Ifipusho Ukufuma ku Babelenga

Inte sha kwa Yehova shimo shalipeelwa incito ya kubombela mu fikuulwa nelyo ififulo ifitungululwa na mabumba ya fya mapepo. Bushe Amalembo yalandapo shani pa ncito sha musango yo?

Uyu mulandu kuti wakuma Abena Kristu abafumacumi abafwaya ukumfwila ifyaba pali 1 Timote 5:8, ilembo ilikomaila pa bucindami bwa kusunga aba mu ng’anda. Ilintu kwena Abena Kristu cine cine bafwile ukumfwila uku kufunda, tacilolele mu kuti cili fye bwino ukwingila incito iili yonse ukwabula ukusakamana umusango wa ncito. Abena Kristu balatesekesha ubucindami bwa kuba abaibukila ku fingaba ukufwaya kwa kwa Lesa. Ku ca kumwenako, umo te kuti alingwe uwa kaele nga atoba ifunde lya mu Baibolo ilibinda bucisenene nelyo ukwipaya pa mulandu wa kufwaya ukusunga ulupwa. (Linganyeniko Ukutendeka 39:4-9; Esaya 2:4; Yohane 17:14, 16.) Na kabili calicindama ku Bena Kristu ukumfwila ikambisho lya kufuma muli Babele Mukalamba, ubuteko bwa calo ubwa kupepa kwa bufi.—Ukusokolola 18:4, 5.

Mwi sonde lyonse, ababomfi ba kwa Lesa balamona incito shalekanalekana. Te kuti cilolemo kabili tatwaba na maka ya kupanga amafunde pa lwa musango onse uwa ncito umuntu afwile ukwingila. (2 Abena Korinti 1:24) Lelo, natulandeko pa fishinka fimo fintu Abena Kristu bafwile ukutontonkanyapo pa kusala incito. Ifi fishinka fyalilandilwepo panono mu Ulupungu lwa kwa Kalinda ulwa January 15, 1983, umwali umutwe walelanda pa kumwenamo muli kampingu wesu uwapeelwa na Lesa. Mu mukululo mwali ifipusho fyacindama fibili, pamo ne fishinka fimbi ifya kwaafwa.

Icipusho cacindama ica kubalilapo cileti: Bushe uyo mulimo walibindwa mu Baibolo? Pa kulanda pali ici cipusho, Ulupungu lwa kwa Kalinda lwatile Baibolo yalibinda ukwiba, ukubomfya bubi bubi umulopa, no kupepa utulubi. Umwina Kristu tafwile ukubomba incito iilelundulula ifibelesho fintu Lesa asenuka, ifili nge fi twalandapo.

Icipusho ca bubili cileti: Bushe uulebomba aleafwilisha icibelesho cabindwa? Ukwabula ukutwishika, uubombela mu cikuulwa umubelama abateya ifyangalo fya cela mushuke, mu kiliniki wa kuponya amafumo, nelyo mu ng’anda ya bacilende, ninshi alelundulula ifibelesho fintu Amalembo yasenuka. Nangu cingati cila bushiku abombela fye ku kupyanga nelyo ukwasuka balamya, ninshi alelundulula icibelesho ico Icebo ca kwa Lesa casenuka.

Abena Kristu abengi abafwaya ukupingulapo pa ncito balefwaya ukwingila balisanga ukuti ukubebeta fye ifi fipusho kulabaafwa ukupingulapo bwino.

Ku ca kumwenako, ifi fipusho fibili, kuti fyalanga umulandu kapepa wa cine tafwile ukwingile ncito mu kuteyanya kwa kupepa kwa bufi, ukubabombela nelyo ukubombela mu calici. Ukusokolola 18:4 kutukambisha ukuti: “Fumenimo muli wene, mwe bantu bandi, epali mwawilako mu membu shakwe.” Umuntu kuti aleafwilisha no kuwila mu membu sha Babele Mukalamba nga alebombe ncito mwi bumba lya kupepa kwa bufi. Te mulandu asakamana ulubansa, ukuwamya mu fikuulwa, ukulungisha ifilefwa, nelyo abombela ku maakaunti, ninshi umulimo wakwe ulelundulula ukupepa ukwapusana no kupepa kwa cine. Ukulundapo, abantu abengamumona aleyemfye calici, ukulungisha ifintu, nelyo ukwafwilisha imilimo ilelundulula kulya kupepa, kuti batila alitemwa ilya mipepele.

