Ukutungulula Abasambi ku Kuteyanya Kwesu
1 “Bukombe ubulandwa mu ndimi ukucila pali 200. Bukombe ubumfwika mu fyalo ukucila pali 210. Bukombe ubushimikilwa ukuli konse ukwingasangwa abantu. Bwaba lubali lwa kampeni wa kushimikila uwakulisha uo icalo cabala acipokelela, ubukombe ubwikatanya amamilioni ya bantu mwi sonde lyonse. Inte sha kwa Yehova baliteyanishiwa ku kupwishishisha uyu mulimo pa myaka ukucila umwanda umo!”
2 Ifyo e fitendeka ukushimika muli vidio wa Jehovah’s Witnesses—The Organization Behind the Name (Inte sha kwa Yehova—Ukuteyanya Kwesu). Atwalilila ukwasuka ifi fipusho: Bushe Inte sha kwa Yehova ni bani mu cine cine? Ni shani fintu imibombele yabo iteyanishiwa? Ni shani itungululwa? Ni kwi kufuma indalama isho kubomfya? Acincisha abaletamba ukumfwikisha ukuti “Inte sha kwa Yehova mwi sonde lyonse balikanshiwa pamo nga ukuteyanya ku kwafwilisha abantu banabo ukukuula icitetekelo muli Baibolo,” kabili alabakoselesha ukuimwena abene icaba ukuteyanya kwesu. Pa numa ya kutamba uyu vidio, umwanakashi umo uwalesambilila aponeshe ifilamba fya buseko no kutasha, e lyo atile: ‘Bushe kwena umuntu kuti afilwa ukumona ukuti uku e kuteyanya kwa kwa Lesa wa cine, Yehova?’—Linganyeniko 1 Abena Korinti 14:24, 25.
3 Umwanakashi na umbi alesambilila Baibolo limo limo fye, lelo tasuminishe icishinka ca kuti Bulesa Butatu cisambilisho ca bufi. Lyene alangilwe vidio wesu capamo no mulume wakwe. Balicincimushiwe ku fyo bamwene kabili bamutambile imiku ibili icungulo bushiku cimo cine. Pe sambililo lyabo ilyakonkelepo, umukashi alumbulwile ukuti alefwaisha ukuba Inte. Atile aletontomesha pa cisumino cakwe ica Bulesa Butatu no kufilwa ukulolekesha pa kuteyanya kwesu na bantu babamo. Vidio atambile amulengele ukwiluka ukuti alisangile ukuteyanya kwa cine ukwa kwa Lesa. Afwaile ukutendeka ukushimikila ku ŋanda ne ŋanda apo pene fye. Pa numa bamulondolwelele ifyo alekabila ukucita pa kuti engaba kasabankanya ushabatishiwa, atile: “Nalabombelapo nomba line fye.” Alifuutishe ishina lyakwe ku calici aliko, ukutendeka ukuya mu mulimo wa mwi bala, no kuba uwafikapo mu kusuusha Bulesa Butatu.
4 Calishibikwa bwino kuti abasambi ba Baibolo balalunduluka bwino lwa ku mupashi no kulola ku bukalamba mu kwangufyanya lintu baishiba ukuteyanya kwa kwa Yehova no kubishanya na kwene. Mu cine cine, pa numa 3,000 babatishiwe pa Pentekoste, “batwalilile ukuipeelesha ku kusambilisha kwa batumwa no kubishanya capamo.” (Imil. 2:42, NW, utulembo twa mwi samba) Calikatama ukuti twafwe abasambi ukucita cimo cine ilelo. Ni shani fintu twingabaafwa?
5 Sunseni Icishingamo: Onse uupanga abasambi afwile ukwishiba ukuti caba cishingamo cakwe ukutungulula umusambi wa Baibolo ku kuteyanya kwa kwa Lesa. (1 Tim. 4:16) Afwile ukumona isambililo limo limo pamo nga apa kutanukila ukulola ku bushiku bwa nsansa lintu umupya akalangisha ukuti naipeela kuli Yehova mu lubatisho lwa mu menshi. Cimo ica fipusho ifyo bakamwipusha pa nshita ya lubatisho citila: “Bushe naumfwikisha ukuti ukuipeela kobe no lubatisho filekwishibisha nga umo uwa Nte sha kwa Yehova mu kubishanya capamo no kuteyanya kwa kwa Lesa ukutungululwa no mupashi?” E ico, cili icacindama ukuti amone ukuti te kuti abombele Lesa ukwabula intanshi ukubishanya ne cilonganino ca cine ica Bwina Kristu mu kucincila.—Mat. 24:45-47; Yoh. 6:68; 2 Kor. 5:20.
