Icipasho ca Kukonka mu Kupalamisha
1 Ukwabulo kutwishika Yesu aali e muntu wakulisha uwabalile abako uwa mweo. Aimikile abasambi bakwe ica kumwenako capwililika. Nangu cingati te kuti tufike ku cipimo cakwe ica kupwililika, twacincishiwa “ukukonka mu nkasa shakwe mu kupalamisha.” (1 Pet. 2:21, NW) Tulingile ukufwaisha nga nshi ukupala Yesu ukufika pantu twingapesha, mu kupimpa ukwakana icine na bambi.
2 Yesu alicilile pa kuba fye kashimikila; aali ni kasambilisha wapulamo. “Amabumba yapapile imisambilishishe yakwe.” (Mat. 7:28) Mulandu nshi abelele ifyo uwa kufumamo cimo? Natuloleshe mu kusakamanishisha pa “misambilishishe” yakwe.
3 Ifyo Twingakonka Yesu: Yesu asambilishiwe na Wishi. (Yoh. 8:28) Ukukuntwa kwakwe kwali kucindika Yehova no kukatamike shina Lyakwe. (Yoh. 17:4, 26) Mu kushimikila kwesu no kusambilisha, ukukuntwa kwesu na ifwe bene kulingile ukuba kucindika Yehova no kukanaalwila ukusakamana kuli fwe bene.
4 Icili conse Yesu asambilishe cashimpilwe pa Cebo ca kwa Lesa. Mu kutwalilila alelosha ku calembelwe mu Malembo yapuutwamo. (Mat. 4:4, 7; 19:4; 22:31) Tulefwaya ukutungulula bakakutika besu kuli Baibolo; muli fyo tulabaleka ukumona ukuti cintu tushimikila no kusambilisha cashimpwa pa bulashi bwasumbukisha.
5 Yesu abomfeshe inumbwilo ishipi, ishibomba, ishishapikana. Ku ca kumwenako, pa kulondolola ifyo Lesa engatulekelela, atukoseleshe ifwe bene ukuba abalekelela bambi. (Mat. 6:14, 15) Tulingile ukwesha ukulondolola ubukombe bwa Bufumu mu numbwilo shayanguka, ishingomfwika.
6 Yesu mu kulamuka abomfeshe ifilangililo ne fipusho ku kubimbula ukutontonkanya kwa bambi. (Mat. 13:34, 35; 22:20-22) Ifilangililo pa lwa fintu fyaseeka, ifya cila bushiku kuti fyaafwa abantu ukumfwikisha ififundisho fya Baibolo ifyapikana. Tulingile ukwipusha ifipusho ifyo fikoselesha bakakutika besu ukutontonkanya pa lwa cintu bomfwa. Ifipusho fya kufwaya ukwishiba imimwene yabo kuti fyabaafwa ukufika ku nsondwelelo shalungama.
7 Yesu aali uwatekanya pa kulondolola ifintu fyaafya kuli abo abaipwishe ifyebo fyalundwako. Abo mu cine cine bali no buseko, pamo nga basambi bakwe, baali na maka ya kwiluka cintu Yesu asambilishe. (Mat. 13:36) Mu kupalako tulingile ukuba aba kwaafwa lintu ifipusho fyaipushiwa mu kufumaluka. Nga ca kuti tatwishibe ifyasuko, kuti twasapika uyo mutwe we lyashi no kubwela mu kuba ne fyebo pa nshita imbi.
8 Yesu abomfeshe ifintu fyalemoneka ku kusambilisha. Ica kumwenako ca ici cali kusamba kwakwe amakasa ya basambi bakwe, nangu cingati aali ni Shikulwibo. (Yoh. 13:2-16) Nga twalangisha umupashi wa kuicefya, abo balesambilishiwa bakakuntwa ukubomfya cintu balesambilila.
9 Yesu aipukishe imitima ya bantu no kutemwa kwabo ubulungami. Na ifwe bene tulefwaya ukufika pa mitima. Twesha ukwipukisha ukufwaisha kwa lwa nkati ukwa mutundu wa muntu ukwa kupepa umuntu wasumbukako no kwa kwikala na bambi mu mutende na mu nsansa.
10 Mu December kuti twayakana na bambi ifintu ifyo twasambilila pa lwa kwa Yesu pa kutambika icitabo Umuntu Wakulisha Uwabalile Abako Uwa Mweo. Ukupashanya kwesu imisambilishishe ya kwa Yesu kuti pambi kwakunta abafumaluka ukukutika ilyo tulelondolola cintu asambilishe.—Mat. 10:40.