Beni Abashilimuka pa Kutambika Impapulo Shesu
1 Ukwananya kwateyanishiwa ukwa mpapulo shesu kwatendeke na bamagazini 6,000 aba mu ciNgeleshi aba Ulupungu lwa kwa Kalinda ulwa July 1, 1879. Ukutula lilya, impapulo shapusanapusana ishingi nga nshi shalipulintwa no kwananishiwa.
2 Imitantikile ya Kukanaimika Umutengo: Mu November 1999, twaumfwile ukuti bakasabankanya capamo na bantu bambi abalefwaya bamagazini ne mpapulo bakulasangwilako fye, e kutila ukwabula ukubapingwila umusangulo nelyo ukwabula ukubemikila umutengo. Ilyo tuletambika impapulo, twakulapoka umusangulo wa kuitemenwa uwa kwafwilisha umulimo wa mwi sonde lyonse uwa kusabankanya imbila nsuma. Natucetekela ukuti Yehova akapaala iyi mitantikile.—Linganyeniko Mateo 6:33.
3 Ifya Kubomba mwi Bala: Tukatwalilila ukulanda pa lyashi limo ilyo umuntu engatemwa ukulanshanya nankwe. Abashitemenwe ifyo tulebashimikila, tatwakulabatambika impapulo. Tatulefwaya ukulaonaula fye impapulo shesu ukupeela abashilefwaya. Lelo nga ca kuti umuntu alekutika kabili asumina ukuti akabelenga ulupapulo, kuti twamushiila. Tulefwaya ukuba abashilimuka pa kutambika impapulo shesu.
4 Pano pali fimo ifyo mwingalanda ilyo muletambika ulupapulo: “Nga kuti mwatemwa ukubelenga ulu lupapulo, kuti namushiila.” Ilingi line umuntu kuti aipusha ukuti: “Mulecita shinga?” Kuti mwaasuka ukuti: “Umulimo tubomba te wa bukwebo. Tatuleshitisha ishi mpapulo. Umulimo tulebomba kuli ino ncende ulebombwa mu fyalo 233, kabili abaubomba tabafolelapo indalama. Bafwilisha abantu mwi sonde lyonse ukwishiba inshila ya ku mweo wa muyayaya. Nga kuti mwaitemenwa ukusangwilako kuli uyu mulimo, kuti napoka umusangulo wenu.”
5 Pa kutambika bamagazini, kuti mwaipusha icipusho pa cipande ca kulungatika, kabili kuti mwatila: “Kuti natemwa na imwe mwaumfwamo ifishinka muli ici cipande. Nga kuti mwatemwa ukubelenga aba bamagazini babili, kuti namushiila.” Nga basumina ukupoka, lundenipo ukuti: “Natemwa sana apo na imwe namwebako ifi fyebo. Ndemona mukasanga ukuti ilyashi lili muli ici cipande lisuma icine cine. Na kuba, kuti natemwa ukubwela uyu mulungu ukwisaumfwa ifyo mwingalandapo pali ifi fyebo. Kuti mwamona ukuti Ulupungu lwa kwa Kalinda lulembwa mu ndimi 132 kabili cila mweshi bamagazini 22,398,000 balananishiwa mwi sonde lyonse. Uyu mulimo onse washintilila pa misangulo ya kuitemenwa. Nga kuti mwaitemenwa ukusangwilako kuli uyu mulimo, kuti twapoka umusangulo wenu.”
6 Inshita shimo, te kuti cilolemo ukulanda pa lwa kusangwilako. Ku ca kumwenako, mwine ng’anda uulefwaya ulupapulo kuti atwipusha ukuti: “Bushe mulepeela fye?” Nalimo kuti twaasuka ukuti: “Nga mulefwaya ukubelenga ulu lupapulo kabili nga kuti mwatemwa ukumushiila, nalamupeela. Nkesapitapo uyu mulungu tukalande pali ili lyashi, nkesamulondolwelako na fimbi pa lwa mulimo wesu uwa mwi sonde lyonse.” Ilyo twabwelelako kuti twayalondolwela mwine ng’anda uko tufumya indalama shibomfiwa mu mulimo wesu.
7 Limo nalyo mwine ng’anda kuti apoka fye ulupapulo apo pene no kulanda ukuti, “Natasha mukwai.” Kuti mwaasuka ukuti: “Endita mukwai, ndesubila mukatemwa ifyo mukabelengamo. Nomba abengi balepusha uko tufumya indalama shibomfiwa muli uyu mulimo pantu ubombwa mwi sonde lyonse. Abengi abapokako impapulo shesu balatasha pa fyo basambililamo kabili balaitemenwa abene ukusangwilako kanono pa kuti kwingaba ukutwalilila ukusabankanya ishi mpapulo. Bamo nga baitemenwa ukusangwilako, tulapoka umusangulo wabo.”
8 Bushe Cine Cine Balefwaya?: Kwena, umulimo wesu te wa kuya tulepeela fye impapulo icipeelepeele. Tufwaya impapulo shilebomba umulimo shabelako, uwa kwafwilisha aba mitima ya bufumacumi ukusambilila ifyalundwapo pa lwa mifwaile ya kusungusha iya kwa Yehova. Kuti tuleonaula fye impapulo nga tuleshiila abantu abashacindika ifya ku mupashi. (Heb. 12:16) Ukushalika impapulo ku bantu abengasambilila icine kwashintilila pa kushilimuka kwenu ukwa kwishiba abalefwaya impapulo icine cine. Kuti mwaishiba shani abalefwaya? Ukuitemenwa ukulanshanya na imwe kuti kwalangilila ukuti umuntu alefwaya. Nelyo ukukutikisha ilyo mulelanda, ukwasuka ifipusho muleipusha, no kulanda ifyo aletontonkanya kuti fyalangilila ukuti alefwaya icine. Ukulanda na imwe mu mucinshi, pamo nga cibusa musuma, kuti calanga ukuti imibele yakwe ili bwino. Ukukonkamo ilyo mulebelenga Baibolo kuti kwalange fyo alicindika Icebo ca kwa Lesa. Ilingi line kuti cawama ukubepusha nga bakabelenga ulupapulo tuletambika. Kuti mwabalaya no kuti mukabwelelako ku kutwalilila apo mwashiila ilyashi. Ukusuminisha ifyo mulelanda na ko kwine kuti kwalanga ukuti umuntu alefwaya. Nga mwamona ifyo fishibilo fya kuti alefwaya, lyena kuti twatila uyo muntu akabelenga impapulo alapokelela.
9 Iyi mibombele yesu iipya ili bushinino bwalundwako ubwa kuti tatwaba “abenshe cebo ca kwa Lesa ku kumwenamo.” (2 Kor. 2:17) Iyi mibombele ilelanga no kuti tatuli ba pano isonde.—Yoh. 17:14.
10 Apo ukonaulwa kwa kwa Babele Mukalamba kulepalamina, amateyanyo yonse aya fya mapepo yalecula ku fintu ifingi. Ico twaimininapo ca kutila umulimo uwacindama uwa kushimikila Ubufumu mwi sonde lyonse uletwalilila ukuya pa ntanshi ukwabula ifipindami, pa kuti abantu na bantu bakapusuke.—Mat. 24:14; Rom. 10:13, 14.