Ukupikintika Pe
1 Abantu ba kwa Yehova balipamfiwa. Twalikwata ifishingamo ifingi ifyakuma ulupwa lwesu, incito, ne sukulu. Kabili icacindamisha, ‘tulapikintika [pe] mu mulimo wa kwa Shikulu.’ (1 Kor. 15:58) Tufwile ukupekanishisha ukulongana kwa cilonganino cila mulungu no kusangwako. Tulakoseleshiwa ukukanaleka umulungu umo ukupitapo ukwabula ukubombako ubutumikishi bwa mwi bala. Tufwile lyonse ukubika pa mbali inshita yakumanina iye sambililo lya Baibolo ilya pa lwesu ne lya lupwa. Baeluda na babomfi batumikila balikwata imilimo ya cilonganino iingi. Inshita shimo tulebwa ukwaafwa abawaminwa abalekabila ukwaafwa.
2 Mu tushita mu tushita, ifwe bambi kuti twafinininwa kuli fyonse ifyo tufwile ukucita. Nalyo line, abantu bapamfiwa nga nshi kuti baba pa kati ka bantu bakwatisha insansa nga ca kuti bashikatala kabili batwalilila ukumona ifintu bwino.—Luk. Mil. 3:12, 13.
3 Umutumwa Paulo ali ni umo uwalepikintika. Ilintu alesakamana ifyo alekabila ifya pa lwakwe ukupitila mu kubomba incito ya kupanga amatenti, alicucutike ukucila na batumwa bambi. Alibombeshe ukwabula ukunenuka pamo nga kabila wa mbila nsuma, ukushimikila ku cintubwingi na ku ng’anda ne ng’anda, ilintu talelekelesha ifishingamo fyakwe pamo nga kacema wa mukuni. (Imil. 20:20, 21, 31, 34, 35) Te mulandu no kupamfiwa mu mulimo wakwe, Paulo lyonse apampamine pa kubomba ifyafulilako mu mulimo wa kwa Yehova.—Linganyeniko Abena Roma 1:13-15.
4 Paulo atwalilile ukuba uwashikatala no kuba no mutima wa nsansa pa kushintilila pali Yehova ukuti amukoshe. Asangile ukuti ubutumikishi bwakwe bwali ubwa kulambula kabili ubwa kwikusha. (Fil. 4:13) Alishibe ukuti Lesa te kuti alabe umulimo wakwe. (Heb. 6:10) Ubuseko bwa kwaafwa bambi ukwishiba Yehova bwalimukoseshe. (1 Tes. 2:19, 20) Ubushinino bwa kumwensekesha isubilo lyakwe ilyashimpwa pali Baibolo bwalimucincishe ukutwalilila ukuba uubombesha.—Heb. 6:11.
5 Tulingile na kabili ukulanguluka ubusuma bufuma mu kucucutika kwesu. Ukuba pa kulongana cila mulungu no kulandapo kwesu filabomba ku kukuulilila no kukoselesha bambi. (Heb. 10:24, 25) Ukucincila kwesu ukwa mukoosha ukwa kufika pali bonse ne mbila nsuma kulalenga ukulunduluka kwa cilonganino ilyo ubuseko bulekushiwa na bapya balebishanya na ifwe. (Yoh. 15:8) Ukwafwilisha abalekabila ukwaafwa bambi kulasumbula umupashi wa kwikatana mu cilonganino, uwapala uwa mu lupwa. (Yako. 1:27) Mu kulundapo, ukupala Paulo, tatulingile ukulaba ukuti ukupamfiwa mu milimo ya kusandulula kulatemuna Yehova Lesa. Tulacimona ukuba ishuko ukumubombela. Kuli ifwe takwaba inshila ya bumi iyawamapo!
6 Kwalibako ubunonshi bwalundwapo mu kupikintika. Lintu tuli abapamfiwa ukukonkelela icibelesho cisuma ica ku mupashi, inshita ilamoneka ukupita bwangu nga nshi. Ukwishiba ukuti ubushiku bumo bumo ubwapita buletupalamika ku calo cipya, mu nsansa tulapokelela ubumi bwapamfiwa ubo tuipakisha nomba. Na kabili tulamona ukuti mu kwikala abapamfiwa mwaliba amano, apantu tatukwata inshita ya kuibimba mu fikonkelelo fya ku calo ifya fye.—Efes. 5:15, 16.
7 Mu kushininkisha, tulepikintika mu mulimo wa kwa Shikulu. Lelo kuti twaba aba nsansa nga twatwalilila ukushintilila pali Yehova Lesa na Yesu Kristu, abalenga umulimo wesu ukuba uwa kupembesula kabili uwa kulambula.—Mat. 11:28-30; 1 Yoh. 5:3.
