“Umuntu wa Bukapekape Akakwata Ifingi”

UKUTULA na kale bakapepa ba cine balatuula amalambo. Abena Israele baletuula inama, na Bena Kristu bene baishibikwa ukuti ‘balatuula ilambo lya kulumbanya.’ Na lyo line kwaliba amalambo yambi ayalenga Lesa alesekelela. (Heb. 13:15, 16) Aya malambo yalenga umuntu aba ne nsansa kabili apaalwa, nga fintu cali ku bantu twalalandapo.

Hana ali mubomfi wa kwa Lesa uwa cishinka uwalefwaisha ukukwata umwana lelo talekwata abana. Mwi pepo alilapile kuli Yehova ukuti nga akwata umwana umwaume ali no ‘kupeela uyo mwana kuli Yehova inshiku shonse isha mweo wakwe.’ (1 Sam. 1:10, 11) Mu kupita kwa nshita, Hana alimiite kabili afyele umwana umwaume uo ainike ati Samwele. Ilyo fye Samwele asumwike, Hana alimutwele ku cikuulwa ca mushilo nga fintu alapile. Yehova alipaalile Hana pa fyo aipeeleshe. Alikwete abana na bambi 5, na Samwele aishileba kasesema kabili alilembeleko na Baibolo.—1 Sam. 2:21.

Na muno nshiku mwine Abena Kristu balikwata ishuko lya kubombela Kabumba wabo nga filya Hana na Samwele bacitile. Yesu atulaile ukuti nga twaipeelesha mu kupepa Yehova tukapaalwa nga nshi.—Marko 10:28-30.

Mu nshiku sha batumwa, Umwina Kristu umwanakashi uo baleita abati Dorka aishibikwe ukuti “alebomba imilimo isuma iingi nga nshi kabili aali kapekape,” aleipeelesha ukwafwa abantu bambi. Ku ca bulanda Dorka “alilwele no kufwa,” ici calengele aba mu cilonganino baba sana no bulanda. Ilyo abasambi baumfwile ukuti Petro ali muli ulya musumba, balimupapete ukuti ayeko. Elenganyeni ifyo bali ne nsansa ilyo Petro aile no kubuusha Dorka, na kuba uyu e muku wa kubalilapo uo umutumwa abuushishe umuntu! (Imil. 9:36-41) Lesa talabile amalambo ayo Dorka aletuula. (Heb. 6:10) Ifyo Dorka acitile fyalilembwa mu Cebo ca kwa Lesa pa kuti tulemupashanya.

Tulingile ukulapashanya no mutumwa Paulo, na o aleipeelesha ukubomfya inshita yakwe kabili alebika sana amano ku bantu. Muli kalata Paulo alembeele Abena Kristu abali mu Korinti atile: “Awe ine ndesekelela nga nshi ukubomfya fyonse ifyo nakwata no kupoosa umweo wandi pa mulandu wenu.” (2 Kor. 12:15) Ifyo Paulo alecita fyalengele aishiba ukuti umuntu nga aipeelesha pa kwafwa bambi alaba ne nsansa, ne cacilapo ca kuti Yehova alamupaala kabili alamutemwa.—Imil. 20:24, 35.

Ukwabula no kutwishika Yehova alatemwa nga tulebomfya inshita yesu na maka ukubomba imilimo ya Bufumu no kwafwa aba bwananyina. Bushe kwaliba na fimbi ifyo twingacita ku kutungilila umulimo wa kubila imbila nsuma ya Bufumu? Ee! Kuti twacindika Lesa nga tulepeela imisangulo ya kuitemenwa. Iyi misangulo baibomfya ku kutwala pa ntanshi umulimo wa kubila imbila nsuma mwi sonde lyonse, ukubikako no kusakamana bamishonari, na bambi ababomba umulimo wa nshita yonse uwaibela. Na kabili, iyi misangulo ilabomfiwa ku kupekanya no kupilibula impapulo na mavidio, ukwafwa abapoonenwe no tuyofi, na kukuula Amayanda ya Bufumu. Te kuti tutwishike no kutwishika ukuti “umuntu wa bukapekape akakwata ifingi.” Na kuba, nga twapeela Yehova ifyuma fyesu, ninshi tulemucindika.—Amapi. 3:9; 11:25.

