Inshita ya Krisimasi Bushe Ikaba nge fyo Mulefwaya?

Icitabo ca Peter the Great—His Life and World citila, Peter [Mukalamba] “akonkomeshe ukuti pa January 1 abantu bonse baleya mu macalici mu kusefya Umwaka Upya. Kabili acincishe ukuti ifimpusa fibikwe pa minshi na mukati ka mayanda pa mutebeto, kabili akambishe ukuti abena Moscow bonse balingile ‘ukusansamuka sana ilyo baleposhanya’ pa Mwaka Upya.”

CINSHI mulefwaya ukucita mu nshita ya Krisimasi no Mwaka Upya? Abantu abengi batila iyi ni nshita ya kusefya Krisimasi, ubushiku basumina ukuti e lyo Kristu afyelwe, kabili isanshamo ukusefya Umwaka Upya. Kanshi ukusefya Krisimasi no Mwaka Upya kulasenda inshita iikalamba. Abafyashi na bana balatusha pali iyi nshita, e co imonekela ukuba iyalinga ku ndupwa ukuba pamo. Bambi nabo, batila iyi ni “nshita ya kusefya Krisimasi” pantu pali iyi nshita ya mwaka bafwaya ukucindika Kristu. Limbi na imwe mumona ukuti ukucindika Kristu e kwacindama sana pali iyi nshita.

Nampo nga baimona nge nshita ya kucindika Kristu, ukuipakisha ukuba pamo no lupwa, nelyo fyonse fibili, abantu abengi abalume, abakashi, na bana balafulukisha iyi nshita. Nga uno mwaka, bushe ikaba iyacindama ku lupwa lwenu? Kabili bushe mukacindika Lesa? Nga muletontonkanya ukuba pamo no lupwa, bushe ikaba nga fintu mulefwaya, nelyo bushe ikaba fye cimbi cimbi?

Abengi abafwaya Krisimasi ukuba inshita ya kucindika Kristu balamona ukuti abantu tabacindika Kristu ilyo balesefya Krisimasi no Mwaka Upya. Lelo, pali iyi nshita ya Krisimasi no Mwaka Upya bapeeleshanya fye ifya bupe, no kupanga amaparte ayo bacitapo ifintu ifishicindika Kristu, kabili iba ni nshita ya lupwa iya kuba pamo na kabili. Ilingi line, ilyo kuba ukusefya pamo no lupwa kulaba bamo abalya sana e lyo bambi balakolwa icibi ica kuti balatendeka ukuumana no kulalwa abene beka. Limbi mwalimona ifi ukuti e ficitika, nelyo kuti na imwe fyalimucitikilapo.

Nga ca kuti ifi fyalimucitikila, limbi mwalimona ukuti tapaba ubupusano sana pa fyalecitika lintu Kateka Peter Mukalamba uwa ku Russia alandile amashiwi tubelengele mu kubalilapo na pa ficitika lelo. Pa mulandu wa fintu fyalekanalekana ificitika, abengi bafwaya inshita ya Krisimasi no Mwaka Upya ukuba iya kutontonkanya sana pa fya mapepo no kuipakisha ukuba pamo no lupwa. Abantu bambi balesha na maka ukwalula uku kusefya, batila, “iyi ni nshita ya kucindika Kristu.” Nomba, bushe abantu kuti bayaluka? Bushe uku kusefya kuti kwacindika Kristu? Finshi fingalenga ukuti mulemona inshita ya Krisimasi no Mwaka Upya iyapusanako ku fyo abengi baimona?

Pa kusanga amasuko yasuma, lekeni tumone ifyo abantu ba mu calo cimo abalingile ukucindamika iyi nshita ya Krisimasi no Mwaka Upya baimona.