Ilyashi Lya Bakabilisha Ba Bufumu

Ukusanga Abayafya Ukusanga

INTE SHA KWA YEHOVA shilabombesha ukumonana no muntu onse uo bengasanga no kumweba pa bukombe bwa Bufumu. Limo limo, bakabila ukubombesha pa kusanga abantu abashisangwa sana pa ng’anda. (Marko 13:10) Ukukuma kuli ici, umutumikishi painiya waibela ku South America ashimika icacitike.

“Bushiku bumo naishibe ukuti kateka wa mu musumba umo ali no kutandalila icifulo uko ine no mukashi wandi twalebombela. Apo ali pa bantu abashisangwa sana pa ng’anda, namulembele kalata no kubikamo impapulo shilanda pali Baibolo, ukusanshako broshuwa wa Cinshi Cintu Lesa Afwaya Kuli Ifwe? ne fitabo fya Ukusapika Lesa Ukwa Mutundu wa Muntu na Ukwishiba Uko Kutungulula ku Mweo wa Muyayaya. Muli kalata nalondolwele ico ulupapulo lumo lumo ulwalimo lwalembelwe.

“Apo nalefwaya ukwishiba ifyo aletontonkanya pali shilya mpapulo, namulombele ukuti ningamonana nankwe. Ilyo papitile imilungu inono, nalisuminishiwe ukumonana nankwe, kabili nasendele na vidio ya Jehovah’s Witnesses—The Organization Behind the Name. Uku kukumana kwasendele amaawala mupepi na yabili. Ilyo twapwile ukutamba vidio no yu kateka, namwipwishe ico aletontonkanya pali yena. Ayaswike ati: ‘Tapaba ukuteyanya pe sonde ukwaba ngo kwenu. Kanshi nga nakwete abantu ababa nga imwe abengangafwa ukupwisha imilimo yandi iya buteko!’ Lyene anjipwishe nga nalitandalako ku maofeshi yakalamba aya kuteyanya kwesu. Namwebele ukuti nangu ca kuti ndafwaisha ukucite co ukutula ilyo nali ne myaka 14, nshatalatandalilapo amaofeshi yesu ayakalamba aya ku Brooklyn, mu New York. Bwali buyo nakwata ubwayafya ukufikapo. Alindolekeshe pa kashita. Lyene atile alefwaya ukuti nkatandaleko. Ashininkishe ukuti twapoka ifitupa fya mwi funde ifya kwendelapo ukuya ku calo cimbi no kutupeela amatikiti ya ndeke nge ca bupe!

“Uyu kateka nomba alapokako bamagazini ba Ulupungu lwa kwa Kalinda na Loleni! lyonse. Tulesubila ukutendeka isambililo lya Baibolo na wene nomba line.”