Langisha Ukuti Ulatesekesha Iŋanda ya kwa Lesa

¹ Mu nshita sha Baibolo Yehova akambishe abantu bakwe ukubungana capamo lyonse pa ŋanda yakwe. (Lebi 23:2) Uku kubungana kwabafwile ukusungilila imintontonkanya yabo pa cebo ca kwa Lesa, ukupayanya inshita ya kwetetula, ukubishanya, no kulanshanya Ifunde lya kwa Yehova. Imintontonkanya yabo yaiswilemo amatontonkanyo ya kwa Lesa, icaleteleko amapaalo ya ku mupashi ayafumba. Utu mu cine cine twali tushita twa nsansa. Iyi mitantikile yatwele pa ntanshi ukwikatana no kupepa kwasanguluka. Ukubungana mu ŋanda ya kwa Lesa ilelo na ko kwine kwalicindama.

² Ni Shani Fintu Twingalangisha Ukuti Tulatesekesha Ukulongana? Ifilonganino fimo ficita lipoti impendwa ya basangwa ku kulongana iinono, ukucilisha mu kulundana na Isukulu lya Butumukishi bwa Teokratiki, Ukulongana kwa Mulimo na Isambililo lya Citabo pa Cilonganino. Mu tushita mu tushita imibele ya muntu kuti pambi yamucilikila ku kusangwa ku kulongana. Lelo bushe walileka utumpika tunono nga nshi ukucilima ukusangwa lyonse ku kulongana? Bamo kuti pambi bapingulapo ukulofwa nga ca kuti baleumfwa umutwe ukukalipa panono nelyo baleyumfwa abanaka pa numa ya kubombesha. Bambi baliyumfwa abakakililwako ukutangata balupwa bashasumina abafwaya ukubatandalila. Bamo balilofwa fye na ku kulongana pa kuti bengatamba programu wa pa TV uwatemwikwa nelyo icangalo cimo. Icipimo ca kutesekesha icalangililwa muli iyi mibele ukwabulo kutwishika tacilingene no kufwaisha kwa kufuma ku mutima ukwalumbulwilwe na bana ba kwa Kora ukuti: “Umweo wandi wafuluka, na kabili walemba ku kufwaye mansa sha kwa Yehova.”—Ilu. 84:2.

³ Nangu cingati kulabako ica kulya ca ku mupashi icapaka icipayanishiwa pa kulongana, abasangwako bamo balakwata ubwafya ukupeelako ukusakamana. Kuti pambi baisanga abene baleloota mu kasuba, ukutontonkanya pa lwa masakamika ya ako kasuba, nelyo fye ukulashipula. Abengi balisango kuti ukulemba ifyebo kulabaafwa ukuba abalola kabili abatontomesha pa cilesoswa. Ukulemba ifintu na kabili kulakakatika ifyebo pa muntontonkanya. Mu kulundapo, ukupekanishisha libela kwaba ca kwaafwa ku kunonkelamo kwakumanina. Nga ca kuti twapekanya bwino, tukaba na maka ya ‘kwangwako mu kucilanapo.’—Heb. 2:1.

⁴ Abana capamo na bakalamba balakabila ukumfwikisha ukufunda kupayanishiwa pa kulongana. Cintu abana balesambilila kuti caba icapeleela nga nshi nga ca kuti abafyashi babapayanishisha ifya kwangasha nelyo ifitabo fya kulengamo pa kuti balabikililweko kabili belakafya icongo. Kulabako kubulisha ukusalapula kwalinga lintu abana basuminishiwa ukwangala, ukulanda, ukulila, nelyo ukucita ifintu fimbi ifyo fipumfyanya abo bekele lwa mupepi. Ukuya ku cimbusu nelyo mu kunwa amenshi ukwa libili libili kabili ukushakabilwa mu kati ka kulongana ilingi line kulacefiwako lintu umwana aishiba ukuti umo pa bafyashi bakwe lyonse akulamutwala.

⁵ Ukufika mu Nshita Kwalicindama: Mu tushita mu tushita, imibele ishingasengaukwa kuti pambi yatucilikila ku kufika pa kulongana mu nshita, lelo mu cibelesho ukufika mu kucelwa pa numa ya lwimbo ne pepo kulangisha ukubulisha umucinshi ku mifwaile yashila iya kulongana no kwangwako kwesu ukwa kusengauka ukupumfyanya bambi. Ibukisha ukuti ukwimba no kupepela capamo na bamunyinefwe pa kulongana kwa cilonganino kwaba lubali lwa kupepa kwesu. Icibelesho ca kucelwa ilingi line caba ca kufumamo ca kuteyanya kwalubana nelyo ukufilwa ukupekanishisha libela. Ukufika mu nshita kulangisha ukuti tulacindika no kutesekesha ukulongana kwesu.

⁶ Ilyo ubushiku bulya bulepalamina, ukukabila kwa kulongana capamo kuli no kuba ukwakulilako. (Heb. 10:24, 25) Lekeni tulangishe ukutesekesha kwesu pa kusangwako lyonse, ukupekanishisha libela, ukufika mu nshita, ukukutikisha, kabili lyene ukubomfya cintu twasambilila.