Umukululo wa Mepusho

◼ Kuti mwaishiba shani nga nacilinga ukushiila umuntu ulupapulo?

Icacindama sana kumona nga uyo muntu alefwaisha ukumfwa icine. Ngo muntu alefwaisha ukumfwa icine, kuti twamushiila magazini ibili, broshuwa, icitabo nelyo impapulo shimbi isho tuleshalika. Kuti twamushiila nampo nga akwete indalama inono iya musangulo wa mwi sonde lyonse nelyo takwete. (Yobo 34:19; Ukus. 22:17) Lelo kwena te kuti tuleshalika impapulo shesu ishacindama ku bantu abashilefwaya.—Mat. 7:6.

Kuti twaishiba shani ukuti abo tuleshimikila balefwaisha ukumfwa icine? Nga basumina ukulanshanya nabo ninshi twaishiba ukutila balefwaya ukumfwa icine. Nga balekutikisha ilyo tulelanda, baleasuka amepusho, nelyo ukulanda ifyo baletontonkanya ninshi balefwaya tulelanshanya. Nga balekonkamo ilyo tulebelenga Baibolo ninshi balelanga ukuti balicindika Icebo ca kwa Lesa. Ilingi line cilaba bwino ukwipusha nga bakabelenga ulupapulo tulebashiila. Bakasabankanya balingile ukulamona nga cine cine umuntu alefwaisha ukwishiba icine. Ku cakumwenako, ilyo tuleshimikila mu misebo, te kuti ciwame ukulapeelapela fye bonse abo tulekumanya, impapulo pamo nga magazini, amabroshuwa, nelyo ifitabo. Nga twamona ukuti abo tuleshimikila balemoneka kwati tabalefwaya ukwishiba icine, kuti cawama ukubashiila fye akapepala ka kwitilapo abantu nelyo trakiti.

Cimo cine ne mpapulo kasabankanya apoka ku mubomfi wa fitabo, afwile ukupoka isho alekabila ukubomfya mwi bala te kulingana ne ndalama engasangwilako. Nga tulesangula te kutila ninshi tulelipila pa mpapulo tupoka, lelo kwafwilisha imbali shonse isha mulimo wa kushimikila uwa mwi sonde lyonse. E ico nampo nga twalikwata indalama nelyo iyo, ukutasha Lesa wesu kukalenga tulepeela ukufuma pa nshi ya mutima, te kupeela ishashalapo ku mulimo wa Bufumu. (Marko 12:41-44; 2 Kor. 9:7) Kabili ukutasha Lesa kukalenga tulesenda impapulo isho tulekabila fye, kabili tatwakulaonaula indalama sha kwa Lesa.

[Amashiwi pe bula 2]

Bakasabankanya balingile ukulamona nga cine cine umuntu alefwaisha ukwishiba icine