6 Twalilileni ukusambilisha umusambi pa lwa cilonganino ca ku mwenu no kuteyanya kwesu ukusangwa mu fyalo ifingi ukwa Inte sha kwa Yehova. Citeni ifi pe sambililo lya Baibolo limo limo, ukutendekela pa lya kubalilapo. Ukufuma fye pa kutendeka, laalikeni umusambi ukwisa ku kulongana, no kutwalilila ukumulaalika.—Ukus. 22:17.
7 Bomfyeni Ifibombelo Ifyapayanishiwa: Impapulo shesu ishawamisha isha kubomfya pa kutungulula amasambililo ya Baibolo aya mu ŋanda shaba ni broshuwa wa Cinshi Cintu Lesa Afwaya Kuli Ifwe? ne citabo ca Ukwishiba Uko Kutungulula ku Mweo wa Muyayaya. Ishi mpapulo shonse shibili shikomaila pa kukabila kwa kubishanya ne cilonganino. Pa mpela ye sambililo 5, broshuwa wa Cintu Lesa Afwaya alondolola ukuti: “Ulekabila ukutwalilila ukusambilila pa lwa kwa Yehova no kumfwila ifyo afwaya. Ukusangwa ku kulongana pa Ŋanda ya Bufumu iya Nte sha kwa Yehova iyabela uko wikala kukakwaafwa ukucite co.” Icitabo ca Ukwishiba mu kubwekeshabwekeshapo cikoselesha umusambi ukubishanya na bambi pa kulongana. Icipandwa 5, paragrafu 22, cilaalika bonse muli iyi nshila: “Inte sha kwa Yehova . . . balekucincisha mu kukaba ukwakana na bo mu kupepela Lesa ‘mu Mupashi na mu cine.’ (Yohane 4:24)” Icipandwa 12, paragrafu 16, cilondolola ukuti: “Ilyo uletwalilila ukusambilila no kucipanga umwata obe ukusangwa ku kulongana kwa Nte sha kwa Yehova, icitetekelo cobe cili no kukoshiwa ukucilanapo.” Icipandwa 16, paragrafu 20, citila: “Cipange ngo mwata ukusangwa ku kulongana kwa Nte sha kwa Yehova.” Cilundako ukuti: “Ici cikakwaafwa ukumfwikisha no kubomfya amano ya kwishiba Lesa mu bumi bobe kabili cikakuletele nsansa. Ukuba ulubali lwa bumunyina bwa Bwina Kristu ubwa mu kusaalala kwa calo kukakwaafwa ukutwalilila ukupalama kuli Yehova.” Icipandwa 17 cilondolola mu kushika fintu umo asanga umutelelwe wa cine pa kati ka bantu ba kwa Lesa. Ilyo tulesambilila na bambi, caba cishingamo cesu ukukomaila pali ifi fyebo.
8 Broshuwa wa Inte sha kwa Yehova—Mu Kwikatana Shicito Kufwaya kwa kwa Lesa mu Kusalala kwa Calo caba cibombelo cawamisha ico capangwa ku kulenga abantu ukubeleshanya no kuteyanya kumoneka kweka fye uko Yehova alebomfya ilelo ku kupwishishisha ukufwaya kwakwe. Ifyebo fyashika ifyo akwatamo pa lwa butumikishi bwesu, ukulongana, no kuteyanya fikakoselesha kabelenga ukubishanya na ifwe mu kupepa Lesa. Lintu fye isambililo lya Baibolo lyaimikwa, ciletubululwa ukuti twapeelako umusambi broshuwa wa kuibelengela umwine. Tatulekabila ukumusambilishamo nga fintu calecitwa kale.
