Nalisanga Insansa mu Kubombela Lesa

Tapakokwele, natendeke icangalo ca gymnastic ne ca kwimya inshimbi. Mu kuya kwa nshita naliswile icikuulwa ica kutukushishamo umubili mu San Leandro, ku California, mu U.S.A., kabili umo pa baleisa mu kutukusha umubili alicimfishe abanankwe no kuba Mr. America. Lelo, ukuba uwapamfuka takwanengele ukuba ne nsansa.

NASANGA ICO NALEFWAISHA

Umunandi uwaishibe ukuti nalefwaisha ukwishiba Baibolo, anjebele ati nkalanshanye no muntu uo aishibe. Ulucelo, ubushiku bwakonkelepo, Inte ya kwa Yehova yaishile ku mwandi. Twalanshenye pa ma-awala yane kabili alyaswike amepusho naleipusha ukubomfya Baibolo. Namwebele ati abwele bulya bwine bushiku icungulo, kabili twalilanshenye ifya mu Baibolo mpaka na pa kati ka bushiku. Nalitemenwe sana ifyo nasambilile kabili namwipwishe nga kuti namukonka ubushiku bwakonkelepo pa kuti nkamone ifyo ashimikila. Nalitemenwe sana ifyo alebomfya Baibolo pa kwasuka amepusho ya bantu. Awe e fyo napingwilepo ukuti ifi fine e fyo ndefwaya ukulacita!

E ico nalilekele ubukwebo bwandi no kutendeka ukulaya mu kushimikila no yu painiya, e fyo Inte sha kwa Yehova beta abashimikila inshita iikalamba. Mu 1948, mu May, nalibatishiwe pa kulongana kwa citungu ukwabelele mu Cow Palace Arena mu San Francisco, ku California. Muli uyu wine mwaka nalitendeke bupainiya.

Pali iyi yine nshita, nalyebele ba Nte ukuyatandalila bamayo. Balikutike kabili tapakokwele baishileba Inte ya kwa Yehova. Te mulandu ne fyo balebakaanya kuli balupwa, balitwalilile ukuba ne cishinka kuli Lesa mpaka na lintu bafwile pa numa ya myaka iingi. Mu lupwa lwesu tamwali na bambi abasangwike Inte ya kwa Yehova.

IFYO NAISHIBENE NO MWINA MWANDI

Mu 1950, nakuukile ku Grand Junction, mu Colorado, uko naishibene na Billie. Afyelwe mu 1928 kabili akulile muli ilya myaka ubunonshi bwa calo bwabwelele sana pa nshi. Lyonse pa kulaala banyina, ba Minnie, balemubelengela Baibolo muli koloboi. Ilyo Billie alefisha imyaka 4 ninshi alishiba ukubelenga, kabili alishibe amalyashi ayengi aya mu Baibolo ku mutwe. Ku kupwa kwa ba 1940, Inte sha kwa Yehova shasambilishe banyina ukuti abantu nga bafwa tabaya mu kupya mu mulilo wa pe, lelo baya fye ku nshiishi. (Lukala Milandu 9:5, 10) Banyina na bawishi baishileba Inte sha kwa Yehova.

Mu 1949, Billie alibwelele ukufuma ku koleji ya mu Boston kabili aishiletendeka ukusambilila Baibolo lyonse. Mu nshita ya kuba kafundisha, asalilepo ukuipeela kuli Lesa. Abatishiwe mu 1950 pa kulongana kwa nko ukwa Nte sha kwa Yehova ukwabelele mu Yankee Stadium ku New York. Tapakokwele, twalishibene no kuupana, kabili twatendeke ukubomba umulimo wa nshita yonse pamo.

Twatendekele mu Eugene, ku Oregon, kabili twalipangile ifibusa ifingi nga nshi. Mu 1953 twakuukile ku Grants Pass, mu Oregon, ku kwafwilisha icilonganino icinono. Muli ulya wine mwaka balitwitile kwi Sukulu lya Gileadi ilyalenga 23, isukulu lya ba Nte uko basambilisha bamishonari, ilyaba mupepi na ku South Lansing, mu New York, apaba amakilomita 400 ku kapinda ka ku kuso aka New York City.

UKUBOMBA UMULIMO WA BUMISHONARI MU BRAZIL

Mu December, mu 1954, pa numa ya myeshi 5 ukutula apo twafumine kwi Sukulu lya Gileadi, twaile ku Brazil ne ndeke. Pa numa fye ye awala limo, injini imo yalilekele ukubomba, lelo yalikile fye bwino mu Bermuda. Ilyo twaimine, na kabili indeke yalikwete ubwafya kabili twaileikila mu Cuba. Pa numa ya kwenda ubulendo pa ma-awala 36 twalifikile umutende pe ofeshi lya Nte sha kwa Yehova ilya ku Rio de Janeiro, ku Brazil.

Ilyo twaikelepo fye inshiku ishinono, ine na Billie, e lyo na bamishonari bambi babili, twaile ku Bauru, mu São Paulo, ku kwisula ing’anda ya bamishonari iipya. Mu musumba mwali abantu 50,000, kabili ni fwe twali Inte sha kubalilapo.

Twatampile ukushimikila pa mayanda ya bantu, lelo ilyo line fye shimapepo wa ku Katolika atendeke ukutukaanya. Aletukonka no kulasoka abantu ukuti mwilakutika kuli bena. Lelo mu milungu fye iinono, aba mu lupwa ulukalamba abo twalesambilila nabo Baibolo, balisambilile icine kabili pa numa balibatishiwe. Tapakokwele na bambi balitendeke ukusambilila.

