Bushe Muleibukisha?

Bushe mwalitesekesha bamagazini ba Ulupungu lwa kwa Kalinda aba nomba line? Cisuma, moneni nga kuti mwayasuka ifi fipusho:

◻ Mulandu nshi amashiwi ya kwa Paulo aya kuti “twabela Kristu inkombe” yalingila nga nshi Abena Kristu basubwa? (2 Abena Korinti 5:20)

Ku kale, inkombe shaletumwa maka maka mu nshita ya nkondo ku kukalulula inkondo. (Luka 14:31, 32) Apantu abantunse aba lubembu balinunuka kuli Lesa, alituma inkombe shakwe ishasubwa ku kwebako abantu ifyo bakabila ukucita pa kuwikishiwa kuli Lesa, ukubacincisha ukufwaya umutende na Lesa.—12/15, ibula 18.

◻ Fintu nshi fine ifyakoseshe icitetekelo ca kwa Abrahamu?

Ica ntanshi, alangilile icitetekelo muli Yehova pa kumfwila lintu Lesa alandile (AbaHebere 11:8); ica bubili, icitetekelo cakwe calyampene nga nshi ne subilo lyakwe (Abena Roma 4:18); ica butatu, Abrahamu lyonse alelanda na Yehova; ne ca bune, Yehova atungilile Abrahamu ilyo akonkele ubutungulushi bwakwe ubwa bulesa. Ifintu fimo fine ne fwe kuti fyakosha icitetekelo cesu ilelo.—1/1, amabula 17 na 18.

◻ Bushe amashiwi ya kuti “Mwitutwala mu kweshiwa” yalola mwi? (Mateo 6:13)

Ninshi tulelomba Lesa ukuti eleka tufilwe ukumumfwila lintu twaeshiwa. Yehova kuti atutungilila pa kuti tatunakiileko no kucimfiwa kuli Satana, ‘[umubifi].’ (1 Abena Korinti 10:13)—1/15, ibula 14.

◻ Finshi umuntu afwile ukucita pa kuti Lesa amulekelele ifilubo?

Ukuyebelela kuli Lesa kufwile kwaendela pamo no kubipilwa ne “fisabo ifyawamino kulapila.” (Luka 3:8) Imibele ya kulapila no kufwaisha ukulungika icilubo na fyo fikatulenga ukufwaya baeluda ba Bwina Kristu batwaafwe lwa ku mupashi. (Yakobo 5:13-15)—1/15, ibula 19.

◻ Mulandu nshi tulingile ukutukutila ukuba abaicefya?

Uwaicefya alatekanya no kushishimisha, kabili taituntumba. Ukuicefya kulaleta ifibusa fya cine cine ifya kutemwa. Ne cacilishapo, kuleta ipaalo lya kwa Yehova. (Amapinda 22:4)—2/1, ibula 7.

◻ Bupusano nshi ubukalamba ubwabapo pa mfwa ya kwa Yesu ne ya kwa Adamu?

Adamu aliwaminwe ukufwa, pantu taumfwilile Kalenga wakwe ku mufulo. (Ukutendeka 2:16, 17) Lelo Yesu tawaminwe ukufwa nangu panono, pantu “wene tacitile ulubembu.” (1 Petro 2:22) E co lintu Yesu afwile, alikwete icintu ica mutengo wakulisha ico Adamu umubembu ashakwete lintu afwile. Akwete insambu sha kuba no bumi bwa buntunse ubwapwililika. E co imfwa ya kwa Yesu yali no mutengo wa bulilambo uwingalubula abantunse.—2/15, amabula 15 na 16.

◻ Bushe umusumba mu cimonwa ca kusesema kwa kwa Esekiele, wimininako cinshi?

Apo umusumba waba pa kati na nkati ka mpanga ya cinsaunte (iishashila), ufwile ukuba wa pano isonde. Kanshi umusumba ulepala ukwimininako ubwangalishi bwa pe sonde, ubukanonsha bonse abakapanga ubwikashi bwa pe sonde ubwalungama.—3/1, ibula 18.

◻ Mulandu nshi Yesu asambile amakasa ya basambi bakwe ilyo balesefya Ukucilila mu 33 C.E.?

Yesu talecita umulimo wa kusamba amakasa ukuba icishilano ca kusefya. Lelo, aleafwa abasambi bakwe ukuti bateuluke mu misango, baleicefya no kubombela bamunyinabo imilimo yasuulwa sana.—3/1, ibula 30.

◻ Mu kusambilisha bambi, cinshi cacindama ukucila ukulamuka kwa cifyalilwa?

Icacindama mibele twakwata ne fibelesho fya ku mupashi twalundulula ifyo abasambi bakapashanya. (Luka 6:40; 2 Petro 3:11)—3/15, amabula 11 na 12.

◻ Ni shani abalanda amalyashi ku cintubwingi bengawamyako ukubelenga Amalembo?

Ukupitila mu kubelesha. Ukubelenga mu kupongomoka imiku ne miku ukufikila bengabelenga mu kulongoloka. Kuti banonkelamo na mu kukutika kuli bakabelenga basuma ukumfwe fyo balealule shiwi no kushimpa na fintu bashimbula amashiwi na mashina yamo ayeni.—3/15, ibula 20.

◻ Bushe ‘umupashi ubwelela shani kuli Lesa’ lintu umuntu afwa? (Lukala Milandu 12:7)

Apantu umupashi maka ya bumi, ‘ubwelela kuli Lesa’ pantu isubilo ilili lyonse fye ilya bumi bwa ku ntanshi ilya uyo muntu nomba lishala fye kuli Lesa. Ni Lesa fye eka e wingabweseshamo umupashi, nelyo amaka ya bumi, ukulenga umuntu ukubwelela ku bumi. (Ilumbo 104:30)—4/1, ibula 17.