Umukululo wa Fipusho

◼ Bushe cila nshita twabwelelako tufwile ukweba mwine ng’anda ukuti tulapoka ubupe bwalinga ubwa kwafwilisha umulimo wa mwi sonde lyonse uwa Sosaite?

Iyo. Mu cipande ca kuti: “Beni Abashilimuka pa Kutambika Impapulo Shesu” icali mu Ubutumikishi Bwesu Ubwa Bufumu ubwa January 2000 mwali amashiwi ya kuti: ‘Inshita shimo, te kuti cilolemo ukulanda pa kusangwilako ku mulimo wa mwi sonde lyonse.’ Mufwile ukuba abashilimuka pa kwishiba bwino ica kucita. Tufwaya abantu ukumfwikisha ukuti umulimo wesu cine cine wa masomo ya Baibolo, te wa bukwebo. Tatuli bakalombalomba ba ndalama.

Ilingi line cisuma lilya line twashalika impapulo pa muku wa kubalilapo ku muntu uulefwaya ukusambilila icine, twamulondolwela bwino ukuti umulimo wesu wafwilishiwa no bupe bwa kuitemenwa. Nga tuleibukisha lyonse ukuti abo tushiila impapulo ni balya abalanga ukutemwa icine nelyo abalanda ukuti balefwaya ukubelenga impapulo shesu, ninshi ilingi line abantu bakulapa no bupe.

Abengi abafwaya ukusambilila icine aba musango yo balaitendekelako ukupeela ubupe lyonse ilyo tuya mu kubatandalila. Bamo kuti baipusha umutengo wa lupapulo. Kuti twabalondolwela ukuti umulimo wesu te wa bukwebo, kabili tupeela impapulo shesu abalefwaya ukubelenga ukwabula ukubashitisha. Kuti twabeba no kuti onse uwingatemwa ukupeelako ubupe bwa kwafwa umulimo wesu uwa mwi sonde lyonse kuti apeela ukulingana na pantu akwatile. Mu nshita mu nshita, ilyo twamona calinga, kuti tulecinkulako mwine ng’anda ulwa kupeelako ubupe ku mulimo wa mwi sonde lyonse nga twamona talepeelako.

Tufwile ukwibukisha ukuti nangu ca kutila tusha impapulo ku balefwaya ukusambilila icine ukwabula ukupingula umutengo, indalama shilapooswapo pa kupulinta no kwananya impapulo shesu. Twalicetekela ukuti umupashi wa kwa Lesa wakulacincisha abamubombela na balefwaya ukusambilila icine abo tusanga mwi bala ukupeela ubupe bwa kuitemenwa ubwa kubomfya kuli fyonse ifya mu mulimo wa mwi sonde lyonse.