Ukushimikila—Ishuko Lyacindama
1 Ubutumikishi bwa mbila nsuma bwaba lishuko lyacindama ilyo Yehova atambulwila kuli ifwe. (Rom. 15:16; 1 Tim. 1:12) Bushe iyo e nshila ubumwenamo? Ukupita kwa nshita nelyo ukupumya kwa bambi tafilingile ukusuminishiwa ukushinshibika ubucindami bwa buko mu menso yesu. Ukusenda ishina lya kwa Lesa kwaba lishuko ilyapeelwa fye ku banono. Ni shani fintu twingakusha ukutesekesha kwesu ukwa ili shuko?
2 Ukushimikila ubukombe bwa Bufumu takutulenga ukutemwikwa ku calo. Abengi tabangwa ku mulimo wesu kabili baliusuula. Bambi balapumya no kukaanya wene. Ukukaanya kwa musango yo kuti kwafuma ku bo tubomba na bo, abena mupalamano, nelyo fye ifilundwa fya lupwa. Mu menso yabo kuti pambi twamoneka nga balufiwa kabili ifiwelewele. (Yoh. 15:19; 1 Kor. 1:18, 21; 2 Tim. 3:12) Imilandile yabo iya kufuupula ya kufwaya ukushinshibika ukupimpa kwesu no kutulenga ukubwelelako pa nshi nelyo ukuleka ishuko lyesu ilyacindama. Imimwene yapusanako iluminishiwa na Satana, “uwapofwishe imitima ya bashitetekela, ku kulesho kuca kuli bene ulubuuto lwa mbila nsuma.” (2 Kor. 4:4) Ni shani fintu wankulako?
3 Caliba icacindama ukusunga mu muntontonkanya ukuti ukushimikila kwesu pa lwa Bufumu e mulimo wacilishapo kucindama uuli onse uwa ifwe engacita ilelo. Twalikwata ubukombe bwa kupususha ubumi ubo bushingasangwako mu nshila iili yonse imbi. (Rom. 10:13-15) Ukusuminishiwa na Lesa, te bantu, e cacindama. Imimwene ya calo iyapusanako iya mulimo wesu uwa kushimikila taitucilikila ku kubilisha imbila nsuma mu kushipa.—Imil. 4:29.
4 Yesu alikatamike nga nshi ishuko lyakwe ilya kucita ukufwaya kwa kwa Wishi. (Yoh. 4:34) Aipeeleshe umwine mu kupaatulwako ku butumikishi kabili tasuminishe atemwa ukupumbula nelyo bakakaanya ukumubwesesha pa nshi. Ukushimikila ubukombe bwa Bufumu lyonse kwaleisa intanshi mu bumi bwakwe. (Luka 4:43) Twalikambishiwa ukukonka ica kumwenako cakwe. (1 Pet. 2:21) Pa kucite fyo, tubomba nga “bakabomba banankwe aba kwa Lesa.” (1 Kor. 3:9, NW) Bushe mu kukumanina tuleshukila uyu mulimo? Bushe tulafwayako utushita twa kwakana imbila nsuma na bambi ponse pabili mu bunte bwa lyonse no bwa mu lyashi? Pamo nge Nte sha kwa Yehova, lyonse tulingile ukuba abaiteyanya ‘ukutootele shina lyakwe.’—Heb. 13:15.
5 Ukwakanamo kwesu mu butumikishi apakalamba kupiminwa ku mibele yesu iya mutima. Bushe mu kushika tulatesekesha conse ico Yehova atucitila? Bushe mu mitima yesu twalilundulula ukutemwa kwa kuli Yehova uko kutukunta ukucita apo twingapesha mu mulimo wakwe? Ukwetetula pa mapaalo ayo tuleipakisha pali nomba capamo na cintu Yehova alaya ukukuma ku nshita ya ku ntanshi kulatwaafwa ukwisulamo ukutemwa kwa kuli Kabumba wesu. Ukutemwa kwa musango yo kulatukunta ku ncitilo—umupampamina no mukoosha mu mulimo wa kushimikila Ubufumu ukufika ku cipimo uko imibele yesu ingatusuminisha. Ukupimpa kwesu kukashininkisha ukuti twalitemwa Yehova na bena mupalamano besu.—Marko 12:30, 31.
6 Tulangisha fintu twakatamika icintu cimo apakalamba ukupitila mu co tucita na cene no kusosa pa lwa cene. Bushe mu cine cine twalikatamika ishuko lyesu ilya kushimikila pa lwa Bufumu? Bushe tulacindika bukapyunga bwesu? Bushe tuli abapampamina ukutwalilila mu mukoosha muli uyu mulimo wakatama te mulandu no kukaanya? Nga ca kuti twalikatamika apakalamba ili shuko lyawamisha, mu kushininkisha tukaba abapimpa kabili aba mutima onse.—2 Kor. 4:1, 7.