Ababelenga ino Magazini Balepusha Ukuti

Cinshi Inte sha kwa Yehova Bashilwilako Inkondo?

Ukufuma fye ku kale, Inte sha kwa Yehova konse uko baba tabaitumpa mu nkondo ishicitika pa kati ka fyalo nelyo isho abana calo beka beka balwa. Imyaka 50 iyafumako, icitabo ca Australian Encyclopædia catile: “Inkondo nga yabuuka, Inte sha kwa Yehova tabaitumpamo nangu panono.”

Umulandu uukalamba Inte sha kwa Yehova bashiitumpila mu nkondo, ni co kampingu yabo ilabakaanya. Apo Bena Kristu, kampingu yabo yasambilishiwa ukukonka amafunde ya kwa Shikulu Yesu Kristu, ne fyo alecita. Aebele abasambi bakwe ukuti baletemwa abanabo. Abebele no kuti: “Muletemwa abalwani benu, mulecite cisuma ku bamupata.” (Luka 6:27; Mateo 22:39) Yesu aebele umusambi wakwe umo uwalefwaya ukumupokololako, ukuti: “Bwesesha ulupanga umo lwikala, pantu bonse ababuula ulupanga bakafwa ku lupanga.” (Mateo 26:52) Kanshi ifyo Yesu alelanda no kucita, fyalangile fye apabuuta tuutu ukuti abasambi tabafwile kubomfya fyanso fya nkondo.

Umulandu na umbi Inte sha kwa Yehova bashilwilako inkondo wa kuti, baba mu lupwa lumo ulwa babwananyina ulwaba pano isonde ponse. Inkondo kuti yalenga aba bwananyina balalwishanya, nomba nga balelwishanya ninshi tabalekonka ifunde Yesu abapeele ilya kuti ‘baletemwana.’—Yohane 13:35.

Inte sha kwa Yehova tabamona aya mafunde yalanda pa kutemwa ukuti malanda kanwa fye, balayakonka. Ku cakumwenako, tontonkanyeni pa fyo bacitile ilyo kwali Inkondo ya Calo Conse iya Bubili iyaliko mu 1939 ukufika mu 1945. Mu United States, Inte sha kwa Yehova ukucila pali 4,300 balibakakile pa mulandu wa kukaana ukulwako inkondo. Mu Britain, ba Nte ukucila 1,500, ukubikako na banakashi ukucila 300 balibakakile pantu balikeene ukubombako imilimo yonse iyakumine inkondo. Aba mu buteko bwa Nazi, mu Germany, balipeye ba Nte ukucila pali 270 pantu balikene ukulwako inkondo. Ilyo aba Nazi baleteka, Inte sha kwa Yehova ukucila pali 10,000 balibapoosele mu fifungo na mu nkambi sha kucushiwilwamo. Inte sha kwa Yehova mu Japan na bo baliculile icine cine. Umuntu onse uwafwililwe balupwa mu Nkondo ya Calo iya Cibili nelyo imbi iyakonkelepo, afwile ukwishiba ukuti takwali Nte nangu umo uwaipeyepo umuntu uuli onse muli shilya nkondo.

Ifyo Inte sha kwa Yehova bamona inkondo, fyalilondololwa bwino bwino mu mashiwi ya kulekeleshako ayo Wolfgang Kusserow alandile. Mu 1942 aba mu buteko bwa Nazi baputwile uyu mwina German umutwe ninshi aali ne myaka 20 pa mulandu fye wa kukaana ukuya ku nkondo. (Esaya 2:4) Kusserow aebele icilye cikalamba ica bashilika ukuti: “Ndi Nte ya kwa Yehova ukutula fye na ku bwaice, kabili nkonka amashiwi ya kwa Lesa ayaba mu Malembo ya Mushilo. Ifunde likalamba kabili ilyacindamisha ilyo Lesa apela abantunse lya kuti: ‘Uletemwa Lesa obe ukucila ifintu fyonse kabili uletemwa umunobe nga we mwine.’ Amafunde yambi yatila: ‘Wilaipaya.’ Bushe fimuti Lesa apeele aya mafunde?”—Marko 12:29-31; Ukufuma 20:13.

Inte sha kwa Yehova baishiba ukuti Yehova fye eka, Lesa wa maka yonse, e ukaleta umutende pe sonde uukabelelela. Balicetekela ukuti akafikilisha ubulayo bwakwe ubwa kupwisha “ubulwi ukufika ku mpela ya calo.”—Psalm 46:9.