! Asosele ukuti kwaliko umulandu usuma uwa kutashisha Inte sha kwa Yehova pa kubombesha kwabo.

Pamo nga ku Greenland, Inte sha kwa Yehova ukushinguluka icalo batwalilila ukushimikila imbila nsuma “ku cibumbwa conse ca mwi samba lya muulu.” (Abena Kolose 1:23; Imilimo 1:8) Mu kuba ne mpapulo sha Baibolo, ukusanshako Ulupungu lwa kwa Kalinda na Loleni!, baafwa abantu ba misango yonse ukucimfya amafya ya muno nshiku kabili no kubapeele subilo lya nshita ya ku ntanshi iyawamisha.

[Mapu pe bula 8]

(Nga mulefwaya ukumona mapu, moneni muli magazini)

Qaanaaq (Thule)

Ittoqqortoormiit

Nuuk (Godthåb)