Lundulula Ubuseko mu Citabo ca Ikala Kuli Pe na Pe
1 Lintu tutandala pa mayanda yabo, ilingi line tusango kuti abantu baba abashikama mu “fya kusakamana ifya pano isonde.” (Marko 4:19) Tulolenkana no kusonsomba kwa kubimbula ubuseko bwabo mu kuba ne mipeelele ya kubalamuna itontonkanyo. Pa kutendekelako fye, abantu abengi kuti pambi bakwata ubuseko bunono mu cintu tuli no kusosa. Nga twingasosa icintu cimo ico icingambukila ubumi bwabo, kuti pambi twaba na maka ya kukumbamo ubuseko mu bukombe bwa Bufumu. Ulufungulo ku kutampa ukulanshanya lwaba kusoobola ifishinka fya kulanshanyapo ifya kucebusha ukufuma mu citabo ca Ikala Kuli Pe na pe. Cinshi cintu wingasosa?
2 Kuti pambi wabomfya iyi nshila:
◼ “Nga mwalikwete amaka, ni mpika nshi iya kubombomanika mu kasuba kesu mwingalungika? [Suminisha ukwankulako, kabili nga cili icalinga, suminisha ukuti abantu abengi bayumfwa mu nshila imo ine.] Ukufika pali nomba, intungulushi sha calo shimoneka ukukwata ukutunguluka kunono mu kusanga ukupikulula ku mpika sha kupelenganya ishingi isha lelo. Lelo kwalibako Umo uwingaleta kabili uukaleta impela ku mpika shonse ishilecululusha umutundu wa muntu. Shi moneni icalondololwa pa Ilumbo 145:16. [Belenga ilembo, kabili alukila ku fikope pa mabula 11-13.] Paragrafu 14 pe bula 14 imya icipusho ico twacilanshanyapo fye kabili itwalilila ukwipusha aiti: ‘Nomba ni lilali ici cikacitika?’” Londolola ukuti icitabo cikasuka ico cipusho kabili tambika icitabo.
3 Nelyo pambi kuti wasosa icapale ci:
◼ “Napamo mwalishiba ukuyumfwa kwa kupelelwa uko kwisako pa kulufya umutemwikwa mu mfwa. Mu kupalishako mwayumfwile aba bulanda kabili abapelelwa nga nshi. Nakalimo mwalilangulwike pali ifi fipusho: [Belenga ifipusho mu paragrafu 1 pe bula 76.] Bushe te kuti cibe ca kusansamusha ukukwata ifyasuko kuli fi fipusho? Kuti pambi camukoselesha ukwishibo kuti Baibolo itambika isubilo lyashininkishiwa kuli abo abafwa. [Belenga Yohane 5:28, 29.] Ici citabo citwaafwa ukumfwikisha imibele ya bafwa kabili ne subilo lyabako ku nshita ya ku ntanshi.” Mu kwipifya alukila ku fipandwa 8 na 20.
4 Cili icapalishako ukuti ukakumanya amashuko ya mu nshita aya kucitilo bunte bwa mu lyashi. Nga ni fyo, kuti pambi mu mashiwi yobe yene wasosa icapale ci:
◼ “Icalo ciswilemo impika shino nshiku, kabili ukwabulo kutwishika na imwe pambi namukwatako shimo. Ca bulanda ukusoso kuti, cimoneka ifyo aba kaele e baculisha. Bushe muletontonkanya Lesa akatala apwisha ukucula konse? [Suminisha ukwankulako.] Lekeni nondolole cintu Lesa alayo kucitila abo abamubombela. [Belenga Ilumbo 37:40 kabili lyene kupukula icitabo ca Ikala Kuli Pe na pe pe bula 99.] Ici citabo cilondolola umulandu Lesa asuminishisha ububifi na fintu akabupwisha.”
5 Nga ca kuti uli kasabankanya wacaice, kuti wabomfya imipeelele iishimpilwe pa fikope fisangwa pa mabula 156-8. Kuti pambi watampa pa kwipusha ukuti:
◼ “Bushe kuti mwatemwa ukwikala mu calo capala ici? [Suminisha ukwankulako.] Cimo na cimo ica ifi fikope fyayemba cishimpilwe pa bulayo ubwalondololwa mu Cebo ca kwa Lesa, Baibolo. [Londolola Amalembo yaloshiweko.] Ici citabo kuti camwafwa ukusambilila ifyafulilako pa lwa bulayo bwa kwa Lesa ku kulenga isonde lyonse ukuba paradise. Cakwatamo ifyebo fya kupususha ubumi kabili caliwaminwa inshita iikabilwa pa kubelenga cene.”—Yoh. 17:3.
6 Lintu uletambika icitabo, imika umufula ku cipempu ca kubwelelamo pa kwimya ifipusho ifya kulanshanya pa numa.