Lelo, ni shani nga umo tabomba lyonse pa calici nelyo mwi bumba lya fya mapepo? Tutile umuntu bamukuuta fye mu kampampa ku kulungisha umupaipi wa menshi uwatulika pa calici. Bushe uyu mulimo taupusene na ulya uwa kuti umuntu bamwipusha, asumina ukulembwa incito ya kuwamya icibumba, nelyo umutenge nelyo ukubika bwino amalaiti mu calici?

Na kabili kuti twatontonkanya pa ncito na shimbi ishingi. Kanshi natulande na pa fishinka fimbi fisano ifyali muli lulya Ulupungu lwa kwa Kalinda:

1. Bushe ni ncito ya kwaafwilisha abantu iishabindwa mu Malembo? Natulande pa muntu uutwala amelu. Te kuti tutile alelundulula icibelesho cabindwa nga ca kuti mu cifulo abombela alatwalako na melu yamo ku calici nelyo ku kiliniki wa kuponya amafumo. Lesa alenga akasuba ukutulila pa mawindo ya fikuulwa fyonse kumo na macalici na ba kiliniki ba kuponya amafumo. (Imilimo 14:16, 17) Umwina Kristu uutwala amelu, kuti atila cila bushiku afwilisha abantu. Cimo cine no Mwina Kristu bengakuuta mu kampampa, pamo nga kalungisha wa mipaipi ukumukuuta ku kuwamya umupaipi watulika pa calici, nelyo namutekenya wa ambyulansi bamukuuta ku kusenda umuntu uwafwa icipuupu mu calici. Kuti amona umulimo wa musango yo ukuti kwafwilisha abantu ukwa mankumanya fye.

2. Maka nshi uyo umuntu akwata pa cicitwa? Shimatuuka Umwina Kristu teti asumine ukukungula no kushitisha ifilubi fya mu fya mapepo, ifinkolonkolo fya kupepa imipashi, fwaka, nelyo soseji wa mulopa. Pantu e mwine we tuuka, e upingula fyonse. Abantu kuti balemukoselesha ukushitisha fwaka nelyo ifilubi fya mapepo ku kumwenako ubukumu, lelo kuti abomba ukulingana ne fisumino fyakwe ifya mu Malembo. Lubali lumbi, Umwina Kristu uwaingila incito mu cikuulwa bashitisha ifya kulya, napamo kuti bamweba ukubombela pali mashini wa kulipililapo indalama, ukuwamya mwi tuuka, nelyo ukusunga amaakaunti. Tapingula ifipe fya kushitisha fintu bafwile ukukungula, nangu line fimo te fisuma, ifili nga fwaka nelyo ifipe fya nshiku sha mwikalwe isha fya mapepo.a (Linganyeniko Luka 7:8; 17:7, 8.) Ici cishinka nacipalana ne co twalalandapo nomba.

3. Bushe uyo muntu lyonse abomba uyo wine mulimo? Natulande pe tuuka na kabili. Napamo uubombela pali mashini wa kulipililapo indalama, nelyo uutantika ifipe mwi tuuka, limo limo alatantika fwaka nelyo ifipe fya mapepo; lelo uyu te mulimo abomba lyonse. Kwena, bapusana sana no muntu uubombela ku kushitisha fwaka mwi tuuka limo line! Uyu ena cila bushiku, abomba umulimo uwapusana ne fisumino fya Bwina Kristu. (2 Abena Korinti 7:1) Apa twamonapo fintu umuntu engapimununa nga lyonse abomba uyo wine mulimo, nelyo ubutali bwa nshita abomba ne fipe fimo, pa kupingulapo umusango wa ncito engengila.

4. Bushe indalama uyo muntu afola shifuma kwi, kabili ni kwi abombela? Tontonkanyeni pa ncito shibili. Aba pa kiliniki wa kuponya amafumo kuti baingisha uwa kupyanga imisebo pa kuti palemoneka bwino. Kuti alefola indalama pa kiliniki, nomba tabomba mu kiliniki, abantu tabatala abamumonapo mu kiliniki. Lelo bamumona alebomba incito iishapusana na Malembo, te mulandu no kufuma indalama afola. Nomba moneni incito imbi. Mu calo umo ubuteko bwasuminisha bucilende, kuti bwaingisha nasi wa kubombela mu cikuulwa ca bacilende, ukulabaceeceeta ku kucefyanyako ukutandanya amalwele ya mu bulalelale. Nangu line afola indalama ku buteko, abombela pa ng’anda ya bacilende, alacefyanyako amalwele yafuma muli bucilende, ukulenga bwene ukutwalilila. Ifi fya kumwenako filelanga umulandu cabela bwino ukutontonkanya pa kulefuma indalama na pa cifulo uko umuntu abombela.

