Ukutampa Amasambililo ya Baibolo mu Citabo ca Ikala Kuli Pe na Pe
1 Ukutemwa abantu kulingile ukutusesha ukwangufyanya ukubwelela ku kwaafwa abo abali ne nsala ne cilaka ca cine. (Mat. 5:6) Tulingile ukusakamana no kulundulula ulusase ululi lonse ulwa buseko ubo pambi twingasanga nga ca kuti tatulefwaya bwene ukushima. Ukupekanya e lufungulo ku kutunguluka.
2 Ubuyo bwesu bulingile ukuba kutampa amasambililo ya Baibolo. (Mat. 28:20) Amakope yapulintilwe pa kubalilapo aya citabo ca Ikala Kuli Pe na pe yasanshishemo uku ukulandapo kwa kwiswila: “Ici mu cine cine cili citabo cawamisha ica kubomfya mu kusambilila no uuli onse, umwaice nelyo umukalamba, te mulandu ne cipimo cabo ica masomo.” Calembwa mu nshila iyo ilenga ukutungulula amasambililo ukuba ukwacilapo kwanguka, ukulenga nelyo fye ni bakasabankanya bapya ukwakanamo. Ukutunguluka kwesu mu kutampa amasambililo yapya kwashintilila pa kufumamo cimo kwesu mu kucite fipempu fya kubwelelamo.
3 Ni Shani Fintu Twingatampa Amasambililo? Lintu twabwelelako, ilingi line caliba icisuma ukukakanya mu kulanshanya kwesu icishinka cimo nelyo icipusho icalumbwilwe pa kutandala kwesu ukwa kubalilapo. Nakalimo mwalanshenye imibele ya bafwa, ukusha icipusho ca kuti, “Lisubilo nshi ilyabako ku batemwikwa besu abafwa?” Londolola ukuti ukubuuka takwaba lisubilo lishashininkishiwa; Baibolo yalembwamo ifya kumwenako ifingi ifya kubuuka uko kale kale kwacitikako. Pitulukeni mu fikope pa mabula 167-9. Lyene lanshanyeni icalondololwa mu maparagrafu 1 na 2 pe bula 166. Tambika ukubwelelako ku kulanshanya ifyalundwapo.
4 Pambi walandile ku mufyashi uwalumbulwile ukusakamikwa pa lwa kwingilishiwako kwa mpika shikumanishiwa mu kukusha abana. Mu mashiwi yobe yene, pambi, kuti wasosa icapale ci:
◼ “Abafyashi bonse bafwaila abana babo ifyawamisha. Baibolo yakwatamo ukufunda uko kwingafwa abafyashi ukukansha abana babo ukusanga ubumi bwa kwikusha ubo bwakwata ubupilibulo ne mifwaile. Pali uyo mulandu, tulekoselesha na maka ukuti indupwa shisambilile Baibolo capamo. [Alukila kuli paragrafu 23 pe bula 246.] Ukwishiba kunonkwa kuti kwaleta amapaalo ya ciyayaya ku lupwa lonse.” Belenga Yohane 17:3. Lumbulula ukuitemenwa kobe ku kubwelelako ku kulanga ulupwa ifya kutampa isambililo lyabo.
5 Nga ca kuti uli mwaice nelyo kasabankanya umupya kabili walandile mu kwipifya pa lwe subilo lya Paradise pa kutandala kwa kubalilapo, mu kuba ne citabo icakupukulwa pe bula 3, lumbulula fye icapale ci:
◼ “Baibolo yalayo kuti abo abacita ukufwaya kwa kwa Lesa kuti balolesha ku ntanshi ku kwikala mu calo capala ici, umukaba insansa no mutende. Ici citabo cilanga ico tufwile ukucita pa kuipakisha ilyo ipaalo.” Mu kwipifya londolola inshila yesu iya kusambililamo, kabili tambika ukulangilila yene.
6 Pamo nga basambi ba kwa Yesu, twalikwata ukukakililwako ku kwaafwa abantu. (Rom. 10:14) Nga ca kuti twalishalike icitabo nelyo nga twakwete fye ukulanshanya kusuma, twalikwata icishingamo ku kulundulula ubuseko. (Mat. 9:37, 38) Nga ca kuti twafikilisha uyu mulimo bwino bwino, bonse kuti baakanako amapaalo ayo yakafumamo.—1 Tim. 4:16.