Ifyo Bamo Basangula Imisangulo ya Mulimo wa mwi Sonde Lyonse

Nga filya fine cali mu nshiku sha kwa Paulo, abengi muno nshiku ‘balapaatulako fimo’ nelyo ukupekanishisha libela indalama sha kubika mu tubokoshi twa misangulo utwalembwapo ukuti, “Umulimo wa mwi Sonde Lyonse.” (1 Kor. 16:2) Cila mweshi, ifilonganino filatuma iyi misangulo kwi ofeshi lya Nte sha kwa Yehova ilya mu calo cabo. Na kabili, kuti mwatuma imisangulo yenu kwi ofeshi lya Nte sha kwa Yehova ilyaba mu calo cenu. Adresi ye ofeshi lya Nte sha kwa Yehova kuti mwaisanga pa Intaneti pa www.jw.org. Imisangulo iyo mwingatuma mu kulungatika ni iyi:

UBUPE

Kuti mwatuma imisangulo ya ndalama ukubomfya banki nelyo amakardi ya ku banki nelyo foni. Pa kutuma imisangulo ku maofeshi yamo aya Nte sha kwa Yehova kuti mwabomfya webusaiti ya jw.org nelyo webusaiti imbi iyo babomfya ukutuminapo imisangulo.
Indalama nelyo ifintu fimbi. Mufwile ukulemba na kalata iya kulangilila ukuti indalama nelyo ifintu fimbi ifyo musangwile, bupe.

INDALAMA ISHO BENGAMUBWESESHA

Misangulo ya ndalama iyo bengabwesha nga ca kuti uwapeele alefwaya ukuti bamubweseshe.
Mufwile ukulemba na kalata iya kulangilila ukuti indalama isho mutumine musangulo uwa kuseekesha fye.

UBUPE BUMBI

Kwaliba inshila na shimbi isha kupeelelamo ku kwafwilisha umulimo wa Bufumu uwa mwi sonde lyonse. Ishi nshila, shili pe samba. Inshila yonse iyo mwingasala pa kupeela ubupe, kuti cawama mwabala mwalanshanya naba pe ofeshi lya mu calo cenu pa kuti mwishibe inshila sha kupeelelamo isho babomfya mu calo cenu. Apo amafunde ya kukonka na ya misonko yalapusanapusana, cisuma ukwipusha abaishiba bwino amafunde ne fya misonko ilyo tamulasala inshila ya kubomfya pa kupeela ubupe.

Inshuwalansi: Umuntu kuti alembesha ukuti indalama sha cipangano ca inshuwalansi nelyo isha penshoni shikapeelwe kwi ofeshi lya Nte sha kwa Yehova.

Indalama sha ku Banki: Umuntu kuti alemba icipangano ca kuti nga afwa, indalama sha ku banki, ifipepala ifilanga ukuti umuntu alibika indalama ku banki nelyo indalama sha penshoni, fikapeelwe kwi ofeshi lya Nte sha kwa Yehova ukulingana na mafunde ye banki ilyo abikako indalama.

Nsonsela: Bamo abakwata indalama ishingi mu twampani kuti batila nsonsela yabo ileba bupe kwi ofeshi lya Nte sha kwa Yehova.

Impanga ne Fikuulwa: Impanga, ifikuulwa ne ng’anda ifyo bengashitisha kuti bapeela ubupe. Uulepeela kuti alemba fye icipangano ne ofeshi lya Nte sha kwa Yehova ukuti nga afwa, e bakaba abene ba ng’anda, impanga nelyo ifikuulwa.

Ubupe bwa Kulapeelwako Akanono: Umuntu kuti apeela indalama iofeshi lya Nte sha kwa Yehova. E lyo ena nangu umuntu umbi uo alefwaya kuti alepokako akandalama kalinga cila mwaka mpaka akafwe.

Nge fyo amashiwi ya kuti “ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabeela. Pa kwafwa abalefwaya ukutungilila umulimo wa mwi sonde lyonse uwa Nte sha kwa Yehova ukubomfya imisangulo ya kupeela mu kuitemenwa, broshuwa iileti “Charitable Planning to Benefit Kingdom Service Worldwide” yalipekanishiwa mu lulimi lwa ciNgeleshi no lwa ciSpanish. Iyi broshuwa yaikwata ifyebo pa nshila shalekanalekana isho twingapeelelamo ifya bupe pali nomba nelyo inshita imbi, nge fya cishale. Ifyebo ifili muli iyi broshuwa nalimo te kuti fibombe sana kuli imwe pa mulandu wa misonko nelyo amafunde yambi ayaba mu calo mwikala. Abengi ababomfya ishi nshila sha kupeela mu kuitemenwa, balafwilisha umulimo wesu uwa mwi sonde lyonse kabili imisangulo yabo ilabomfiwa ku kwafwa bamunyinefwe abaponenwa na masanso kabili ukupeela imisangulo ukubomfya iyi inshila kulalenga abalepeela ukukanalipila indalama ishingi ku misonko. Iyi broshuwa nga kuti yasangwa mu calo mwikala, kuti mwapokako imo kuli kalemba mu cilonganino cenu.

Nga mulefwaya ukwishibilapo na fimbi, kuti mwatinika apo balemba ati “Peeleni Ubupe ku Mulimo wa mwi Sonde Lyonse” pa nshi ye bula lya kubalilapo pa jw.org nelyo kuti mwaipusha iofeshi lya musambo ilyaba mu calo cenu.