Ukwaafwa Bambi Ukutesekesha Ubucindami bwa Mpapulo Shesu
1 “Icebo ca kwa Lesa ca mweo, kabili caliluma.” (Heb. 4:12) Apantu impapulo shesu ishashimpwa pali Baibolo shilaafwa abantu ukunonkelamo mu kuluma kwa Cebo ca kwa Lesa, tulashibomfya ku kubimbula ubuseko muli Baibolo lintu tulecitilo bunte bwa mu lyashi nelyo lintu tuletandala ku ŋanda ne ŋanda.
2 Ulupapulo lwa kutambika mu January luli citabo icili conse ica mabula 192 icapulintwa pa mapepala ayacucuka nelyo ukubutuluka nelyo icasabankanishiwe pa ntanshi ya 1980. Nga ca kuti ifitabo fya musango yo e ko fili mu cilonganino cenu, pekanyeni imipeelele yenu iya bukombe bwa Bufumu mu nshila iingatungulula ku cishinka ca kulungatika mu citabo mulebomfya. Ni shani fintu ici cingacitwa?
3 Ifya Kupekanya: Pa kutendeka, saleni ubulondoloshi mu citabo mulebomfya ubo mu kupalishako bukacebusha abantu ba mitima ya bufumacumi mu cifulo cenu ica kubombelamo. Mu kukonkapo, tontonkanyeni ulwa ca kuponako ca ndakai nelyo umutwe wa lyashi uwa buseko bwa cinkumbawile uyo pambi mwingalanshanyapo mu kwipifya na mwine ŋanda pa ntanshi ya kwalwila ukusakamana kwakwe ku bulondoloshi bwapulintwa ubo musalile. Nakalimo kuliko ilembo liloshiweko nelyo ilyambwilwe ilyo mwingabelenga, atemwa ukufuma muli Baibolo nelyo mu kulungatika ukufuma mu citabo, ku kutungilila ubulondoloshi bwenu. Lyene tambikeni mwine ŋanda icitabo pa musangulo walungama. Nangu cibe fyo, nga ca kuti mwine ŋanda akaana icipeelwa esheni ukumusha ne cipusho cimo nelyo itontonkanyo ilyo mwingabomfya pamo nge citendekelo ca cipempu ca kubwelelamo.
4 Ifilonganino ifingi fyalikwata amakope yanono aya Ubwaice Bobe—Ukukwatilamo Ifyawamisha na Ukukutika kuli Kasambilisha Mukalamba. Nga ca kuti ifi fitabo e ko fili, mulandu nshi te kupekanya ukulanshanya na bacaice mwakumanya mu cifulo ca kubombelamo? Bakoselesheni ukubelenga lumo ulwa ishi mpapulo shishaiwamina. Nga ca kuti muletambika Icine Icitungulula ku Bumi bwa Ciyayaya, kuti mwabomfya inshila ilangililwe pa muulu kabili pekanyeni ukulanshanya impendwa iili yonse iya fifundisho fya Baibolo ifya kutendekelako ifyafimbwa muli ici ica kwaafwa ukusambilila Baibolo icishaiwamina.
5 Tambikeni Ukusapika Lesa Ukwa Mutundu wa Muntu: Kuti pambi mwatampa ukulanshanya pa kwalwila ukusakamana ku lubali lwa lyashi lya pa mulabasa ulo atemwa ululeebekesha ukubimbwamo kwa butotelo mu milandu ya calo nelyo pambi ululelangilila ukusonga kwa butotelo mu bumi bwa bantu.
Lyene ipusheni icipusho, pamo nge ci:
◼ “Ni shani fintu muletontonkanya Lesa amona amabutotelo yaimikwa ayo yalesonga imilandu ya mu calo ilelo? [Lekeni asuke.] Bushe kuti camusungusha ukwishiba ukuti ifisambilisho fya kutendekelako ifya aya amabutotelo yonse fyalipalana nga nshi no kuti fyaba ifyapusanako apakalamba ukufuma ku fisambilisho fya Baibolo?” Nga ca kuti mwine ŋanda ali uwaitemenwa ukukutika, mulangeni umutande wa filimo, kabili londololeni mu kwipifya ukuti nampo nga umuntu aliba uwa butotelo nelyo iyo, ubumi bwakwe buleambukilwako ku kusonga kwa maka ukwa butotelo. Londololeni ifyo kuti amwenamo ukufuma mu kusambilila umulandu ukusapika Lesa ukwa mutundu wa muntu kwatungulwila mu ntunga shafulishe fyo kabili ishataluka nga nshi ukufuma ku kusambilila ifya kwishiba ubutotelo bwalungama.
6 Pa nshita shimo kuti cacilapo kulinga ukutambika bamagazini nelyo trakiti. Twalikwata imilandu iingi iya kubela abacincimuka kabili abapimpa pa lwa kukoselesha bambi ukubelenga ishi mpapulo pa kuti bengapangashiwa ukukumanya ukuluma kwa Cebo ca kwa Lesa mu bumi bwabo pa kwankula ku kutungulula kwa ciko.