Afweni Bambi Ukuti Balesangwa ku Kulongana
1 “Mukwai bonse abekalila kuli ino ncende . . . abalefwaya ukusangwa ku kulongana kuti baleisa mu kusangwako.” Ukutula fye apo babilishishe ifi muli Zion’s Watch Tower iya mu November 1880, Inte sha kwa Yehova shilacincisha abantu ukulongana ku kufundwa ifya mu Baibolo. (Ukus. 22:17) Ukulongana cintu cacindama sana mu kupepa kwa cine.
2 Ukusangwako Kwalicindama: Tulapaalwa nga tulebishanya ne cilonganino. Tuleshiba bwino Lesa wesu uwapuulama Yehova. Mu cilonganino, tulongana ku ‘kusambilishiwa na Yehova.’ (Esa. 54:13) Ukuteyanya kwakwe kwalitantika programu wa lyonse uwa kusambilila ifya mu Baibolo. Ico cilatupalamika sana kuli wene no kutusambilisha ifya kucitile fintu umwabela ‘ukupanga konse ukwa kwa Lesa.’ (Imil. 20:27; Luka 12:42) Ukulongana kusambilisha umuntu umo umo ifya kulamuka pa kusambilisha Icebo ca kwa Lesa. Ukucinkulwako ifya mu Malembo kulatwafwa ukuba abasuma ku banensu na kuli Yehova wine. Ukubishanya na batemwa Yehova kulakosha icitetekelo cesu.—Rom. 1:11, 12.
3 Balaalikeni: Ilyo mwasambilila fye no musambi wa Baibolo uuli onse umuku wa kubalilapo, mulaalikeni ku kulongana. Mucincisheni ukufwaya ukusangwako pa kumulondolwela icishinka cimo icamukoseleshe mu kulongana kwafumineko no kulanda pali fimo ifili no kulandwapo mu kulongana kukakonkapo. Londololeni ifyo Ing’anda ya Bufumu yaba kabili shininkisheni ukuti naishiba ifya kwenda pa kuti akalondoke.
4 Nga umusambi tatendeke ukwisa ku kulongana ilyo line, mwitendwa ukumulaalika. Bomfyeni amaminiti yamo cila mulungu ku kumulondolwela ifyo ukuteyanya kwesu kubomba. Bomfyeni broshuwa wa Inte sha kwa Yehova—Ni Bani? Finshi Basuminamo? na tepu wa Jehovah’s Witnesses—The Organization Behind the Name nga mwalikwata ifya kutambilako vidio, pa kuti mumulange ifyo twaba ne fyo tulongana. Sendeniko na bakasabankanya bambi pa kuti umusambi eshibane na bo. Ilyo mulepepa, tasheni Yehova pa fyo atupeela ukuteyanya kabili lumbuleni no kuti umusambi alekabila ukubishanya no kuteyanya kwine uku.
5 Mwishingashinga ukwafwa abapya abalesambilila icine ukuti batendeke ukulongana na ifwe. Ilyo baleya baleumfwikisha ifyo Yehova aba, bakacincila ukucita ifyo basambilila no kwisa mu kuteyanya kwa kwa Lesa ukwaikatana.—1 Kor. 14:25.