9 Amavidio yamo ayo Sosaite yapanga yaba fibombelo fisuma nga nshi ku kutungulula abasambi ku kuteyanya kwesu. Kuti cawama nga bengatamba (1) The New World Society in Action, ukupituluka muli filimu wa mu 1954 uwalelangisha umupashi wa cikuuku, uusuma, kabili uwa kutemwa uyo ukuteyanya kwa kwa Yehova kubombelamo; (2) United by Divine Teaching, uulondolola ukwikatana kwa mutende uko kwalangwa pa mabungano yesu ayasanshamo ifyalo ifingi mu Eastern Europe, South Amerika, Afrika, na Asia; (3) To the Ends of the Earth, uyo aishibishe umwaka walenga 50 uwe Isukulu lya Baibolo Ilya Gileadi Ilya Watchtower kabili alanga ifisabo ifingi ifyo bamishonari batwala mu mulimo wa kushimikila uwa mwi sonde lyonse; (4) Jehovah’s Witnesses Stand Firm Against Nazi Assault, uyo ashimika ilyashi lya kucincimusha ilya bukose bwa Nte na fintu bacimfishe ilyo bapakeswe icabipisha kuli Hitler; kabili, te kwesha ukulaba, (5) Jehovah’s Witnesses—The Organization Behind the Name.
10 Imikeni Amabuyo ya Kulalongana: Tufwile ukulondolwela abasambi ukuti tukabila fyonse fibili ukusambilila kwa pa mbali ukupayanishiwa mwi sambililo lya Baibolo ilya mu ŋanda no kulanshanya kwa mwi kalasi ukupayanishiwa pa kulongana kwa mu cilonganino. (Yoh. 6:45) Umupya alekabila ukulunduluka mu kulinganya ukumfwikisha Amalembo no kuteyanya. Pa kutunguluka muli ico, takwaba ca kupyanika pa kusangwa ku kulongana. (Heb. 10:23-25) Tendekeni ukulaalika umuntu ku kulongana kwa pa cilonganino ilyo fye mwatendeka ukusambilila. Abapya bamo abalesekelela batendeka ukusangwa ku kulongana nelyo fye tabalatendeka ukusambilila Baibolo pa ŋanda. Mu kushininkisha, tufwaya ukwimika ica kumwenako cisuma ifwe bene pa kusangwako lyonse ku kulongana.—Luka 6:40; Fil. 3:17.
11 Landeni no musambi ifyebo fyakumanina pa lwa kulongana na fintu kutungululwa pa kuti engangukililwa lintu alesangwako umuku wa kubalilapo. Apantu abantu bamo tabayumfwa abantungwa ilyo baleya ku fifulo fipya umuku wa kubalilapo, nalimo kuti cawama ukuya no musambi capamo ku Ŋanda ya Bufumu lintu alesangwa ku kulongana umuku wa kubalilapo. Akangukililwa nga ca kuti muli nankwe ilyo alekumanya ababa mu cilonganino. Icacindamisha pali fyonse, kuba shibweni musuma ku mutandashi wenu, ukumulenga ukuyumfwa umuntungwa kabili uwayangukililwa.—Mat. 7:12; Fil. 2:1-4.
12 Koselesheni umusambi ukusangwa ku bushiku bwa kulongana kwaibela, ukulongana kwa muputule, nelyo ibungano lya citungu inshita iili yonse iyo uku kulongana kukabako. Nakalimo kuti mwamusanshako kuli motoka untu mukalabomfya.
13 Lengeni Umutima Wakwe Umukuunte Ukutasha: Icitabo ca Abateyanishiwa Ukupwilikisha Ubutumikishi Bwesu, ibula 92, cilondolola ukuti: “Nga ukutasha kobe kwashika ukwa kuteyanya kwa kwa Yehova kulebelebeshiwa mu kulanshanya kobe na bantu balesekelela, cikangukilako kuli bene ukukula mu kutasha kabili cikabasesha [ukulundulukilako] ku kwishiba Yehova.” Landeni pa lwa cilonganino cenu mu kukuulilila lyonse, te kwesha ukulanda mu kufuupula. (Ilu. 84:10; 133:1, 3b) Mu mapepo ayo mulepepa pe sambililo lya Baibolo, lumbuleni icilonganino no kuti umusambi alekabila ukulabishanya na cene lyonse.—Efes. 1:15-17.
14 Mu kushininkisha tulefwaya abapya ukutendeka ukukuntwa no mutima wa kutasha pa lwa bucibusa bwawamisha no mutelelwe wa ku mupashi ifisangwa pa kati ka bantu ba kwa Lesa. (1 Tim. 3:15; 1 Pet. 2:17; 5:9) Pamo nga Inte sha kwa Yehova, natubombeshe ukufika apo twingapesha ukutungulula abasambi ba Cebo ca kwa Lesa ku kuteyanya kwesu.
[Amashiwi pe bula 3]
Abasambi balalunduluka lwa ku mupashi mu kwangufyanya lintu baimwena ukuteyanya
[Amashiwi pe bula 4]
Mwishingashinga ukulaalika abasambi ukusangwa ku kulongana