Ukubwelela ku Sukulu na Kabili

¹ Abacaice besu kale kale baletontonkanya pa lwa mwaka upya uwa ku sukulu uwalaswa utampe. Kuliko ifintu fya kuipakisha ifileenekelwa, lelo na kabili kuliko imilandu imo iyo ingaletako icintiinya. Imisepela iingi ikapeelwa bakafundisha bambi, ukutendeka bakosi abapya, no kubalenga ukubishanya na basambi abo bashishibe. Abacaice besu balafwaya ukubombela pamo na balashi be sukulu no kumfwana na basambi banabo, lelo balingile ukwibukisha ukuti bali no kuibaka ku cili conse icingaba ca kucena lwa ku mupashi.—1 Kor. 15:33.

² Ukwangwako kukalamba ku bana banono ne misepela abali ni Nte kuli kusengauka ukusonga kwa kukowesha ukwa calo, ukwayandatila ififulo fya masomo ifya mu fyalo ifingi pali lelo. Abena Kristu abanono na bakalamba bafwile ukuba abakosa ku kukaana ifipimo fya ku calo no kutontonkanya ifyo pali nomba filesumbulwa ukukuma ku milandu ya mibele isuma, kabili bafwile “ukuibaka” ukupitila mu kubelenga no kutungululwa ne Cebo ca kwa Yehova. (Ilu. 119:9) Abafyashi bayangwako balekabila ukwishiba icilesanshiwa mu masambililo ya ku sukulu pa kuti bengatungulula bwino abana babo. Nga ca kuti ifilesambilishiwa pa sukulu nelyo ukuli konse kumbi filepinkana na bumushilo no musangwela ififwaikwa ku babomfi ba kwa Yehova, filingile ukusengaukwa.—1 Pet. 1:15, 16.

³ Na kabili caliseeka nga nshi ukukumanya imilandu ibimbamo ukusefya kwa buluko, ukusefya amaholide, ifyangalo, nelyo ukubungana kwa kwangalila capamo. Broshuwa wa School and Jehovah’s Witnesses alibo wa kwaafwa ku misepela ya Bwina Kristu ukukuma kuli iyi milandu. Imibele iimoneka iyaafya nga nshi kuti yacimfiwa nelyo ukucefiwako lintu abafyashi ba bana banono baitendekelako mu kulanda na bakafundisha ukubomfya ulu lupapulo. Kuti balondolola ukuti ici cili no kwaafwa kafundisha ukumfwikisha umulandu Inte sha kwa Yehova basalilapo ukukanaibimba mu ncitilo shimo. Ukupeela kafundisha ifi fyebo kuti kwaafwa nga nshi ku kuletako umupashi wa kubombela pamo.

⁴ Mu kulundapo, kuti cawama ku basambi abali Bena Kristu ukusungako broshuwa wabo uwa School pa kati ka fitabo fimbi ifya ku sukulu. Ilingi line kulabako amashuko ya mu nshita aya kucitilo bunte ku basambi bambi abepusha ifipusho lintu kwabako ukusakamana ukwatontomeshiwa pa fisumino fyesu. Na kabili, abana banono abali ni Nte balingile ukusenda pa nshita shonse kardi wa Advance Medical Directive/Release nelyo Identity Card uwa nomba line, uwasainwa bwino bwino na bakambone. Abali no kubomfya uku kukonkomesha mu kushininkisha bakapala ‘uwacenjela uwamono bubi no kubelama.’—Amapi. 22:3.