Inte sha kwa Yehova Ukushinguluke Calo—India
INDIA! Ici calo cikalamba e mwikala umuntu umo pa bantu bonse 6 aba pali uno planeti. Capamo, ukucila pa ndimi 1,000 shilalandwa muli ici calo ca bantu balekanalekana. Abantu bafulishamo baHindu, bonse pamo amaperesenti 83, ilintu amaperesenti 11 baShilamu, mu kuba na baSikh, abaBuddha, abaJain, na betwa Abena Kristu ukupanga icipendo cashalako.
Inte sha kwa Yehova nabatunguluka nga nshi mu India mu myaka ya nomba line. Balisanga abantu bapale mpaanga abali abaitemenwa ukwiminina mu kushangila ku Bufumu bwa kwa Yehova, te mulandu ne misango yalekanalekana iya kutitikisha no kukaanya.
Ku ca kumwenako, umukashana mu mipepele ya lupwa lwa ciHindu aali uwa bulebe ukutula fye ku bwaice pa mulandu wa polio. Ukucula apitilemo kwamulengele ukutontonkanya pa lwa kwa Lesa ne mifwaile ya bumi. Afwailishe icasuko mu mipepele iingi lelo tasangilemo icisansamushi icili conse. Nge ca kufumamo, alufishe icitetekelo cakwe mu mipepele, nangu ca kuti talufishe citetekelo muli Lesa mwena.
Pali iyi ine nshita Inte shibili shakumenye uyu mukashana mu butumikishi bwabo ubwa ku ŋanda ne ŋanda. “Nalitibinte filamba lintu nabomfwile uko balebelenga Ukusokolola 21:4,” e fyo ebukisha. Apokelele impapulo sha Watch Tower Society ishingi kabili alisumine ukulasambilila Baibolo pa ŋanda te mulandu no kukaanya kwa kwa nyina. Uyu mukashana alyalwike nga nshi mu bumi bwakwe, mu kushipa alolenkene no kukaanya ukufuma ku lupwa, kabili abele Inte yabatishiwa. Asoso kuti: “Ninunduluka sana, kabili cintu cakosa. Lelo Yehova Lesa lyonse aliba na ine no kumpeela umutende uwingi no buseko.”
Ukubo Washangila ku Kupepa Kwasanguluka pa Sukulu
Kafundisha aebele nkashi wacaice ukuya ku Calici lya ciKatolika capamo ne kalasi lyonse. Mu mucinshi nkashi alikeene, ukusoso kuti aali umo uwa Nte sha kwa Yehova kabili taali na kupepa uuli onse nelyo icili conse pa mbali ya kwa Yehova. Kafundisha asosele ifyo nga ca kuti bonse balaya ku calici, na o wine aali no kuyako. Lelo nkashi aali uwashangila no kusoso kuti apantu abaali no kuya ku calici tabaali no kupepa Yehova, tamwenepo umulandu uo engaila mu kusangwako.
Pa mulandu wa kushangila kwa uyu mukashana, kafundisha afwaile ukwishiba ifyafulilako. E co ubushiku bwakonkelepo nkashi amupeele icipande ca mu Ulupungu lwa kwa Kalinda icalelanda pa kupepa Yehova. Pa kutemwa cintu abelengele, kafundisha lyene amwebele ukukanaakanako imibombele yonse iyabimbilemo imipepele pa sukulu. Nkashi ashalike bamagazini 10 kuli uyu kafundisha na kuli bakafundisha bambi.
Ukumfwila Ifunde lya kwa Lesa pa Mulopa Kwalambulwa
Nomba line kwaimineko icikuko ca bulwele bwa kashishi mu mbali shimo isha citungu ca Kerala. Ubu bulwele bulonaula imfyo icabipisha kabili butungulula ku kundapa kwa kusuumununamo amenshi. Ilingi line balakuushishamo umulopa. Mu musumba umo abantu 14 balitekelwe mu cipatala pa mulandu wa ubu bwine bulwele. Umo uwa aba balwele aali ni Nte, eluda mu cilonganino ca cikaya. Aebelwe ukuti ukukuushishamo mulopa e kundapa fye kweka ukwalipo. Eluda alondolwele ifisumino fyakwe ifya mu Malembo no kukaaninina fye ukubikwamo mulopa. (Imilimo 15:28, 29) Pa numa ya kupaashanya nga nshi badokota basosele ukuti aali no kufwa pa mulandu wa kuti alikeene ukukuushishamo mulopa.
Abalwele bambi 13 balipokelele umulopa. Ku ca bulanda, bonse bene balifwile mu nshiku fye ishinono. Munyina e wapuswike fye eka! Abakalamba ba cipatala balisungwike nga nshi. Ababomba mu cipatala balyebekeshiwe apakalamba ku filundwa fya cilonganino ubwingi abalemupempula. Pa numa ya kumufumya mu cipatala, munyina aile mu kutasha badokota, lelo basosele abati: “Mulandu nshi uletutashisha? Tasha Lesa obe, Yehova. E wakupuswishe. Twapaapaata utupepeleko na ifwe kuli Lesa obe, Yehova.”
[Akabokoshi pe bula 24]
UKULONDOLOLA IMIBOMBELE YA CALO
Umwaka wa Mulimo uwa 1994
IMPENDWA YA PA MUULU IYA ABALECITILO BUNTE: 14,271
ICIPIMO: Nte umo kuli 65,266
ABASANGILWE KU CIBUKISHO: 38,192
AVAREJI WA BAPAINIYA BAKASABANKANYA: 1,780
AVAREJI WA MASAMBILILO YA BAIBOLO: 12,453
IMPENDWA YA BABATISHIWE: 1,312
IMPENDWA YA FILONGANINO: 410
IOFESI LYA MUSAMBO: LONAVLA
[Icikope pe bula 25]
Iofesi lya musambo, Lonavla
[Icikope pe bula 25]
Ukucitilo bunte mu kulundana ne Bungano lya “Imbila Nsuma iya Muyayaya” mu 1963
[Icikope pe bula 25]
Ukushimikila ku musulwishi wa mu musebo ku nse ya Red Fort mu Delhi