Awileni Ibeli lya kwa Yehova!
1 Pa Mulungu, Nisani 9, 33 C.E., ibumba likalamba ne misambo ya tuncindu mu minwe yabo lyaawilile Umwana mwaume ibeli lya kwa Yehova, Shikulu Yesu Kristu, nge “Mfumu iileishila mwi shina lwa kwa [Yehova, NW].” (Luka 19:38; Heb. 1:6) Pali Cimo na pali Cibili, Nisani 10 na 11, Yesu alyobelwe no butumikishi bwakwe ubwa pa cintubwingi, ukulenga shilya nshiku sha kulekelesha ukuba ishacilishapo ukupamfiwa mu bumi bwakwe ubwa pe sonde.
2 Ilelo, ibumba ilyakulanapo mu kuba ne misambo ya tuncindu twa mampalanya mu minwe libilikisha ne shiwi likalamba aliti: “Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” (Ukus. 7:9, 10) Pa March 26, tukakumana ku kusefya Icibukisho ca mfwa ya kwa Kristu. Ilyo bulya bushiku bulepalamina, bushe kuti twaluminishako ukubombesha kwesu mu butumikishi na muli ifyo ukulundako kuli uku kupunda kwe lumbo ukwa mu cibulungwa conse?
3 Lundako Imibombele ya mwi Bala: Bakasabankanya abengi kale kale balilembesha nga bapainiya ba kwafwilisha mu March. Bushe kuti watemwa ukuilunda kuli bene? Nga ni fyo, lembesha ukwabula ukushingashinga. Umo uwa baeluda akaba uwa nsansa ukwasuka ifipusho ifili fyonse pambi wingakwata pa lwa mulimo.
4 Nampo nga kuti wabomba nga painiya wa kwafwilisha nelyo iyo, ukafwaya ukukwata ukwakanamo kwakumanina mu butumikishi mu kati ka March. Icilonganino kuti pambi caba na maka ya kutantika ukucitilo bunte kwe bumba cila bushiku mu kati ka mweshi. Icifulo ca kubombelamo icalinga cikabikwa pa mbali kuli iyo mifwaile.
5 Ifilonganino fyonse filingile ukutantika ukukumana kwaibela ukwa mulimo wa mwi bala pa Cibelushi, March 26. Nangu ca kuti kuliko ifingi ifya kucita mu kupekanishisha Icibukisho, citashiwe ukuti uuli onse uuli na maka ya kucite fyo aibimbe mu butumikishi bwa mwi bala pa Cibelushi ulucelo. Ukulunda ku kubomba ukufuma ku ŋanda ne ŋanda, shininkisha ukuti abo ulaalike ukusangwa ku Cibukisho nabakwata imyendele no kuti nabeshiba bwino bwino inshita ne cifulo ca kulonganinapo.
6 Laalika Kabili Koselesha Bambi: Yesu akambishe abakonshi bakwe ukuti: “Citeni ici ku kunjibukisha.” (1 Kor. 11:24) Ilyo abakonshi ba kwa Yesu abasubwa abakonka mu nkasa shakwe baleumfwila ilyo ikambisho, umubomfi wa kwa Yehova uuli onse nalaalikwa ukusangwako no kubaka ukusefya kwa Cibukisho. Pa kati ka abo ulelaalika palingile ukuba, amasambililo ya Baibolo, ba lupwa, abo ulanshanya na bo pa lwa Baibolo, umwina mobe uushasumina, na bantu ubomba na bo. Panga umutande pa kuti tapali nangu umo uwalabwako.
7 Kukabako amashuko ya mu nshita ayalundwako pa Cibukisho aya kukoselesha abalesekelela. Ba uwashininkisha ukufika mu kubangilila pa kuti wingaposha abapya abalesangwako umuku wa kubalilapo. Nga ca kuti amasambililo yobe aya Baibolo ayafulilako yasangwako, kuti pambi cabomba ukuleka kasabankanya umbi ukwikala na bamo aba bene mu kati ka kulongana. Laalika abapya ukusangwa ku Kulongana kwa Cintubwingi ukwa lyonse ukwa cilonganino. Eluda usalilwe ukupeela ilyashi lya cintubwingi alingile ukuba uwaipekanya bwino ukupeela ilyashi lya kucincimusha.
8 Pa kusondwelela kwa kusefya kwa Cibukisho, ilyo tulelunda amashiwi yesu mu kwimba ulwimbo 46, “Awileni Ibeli lya kwa Yehova!,” shi natube na maka ya kulolesha ku numa mu kuba no kwikushiwa pa mweshi wa kupimpa uwa mibombele ya teokratiki kwi lumbo lya kwa Yehova!