Ulu lupwa ulwabatishiwe lwalikwete lupwa uwali umukalamba mu kabungwe akaishibikwe sana. Nalilanshenye nankwe ukuti tukabomfyeko ifikuulwa fyabo ukulonganinamo ukulongana ukukalamba. Ilyo shimapepo akoselepo fye ukuti betusuminisha, umukalamba wa kabungwe aebele aba mu kabungwe ukuti: “Nga tamwabasuminishe, nalafuma muli aka kabungwe!” Awe e fyo batusuminishe ukulonganinamo.

Umwaka wakonkelepo, mu 1956, twaile ku kulongana kwa citungu mu Santos, ku São Paulo. Ba Nte nalimo 40 aba mu cilonganino cesu balile ne shitima kuli uku kulongana. Ilyo twabwelele ku Bauru, nasangile kalata umo njebele ukuba kangalila wenda uwa kutandalila ifilonganino fya Nte sha kwa Yehova. E fyo nabombele uyu muli pa myaka 25, kabili nalile ku ncende ishalekanalekana isha mu Brazil.

IFYO TWALEBOMBA UMULIMO WA KUSHIMIKILA

Muli ilya myaka, imyendele yalyafishe. Lelo mu kuya kwa nshita twasukile twashinguluka icalo conse ukubomfya imyotoka, amashitima, ifikocikala, incinga, ukubikako fye no kwenda na makasa. Umusumba twabalilepo ukutandalila musumba wa Jaú, mu São Paulo. No ku kwine shimapepo aletukaanya.

Atile: “Tamwashimikile ku ‘mpaanga shandi!’”

Twamwaswike ukuti: “Te mpaanga shobe, sha kwa Lesa.”

Twateyenye ukuti tukatambishe vidio iilanda pa mulimo wa kushimikila uwa mwi sonde lyonse iya kuti The New World Society in Action, lelo shimapepo alongenye abantu pa kuti bese batusanse. Awe twalyebeleko bakapokola. Ilyo shimapepo ne bumba lyabo apepa nabo baishile, basangile bakapokola abengi pa mwinshi kabili balibasontele imfuti. Abaishile mu kutamba iyi vidio bali-itemenwe sana.

Konse uko twaleya mu kushimikila pali ilya nshita baletukaanya. Ku ca kumwenako, mu Brusque, mupepi na ku Blumenau, mu Santa Catarina, twakumene na bapainiya babili abo balekaanya sana. Lelo mu kushipikisha na mu kutekanya kwabo mwalifumine ifisuma. Pali ino nshita, pa numa ya myaka 50, muli ilya ncende mwaba ifilonganino ukucila pali 60 ne Cikuulwa ca Kulonganina ukulongana kukalamba icaba mupepi no musumba wa Itajaí!

Ico twibukisha sana ilyo twalebomba umulimo wa kutandalila ifilonganino ni nshita twaleipakisha ukuba pamo na ba Nte banensu pa kupekanya ukulongana kukalamba. Muli ba 1970, nalikwete ishuko lya kwangalila ukulongana kwa citungu ukwabelele mu Morumbi Stadium. Twatumine amakalata mu filonganino nalimo 100 ifyali lwa mupepi ukuti batume abantu 10 aba kuwamya mu cibansa ca kulonganinamo. Twawamishe ubushiku ilyo ukulongana kushilatendeka pa bushiku bwakonkelepo.

Ilyo abateya umupila balefuma mu cibansa ubushiku, bamo baletuseka abati, “Moneni, utukashana e tuli ne fipyango ne fikolopo.” Nomba ilyo calefika pa kati ka bushiku twalipwile ukuwamya icibansa! Maneja wa cibansa atile, “Ababomfi besu nga cabasendele umulungu onse pa kubomba uyu mulimo ba Nte mwabomba mu ma-awala ayanono!”

TWABWELELA KU UNITED STATES

Mu 1980 batata balifwile, kabili tapakokwele twabwelele ku United States, mu Fremont, ku California, ku kusakamana bamayo. Twalebomba incito ya kuwamya ifikuulwa ubushiku pa kuti tutwalilile ukubomba bupainiya kabili twaleshimikila mu ncende umwaleikala abalelanda iciPortuguese. Pa numa twakuukile ku San Joaquin Valley, uko twaleshimikila ku bantu abalelanda iciPortuguese abaleikala mu Sacramento ukuyafika fye na ku Bakersfield. Pali ino nshita mu California mwaba ifilonganino 10 umo balanda iciPortuguese.

Ilyo bamayo bafwile mu 1995, twakuukile ku Florida ku kusakamana bawishi Billie mpaka bafwa. Banyina bafwile mu 1975. Mu 2000 twakuukile ku ncende ya matololo iyaba ku kapinda ka ku kulyo mu Colorado uko twaleshimikila ku bena America inkonko abekala mu Navajo na mu Ute. Lelo ku ca bulanda, mu February mu 2014, Billie alifwile.

Naliba ne nsansa sana ukuti imyaka 65 iyapita, nalikumenye Nte ya kwa Yehova uwalebomfya Baibolo pa kwasuka amepusho naleipusha! Ne co nabela sana ne nsansa ca kuti nalefwailisha pa kuti nshininkishe ukuti ifyo alelanda e fyo Baibolo isambilisha. Ici calenga nsange insansa sana mu kubombela Lesa.