8 Fintu twasenaminwa ukukwata icine! Pa mulandu wa kuipeela kuli Yehova, ‘twaliseekeshiwa imbila nsuma.’ (1 Tes. 2:4) Ici citulenga ukuba ne cishingamo cakulisha. Yesu atile: “Umuntu onse uwapeelwe fingi, bakafwayako ifingi; no wabikilweko ifingi, bakafwayako ifyacilamo.”—Luka 12:48.
9 Fintu ayo mashiwi yaba aya cine! Apantu ifwe bonse twalishiba Icebo ca kwa Lesa, ukubishanya kwawamisha na bamunyina, ne subilo lya kusungusha, mu cine cine kuti casoswa ukuti twalipeelwa ifingi. Mu kubamo amano, ifingi filenekelwa nga icibwesha.
10 Twalilileni Ukumona Ififwaikwa mu Nshila Isuma: Bamo balisondwelela ukuti ifyenekelwa kuli ifwe fyalicilamo kufula. Pamo nga Umutwe wa cilonganino ca Bwina Kristu, Yesu Kristu ewishiba ‘icilekabilwa’ pa kucilenga ukubomba bwino. (Efes. 4:15, 16) Alatwebekesha ukuti ‘ikoli lyakwe lyalyanguka, ne cisendo cakwe calipepuka.’ (Mat. 11:28-30) Mu kutemwa alomfwikisha abo abapelebela. (Luka 21:1-4) Nga ca kuti twapeela ifyawamisha, te mulandu no bwingi, tukapaalwa.—Kol. 3:23, 24.
11 Ipusheni mwe bene amuti, ‘Bushe ifya Bufumu e fyo ntangishako mu bumi bwandi? Bushe ndebomfya inshita yandi ne fikwatwa mu nshila iyo ifumamo ilumbo kwi shina lya kwa Lesa no bunonshi kuli bambi? Bushe ndasanga ukuti ndakwatisha insansa mu kubombela Yehova ukucila ukuipakisha ifintu fya ku mubili mu kaso?’ Ifyasuko fyesu kuli ifi fipusho e filesokolola ifili mu mitima yesu.—Luka 6:45.
12 Sengaukeni Ukutunkwa ku Kucita Icalubana: Takwatala akubako amatunko ya musango uyu no kutitikisha ukulola kuli bukaitemwe, ubufunushi, no kutemwa umusamwe nga fintu cili nomba. Cila bushiku tulalolenkana na mafya mu mibele, na matunko ya kunakilako. Pa kucimfya aya mafya mu kutunguluka, tufwile ukwipusha Yehova ukutwaafwa. (Mat. 26:41) Ukupitila mu mupashi wakwe, kuti atulenga ukuba abakosa. (Esa. 40:29) Ukubelenga Icebo ca kwa Lesa cila bushiku kwaba kwaafwa apakalamba. (Ilu. 1:2, 3) Ukuisalapula no kuilama na fyo filabomba umulimo ukalamba.—1 Kor. 9:27.
13 Tacakumanina ukutemwa fye icisuma—na kabili tufwile ukupata icabipa. (Ilu. 97:10) Ici cilepilibula ukukanafuluka ifintu fyabipa. Amapinda 6:16-19 yatantika ifintu cinelubali ifyo Yehova apata. Ukwabula ukutwishika, uulefwaya ukutemuna Yehova na kabili afwile ukupata ifintu fya musango yo. Apantu twalinonka ukwishiba kwalungikwa ukwa cine, tulingile ukufwaya ukulabomba umwabela uko kwishiba, ukupampamika imintontonkanya yesu pa fintu fisuma.
14 Calilinga ukupepela imibele iingasuminisha “ukupikintika pe mu mulimo wa kwa Shikulu.” Abengi balisanga ukuti ukubomba mu kupamfiwa kwaliba bucingo pa mulandu wa kuti takusuminisha inshita ya kukonkelela ifintu fya fye.
15 Pa numa ya kulanda pa fintu fyonse, kuti twatila fintu Yehova afwaya kuli ifwe fyaliba ifyalinga. (Mika 6:8) Kuti twaba abatasha lyonse pa mulimo umo umo. (Efes. 5:20) E ico, tutwalilila ‘ukucucutika no kupikintika,’ ukucetekela ukuti icilambu cesu cikaba icikalamba nga nshi ukucila icili conse icifwaikwa kuli ifwe.—1 Tim. 4:10.