5. Bushe abantu bamona shani incito abomba; bushe ilacusha kampingu wakwe nelyo ilapunwisha bambi? Tufwile ukutontonkanyapo pali kampingu wesu no wa bambi. Nangu line (te mulandu no ko tubombela, nelyo abatufolesha) twamona Abena Kristu abengi batila iyo ncito isuma, tufwile ukwiluka ukuti kampingu wesu kuti acushiwa. Umutumwa Paulo, uwali ica kumwenako cisuma atile: “Tuli na kampingu musuma, pa kufwayo kwenda bwino bwino muli fyonse.” (AbaHebere 13:18) Tatufwile ukubomba incito iilecusha kampingu wesu; kabili tatufwile ukulengulula bambi abo kampingu wabo apusene no wesu. Nomba fyapusana no Mwina Kristu napamo uwingatila Baibolo tayalesha incito imo, lelo naishiba ukuti abengi mu cilonganino bakasunguka pa kumona alebomba uyo mulimo. Paulo akontele fye pa kebo lintu atile: “Tatubika ca kupunwisha nangu cimo, ukuti bukapyunga bwesu bwitungwa kabi; lelo tuli abaishininkisha nga bakapyunga wa kwa Lesa muli fyonse.”—2 Abena Korinti 6:3, 4.

Natubwelele ku cipusho cesu icikalamba ica kubombela mu fikuulwa nelyo ififulo ifitungululwa na mabumba ya fya mapepo, ifili nga ukubika amawindo, ukuwamya kapeti, nelyo ukulungisha ifya kukafya mu fikuulwa. Bushe kuti twabomfya shani ifi fishinka muli uyu mulandu?

Ibukisheni icishinka ca maka ayo umuntu akwata pa cicitwa. Bushe Umwina Kristu e mwine wa ncito nelyo e waba na maka ya kupingula ukuya mu kubombela ku calici? Bushe Umwina Kristu uwaba na maka pa cicitwa, kuti atemwa ukulundulula ukupepa kwa Babele Mukalamba, pa kufwayako incito nelyo ukusumina ukubombela ukupepa kwa bufi? Bushe te kuti tulinganye co kuli shimatuuka uwingapingulapo ukushitisha fwaka nelyo ifilubi fya mapepo mwi tuuka lyakwe?—2 Abena Korinti 6:14-16.

Nga Umwina Kristu alabomba, lelo taaba na maka ya kupingula ififwile fyabombwa, tufwile ukutontonkanya pa cifulo uko abombela no butali bwa nshita abomba uyo mulimo. Bushe uyo muntu atwala fye amelu, nelyo limo limo balamutumako ukubika ifipuna ifipya mwi calici nelyo ukwaafwilisha abantu, ifili nga ukushimya umulilo pa calici pa kuti wisalangana? Abengi kuti bamona ici ukupusanako no muntu uwaingila incito pa nshita yalepa, ukupenta nelyo ukusakamana ulubansa pa calici. Ukubombela palya pene lyonse kukalenga bambi ukumona Umwina Kristu kwati alitemwa kulya kupepa, cibe atila kwa bufi, kabili napamo bamo kuti abapunwisha.—Mateo 13:41; 18:6, 7.

Twalanda pa milandu yalekanalekana mu sha ncito. Iyi milandu yacibimbamo icipusho pa lwa kupepa kwa bufi. Lelo, ifi fishinka kuti fyabomba na ku ncito shimbi. Lyonse ilyo umuntu aleingile ncito, afwile ukupepa no kutontonkanyapo bwino, afwile ukumona fintu incito ili, pantu limbi naiibela. Ifishinka twalandapo muno kale kale fyalyaafwa Abena Kristu abengi, ukupingulapo kwabo ukwa bufumacumi kwalilanga ukuti balafwaya ukuba aba cishinka kabili abalungama kuli Yehova.—Amapinda 3:5, 6; Esaya 2:3; AbaHebere 12:12-14.

[Futunoti]